Larepons dis kestyon lo sèks

1 Eski sèks ti sa pese orizinel ki Adan ek Ev ti fer dan zarden Edenn?

▪ Larepons: Bokou dimoun i krwar ki sa fri defandi i reprezant relasyon seksyel. Me Labib pa dir sa.

Egzamin sa pwen: Menm avan ki Ev ti ganny kree, Bondye ti donn Adan sa komann pour pa manz sa fri ki ti lo pye “konnesans bon e move.” (Zenez 2:15-18) Vi ki Adan ti li tousel, sa komann pa ti kapab pe refer avek relasyon seksyel. An plis ki sa, Bondye ti dir byen kler avek Adan ek Ev: “Fer zanfan e vin bokou, ranpli later.” (Zenez 1:28) Eski en Bondye lanmour ti pou demann sa premye koup pour “ranpli later,” en aksyon ki enplik annan relasyon seksyel e apre pas en santans lanmor lo zot akoz zot in obeir son lenstriksyon?​—1 Zan 4:8.

Deplis, Ev ti “kas sa fri e i ti manze” kan son msye pa ti la. “Apre sa i ti donn son msye en bout kan i ti avek li e i ti konmans manze.”​—Zenez 3:6.

En dernyen pwen: Bondye pa ti ankoler avek Adan ek Ev kan zot ti annan relasyon seksyel e ganny zanfan. (Zenez 4:1, 2) I kler alor ki sa fri ki Adan ek Ev ti manze pa ti reprezant relasyon seksyel me i ti plito en vre fri.

2 Eski Labib i kont annan plezir seksyel?

▪ Larepons: Sa premye liv Labib i dir ki Bondye ti kre “zonm ek fanm.” Bondye ti dir ki son kreasyon ti “tre bon.” (Zenez 1:27, 31) Pli tar, Bondye ti enspir Salomon pour ekrir sa bann lenstriksyon pour bann msye: “Trouv lazwa avek madanm ou zenn tan . . . Les son tete satisfer ou toultan.” (Proverb 5:18, 19) Eski sa i donn lenpresyon ki Labib i kont annan plezir seksyel?

 Alor, Bondye pa ti kre lorgann seksyel zis pour fer zanfan me pour en koup marye eksprim zot lanmour ek lafeksyon pour kanmarad dan en fason kot tou le de i kapab trouv plezir seksyel. Sa kalite relasyon i satisfer bezwen emosyonnel, afektif e fizik en msye ek son madanm.

3 Eski Labib i ankouraz en zonm ek en fanm pour reste ansanm menm si zot pa’n marye?

▪ Larepons: Labib i dir klerman: “Bondye pou ziz bann ki anmenn en lavi dezordonnen.” (Ebre 13:4) Sa term “lavi dezordonnen” i sorti dan sa mo Grek porneia ki refer avek bann dimoun ki annan relasyon seksyel an deor maryaz. * Alors, i pou mal dan lizye Bondye pour en zonm ek en fanm reste avek kanmarad menm si zot annan lentansyon marye apre.

Menm si de dimoun i vreman anmoure avek kanmarad, Bondye i demann zot pour marye avan ki zot satisfer zot dezir seksyel. Bondye in kre nou avek sa kapasite pour demontre lanmour. Lanmour i sa kalite pli dominan ki Bondye i annan. Alor se pour sa rezon ki i ensiste ki sèks i ganny fer ant de dimoun marye parey sa lot lartik pou eksplike.

4 Eski poligami i akseptab?

▪ Larepons: I ti annan en letan kot Bondye ti permet en zonm pour annan plis ki en madanm. (Zenez 4:19; 16:1-4; 29:18–30:24) Me Bondye pa’n zanmen deza ankouraz poligami, setadir ankouraz en zonm pour annan plizyer madanm. I ti donn Adan zis en madanm.

Bondye ti otoriz Zezi Kri pour remet an plas monogami, sa standar ki I ti annan depi o konmansman kot en zonm i annan en sel madanm. (Zan 8:28) Zezi ti dir sa kan i ti ganny demande en kestyon konsernan maryaz: “Depi o konmansman kreater ti fer zot mal ek femel, e ti dir: ‘Pour sa rezon, en zonm pou kit son papa ek son manman pour ini avek son madanm, e toulede zot vin en sel laser.’”​—Matye 19:4, 5.

 En pe letan apre sa, en disip Zezi ti ganny enspire pour ekrir: “Sak zonm i devre annan son prop madanm, sak madanm i devre annan son prop mari.” (1 Korentyen 7:2) Labib i osi dir ki nenport zonm marye dan kongregasyon Kretyen ki ganny donnen bann responsabilite spesyal i devret “mari en sel madanm.”​—1 Timote 3:2, 12.

5 Eski i mal pour en koup marye servi kontraseptif?

▪ Larepons: Zezi pa ti dir son bann disip ki zot devret fer zanfan, ni son bann disip pa ti donn en tel lord. Napa ni menm okenn landrwa dan Labib ki dir direkteman ki i mal pour servi kontraseptif pour pa ganny zanfan.

Alors, bann koup marye i kapab fer zot prop desizyon si zot ti a kontan annan zot prop fanmir oubyen non. Zot menm kapab deside konbyen zanfan ki zot ti a kontan annan e kan ki zot ti a kontan annan zanfan. Si en msye ek madanm marye i deside pour servi en metod kontraseptif pour anpes lansentman me ki pa enplik avortman, sa i zot prop desizyon personnel e i zot responsabilite. * Personn pa devret ziz zot.​—Romen 14:4, 10-13.

6 Eski i mal pour fer lavortman?

▪ Larepons: Pour Bondye, lavi i en keksoz sakre. I menm konsider en anbriyon konman en lavi ki inik. (Psonm 139:16) Bondye in dir ki en dimoun pou rann kont si i fer ditor en baba ki pa ankor ne. Alor, i konsider touy en pti baba ki pa ankor ne konman en mert.​—Egzod 20:13; 21:22, 23.

Me si i ariv en ka kot pandan pe donn nesans, lavi sa manman ek baba i an danze e sa koup i bezwen swazir pour sov lavi zis enn? Dan bann ka parey, sa koup pou bezwen deside zot menm lekel ki zot ti pou anvi sove. *

7 Eski Labib i permet en dimoun divorse?

▪ Larepons: Wi, Labib i permet en dimoun pour divorse. Zezi ti donn sa sel rezon pour divorse an dizan: “Si en zonm i divors son madanm pour okenn rezon, eksepte si i’n tronp li, e i marye avek en lot madanm, i komet adilter.”​—Matye 19:9, nou ki’n met an italik.

Bondye i ay bann divors malonnet. I pou ziz bann dimoun ki divors zot konzwen an bonnavini, sirtou bann ki fer li zis akoz zot anvi marye avek en lot dimoun.​—Malaki 2:13-16; Mark 10:9.

8 Eski Bondye i aksepte omoseksyalite?

 ▪ Larepons: Labib i fer byen kler ki bann aksyon imoral ki enkli omoseksyalite i en pese grav. (Romen 1:26, 27; Galat 5:19-21) Me menm si Labib i dir klerman ki Bondye pa aksepte sa kalite lavi, i osi dir ki “Bondye in telman kontan lemonn ki i’n donn son sel Garson, pour ki nenport ki, ki krwar dan li, pa pou mor, me i a ganny lavi eternel.”​—Zan 3:16.

Menm si bann vre Kretyen i dir ki zot pa toler omoseksyalite, zot demontre labonte anver tou dimoun. (Matye 7:12) Bondye i anvi ki nou “respekte tou dimoun.” Alors, bann vre Kretyen pa ay bann omoseksyel.​—1 Pyer 2:17.

9 Eski i mal pour koz lo sèks lo telefonn, fer sexting oubyen cybersex?

▪ Larepons: Koz lo sèks lo telefonn i enplik fer bann konversasyon oubyen ekout bann mesaz lo telefonn ki stimil dezir seksyel. Sexting i en term ki refer avek lesanz bann mesaz oubyen portre ki antyerman baze lo sèks lo telefonn. Cybersex i enplik anvoy bann portre ek mesaz, e osi fer bann aksyon endesan anmezir ki lezot dimoun pe gete lo Internet.

Labib pa koz spesifikman lo sa bann keksoz ki pe ganny pratike denozour. Me i dir: “Konman bann sen, zot devre alor veye ki tou form aktivite seksyel imoral, lavi dezordonnen, ek lanvi pour keksoz ki lezot dimoun i posede, pa menm ganny mansyonnen parmi zot. I pa byen osi ki zot servi langaz obsenn, parol grosye e vilger.” (Efezyen 5:3, 4) Sa bann aktivite parey koz lo sèks lo telefonn, sexting ek cybersex i fer dimoun annan en pwennvi ki pa natirel lo sèks e i ankouraz dimoun pour satisfer zot dezir seksyel an deor maryaz. Dan plas ed dimoun pour annan kontrol lo zot prop lekor, sa bann kalite aktivite i ankouraz zot pour satisfer zot bann dezir egois.

10 Ki Labib i dir konsernan mastirbasyon?

▪ Larepons: Labib pa koz spesifikman lo mastirbasyon, sa pratik kot en dimoun i zwe avek son lorgann seksyel pour satisfer son dezir seksyel. Me Labib i ordonn tou Kretyen pour: “Met an-mor bann dezir materyel ki dan zot: limoralite seksyel, lenpirte, pasyon, move dezir.”​—Kolosyen 3:5, nou ki’n met an italik.

Mastirbasyon i fer dimoun annan en move pwennvi lo sèks e i fer zot mazin zis zot prop lekor. Labib i asir nou ki Bondye pou kapab donn nou “pisans [oubyen lafors] ki napa son parey” pour nou kapab aret net sa move labitid.​—2 Korentyen 4:7; Filipyen 4:13.

[Not anba lo paz]