Annou aprann atraver “striktir laverite”
Annou aprann atraver “striktir laverite”
“Dan lalwa i annan [“striktir konnesans ek striktir laverite,” NW].” —ROM. 2:20.
ROD LAREPONS SA BANN KESTYON:
Ki bann sakrifis ki ti ganny ofer dapre Lalwa Moiz ti pe montre?
Ki similarite i egziste ant bann sakrifis ki bann Izraelit ti fer ek sa ki bann Kretyen i fer denozour?
Ki mannyer nou pou konnen si en sakrifis i akseptab ouswa pa akseptab dan lizye Zeova?
1. Akoz i enportan pour nou konpran sa ki Pol ti dir lo Lalwa Moiz?
I TI pou difisil pour nou konpran sinifikasyon plizyer laspe dan Lalwa Moiz, si nou ti napa bann let enspire ki zapot Pol ti ekrir. Par egzanp, dan son let pour bann Ebre, Pol i montre ki mannyer Zezi dan son rol konman sa “Gran-Pret fidel” ti enn fwa pour tou ofer son lekor konman en sakrifis pour ki bann dimoun ki annan lafwa dan sa sakrifis i kapab ganny en “delivrans eternel.” (Ebr. 2:17; 9:11, 12) Pol ti eksplike ki tabernak ti zis “en lonbraz sangtyer ki dan lesyel” e ki Zezi ti vin Medyater “en meyer lalyans” ki sa enn ki Moiz ti medyater. (Ebr. 7:22; 8:1-5) Leksplikasyon ki Pol ti donnen lo Lalwa ti annan en gran valer pour bann Kretyen e i ankor le ka. Sa bann leksplikasyon i ed nou pour pli byen konpran valer bann provizyon ki Bondye in fer pour nou.
2. Ki lavantaz bann Kretyen Zwif ti annan konpare avek bann non Zwif?
2 Kan Pol ti ekrir bann Kretyen Ronm, serten son bann leksplikasyon ti pour bann manm kongregasyon ki ti annan en lorizin Zwif e ki ti’n ganny enstrir dapre Lalwa Moiz. Vi ki zot ti deza annan en serten konnesans lo Lalwa Bondye, zapot Pol ti dir ki zot ti deza annan “striktir konnesans ek striktir laverite” konsernan Zeova ek son bann prensip drwat. Lefet ki bann Kretyen Zwif, ensi ki bann Zwif fidel avan zot ti annan konnesans ek en profon respe pour laverite ki ti dan lalwa ki Zeova ti’n donn son pep, sa i fer ki zot ti kapab servi sa konnesans pour gid, ansenny e ekler zot.—Lir Romen 2:17-20. *
LONBRAZ SAKRIFIS ZEZI
3. Ki byenfe nou gannyen kan nou etidye lo bann sakrifis ki bann Zwif ti fer dan lepase?
3 Sa striktir laverite ki Pol ti koz lo la i ankor enportan la konmela pour ki nou kapab konpran plan Zeova. Lalwa Moiz i baze lo bann prensip ki pa’n perdi son lenportans ouswa valer. Avek sa nide antet, annou egzamin zis en laspe sa Lalwa. Nou pou vwar ki mannyer bann diferan sakrifis ek lofrann ti atir bann Zwif ki ti annan limilite ver Kris e ed zot pour konpran sa ki Bondye ti ekspekte avek zot. Vi ki bann keksoz de baz ki Zeova i ekspekte avek son bann serviter pa zanmen sanze, nou pou osi vwar dan ki fason lalwa ki Bondye ti donn bann Izraelit konsernan sakrifis ek lofrann i kapab ed nou pour analiz kalite servis sakre ki nou ofer li. —Mal. 3:6.
4, 5. (a) Ki Lalwa Moiz ti fer pep Bondye rapel? (b) Lalwa Bondye konsernan sakrifis ti pe refer avek kwa?
4 Bann Zwif pa ti pou kapab oubliye ki en kantite laspe dan Lalwa Moiz ti met lanfaz lo zot lenperfeksyon. Par egzanp, si en dimoun ti tous en lekor mor, i ti pou bezwen ganny pirifye. Pour fer sa, en vas rouz san defo ti ganny touye e brile. Son lasann ti ganny anmase pour fer “delo pirifikasyon” ki ti ganny fannen lo sa dimoun lo trwazyenm ek setyenm zour apre ki i ti’n vin enpir. (Nom. 19:9-13) Pour zot rapel ki lenperfeksyon ek pese i ganny transmet atraver nesans, en madanm ki ti donn nesans ti enpir pour en serten letan, e apre sa, pour li ganny pirifye i ti bezwen ofer en sakrifis.—Lev. 12:1-8.
5 Sakrifis zannimo ti osi ganny ofer dan lezot sityasyon dan lavi tou le zour pour ki pese i ganny pardonnen. Ki swa sa adorater ti realize ouswa non, sa bann sakrifis ek lezot ankor ki ti ganny ofer kot tanp Zeova ti “en lonbraz” sa sakrifis parfe ki Zezi ti pou ofer.—Ebr. 10:1-10.
SA BON LETA LESPRI POUR OFER SAKRIFIS
6, 7. (a) Kwa ki ti gid bann Izraelit kan zot ti bezwen swazir en lofrann pour sakrifye e ki sa ti pe montre? (b) Ki kestyon nou kapab demann nou lekor?
6 Pour ki en zannimo ki ganny sakrifye avek Zeova i akseptab, i ti pou bezwen “san defo” dan tou laspe. I pa ti devret ni aveg, ni bwate, ni diformen ouswa malad. (Lev. 22:20-22) Kan bann Izraelit ti ofer Zeova fri ouswa legren, zot ti bezwen ofer “premye fri,” sa “pli meyer” dan rekolt. (Nom. 18:12, 29) Zeova pa ti pou aksepte bann sakrifis ki pa ti sa pli bon ki zot ti annan. Sa laranzman enportan konsernan sakrifis zannimo ti pe montre ki sakrifis Zezi ti pou san defo e san okenn tas e ki Zeova ti pou sakrifye sa ki pli meyer e ki annan plis valer pour li, pour ki limanite i ganny libere.—1 Pyer 1:18, 19.
7 Si sa dimoun ki ti pe ofer sakrifis ti rekonesan anver Zeova pour Son labonte, eski ou krwar ki i pa ti pou kontan pour donn Zeova sa keksoz pli meyer ki i annan? An tou ka, se sa dimoun ki ti pou deside. Me, i ti konnen ki Bondye pa ti pou kontan si sa sakrifis ti annan defo parski finalman sa ti pou zis vin en fardo oubyen en routin koumsa menm. (Lir Malaki 1:6-8, 13. *) Sa pwen i devret motiv nou pour reflesir lo nou servis pour Bondye: ‘Avek ki leta lespri mon pe servi Zeova? Eski in ler pour mwan revwar kalite servis ki mon pe ofer ek mon motivasyon?’
8, 9. Akoz nou devret egzamin leta lespri bann Izraelit ler zot ti ofer bann sakrifis?
8 Si sakrifis ki en Izraelit ti fer ti enn volonter akoz son rekonesans senser anver Zeova, ouswa parey dan ka en lofrann brile, pour demann Bondye son laprouvasyon, i pa ti pou difisil pour li swazir sa pli bon zannimo. Sa adorater ti pou vreman kontan pour donn Zeova son meyer. Bann Kretyen ozordi pa fer bann sakrifis ki ti ganny demande dan Lalwa Moiz, me zot fer bann sakrifis dan sa sans ki zot servi zot letan, lenerzi ek resours pour servi Zeova. Zapot Pol ti dir ki ler bann Kretyen i servi zot labous pour koz lo zot lespwar e kan zot pa “manke fer dibyen e ed kanmarad,” zot pe fer bann sakrifis ki fer plezir Bondye. (Ebr. 13:15, 16) Sa leta lespri ki pep Zeova i annan pour partisip dan bann aktivite Kretyen i montre ki kantite zot rekonesan e apresye tou sa ki Zeova in donn zot. Savedir i annan en similarite avek latitid ek motivasyon sa bann ki partisip dan servis Bondye ozordi ek sa bann ki ti ofer bann sakrifis volonter dan letan lontan.
9 Me, ki nou kapab dir konsernan sityasyon kot en dimoun ti bezwen ofer lofrann pour pese ouswa akoz i ti koupab dapre Lalwa? Eski ou krwar ki lefet ki sa sakrifis ti obligatwar, sa ti annan en lefe lo latitid ek leta lespri sa dimoun vizavi sa sakrifis? Eski sa bann sakrifis ti ganny ofer zis pourvi? (Lev. 4:27, 28) I pa ti pou le ka si sa dimoun ti senser e vreman anvi gard en bon relasyon avek Zeova.
10. Ki sakrifis bann Kretyen i bezwen fer pour reetablir en relasyon ki’n kase?
10 Pareyman ozordi, san reflesir ouswa san realize nou’n kapab ofans en lot Kretyen envolonterman. I kapab ki ou konsyans in dir ou ki ou’n mal fer. En dimoun ki fer son servis pour Zeova avek senserite pou fer tou sa ki i kapab pour regle sa problenm, pa i vre? I pou bezwen senserman demann pardon avek sa dimoun ki i’n ofanse, ouswa si i’n fer en pese grav, i pou bezwen rod led spirityel avek bann ansyen. (Mat. 5:23, 24; Zak 5:14, 15) I pou kout nou serten keksoz pour koriz fot ki nou’n fer kont nou kanmarad ouswa kont Zeova li menm. Kantmenm sa, kan nou fer sa bann kalite sakrifis, nou reganny nou relasyon avek Zeova ek nou frer e nou annan en konsyans kler. Sa bann bon rezilta pou reasir nou ki Zeova i konn sa ki pli bon pour nou.
11, 12. (a) Kwa ki ti enplike dan sakrifis konminyon? (b) Ki leson nou kapab tire avek bann sakrifis konminyon dan nou ladorasyon ozordi?
11 Dan Lalwa Moiz i ti osi annan bann lofrann konminyon ki ti reflekte en relasyon pezib ant sa dimoun ek Zeova. Sa dimoun ek son fanmir ki ti pe ofer sa lofrann, ti pou manz lavyann sa zannimo petet dan enn bann lasal a manze kot tanp. Sa pret ki ti ofer sa sakrifis ti pou ganny en bout sa lavyann, ensi ki lezot pret ki ti pe servi kot tanp. (Lev. 3:1, not anba paz; 7:31-33) Sa adorater ti donn son sakrifis zis akoz i ti anvi annan en bon relasyon avek Bondye. I ti pou konmsi sa adorater, son fanmir, bann pret ek Zeova li menm ti pe pran sa repa ansanm dan lazwa ek lape.
12 Eski dan en sans senbolik i annan ankor en pli gran privilez ki envit Zeova en repa e ki Zeova i aksepte sa lenvitasyon? Normalman, sa dimoun ki pe envit sa envite spesyal ti pou kontan ofer li bann keksoz pli meyer ki i annan, pa i vre! Sa bann sakrifis konminyon dan Lalwa ti form parti striktir laverite, e i ti pe montre ki atraver sakrifis Zezi bann imen ki kontan pour annan en relasyon pros avek zot Kreater ti pou annan sa sans pour fer li. Ozordi, nou kapab apresye lanmitye ek konpanni Zeova anmezir nou volonterman sakrifye nou resours ek lenerzi dan son servis.
BANN LAVERTISMAN KONSERNAN SAKRIFIS
13, 14. Akoz sa sakrifis ki Lerwa Sail ti pe al ofer Zeova pa ti akseptab?
13 I evidan ki pour Zeova aksepte en sakrifis, dapre Lalwa Moiz, sa sakrifis ti pou bezwen ganny ofer avek en bon leta lespri ek en bon kondisyon leker. Me, Labib i osi koz lo bann kalite sakrifis ki pa ti akseptab pour Bondye. Akoz i ti rezet sa bann sakrifis? Annou vwar de legzanp.
14 Profet Samyel ti dir Lerwa Sail ki sa ler ti’n arive pour ki Zeova i egzekit zizman lo bann Amalekit. Savedir Sail ti pou bezwen detri sa nasyon antye ensi ki son troupo. Me, apre ki i ti’n ranport laviktwar, Sail pa ti fer nanryen kan son bann solda pa ti touy Agag, lerwa bann Amalekit. Sail pa ti ni menm touy bann pli bon zannimo parmi zot troupo akoz i ti konsider zot konman bann bon sakrifis pour Zeova. (1 Sam. 15:2, 3, 21.) Ki mannyer Zeova ti reazir? Zeova ti rezet Sail akoz son dezobeisans. (Lir 1 Samyel 15:22, 23. *) Ki nou aprann avek sa? Pour ki nou sakrifis i akseptab dan lizye Zeova, fodre absoliman nou pe obeir son komannman.
15. Move kondwit serten Izraelit ki ti ofer sakrifis dan letan Izai i montre kwa?
15 Liv Izai i koz lo en lot legzanp. Dan lepok Izai, bann Izraelit ti ofer bann sakrifis ki ou a fer. Pour Zeova, zot ti pe ofer bann sakrifis ki ti napa valer akoz zot ti annan en move kondwit. “Zeova ti demande: ‘Pour ki rezon zot pe ofer sa kantite sakrifis? Mon’n ganny ase avek bann mal mouton ki’n ganny ofer konman lofrann brile, ek lagres bann zannimo byen angrese, e mon pa’n pran plezir dan disan bann zenn toro, bann pti mouton ek bann bouk. . . . Aret anmenn ankor okenn lofrann lagrenn ki napa valer. Lansan i en keksoz degoutan pour mwan.’” Ki problenm i ti annan? Bondye ti dir zot: “Kantmenm zot fer zot kantite lapriyer, mon pa pe ekoute; zot lanmen i plen avek disan. Al lav zot, fer zot prop, aret fer bann keksoz mal ki zot pe fer devan mwan; arete fer sa ki mal.”—Iza. 1:11-16.
16. Kwa ki fer en sakrifis akseptab dan lizye Zeova?
16 Zeova pa ti pran plezir dan bann sakrifis ki ti ganny ofer par bann peser ki pa ti oule repantir. Me, i ti aksepte lapriyer ek lofrann senser sa bann ki ti viv an armoni avek sa ki i ti’n komande. Striktir sa Lalwa ti fer zot konpran ki zot ti enparfe e ki zot ti bezwen ganny pardonnen. (Gal. 3:19) Akoz sa, zot ti santi regre dan zot leker. Pareyman ozordi, nou devret konpran akoz Kris in mor pour nou e ki atraver son sakrifis nou kapab ganny pardonnen nou pese. Si nou konpran e apresye sa sakrifis, Zeova pou “kontan” pour vwar tou sa ki nou fer pour li dan nou servis.—Lir Psonm 51:17, 19. *
DEMONTRE LAFWA DAN SAKRIFIS ZEZI
17-19. (a) Dan ki fason nou kapab demontre rekonesans anver Zeova pour sa sakrifis ki Zezi ti fer? (b) Ki nou pou diskite dan prosen lartik?
17 Lavantaz ki nou nou annan konpare avek bann serviter Bondye avan lepok Kretyen, se ki nou nepli vwar zis “lonbraz” plan Bondye. (Ebr. 10:1) Lalwa konsernan bann sakrifis ti ankouraz bann Zwif pour devlop bann latitid apropriye pour ki zot kapab annan en bon relasyon avek Bondye. Par egzanp, sa ti pou ankouraz zot pour demontre rekonesans senser anver li, annan sa dezir pour donn li sa ki meyer e rekonnet sa bezwen pour ganny pardonnen. Gras a Lekritir Grek, nou kapab konpran ki atraver ranson, Zeova pou retir tou move lefe pese pour touzour e ki menm depi la konmela nou kapab annan en konsyans kler devan li. Sakrifis Zezi i en provizyon merveye, pa i vre!—Gal. 3:13; Ebr. 9:9, 14.
18 Byensir, nou bezwen konn plis ki zis en senp leksplikasyon lo ranson pour ki nou kapab benefisye avek sa provizyon. Pol ti ekrir: “Alor Lalwa ti nou gardyen ziska ler Kris ti arive, pour ki nou ganny zistifye devan Bondye par lafwa.” (Gal. 3:24, nou ki’n met an italik.) Lafwa i touzour ganny akonpannyen par aksyon. (Zak 2:26) Alor, Pol ti pe ankouraz bann Kretyen dan premye syek ki ti konn Lalwa Moiz pour azir an armoni avek sa ki zot ti’n aprann. Si zot ti fer li, zot ti pou annan en kondwit ki ti pou an armoni avek bann prensip Bondye ki zot ti pe ansennyen.—Lir Romen 2:21-23.
19 Menm si bann Kretyen dan nou letan pa bezwen swiv Lalwa Moiz, zot kantmenm sa bezwen ofer bann sakrifis ki akseptab dan lizye Zeova. Lafason ki nou devret fer li pou ganny diskite dan prosen lartik.
[Not anba lo paz]
^ par. 2 Romen 2:17-20: “17 Me ou ki port sa non Zwif, ou ki apiy lo lalwa e ou ki fyer ou relasyon avek Bondye, 18 ou konnen ki ou Bondye i demann ou fer e lalwa in montre ou ki mannyer pour swazir sa ki byen. 19 Ou mazinen ki ou en gid pour bann aveg e en lalimyer pour bann ki dan fernwanr, 20 en profeser pour bann inyoran, en ansenyan pour bann zanfan, akoz ou sir ki dan lalwa i annan [“striktir konnesans ek striktir laverite,” NW].”
^ par. 7 Malaki 1:6-8, 12-13: “6 ‘Zeova bann larme in dir avek zot, bann pret ki ay mon non: “En garson i onor son papa, e en serviter i onor son gran met. Alor, si mon en papa pour zot, oli mon loner mwan? E si mon en Gran Met pour zot, oli lakrent pour mwan?” Zot in dir: “Dan ki fason nou’n mepriz ou non?” 7 “Parski zot in ofer bann sakrifis dipen kontaminen lo mon lotel.” E zot in dir: “Dan ki fason nou’n kontamin ou?” Par sa ki zot in dir: “Latab Zeova i en keksoz ki nou meprize.” 8 E kan zot prezant en zannimo aveg konman sakrifis, zot dir: “Napa nanryen mal avek sa.” E kan zot prezant en zannimo ki bwete e malad, zot dir: “Napa nanryen mal avek sa.” Zeova bann larme in dir: “Silvouple, anmenn li la kot ou gouverner. Eski i pou trouv faver dan ou e aksepte ou zantiman?”’” “12 E Zeova bann larme in dir: ‘. . . 13 Pa zot in dir: “Gete! Pa i fatigan!” e zot in mepriz li. Zeova in dir: “E zot in anmenn en zannimo ki’n redi pardfors, enn ki bwete e enn ki malad; wi, zot in anmenn li konman lofrann. Eski mon kapab apresye sa ki sorti dan zot lanmen?”’”
^ par. 14 1 Samyel 15:22, 23: “22 Alors Samyel ti dir: ‘Eski Zeova i pran plis plezir dan lofrann brile ek sakrifis ki dan obeir lavwa Zeova? Ekoute! Obeir Bondye i pli bon ki fer en sakrifis, i pli bon ekoute ki ofer lagres mouton; 23 akoz rebelyon i parey pese pour devinen e lorgey i parey avek servi pouvwar mazik ek terafim. Vi ki ou’n rezet parol Zeova, li osi i’n rezet ou pour ki ou nepli lerwa.’”
^ par. 16 Psonm 51:17, 19: “17 Bann sakrifis pour Bondye i en lespri fatige; ou pa pou mepriz en leker kase e brize, O Bondye.” “19 Dan sa ka, ou pou kontan bann sakrifis ladrwatir, avek bann sakrifis brile ek bann lofrann. Dan sa ka, bann toro pou ganny ofer lo ou lotel.”
[Kestyon]
[Ekstre lo paz 19]
Sa ki Zeova i ekspekte avek son serviter pa zanmen sanze
[Portre lo paz 20]
Lekel parmi sa de ki ou ti pou ofer Zeova?
[Portre lo paz 21]
Sa ki ofer bann sakrifis akseptab anver Zeova i ganny son laprouvasyon
