Konman pour fer fas avek dezas natirel

Lefet ki i annan en logmantasyon dan lakantite dezas natirel ek dega ki i fer, ki en dimoun i kapab fer pour fer fas avek bann sityasyon parey? Annou vwar detrwa keksoz ki en dimoun i kapab fer.

Pa reste dan bann landrwa danzere. Labib i dir: “En dimoun pridan i al kasyet li ler i’n vwar maler, me en dimoun ki mank leksperyans in pase e i a bezwen sibir konsekans.” (Proverb 22:3) Sa konsey i saz e i kapab ganny aplike dan ka dezas osi. Si i annan en lavertisman ki ganny donnen konsernan en volkan ki pe al eripte, en kek linondasyon, siklonn ouswa tsounami, i pou saz si sa bann ki reste dan sa rezyon i evakye e al dan en landrwa ki pli an sekirite, pa i vre! Lavi i annan plis valer ki lakaz ouswa keksoz materyel.

Pour serten, zot annan sa swa pour zot pa reste dan en landrwa danzere. En eksper ti dir: “I annan serten landrwa kot i annan plis risk pour annan dezas. Dan sa bann landrwa lo later kot i annan en kantite risk pour annan dezas, a lavenir sa bann dezas pou pli pir ankor.” Sa i kapab le ka sirtou dan bann rezyon o bor lakot ouswa kot i annan posibilite tranblemandter. Si ou kapab evite reste dan sa bann landrwa koumsa ouswa ou al reste dan en landrwa ki pli an sekirite, i pou annan mwens risk ki ou pou ganny afekte avek dezas.

Annan en plandaksyon. Malgre prekosyon ki ganny pran, petet ou pou kapab eksperyans en kek dezas ki pou arive en sel kou. I pou pli fasil pour ou fer fas avek li, si ou fer bann plan davans. Sa fason azir i an armoni avek sa konsey dan Proverb 22:3 ki’n ganny site pli boner. Eski ou annan en sak ki la pare pour kan en dezas i arive? En piblikasyon ki apel 1-2-3 of Disaster Education i ankouraz nou pour annan sa bann keksoz neseser dan sa sak: Bann nesesite premye swen, delo, manze prezerve ek bann dokiman enportan. I pou saz osi pour revwar avek ou fanmir bann kalite dezas ki kapab arive dan ou rezyon e vwar kwa ki kapab ganny fer dan sak sityasyon.

Annan en bon relasyon avek Bondye. En bon relasyon avek Bondye pou ed nou dan nenport sityasyon. Labib i koz lo Bondye konman en “Papa ki ranpli avek labonte, Bondye ki touzour donn konsolasyon. I konsol nou dan nou bann soufrans.” En lot verse i dekrir li konman sa “Bondye ki konsol tou.” ​—2 Korentyen 1:3, 4; 7:6.

Bondye i konnen ki sityasyon sa bann ki annan lafwa dan li pou ladan. I en Bondye lanmour e i donn nou lankourazman dan diferan fason. (1 Zan 4:8) Nou pa devret priye pour en mirak, me plito pour nou ganny lespri sen Bondye  ki pou ed nou dan nenport sityasyon. Lespri sen i rekonfort sa bann ki fer fas avek difikilte par fer zot rapel bann verse Labib ki kapab rekonfort zot e donn zot lafors. Vreman, bann serviter fidel Bondye i kapab annan menm santiman ki David, en lerwa dan letan lontan Izrael ki ti dir: “Kantmenm mon mars dan en vale fernwanr, mon pa per okenn keksoz mal, parski ou avek mwan. Ou baget ek ou baton i bann keksoz ki rekonfort mwan.” ​—Psonm 23:4.

Bann vre Kretyen i ed kanmarad. Dan premye syek, en profet ki ti apel Agabis ti anonse ki i ti pou annan “en gran lafamin lo later antye [e] sa ti arive kan Klod ti lanperer.” En kantite disip Zezi ki ti reste Zide ti ganny afekte avek sa lafamin. Ki bann disip dan lezot landrwa ti fer ler zot ti tann konsernan soufrans zot bann kanmarad Kretyen? Sa resi i dir: “Bann disip ti deside pou anvoy en kontribisyon selon zot mwayen pour bann frer ki ti reste dan Zide.” (Akt 11:28, 29) Zot ti donn bann provizyon neseser gras a zot lanmour.

Ozordi osi, bann serviter Bondye i azir dan menm fason kan bann gro maler i arive. Temwen Zeova i byen koni pour led ki zot donn zot bann frer ek ser Kretyen. Par egzanp, kan en gro tranblemandter ti frap Chile le 27 Fevriye 2010, deswit zot ti pran aksyon pour ed sa bann ki ti’n ganny afekte. Karla, en madanm ki son lakaz ti’n ganny balye par en tsounami ti dir: “I ti vreman rekonfortan e ankourazan pour vwar ki son lannmen [bann Temwen] ti vini sorti dan lezot landrwa pour ed nou. San okenn dout, Zeova ti rekonfort nou atraver labonte sa bann volonter. Mon ti santi zot lanmour ek proteksyon.” Son granpapa ki pa en Temwen Zeova ti vwar sa led ki son pti zanfan ti pe gannyen. I ti dir: “I vreman diferan avek sa ki mon’n abitye vwar pandan tou sa lannen avek bann manm mon legliz.” Sa ki i ti vwar ti pous li pour demann Temwen Zeova pour etidye Labib avek li.

Si ou frekant sa bann ki kontan Bondye ou pou ganny en kantite led dan bann moman difisil. Me, eski i pou annan en letan kot dezas natirel pou nepli en menas pour nou? Parey nou ti vwar pli boner, sa pou le ka.

[Portre lo paz 6]

Eski ou annan en sak ki pare pour letan dezas?

[Portre lo paz 7]

Priye, pa pour mirak, me pour ganny led lespri sen dan nenport sityasyon

[Portre lo paz 7]

Bann vre Kretyen i ed kanmarad fer fas apre dezas

[Portre lo paz 7]

“Mon ti santi lanmour ek proteksyon”