Fer bann sakrifis pour Zeova avek tou ou leker

“Dan tou sa ki zot fer, fer li avek tou zot leker, konmsi zot pe travay pour [Zeova].” ​—KOL. 3:23.

KI OU KAPAB REPONN:

Dan ki fason nou kapab onor Zeova dan bann aktivite tou le zour?

Ki sakrifis nou fer dan nou ladorasyon pour Zeova?

Ki mannyer nou kapab ofer bann keksoz materyel avek Zeova?

1-3. (a) Eski lanmor Zezi konman en sakrifis i vedir ki Zeova nepli oule ki nou fer sakrifis? Eksplike. (b) Ki kestyon ki ganny souleve konsernan sakrifis dan nou letan?

DAN premye syek N.L., Zeova ti montre son pep ki sakrifis Zezi ti aboli Lalwa Moiz. (Kol. 2:13, 14) Tou sa bann lofrann sakrifisyel ki bann Zwif ti’n fer pour plizyer santenn lannen ti nepli neseser e i ti nepli annan okenn valer. Lalwa ti’n fini akonplir son bi konman en “gardyen ziska ler Kris ti arive.” ​—Gal. 3:24.

² Selman, sa pa vedir ki bann Kretyen pa devret enterese avek bann sakrifis. O kontrer, zapot Pyer ti koz konsernan sa nesesite pour “fer sakrifis spirityel, [ki] akseptab devan Bondye par Zezi-Kri.” (1 Pyer 2:5, nou ki’n met an italik.) Deplis, zapot Pol ti fer kler ki dan tou laspe lavi en Kretyen, son lavi i kapab ganny konsidere konman “en sakrifis.” ​—Rom. 12:1.

³ Alor, savedir en Kretyen i fer sakrifis pour Zeova kan i donn li serten keksoz ouswa kan i abandonn serten keksoz pour servi li. Me, dapre sa ki nou konnen konsernan sa ki bann Izraelit ti devret fer, ki mannyer nou kapab asire ki tou sa bann sakrifis ki nou fer i akseptab dan lizye Zeova?

DAN LAVI TOULEZOUR

4. Ki nou devret rapel konsernan bann aktivite ki nou fer tou le zour?

⁴ Anmezir nou fer bann aktivite tou le zour, i kapab paret difisil pour konpran ki relasyon sa bann aktivite i annan an rapor avek bann sakrifis. Nou bann louvraz lakour, lekol, fer konmisyon ek lezot ankor i kapab paret bann ptipti keksoz ki napa nanryen pour fer avek nou bann keksoz spirityel. Me, si ou’n dedye ou lavi avek Zeova ouswa ou swete fer li a lavenir, sa leta lespri avek ki ou fer sa bann aktivite i  enportan. Nou en Kretyen 24 lo 24. Nou devret aplik bann prensip Labib dan tou laspe nou lavi. An rapor avek sa, Pol ti dir: “Dan tou sa ki zot fer, fer li avek tou zot leker, konmsi zot pe travay pour [“Zeova” NW] non pa pour en zonm.”​—Lir Kolosyen 3:18-24. *

5, 6. Ki nou devret pran an konsiderasyon an rapor avek nou resanz ek kondwit?

⁵ Pa tou sa ki en Kretyen i fer dan son lavi tou le zour ki form parti son servis sakre. Toudmenm, lefet ki Pol ti ankouraz nou pour fer tou “avek tou nou leker konmsi [nou] pe fer li pour Zeova,” sa i fer nou mazin tou sa ki nou fer dan nou lavi. Alor, ki mannyer nou kapab personnelman aplik sa konsey? Eski nou sanz e konport nou dan en fason apropriye 24 lo 24? Letan nou pe partisip dan bann aktivite lavi tou le zour, eski nou anbarase pour dir ki nou en Temwen Zeova akoz lafason ki nou konport nou ouswa akoz nou fason sanze? Fodre pa ki sa i le ka. Pep Zeova pa ti pou zanmen oule fer okenn keksoz ki ti pou sali non Bondye. ​—Iza. 43:10; 2 Kor. 6:3, 4, 9.

⁶ Annou vwar ki mannyer sa dezir pour travay “avek tou [nou] leker konmsi [nou] pe fer li pour Zeova” i annan lefe lo diferan laspe nou lavi. Anmezir nou fer li, gard antet ki tou bann sakrifis ki bann Izraelit ti ofer Zeova ti devret zot meyer. ​—Egz. 23:19.

LEFE LO OU LAVI

7. Dedikasyon Kretyen i enplik kwa?

⁷ Kan ou ti dedye ou lavi avek Zeova, ou ti fer li avek tou ou leker, pa i vre? Anfet, ou ti dir ki dan tou laspe ou lavi ou ti pou met Zeova premye. (Lir Ebre 10:7.) Sa ti en bon desizyon. San okenn dout, ou’n remarke ki kan ou rod led Zeova dan nenport sityasyon e ou fer tou pour azir an armoni avek son lavolonte, ou ganny bann bon rezilta. (Iza. 48:17, 18) Pep Bondye i sen e zwaye akoz zot reflekte bann kalite sa Enn ki enstrir zot.​—Lev. 11:44; 1 Tim. 1:11.

8. Akoz i enportan pour nou ki Zeova ti konsider bann sakrifis dan letan lontan konman sen?

⁸ Sakrifis ki bann Izraelit ti fer avek Zeova ti ganny konsidere konman sen. (Lev. 6:25; 7:1) Sa mo Ebre ki ganny tradwir “sentete” i donn lide en keksoz sen ki’n ganny met apar ouswa ki zis  pour Bondye. Pour ki nou sakrifis i akseptab pour Zeova, fodre ki i pir e i pa’n ganny kontaminen avek sa lemonn. Nou pa devret kontan okenn keksoz ki Zeova i deteste. (Lir 1 Zan 2:15-17.) I kler ki sa i vedir ki nou merit evit okenn lasosyasyon ouswa frekantasyon ki pou fer nou enpir dan lizye Zeova. (Iza. 2:4; Rev. 18:4) I osi vedir ki nou pa devret les nou lizye kontinyen get bann keksoz enpir oubyen imoral ouswa les nou lespri vagabonde lo bann keksoz parey. ​—Kol. 3:5, 6.

9. Akoz konportman en Kretyen anver lezot i enportan?

⁹ Pol ti ankouraz son bann frer ek ser Kretyen: “Pa manke fer dibyen e ed kanmarad, parski se bann sakrifis koumsa ki fer plezir Bondye.” (Ebr. 13:16, nou ki’n met an italik.) Alor, kan nou bon e fer dibyen lezot sa i en keksoz ki Zeova i vwar konman bann sakrifis akseptab anver li. Lentere senser dan lezot i en mark remarkab ki fer bann vre Kretyen diferan. ​—Zan 13:34, 35; Kol. 1:10.

SAKRIFIS DAN LADORASYON

10, 11. Ki mannyer Zeova i vwar nou minister ek ladorasyon konman Kretyen e ki lefe sa i devret annan lo nou?

¹⁰ En pli bon fason ki nou fer dibyen lezot konman bann vre Kretyen se atraver sa mesaz lespwar ki nou anonse. Eski ou sezi tou loportinite pour rann en temwannyaz? Pol ti dekrir sa aktivite enportan pour en Kretyen konman en fason ki nou pe ‘rann glwar Bondye, setadir, loue non Bondye par nou labous.’ (Ebr. 10:23; 13:15; Ose. 14:2) I annan en kantite ki kapab ganny dir konsernan kantite letan nou pase dan predikasyon ek lafason ki nou pres sa bon nouvel Rwayonm. Bokou parti dan Renyon Servis in ganny fer pour prepar nou fason panse pour sa travay. Me, vi ki nou predikasyon ek temwannyaz enformel i en sakrifis ki “rann glwar Bondye,” savedir i form parti nou ladorasyon e i devret sa pli meyer sakrifis ki nou kapab ofer. Menm si sirkonstans i varye, lakantite letan ki nou pase dan predikasyon i demontre ki kantite lapresyasyon nou annan pour bann keksoz spirityel.

¹¹ Bann Kretyen i regilyerman pas letan dan ladorasyon, ki swa personnelman ouswa avek lezot. Zeova i demann nou pour fer sa. I vre, nou nepli bezwen fer Saba ouswa fer bann gran vwayaz  pour al bann lafet Zerizalenm. Me, sa bann selebrasyon i annan en sinifikasyon pour nou ozordi. Bondye i ankor ekspekte ki nou met letan dekote pour etidye son Parol, priye e asiste renyon. Bann sef fanmir Kretyen i pran linisyativ pour organiz ladorasyon fanmir avek zot fanmir antye. (1 Tesa. 5:17; Ebr. 10:24, 25) Konsernan nou bann aktivite spirityel, i byen pour nou demann nou lekor: ‘Eski mon kapab ador Bondye pli byen ankor?’

12. (a) Lansan ki ti ganny ofer dan ladorasyon dan letan lontan i kapab ganny konpare avek kwa ozordi? (b) Ki lefe sa konparezon i devret annan lo nou lapriyer?

¹² Lerwa David ti sante: “Ki mon lapriyer i ganny prepare konman lansan devan ou.” (Ps. 141:2) Mazin en kou konsernan ou lapriyer, lakantite fwa ki ou fer li ek kalite ou lapriyer. Liv Revelasyon i konpar lapriyer “bann sen” avek lansan dan sa sans ki bann lapriyer akseptab ki al ver Zeova i santi bon e annan en loder agreab. (Rev. 5:8, NW) Dan letan lontan Izrael, lansan ki ti ganny ofer regilyerman lo lotel Zeova ti ganny prepare avek swen e dan en fason presi. I ti akseptab pour Zeova si i ti ganny ofer zis dapre bann lenstriksyon ki ti’n ganny etablir. (Egz. 30:34-37; Lev. 10:1, 2) Si nou lapriyer i ganny ofer dan sa menm fason, alor, nou kapab asire ki i akseptab devan Zeova.

DONNEN E OU AVA RESEVWAR

13, 14. (a) Ki servis Epafrodit ek bann Kretyen dan kongregasyon Filip ti fer anver Pol e ki mannyer sa zapot ti santi? (b) Dan ki fason nou kapab swiv legzanp Epafrodit ek bann Filipyen?

¹³ Bann kontribisyon finansyel ki ganny fer pour siport travay mondyal i kapab ganny konpare avek bann sakrifis, ki swa nou donn bokou ouswa en ptigin. (Mark 12:41-44) Dan premye syek N.L., kongregasyon Filip ti anvoy Epafrodit Ronm pour ki i pran swen avek bezwen fizik Pol. I evidan ki sa reprezantan kongregasyon Filip ti anmenn larzan ki kongregasyon ti’n donnen. I pa ti fer premye fwa ki bann Filipyen ti zenere anver Pol. Zot pa ti anvi ki Pol i enkyet konsernan larzan pour ki i akonplir son minister pli plennman. Ki mannyer Pol ti konsider sa kado? I ti apel sa, “en lofrann avek bon loder, en sakrifis ki Bondye i aksepte e ki fer li plezir.” (Lir Filipyen 4:15-19.) Pol ti vreman apresye labonte bann Filipyen e Zeova osi.

¹⁴ Pareyman ozordi, Zeova i vreman apresye nou bann kontribisyon finansyel anver sa travay mondyal. Deplis, i promet ki si nou kontinyen met lentere Rwayonm premye dan nou lavi, i pou pran swen avek tou nou bann bezwen spirityel e fizik. ​—Mat. 6:33; Lik 6:38.

DEMONTRE LAPRESYASYON

15. Nonm serten rezon akoz ou devret rekonesan anver Zeova.

¹⁵ I ti pou pran en kantite letan pour eksplik tou bann rezon akoz nou devret rekonesan anver Zeova. Eski pa i vre ki nou devret remersye li tou le zour pour sa kado lavi ki i’n donn nou? I donn nou tou sa ki nou bezwen pour pran swen avek nou lekor, ki swa manze, lenz ek en landrwa reste ensi ki sa ler ki nou respire. Deplis, nou lafwa ki baze lo konnesans egzakt i donn nou lespwar. I apropriye alor ki nou ador Zeova e donn li bann sakrifis atraver nou labous, senpleman akoz sa ki Zeova i ete e sa ki i’n fer pour nou.​—Lir Revelasyon 4:11.

16. Ki mannyer nou devret reazir anver sakrifis Kris?

¹⁶ Parey nou’n vwar dan lartik avan, en kado vreman spesyal ki Zeova in  donn limanite se sakrifis Kris. Sa i en fason remarkab ki montre ki Bondye i kontan nou. (1 Zan 4:10) Ki mannyer nou devret reazir anver sa? Pol ti dir: “Lanmour Kris i kontrol nou, parski nou asire ki en sel in mor pour tou dimoun. . . .  E i’n mor pour tou bann vivan pour ki bann vivan i nepli viv pour zot menm, me pour li ki’n mor e resisite pour zot.” (2 Kor. 5:14, 15) Anfet, Pol ti pe dir ki si nou apresye labonte ekstraordiner ki Bondye in demontre anver nou, nou pou servi nou lavi pour onor Li ek Son Garson. Nou lanmour ek lapresyasyon pour Bondye ek Kris i ganny demontre atraver nou lobeisans ek nou dezir pour prese e fer disip.​—1 Tim. 2:3, 4; 1 Zan 5:3.

17, 18. Dan ki fason serten in fer plis pour loue Bondye avek zot labous? Donn en legzanp.

¹⁷ Eski i posib pour ou amelyor ou sakrifis louanz ki ou ofer Bondye? Apre ki zot in reflesir lo tou sa bon keksoz ki Zeova in fer pour zot, serten Kretyen in organiz zot letan ek zot bann aktivite pour ogmant zot partisipasyon dan predikasyon sa bon nouvel lo Rwayonm ouswa dan lezot aktivite teokratik. Serten in kapab fer pionye asistan pour en mwan ouswa plis sak lannen, tandis ki lezot zot in vin bann pionye ordiner. Lezot ankor in partisip dan bann proze konstriksyon. Eski pa sa i bann bon fason ki nou kapab demontre lapresyasyon? Si nou demontre lapresyasyon e remersye Bondye avek sa bon motivasyon, nou servis sakre pou akseptab pour Bondye.

¹⁸ En kantite Kretyen i santi ki zot merit demontre lapresyasyon pour Zeova e sa i motiv zot pour kontinyen servi li. Morena i en legzanp. I ti rod larepons son bann kestyon spirityel dan larelizyon Katolik ki i ti’n ganny elve ladan e dan filozofi Azyatik. Me, i pa ti trouv larepons satisfezan dan okenn ant le de. Zis ler i ti konmans etidye Labib avek Temwen Zeova ki son laswaf spirityel ti ganny satisfer. Morena ti rekonesan pour sa bann larepons sorti dan Labib pour tou son bann kestyon e lefet ki sa bann larepons in fer son lavi annan en vre sans. I ti anvi remersye Zeova par depans tou son lenerzi pour servi li. I ti konmans fer pionye asistan lo en baz regilye deswit apre son batenm, e en pti pe letan apre ki son sirkonstans ti’n sanze, i ti vin en pionye ordiner. Sa ti 30 an pase e Morena i ankor dan servis a plen tan.

19. Konman ou kapab fer plis pour ofer Bondye bann sakrifis?

¹⁹ Byensir, i annan en kantite serviter fidel Zeova ki zot sirkonstans pa permet zot fer pionye. Nenport kwa ki nou kapab fer dan servis Zeova, nou tou nou kapab ofer bann sakrifis spirityel ki akseptab devan li. Par nou kondwit, nou bezwen swiv bann prensip drwat byen, par mazinen ki nou reprezant Zeova dan tou moman. Avek lafwa, nou annan konfyans total dan lakonplisman plan Bondye. Par nou bann bon aksyon, nou proklanm sa bon nouvel partou. Avek bokou lazwa ek lapresyasyon pour tou sa ki Zeova in fer pour nou e avek tou nou leker, annou kontinyen fer bann sakrifis pour Zeova.

[Not anba lo paz]

[Kestyon]

[Portre lo paz 27]

Eski labonte Zeova i motiv ou pour ofer plis sakrifis louanz?

[Portre lo paz 25]

Eski ou sezi tou loportinite pour rann en temwannyaz?