Lespri sen Bondye ti gid bann serviter fidel dan lepase
Lespri sen Bondye ti gid bann serviter fidel dan lepase
“Souvren Senyer Zeova in anvoy mwan, wi i’n menm anvoy son lespri.”—IZA. 48:16.
1, 2. Ki nou bezwen fer pour demontre lafwa e ki lankourazman nou pou gannyen par etidye legzanp bann serviter fidel Bondye dan lepase?
MENM si serten dimoun in demontre lafwa depi lepok Abel, “pa tou dimoun ki annan lafwa.” (2 Tesa. 3:2) Me, akoz serten i annan sa kalite e ki mannyer lafwa i kapab ed zot reste fidel? An zeneral, lafwa i vin apre ki nou’n tann mesaz sorti dan Parol Bondye. (Rom. 10:17) I en laspe fri lespri sen Bondye. (Gal. 5:22, 23) Pour sa rezon, si nou oule annan e demontre lafwa, nou bezwen lespri sen.
2 I pa fer sans pour krwar ki bann zonm ek fanm fidel dan lepase ti ne avek lafwa e ki zot ti demontre sa kalite natirelman. Labib i koz lo bann dimoun ki ti bann bon legzanp, me i osi dir ki zot “ti annan menm natir [oubyen santiman] ki nou.” (Zak 5:17) Zot osi zot ti annan bann dout, febles e mank konfyans, me “zot ti repran lafors” gras a lespri sen Bondye. (Ebr. 11:34) Annou egzaminen ki mannyer lespri sen Zeova ti ed zot akoz sa pou ankouraz nou pour kontinyen reste fidel vi ki nou pe viv dan en letan kot nou lafwa i toultan pe ganny teste.
Lespri sen ti donn Moiz lafors
3-5. (a) Ki mannyer nou konnen ki Moiz ti azir an armoni avek led lespri sen? (b) Ki legzanp Moiz i ansenny nou lo lafason ki Zeova i donn son lespri sen?
3 Parmi tou bann imen ki ti pe viv an 1513 A.N.L., Moiz ti sa enn ki ti “annan plis limilite.” (Nom. 12:3) Bondye ti konfye sa zonm dous en gro responsabilite pour diriz nasyon Izrael. Lespri sen Bondye ti donn lafors Moiz pour profetize, zize, ekrir bann liv, dirize e fer bann mirak. (Lir Izai 63:11-14. *) Me, en serten moman, Moiz ti santi ki sa responsabilite ti tro lour pour li. (Nom. 11:14, 15) Alor, Zeova ti “pran en pe sa lespri” ki ti avek Moiz e i ti donn 70 lezot zonm pour donn li lanmen desarz son responsabilite. (Nom. 11:16, 17) Menm si responsabilite Moiz ti paret bokou, i pa ti pe fer li li tousel, sa 70 lezot osi ki ti’n ganny swazir pour ed Moiz pa ti pou fer sa travay zot tousel.
4 Moiz ti’n ganny ase lespri sen ki ti pou ed li desarz son responsabilite. Apre sa sanzman, Moiz ti kontinyen annan sa kantite lespri sen ki i ti bezwen. I ti napa tro ptigin, e sa 70 lezot zonm aze pa ti annan tro bokou. Zeova i donn nou ase lespri sen ki nou bezwen, depandan lo nou sirkonstans. ‘Bondye i donn nou son Lespri an labondans.’—Zan 1:16; 3:34.
5 Eski ou pe fer fas avek bann leprev? Eski ou bezwen plis letan ankor? Eski ou enkyet pour ou lasante oubyen akoz problenm ekonomik? Malgre sa, eski ou pe fer en kantite pour pran swen avek bezwen spirityel e materyel ou fanmir? Eski ou annan bann gro responsabilite dan kongregasyon? Ou kapab asire ki atraver son lespri sen, Bondye i kapab donn ou sa lafors ki ou bezwen pour fer fas avek nenport kalite sityasyon.—Rom. 15:13.
Lespri sen ti ed Betsalel pour kalifye
6-8. (a) Ki lespri sen Bondye ti ed Betsalel ek Ooliyab fer? (b) Kwa ki montre ki Betsalel ek Ooliyab ti ganny gide par lespri sen? (c) Akoz leksperyans Betsalel i ankourazan?
6 Leksperyans Betsalel, en kontanporen Moiz i revel en kantite lo lafason ki lespri sen Bondye i travay. (Lir Egzod 35:30-35. *) Betsalel ti ganny swazir pour responsab bann akseswar neseser ki ti pou dan tabernak. Eski i ti annan okenn konnesans lo sa louvraz avan ki i ti konmans sa proze? Tre probab, me kalifikasyon ki i ti annan se ki i ti pe fer blok pour bann Ezipsyen sa letan. (Egz. 1:13, 14) Alor, ki mannyer Betsalel ti pou akonplir sa latas difisil? Zeova “ti ranpli li avek lespri . . . dan lasazes, dan konprenezon, dan konnesans pour fer tou sort keksoz e pour fer tou sort prodwi orizinal e pour envant tou sort lobze.” Sa abilite ki Betsalel ti annan ti amelyore avek led lespri sen. Menm keksoz ti arive avek Ooliyab. Betsalel ek Ooliyab ti’n byen aprann, akoz zot pa ti zis akonplir zot latas, me zot ti osi montre lezot ki pour fer. Wi, Bondye ti motiv zot pour ansennyen.
7 En lot laprev pour montre ki Betsalel ek Ooliyab ti ganny gide par lespri sen Bondye i lefet ki sa bann keksoz ki zot ti fer ti dirab. Sa ki zot ti fer ti ankor pe ganny servi 500-z-an pli tar. (2 Kron. 1:2-6) Kontrerman avek bann fabrikan dan nou letan, Betsalel ek Ooliyab pa ti enterese pour ganny rekonnet pour zot travay. Zeova ki ti ganny glorifye pour sa travay ki zot ti fer.—Egz. 36:1, 2.
8 Ozordi, petet nou ganny bann travay difisil kot nou bezwen annan serten abilite dan sa louvraz tel ki travay avek masin lenprimri, dan konstriksyon, organiz lasanble distrik, organiz travay sekour apre katastrof natirel, e koz avek bann dokter ek staf lopital konsernan nou pozisyon an rapor avek disan. Par ler, sa travay i ganny fer par bann ki kalifye, me souvan i plizoumwen bann volonter ki napa okenn abilite dan sa travay ki ede dan serten sa bann latas. Lespri sen Bondye i ed zot reisi dan zot zefor. Eski ou’n deza refiz en privilez dan servis Zeova akoz ou santi ki lezot i pli kalifye ki ou? Rapel byen ki lespri sen Zeova i kapab ed ou ogmant ou konnesans e ed ou amelyor ou abilite pour ou kapab desarz okenn responsabilite ki i donn ou.
Zozye ti reisi avek led lespri sen Zeova
9. Dan ki sirkonstans bann Izraelit ti trouv zot ladan apre zot lamars sorti Lezip, e ki kestyon ki ti bezwen ganny reponn?
9 Lespri sen Bondye ti osi gid en kontanporen Moiz ek Betsalel. En pti pe letan apre sa lamars sorti Lezip, bann Amalekit ti lans en latak lo pep Bondye. I ti’n ariv ler pour bann Izraelit lager zot osi. Menm si zot pa ti’n zanmen lager, bann Izraelit ti partisip dan zot premye batay konman en pep ki ti lib. (Egz. 13:17; 17:8) I ti bezwen annan en dimoun ki ti pou gid sa larme. Lekel ki ti pou ganny swazir?
10. Akoz bann Izraelit anba komann Zozye ti sorti viktorye dan en batay?
10 Zozye ki ti ganny swazir. Me si i ti pou bezwen dir ki louvraz i ti fer pour kalifye pour sa latas, ki i ti pou dir? I ti pou dir ki i ti en lesklav, i ti fer blok, e dan dezer i ti anmas lamann. I vre, Elisama, granpapa Zozye ti sef tribi Efraim e aparaman i ti gid 108,000 zonm ki ti form parti trwa tribi ki ti’n zwenn ansanm. (Nom. 2:18, 24; 1 Kron. 7:26, 27) Me, Zeova ti dir Moiz ki Zozye ki ti pou gid sa larme pour ranport laviktwar lo zot lennmi, pa Elisama, ni son garson Noun. I ti pran preski en lazournen antye pour sa batay terminen. Vi ki Zozye ti konpletman obeir Bondye e i ti apresye led ki lespri sen Bondye ti donnen, Izrael ti ranport laviktwar.—Egz. 17:9-13.
11. Parey Zozye, ki mannyer nou kapab reisi dan nou servis sakre?
11 Pli tar, Zozye “ranpli avek lespri lasazes,” ti siksed Moiz. (Det. 34:9) Lespri sen pa ti fer li devlop en abilite pour profetize ouswa pour fer mirak parey i ti le ka pour Moiz, me i ti permet Zozye gid Izrael dan bann lager ki ti fer zot konkerir Kanaan. Ozordi, nou kapab santi ki nou napa ase leksperyans ouswa pa kalifye pour desarz en serten responsabilite dan servis sakre. Me, parey Zozye, nou asire ki nou pou reisi si nou konpletman obeir bann lenstriksyon Zeova.—Zoz. 1:7-9.
“Lespri Zeova ti lo Gideonn”
12-14. (a) Vi ki 300 zonm ti kapab ranport laviktwar lo sa gran larme Madyanit, ki sa i montre? (b) Ki mannyer Zeova ti reasir Gideonn? (c) Ki lasirans sorti kot Bondye nou gannyen ozordi?
12 Apre lanmor Zozye, Zeova ti kontinyen montre ki mannyer son pwisans i kapab donn lafors son bann serviter fidel. Liv Ziz i ranpli avek bann resi konsernan bann imen ki “malgre ki zot ti feb, zot ti repran lafors.” (Ebr. 11:34) Atraver lespri sen, Bondye ti motiv Gideonn pour lager pour son pep. (Ziz 6:34) Sa larme ki Gideonn ti rasanble ti mwens konpare avek larme Madyanit; 1 zonm ti pou bezwen lager avek 4 gerye dan kan lennmi. Dan lizye Zeova, sa ptigin zonm ki ti annan dan sa larme ti tro bokou pour al lager. De fwa i ti demann Gideonn pour redwir lakantite zonm, ziska ki finalman, 1 zonm ti pou bezwen lager avek 450 oponan. (Ziz 7:2-8; 8:10) Zeova ti aksepte sa kantite gerye. Parski si bann Izraelit ti ganny laviktwar, zot pa ti pou ponp zot lekor konmkwa zot ki ti’n fer li, me plito tou laglwar ti pou al pour Bondye.
13 Gideonn ek son larme ti pros pour pare. Si ou ti parmi sa pti group gerye, eski ou ti pou santi ou an sekirite vi ki tou bann ki ti per e bann ki pa ti sitan pridan ti’n ganny tire? Oubyen eski ou ti pou’n vreman per ou osi akoz ou pa ti pou tro tro asire ki mannyer keksoz ti pou fini? Pa fodre ki nou mazinen ki mannyer Gideonn ti santi. I ti fer sa ki i ti’n ganny demande, pa i vre! (Lir Ziz 7:9-14. *) Zeova pa ti reprimann Gideonn akoz i ti’n demann li en siny konman laprev ki I ti pou avek li. (Ziz 6:36-40) O kontrer, i ti ranforsi lafwa Gideonn.
14 Pouvwar ki Zeova i annan pour delivre napa limit. I kapab delivre son pep dan bann sityasyon difisil, menm par servi sanmenm sa bann ki kapab paret fay e san defans. Par ler nou kapab santi ki nou fay ouswa nou dezespere. Nou pa ekspekte ki Zeova i montre nou ki i siport nou atraver mirak parey i ti fer pour Gideonn, me nou kapab ganny en kantite gidans ek lasirans dan Parol Bondye e atraver son kongregasyon ki ganny dirize par lespri sen. (Rom. 8:31, 32) Bann promes Zeova i fortifye nou lafwa e i konvenk nou ki i vreman sa Enn ki ed nou, pa i vre!
“Lespri Zeova ti aprezan lo Yifta”
15, 16. Akoz fiy Yifta ti annan en bon latitid e ki mannyer sa i ankourazan pour bann paran?
15 Annou get en lot legzanp. Kan bann Izraelit ti bezwen al lager avek bann Amonit, lespri Zeova ti “lo Yifta.” Lefet ki i ti vreman anvi ranport laviktwar pour ki Zeova i ganny loue, Yifta ti fer en ve ki ti kout li ser. I ti fer sa ve ki si Zeova i ed li ranport laviktwar lo bann Amonit, i ti pou donn Zeova sa premye dimoun ki ti pou vin zwenn li ler i retourn kot li. Apre son laviktwar lo bann Amonit, ler Yifta ti retournen, son fiy ti taye pour vin zwenn li. (Ziz 11:29-31, 34) Eski Yifta ti sirprann? Tre probab non akoz i ti annan en sel zanfan. I ti onor son ve par donn son fiy pour servi Zeova kot sanktyer Silo. Konman en serviter fidel Zeova, fiy Yifta ti konnen ki ve son papa ti devret ganny onore. (Lir Ziz 11:36. *) Lespri sen Zeova ti donn zot tou le de sa lafors ki zot ti bezwen.
16 Ki mannyer fiy Yifta ti’n kapab devlop sa leta lespri sakrifis? San dout, son lafwa ti’n ogmante anmezir ki i ti obzerv devouman son papa ek son devosyon pour Bondye. Paran, ou zanfan i touzour vwar ou legzanp. Ou bann desizyon i montre ki ou krwar dan sa ki ou dir. Ou zanfan i konpran ki savedir servi Zeova avek en leker konplet kan zot tann ou bann lapriyer senser ek lansennyman efikas, e osi vwar ou legzanp. Anmezir ou zanfan i vwar ou legzanp, zot osi zot pou devlop en gran dezir pour ofer zot lekor volonterman dan servis Zeova. Sa i en bon rezon pour rezouir, pa i vre!
“Lafors Zeova ti azir lo” Sanmson
17. Ki Sanmson ti kapab fer gras a lafors Bondye?
17 Annou get ankor en lot legzanp. Kan bann Izraelit ti’n ganny kaptire par bann Filisten, “avek letan, lespri Zeova ti pous” Sanmson pour delivre Izrael. (Ziz 13:24, 25) Lespri sen Zeova ti donn Sanmson en lafors enkrwayab ki ti permet li fer en bann travay ekstraordiner. Kan bann Filisten ti persyad bann Izraelit pour tyonbo Sanmson, “lafors Zeova ti konmans azir lo Sanmson, e lakord ki ti’n anmar son lebra ti vin parey difil ki’n pas dan dife, e konmsi sa ki ti’n anmar son lanmen ti fonn.” (Ziz 15:14) Menm si Sanmson ti’n fay akoz en move desizyon ki i ti’n fer, par lafwa i ti reganny son lafors. (Ebr. 11:32-34; Ziz 16:18-21, 28-30) Lafors Zeova ti konmans azir lo Sanmson dan en fason ekstraordiner akoz sirkonstans ti fer li neseser. Me toudmenm, leksperyans Sanmson i ankouraz nou. Dan ki fason?
18, 19. (a) Ki lasirans nou gannyen atraver leksperyans Sanmson? (b) Ki mannyer ou’n benefisye avek legzanp bann serviter fidel ki nou’n egzaminen dan sa lartik?
18 Nou osi nou depan lo sa menm lespri sen ki ti ed Sanmson. Nou bezwen lespri sen Bondye pour nou akonpli travay ki Zezi in konfye nou setadir, pour ‘prese e anons’ sa bon nouvel plennman. (Akt 10:42) Sa travay i demann serten abilite ki nou pa neseserman annan. Pa nou vreman rekonesan ki Zeova i servi son lespri sen pour nou akonplir diferan latas ki i’n konfye nou! Alor, anmezir ki nou akonplir nou misyon, nou kapab dir menm parol ki profet Izai: “Souvren Senyer Zeova, li menm in anvoy mwan, wi son lafors ki’n anvoy mwan.” (Iza. 48:16) Se lespri sen Bondye ki’n anvoy nou, pa i vre! Nou determinen pour fer sa travay akoz nou asire ki Zeova pou donn nou bann abilite ki nou manke parey i ti fer pour Moiz, Betsalel ek Zozye. Nou servi ‘lepe ki lespri i donnen, setadir Parol Bondye,’ e nou asire ki Bondye pou donn nou lafors ki nou bezwen parey i ti fer pour Gideonn, Yifta ek Sanmson. (Efe. 6:17, 18) Ler nou tourn ver Zeova pour ganny son led pour sirmont bann difikilte, nou kapab vin for spirityelman zis parey Sanmson ti ete fizikman.
19 Vreman, Zeova pe beni bann ki pa per pour defann vre ladorasyon. Si nou les lespri sen Bondye azir lo nou, nou pou annan bokou lafwa. Alor, eski pa i pou byen pour nou revwar sa ki bann Kretyen ti fer dan Lekritir Grek? Sa pou montre nou ki mannyer lespri sen Zeova ti azir dan premye syek, ki swa avan oubyen apre lapannkot lannen 33 N.L. Se sa ki nou pou vwar dan lot lartik.
[Not anba lo paz]
^ par. 3 Izai 63:11-14: “11 Alor, i ti konmans rapel letan pase, dan letan Moiz son serviter: ‘Oli sa Enn ki ti fer zot travers lanmer avek bann berze son troupo? Oli sa Enn ki ti met son lespri sen dan li? 12 Sa Enn ki’n plas son lanmen merveye dan kote drwat Moiz; sa Enn ki’n separ delo devan zot pour ki i fer en non pour li ki pou dire pour en letan endefini; 13 sa Enn ki pe fer zot mars dan delo profon pour ki, parey en seval dan dezer, zot pa ti tonbe? 14 Lespri Zeova ti fer zot repoze zis parey ler en zannimo sovaz i desann dan laplenn.’ Koumsa ki ou ti gid ou pep pour ki ou fer en zoli non pour ou.”
^ par. 6 Egzod 35:30-35: “30 Apre sa, Moiz ti dir bann garson Izrael: ‘Gete, Zeova in apel Betsalel, garson Ouri ki garson Our dan tribi Zida. 31 E i ti ranpli li avek lespri Bondye dan lasazes, dan konprenezon, dan konnesans pour fer tou sort keksoz 32 e pour fer tou sort prodwi orizinal e pour envant tou sort lobze, e pour travay avek lor, larzan ek kwiv, 33 pour fer bann travay avek ros e envant tou sort lobze avek dibwa. 34 I ti met dan son leker pour li ansennyen, zot de Ooliyab garson Aisamak dan tribi Dann. 35 I ti donn zot en leker saz pour fer tou bann travay en artizan e brode, i ti fer latwal avek difil ble ek lalenn ki ti’n ganny tenn an gro kouler rouz, bann materyo avek kouler rouz e bann linenn fen e bann travay fer latwal, bann zonm ki ti pe fer tou sort kalite travay e fer tou sort prodwi orizinal.’”
^ par. 13 Ziz 7:9-14: “9 I ti arive ki pandan lannwit Zeova ti dir li: ‘Leve, al kot sa kan akoz mon’n donn li dan zot lanmen. 10 Me, si ou per pour desann, desann ansanm avek Poura ou serviter, al kot sa kan. 11 E ou devret ekout sa ki mon pou dir, e apre sa ou lanmen pou vin for, e ou pou sirman ranport laviktwar lo sa kan.’ Deswit, zot de Poura son serviter ti desann e al kot kan lennmi. 12 Aprezan, bann Madyanit, Amalekit ek bann zabitan Les ti’n zwenn ansanm dan laplenn, zot ti parey sotrel telman i ti annan en kantite zot, e zot ti annan en kantite samo parey gren disab lo lans. 13 Gideonn ti ale, e gete! I ti annan en zonm ki ti pe rakont son rev avek son kanmarad e i ti dir: ‘La sa ki mon’n reve. I ti annan en gato ron ki ti’n ganny fer avek lorz ki ti pe vire zanmen fini dan kan Madyann. Sa gato ti tap dan en latant, e sa latant ti devir latet anba e i ti tonbe aplat ater.’ 14 Son kanmarad ti reponn e dir: ‘Sa pa lot ki lepe Gideonn, garson Yoas, en Izraelit. Sa vre Bondye in donn Madyann ek son kan dan son lanmen.’”
^ par. 15 Ziz 11:36: “Me i ti dir li: ‘Papa, si ou’n fer en ve avek Zeova, fer sa ki ou’n dir ou pou fer, vi ki Zeova in donn ou laviktwar lo bann Amonit, ou lennmi.’”
Akoz i ankourazan pour konnen konman lespri sen Bondye ti azir lo . . .
• Moiz?
• Betsalel?
• Zozye?
• Gideonn?
• Yifta?
• Sanmson?
[Kestyon]
[Ekstre lo paz 24]
Lafors Bondye i kapab fer nou vin for spirityelman zis parey Sanmson ti ete fizikman
[Portre lo paz 23]
Paran, ou legzanp devouman pou annan en lefe lo ou zanfan
