Eski larepons i enportan?

“Mon ti konmans frekant bann garson kan mon ti annan di-z-an. Premye kou nou ti zis tyonbo lanmen e anbrase. Me i pa ti pran bokou letan pour nou konmans tous parti prive kanmarad e esey bann diferan form relasyon seksyel. Ler mon ti konmans travay mon ti annan kenz an. Kot mon ti pe travay, bann zonm ti esey toudsort fason pour kapab fer sèks avek mwan. Mon ti anvi prouve ki mwan osi mon ti kapab fer tou sa ki mon bann koleg travay ti pe fer. Mon ti anvi ganny aksepte e sa ti pous mwan pour esey diferan fason fer sèks.”​—SARAH, * LOSTRALI.

ESKI ou ti konnen ki Sarah ti grandi dan en fanmir ki byen relizye? Son paran ti fer zot mye pour elve li dapre bann standar Labib lo moralite. Me i ti swazir en lot semen.

I annan bokou dimoun ki pa vwar nanryen mal avek sa ki Sarah ti pe fer. Zot krwar ki pwennvi Labib i aryere. Me de lot kote, i annan serten ki dir zot en Kretyen me an menm tan pe anmenn en lavi imoral.

Eski i enportan pour konnen e aplik sa ki Labib i dir lo sèks? Labib in ganny “enspire par Bondye e i itil pour ansennyen.” (2 Timote 3:16) Si ou krwar ki se Bondye ki’n kre imen e ki Labib i son parol, i enportan alor pour konnen sa ki i dir lo sèks.

Malerezman bokou i konfize lo sa ki Labib i vreman dir lo sèks. Bann sef relizye i dir ki zot pe swiv sa ki Labib i dir, pourtan zot pe ansenny tou lekontrer. Anfet, sa size in kre divizyon dan plizyer gran larelizyon.

Dan plas ekout sa ki lezot i panse, akoz ou pa pran detrwa minit pour konn en pe plis lo sa size? Sa lartik ki swiv pou diskit lo dis kestyon ki dimoun i souvan demann zot lekor konsernan pwennvi Labib lo sèks. Ou pou trouv bann larepons ki fran baze lo sa ki Labib i vreman dir. Dernyen lartik dan sa seri pou koz lo akoz nou swa ki nou fer i enportan.

[Not anba lo paz]