Gidans lespri sen dan premye syek e dan nou letan

“Tousala i ganny prodwi par en sel e menm Lespri.”​—1 KOR. 12:11.

1. Ki nou pou egzaminen dan sa lartik?

LAPANNKOT lannen 33 N.L. ti en zour kot i ti annan bann keksoz eksitan! (Akt 2:1-4) I ti sa zour kot Bondye ti vers lespri sen lo son bann serviter. Sa zour, Zeova ti konmans servi son lespri sen pour gid son pep dan en nouvo fason. Dan lartik avan, nou ti vwar serten fason ki lespri sen Bondye ti ed bann serviter fidel pour fer bann travay difisil e donn zot lenstriksyon byen detaye. Me ki diferans i annan ant lafason ki lespri sen Bondye ti azir avan lepok bann Kretyen ek lafason ki i ti azir dan premye syek? Ki mannyer lespri sen i azir lo bann Kretyen dan nou letan? Annou vwar.

“Mwan, mon servant Senyer”

2. Dan ki fason Mari ti eksperyans pwisans lespri sen?

² Mari ti la Zerizalenm dan sa gran lasanm dan letaz, ler lespri sen ti ganny verse sa zour. (Akt 1:13, 14) Pourtan, pour plis ki  trant an avan sa ti arive, i ti’n eksperyans pwisans lespri sen Zeova dan diferan fason remarkab. Zeova ti’n transfer lavi son Garson ki ti dan lesyel dan vant Mari ler i ti ankor en vyerz. Se gras a “pisans Sent-Espri” ki sa zanfan ti formen dan li.​—Mat. 1:20.

3, 4. Ki kalite dimoun Mari ti ete e ki mannyer nou kapab imit li?

³ Akoz Mari ki ti ganny sa gran privilez? Apre ki lanz ti’n eksplik li sa ki Zeova ti anvi fer, Mari ti dir: “Mwan, mon servant Senyer, ki i ariv mwan parey ou’n dir mwan.” (Lik 1:38) Ler Mari ti dir sa, i ti pe montre ki kalite dimoun i ti vreman ete. En keksoz ki Bondye ti’n fini vwar. Larepons ki i ti donnen deswit i montre ki i ti pare pour aksepte sa ki Zeova ti anvi fer dan sa sityasyon. I pa ti demann okenn kestyon konsernan lafason ki dimoun dan son kominote ti pou konsider son lansentman oubyen lefe ki sa ti kapab annan lo son relasyon avek son fiyanse. Lefet ki i ti dir ki i ti en servant, sa i montre ki Mari ti annan konfyans total dan son Met, Zeova.

⁴ Eski responsabilite ek defi dan servis Bondye i kapab par ler fer ou santi ou nepli kapab? I byen pour demann nou lekor: ‘Eski mon annan konfyans total ki Zeova pou fer keksoz dapre son lavolonte? Eski mon vreman pare pour les Zeova servi mwan?’ Ou kapab asire ki Bondye i donn son lespri sen tou sa ki met zot konfyans dan li avek tou zot leker e obeir li konman Souvren.​—Akt 5:32.

Lespri sen ti ed Pyer

5. Avan Lapannkot lannen 33 N.L., dan ki fason lespri sen ti ed zapot Pyer?

⁵ Parey Mari, zapot Pyer ti’n osi eksperyans pwisans lespri sen Bondye avan Lapannkot lannen 33 N.L. Par egzanp, Zezi ti donn li ek lezot zapot pouvwar pour sas demon. (Mark 3:14-16) Menm si Labib pa donn bokou detay konsernan sa size, tre probab, Pyer ti servi sa pouvwar. Lo Lanmer Galile, pwisans Bondye ti osi evidan ler Zezi ti demann Pyer pour mars lo delo e sanmenm ki Pyer ti fer. (Lir Matye 14:25-29.) I evidan ki Pyer ti depan lo lespri sen pour fer bann mirak. Sa menm lespri sen ti pou ed Pyer ek lezot disip dan lezot nouvo fason.

6. Avek led lespri sen Bondye, ki Pyer ti kapab fer pandan e apre Lapannkot lannen 33 N.L.?

⁶ Zour Lapannkot lannen 33 N.L., Pyer avek lezot disip ti ganny don mirakile pour koz dan diferan langaz avek bann ki ti’n vin vizit Zerizalenm. Pyer ti apre sa adres sa lafoul. (Akt 2:14-36) Wi, sa zonm ki parler ti azir san reflesir oubyen per ti ganny kouraz pour donn en temwannyaz avek lardyes malgre lopozisyon ek persekisyon. (Akt 4:18-20, 31) Bondye ti revel serten keksoz avek li. (Akt 5:8, 9) I ti menm ganny pouvwar pour resisit en dimoun.​—Akt 9:40.

7. Avan ganny batize par lespri sen, ki serten lansennyman Zezi ki Pyer pa ti konpran?

⁷ Me menm avan zour Lapannkot, Pyer ti konpran en kantite keksoz ki Zezi ti’n ansennyen. (Mat. 16:16, 17; Zan 6:68) Par kont, i ti annan serten keksoz ki Zezi ti’n ansennyen ki i pa ti konpran avan Lapannkot. Par egzanp, Pyer pa ti konnen si Kris ti pou resisite konman en lespri trwazyenm zour e i pa ti konnen ki sa Rwayonm ti pou dan lesyel. (Zan 20:6-10; Akt 1:6) Pyer pa ti konnen osi ki serten imen ti pou resisite konman en lespri e dirize dan en Rwayonm ki dan lesyel. I ti konpran tou sa la ler i ti ganny batize par lespri sen e ganny sa lespwar pour viv dan lesyel.

8. Ki kalite konnesans bann Kretyen swazir ek lezot mouton i gannyen?

⁸ Apre ki lespri sen ti’n ganny verse lo zot, bann disip Zezi ti konpran sa ki zot pa ti  pe konpran avan. Bann ekriven Lekritir Grek ti ganny enspire pour ekrir bann keksoz ki ti pou fer nou konpran byen plan Bondye. (Efe. 3:8-11, 18) Ozordi, bann Kretyen swazir ek lezot mouton pe benefisye spirityelman avek sa menm lansennyman. (Zan 10:16) Eski ou apresye sa konnesans ek konprenezon lo Parol Bondye ki lespri sen i donn ou?

Pol ti ranpli avek lespri sen

9. Ki zapot Pol ti kapab fer avek led lespri sen?

⁹ Apepre enn an apre Lapannkot lannen 33 N.L., en lot dimoun ti ganny lespri sen Bondye. Sa ti Sol ki plitar ti ganny apele Pol. Lespri sen ti azir lo li dan plizyer fason ki benefisye nou ozordi. Zapot Pol ti ganny enspire pour ekrir 14 liv dan Labib. Zis parey i ti le ka pour Pyer, lespri sen ti ed Pol pour konpran e ekrir klerman konsernan sa lespwar pour viv pour touzour dan lesyel. Atraver lespri sen, zapot Pol ti geri bann malad, sas demon e menm resisit dimoun mor! Par kont, sa pwisans ki zot ti gannyen atraver lespri sen ti fer zot fer en keksoz pli enportan ankor, en keksoz ki tou serviter Bondye ozordi i kapab fer, me pa dan en fason mirakile.

10. Ki lefe lespri sen ti annan lo abilite Pol pour koze?

¹⁰ Avek lardyes, Pol ki ti “ranpli avek Sent-Espri” ti koz avek en sorsye. Sa ti annan en gran lefe lo gouverner Sip ki ti pe ekout sa konversasyon, pa i vre! Sa gouverner ti aksepte laverite akoz i “ti byen enpresyonnen par lansennyman” lo Zeova. (Akt 13:8-12) I kler ki Pol ti konn tre byen rol enportan ki lespri sen i zwe konsernan laverite. (Mat. 10:20) Plitar i ti demann kongregasyon Efez pour priy pour li pour ki Bondye i fer li “konnen ki fodre dir.”​—Efe. 6:18-20.

11. Ki mannyer Pol ti ganny gide par lespri sen Bondye?

¹¹ Lespri sen pa ti zis ed Pol pour koze, me parler i ti osi anpes li koze dan serten landrwa. Pol ti ganny gide par lespri sen dan son bann vwayaz misyonner. (Akt 13:2; lir Akt 16:6-10.) Zeova i ankor pe diriz sa travay predikasyon par mwayen son lespri sen. Parey Pol, tou bann serviter Zeova ki obeisan pe fer zefor pour anons laverite avek lardyes ek devouman. Menm si lafason ki Bondye i gid nou ozordi i diferan avek dan letan Pol, nou kapab asire ki Zeova pe servi son lespri sen pour fer sir ki bann ki senser i tann laverite.​—Zan 6:44.

Lespri sen i travay dan diferan fason

12-14. Eski lespri sen i azir lo tou bann serviter Bondye dan menm fason? Eksplike.

¹² Eski bann resi konsernan benediksyon ki Zeova ti donn bann Kretyen swazir dan premye syek i ankouraz bann serviter Bondye ozordi? Definitivman wi! Mazin sa ki zapot Pol ti dir avek kongregasyon Korent konsernan bann don ki lespri sen ti  donnen dan son letan. I ti dir: “I annan diferan don spirityel, me se enn menm Lespri ki donnen. I annan plizyer fason servi, me enn menm Senyer. I annan [tou] sort aktivite, me menm Bondye ki prodwi tou dan sak dimoun. Tousala i ganny prodwi par en sel e menm Lespri, ki donn sakenn en don diferan mannyer li i oule.” (1 Kor. 12:4-6, 11, nou ki’n met an italik.) Wi, lespri sen i kapab azir dan diferan fason lo diferan serviter Bondye pour en rezon. Tou le de group, “pti troupo” ek “lezot mouton” Kris i ganny lespri sen. (Lik 12:32; Zan 10:16, NW) Me selman, lespri sen pa azir dan menm fason lo sak manm kongregasyon.

¹³ Par egzanp, se lespri sen ki apwent bann ansyen. (Akt 20:28) Me pa tou Kretyen swazir ki sirveyan dan kongregasyon. Akoz? Senpleman akoz lespri sen i azir dan diferan fason lo sak manm kongregasyon.

¹⁴ Lespri sen ki fer bann Kretyen swazir konnen ki zot in ganny adopte konman bann “garson Bondye.” Zeova ti servi sa menm lespri sen pour resisit son sel Garson e donn li lavi imortel dan lesyel. (Lir Romen 8:11, 15.) I ti osi servi sa menm lespri sen pour kre liniver antye. (Zen. 1:1-3) Atraver sa menm lespri sen, Zeova ti donn Betsalel abilite pour fer en travay spesyal dan tabernak. I ti osi permet Sanmson fer bann keksoz ekstraordiner e fer Pyer mars lo delo. Alor, sa i montre nou ki i annan en diferans ant ganny lespri sen Bondye e ganny swazir par lespri sen. Ganny swazir par lespri sen Bondye i zis enn parmi bann diferan fason ki lespri sen i azir e sa i depan lo Bondye.

15. Eski batenm par lespri sen pou toultan egziste? Eksplike.

¹⁵ Depi ki Zeova in annan bann serviter fidel, son lafors aktif in toultan azir dan diferan fason lo zot, menm plizyer milye lannen avan ki Bondye ti konmans servi lespri sen pour swazir bann Kretyen ki pou al viv dan lesyel. Sa nouvo fason ki lespri sen ti azir ti konmanse zour Lapannkot lannen 33 N.L., me i pa ti pou dir pour touzour. Bann Kretyen ti pou nepli ganny batize par lespri sen, me i ti pou kontinyen azir lo pep Bondye pour ki zot fer son lavolonte pour touzour.

16. Ki bann serviter Bondye pe reisi fer la konmela gras a lespri sen?

¹⁶ Kwa ki pe arive lo later gras a lespri sen Zeova la konmela? Revelasyon 22:17 i dir: “Lespri avek Nouvel-Marye i dir: ‘Vini!’ Ki tou sa ki tande i dir: ‘Vini!’ Ki sa ki swaf i vini, e ki sa ki anvi, i pran delo lavi gratwitman!” Avek led lespri sen, ozordi bann Kretyen pe envit tou “sa ki anvi” pour pran sa delo lavi ki Zeova pe ofer. Bann Kretyen swazir i organiz sa travay predikasyon e lezot mouton i donn zot koudmen pour fer sa travay. Bann Kretyen swazir ek lezot mouton i ganny gide dan sa travay par sa menm lespri sen. Tou le de group in dedye zot lavi avek Zeova e zot in ganny batize “o non di-Per, di-Fis e di-Sent-Espri.” (Mat. 28:19) Zot tou zot les lespri sen Bondye gid zot e les sa lespri prodwir son fri dan zot. (Gal. 5:22, 23) Parey bann Kretyen swazir, lezot mouton i osi les lespri sen Bondye ed zot. Avek led lespri sen, zot fer zot mye pour viv en lavi sen ki annakor avek bann standar Bondye.​—2 Kor. 7:1; Rev. 7:9, 14.

Kontinyen demande pour ganny lespri sen

17. Kwa ki montre ki lespri sen pe azir lo nou?

¹⁷ Zeova i kapab donn ou “pisans ki napa son parey” pour ou kapab gard ou lentegrite e ganny ou rekonpans, ki swa ou annan lespwar pour viv dan lesyel oubyen lo later.  (2 Kor. 4:7) Ou kapab ganny sikannen lefet ki ou pe kontinyen anons sa bon nouvel konsernan Rwayonm. Me mazinen ki ‘si ou ganny maltrete pour non Kris, ou ere, parski Lespri laglwar, Lespri Bondye i repoz lo ou.’​—1 Pyer 4:14.

18, 19. Ki mannyer Zeova i kapab ed ou par mwayen son lespri sen e ki ou determinen pour fer?

¹⁸ Bondye i donn son lespri sen tou bann ki senserman demann li. I kapab ed ou pour amelyor ou bann abilite e osi ogmant ou dezir pour donn ou meyer dan son servis. ‘Bondye i travay dan ou, e i donn ou lavolonte e rann ou kapab pour akonpli tou dapre son bon plan.’ Sa kado presye, setadir lespri sen ek zefor senser ki nou fer pour ‘atas nou for avek parol lavi’ pou permet nou kontinyen ‘travay pour nou delivrans avek lafreyer ek reverans.’​—Fili. 2:12, 13, 16.

¹⁹ Alor, avek en konfyans total dan lespri sen Bondye, fer tou sa ki ou ganny demande pour fer avek tou ou leker, amelyor ou abilite dan sa ki ou fer e demann Zeova son led. (Zak 1:5) Zeova pou donn ou sa ki ou bezwen pour konpran son Parol, pour fer fas avek bann problenm tou le zour e anons sa bon nouvel. Kontinyen “demande e zot a gannyen; rode e zot a trouve; frape e laport i a ouver” andotmo, demann Bondye son lespri sen. (Lik 11:9, 13) Vreman, i byen pour kontinyen sipliy Zeova pour ki ou ava vin parey bann serviter fidel dan lepase e dan nou letan ki ti ganny gide par lespri sen Zeova.

Eski ou kapab eksplike?

• Parey Mari, ki kalite latitid nou devret annan pour ganny benediksyon?

• Ki mannyer Pol ti ganny gide par lespri sen?

• Ki mannyer bann serviter Bondye i ganny gide par lespri sen denozour?

[Kestyon]

[Portre lo paz 26]

Lespri sen Bondye ti ed Pol pour sas bann demon

[Portre lo paz 28]

Ki swa nou annan lespwar pour viv dan lesyel oubyen lo later, lespri sen i kapab ed nou ozordi