Aprann avek Parol Bondye

Ki byenfe nou gannyen avek lalwa Bondye?

Sa lartik i soulev bann kestyon ki petet ou’n deza demande e i montre kote ou kapab trouv larepons sa bann kestyon dan ou Labib. I pou en plezir pour Temwen Zeova ed ou pour trouv larepons sa bann kestyon.

1. Akoz nou devret obeir Bondye?

I fer sans pour obeir Bondye parski li ki’n kre nou. Menm Zezi ti toultan obeir Bondye. (Zan 6:38; Revelasyon 4:11) Par swiv lalwa Bondye, nou kapab montre si nou kontan li. ​—Lir 1 Zan 5:3.

Tou bann lalwa Bondye i pour nou prop dibyen. Zot montre nou sa pli bon fason viv la konmela e konman nou pou kapab ganny bann rekonpans eternel a lavenir. ​—Lir Psonm 19:7, 11; Izai 48:17, 18.

2. Ki byenfe lalwa Bondye i anmennen lo kote lasante?

Lalwa Bondye konsernan bwar tro bokou i protez nou kont bann maladi mortel ek bann aksidan. En dimoun i kapab adikt avek lalkol e i kapab annan bann move konportman. (Proverb 23:20, 29, 30) Zeova i permet nou bwar lalkol, me avek moderasyon. ​—Lir Psonm 104:15; 1 Korentyen 6:10.

Zeova i osi averti nou an rapor avek zalouzi, move lakoler ek lezot latitid ki fer ditor. Si nou aplik son bann konsey, nou pou annan en ase bon lasante. ​—Lir Proverb 14:30; 22:24, 25.

3. Ki mannyer lalwa Bondye i kapab protez nou?

Dapre lalwa Bondye, relasyon seksyel pa devret ganny fer an deor maryaz. (Ebre 13:4) Bann koup ki obeir sa lalwa i santi zot pli an sekirite e zot zanfan pou grandi dan en bon lanvironnman. De lot kote, laplipar di tan, relasyon seksyel ki ganny pratike an deor maryaz i anmenn maladi, divors, vyolans, troub emosyonnel e menm bann fanmir kot i annan zis en paran. ​—Lir Proverb 5:1-9.

Nou relasyon avek Bondye pa pou ganny afekte si nou evit bann sityasyon kot nou kapab ganny tante pour fer relasyon seksyel an deor maryaz. Nou pou osi evite fer ditor lezot. ​—Lir 1 Tesalonisyen 4:3-6.

 4. Ki byenfe nou gannyen kan nou annan respe pour lavi?

Bann dimoun ki respekte lavi konman en kado sorti kot Bondye i annan en bon lasante kan zot aret fimen e aret fer lezot pratik ki met zot lavi an danze. (2 Korentyen 7:1) Menm lavi en pti baba ki pe devlope dan vant son manman i annan valer devan Bondye. (Egzod 21:22, 23) Alor, nou pa devret touy en pti baba ki pa ankor ne. An plis ki sa, sa bann ki apresye pwennvi Bondye lo lavi, i pran bann prekosyon kot travay, kot lakour e dan transpor. (Deterononm 22:8) Deplis, zot pa pou fer bann sport ki met zot lavi an danze akoz lavi i en kado ki Bondye in donnen. ​—Lir Psonm 36:9.

5. Ki byenfe nou gannyen lefet ki disan i sakre?

Disan i sakre parski Bondye in dir ki i reprezant lavi. (Zenez 9:3, 4) Lalwa Bondye lo disan ek lavi i benefisye nou. Ki mannyer? Sa lalwa i fer li posib pour nou ganny pardonnen nou pese. ​—Lir Levitik 17:11-13; Ebre 9:22.

Disan Zezi ti vreman presye akoz i ti parfe. Zezi ti ofer son disan avek Bondye e sa disan ti pe reprezant son lavi. (Ebre 9:12) Son disan ki’n ganny verse i fer li posib pour nou ganny lavi eternel. ​—Lir Matye 26:28; Zan 3:16.

Pour plis lenformasyon, vwar sapit 12 ek 13 dan liv Ki Labib i vreman dir? pibliye par Temwen Zeova.