Kontinyen veye parey bann zapot Zezi
Kontinyen veye parey bann zapot Zezi
“Veye avek mwan.”—MAT. 26:38.
KI OU’N APRANN KONSERNAN:
Veye pour konnen kote pour prese?
Veye e priye?
Rann en temwannyaz pli plennman malgre difikilte?
1-3. Dan ki fason bann zapot pa ti veye pandan sa dernyen swar ki Zezi ti lo later e kwa ki montre ki zot pa ti tarde pour aprann zot leson?
ESEY mazin sa ki ti arive dan lavi Zezi son dernyen lannwit lo later. Zezi ti al dan enn son landrwa prefere, zarden Zetsemane ki dan les Zerizalenm. I ti’n al laba avek son bann zapot fidel. Zezi ti anvi en pe letan li tousel pour priye akoz i ti annan bokou keksoz ki ti pe trakas li.—Mat. 26:36; Zan 18:1, 2.
2 Zapot Pyer, Zak ek Zan ti akonpanny Zezi ziska en landrwa en pti pe pli lwen dan zarden. Apre sa, Zezi ti dir zot: “Reste isi e veye avek mwan,” e apre i ti al priye. Ler i ti retournen, i ti zwenn son trwa zanmi pe dormi. Ankor enn fwa, i ti sipliy zot pour kontinyen “veye.” Me zot ti tonm dormi de fwa ankor! Plitar sa menm swar, tou son bann zapot pa ti reste vizilan spirityelman. Anfet, zot ti menm abandonn Zezi e sove!—Mat. 26:38, 41, 56.
3 Bann zapot fidel ti sirman regrete ki zot pa ti’n reste eveye, me zot pa ti tarde pour aprann zot leson. Liv Akt dan Labib i montre ki zot ti kit en legzanp ekstraordiner an sa ki konsern kontinyen veye. Zot legzanp fidelite ti sirman ankouraz lezot Kretyen pour fer parey. Konmela plis ki zanmen oparavan, nou bezwen kontinyen veye. (Mat. 24:42) Annou vwar trwa leson ki nou kapab aprann dan liv Akt konsernan kontinyen veye.
VEYE POUR KONNEN KOTE POUR PRESE
4, 5. Ki mannyer Pol ek bann ki ti pe vwayaz avek li ti ganny gide par lespri sen?
4 Bann zapot ti veye pour konnen kote pour prese. Dan en resi, nou vwar ki mannyer Zezi ti servi lespri sen ki Zeova ti’n donn li, pour gid zapot Pol ek bann ki ti pe akonpanny li lo en vwayaz spesyal. (Akt 2:33) Annou egzamin sa ki ti arive.—Lir Akt 16:6-10.
5 Pol, Silas ek Timote ti’n kit lavil Lis ki dan sid Galasi. Detrwa zour plitar, zot ti ariv lo en gran semen ki al dan was, dan sa rezyon kot i ti annan plis dimoun ki reste dan distrik Lazi. Zot ti anvi al laba pour vizit bann lavil kot en kantite dimoun ti bezwen tann sa bon nouvel konsernan Kris. Me en keksoz ti anpes zot al laba. Verse 6 i dir: “Sent-Espri ti anpes zot pres Laparol dan provens Lazi, alor zot ti travers rezyon Frizi ek Galasi.” Dan en fason ki nou pa konnen, lespri sen ti anpes Pol ek son bann konpanyon pour al prese dan provens Lazi. I evidan ki Zezi, par mwayen lespri sen ti gid Pol ek son bann konpanyon dan en lot direksyon.
6, 7. (a) Ki ti arive avek Pol ek son bann konpanyon ler zot ti pros avek Bitini? (b) Ki desizyon sa bann disip ti fer e avek ki rezilta?
6 Kote Pol ek son bann konpanyon devoue ti ale? Verse 7 i eksplike: “Kan zot ti ariv pre Mizi zot ti esey antre dan Bitini, me Lespri Zezi pa ti les zot.” Lefet ki lespri sen ti’n anpes zot pres Lazi, Pol ek son bann konpanyon ti al dan nor, avek bi pour pres dan bann lavil Bitini. Par kont, ler zot ti vin pli pre avek Bitini, Zezi ti ankor enn fwa servi lespri sen pour anpes zot al dan sa landrwa. Sirman sa bann zonm ti’n bezwen konfize. Zot ti konnen kwa ki zot ti pou anonse e konman pour prese, me zot pa ti konnen kote pour prese. Petet nou kapab dir li dan sa fason: Zot ti’n tap lo en laport ki al ver Lazi, me anven. Zot ti’n tap lo en laport ki al ver Bitini, me ankor enn fwa i ti anven. Me eski zot ti aret tape? An tou ka, pa sa bann predikater devoue!
7 Sa letan la, Pol ek son bann konpanyon ti fer en desizyon ki ti kapab paret en pe drol. Verse 8 i dir nou: “Zot ti vwayaz atraver Mizi e al ziska Troas.” Savedir, zot ti sanz direksyon e al dan was. Zot ti mars apepre 550 kilomet e pas dan bann diferan lavil ziska ki zot ti ariv Troas. Troas ti en por kot bato ti kite pour al Masedwann. La, pour en trwazyenm fwa, zot ti tap lo en laport e safwasi laport ti ouver gran! Verse 9 i dir nou ki ti arive apre: “Pandan lannwit Pol ti ganny en vizyon. I ti war en zonm Masedonyen pe debout e i ti sipliy li, ‘Pas dan Masedwann e vin sekour nou.’” A lafen de fen, Pol ti konnen kote pour al prese. San tarde, zot ti pran bato pour al Masedwann.
8, 9. Ki nou kapab aprann atraver sa resi lo vwayaz Pol?
8 Ki nou kapab aprann atraver sa resi? Remarke ki se apre ki Pol ti’n kite pour al Lazi ki lespri sen Bondye ti entervenir. I ti osi apre ki Pol ti’n ariv pros avek Bitini ki Zezi ti entervenir. Finalman, apre ki Pol ti’n ariv Troas ki Zezi ti diriz li ver Masedwann. Konman Sef kongregasyon, Zezi i kapab azir dan menm fason avek nou. (Kol. 1:18) Par egzanp, petet ou pe mazin fer servis pionye oubyen servi dan en landrwa kot i annan plis bezwen. Me i kapab ki Zezi pou gid ou par mwayen lespri sen selman apre ki ou’n fer bann pa neseser pour atenn ou lobzektif. Pour donn en legzanp: En drayver i kapab sanz direksyon son loto si sa loto pe bouze. Pareyman, Zezi i kapab ed nou fer plis dan nou minister si nou pe bouze, setadir si nou pe fer zefor pour atenn nou lobzektif.
9 Me ki ou pou fer si ou pa pe vwar rezilta deswit? Eski ou merit bes lebra an krwayan ki lespri sen Bondye pa pe gid ou? I byen pour rapel ki Pol osi ti rankontre bann lobstak. Me i ti kontinyen rode e tap laport ziska ler enn ti ouver. Pareyman, si ou kontinyen rode, “en gran laport [pou] ouver pour [ou] fer en gran travay” e ou pou ganny rekonpanse ou osi.—1 Kor. 16:9.
VEYE E PRIYE
10. Kwa ki montre ki i enportan pour persevere dan lapriyer pour kapab kontinyen veye?
10 Aprezan, annou vwar ki mannyer nou kapab kontinyen veye dan en lot laspe ankor parey nou bann frer dan premye syek. Zot ti reste vizilan an rapor avek lapriyer. (1 Pyer 4:7) Pour nou kapab kontinyen veye, i enportan ki nou persevere dan lapriyer. Rapel ki ler Zezi ti dan zarden Zetsemane, zis avan i ti ganny arete, i ti demann son trwa zapot pour kontinyen “veye e priye pour zot pa tonm dan tantasyon.”—Mat. 26:41, nou ki’n met an italik.
11, 12. Akoz e dan ki fason Erod ti persekit bann Kretyen, enkli Pyer?
11 Zapot Pyer ti la ler Zezi ti dir sa parol e plitar i ti eksperyans personnelman pwisans lapriyer senser. (Lir Akt 12:1-6.) Dan bann premye verse sa resi nou vwar ki Erod ti maltret bann Kretyen pour li ganny faver bann Zwif. Tre probab, i ti konnen ki Zak ti en zapot ki ti pros avek Zezi, alor i ti fer Zak ganny touye “par lepe.” (Verse 2) Kongregasyon ti alor perdi en zapot byenneme. Pa sa ti teste lafwa nou bann frer ek ser!
12 Ki Erod ti fer apre? Verse 3 i eksplike: “Kan i ti war ki tousala ti pe fer plezir bann Zwif, i ti fer aret Pyer.” Me par ler, sa bann prizon pa ti kapab gard bann zapot anndan, enkli Pyer. (Akt 5:17-20) I posib ki Erod ti konn sa byen. Sa politisyen malen pa ti pran okenn risk. Verse 4 i montre ki “i ti donn lord pour ki kat group [kat] solda i vey li. I ti annan lide fer ziz li an piblik apre [Lapak].” Zis mazin sa! Erod ti’n fer Pyer ganny ansennen avek de lasenn ant de solda, 16 gard an tou ti pe vey li lizour konman aswar pour fer sir ki i pa sove. Erod ti annan lentansyon prezant Pyer avek lafoul apre Lapak, e son lanmor ti pou parey en kado pour fer bann Zwif plezir. Dan en sityasyon difisil koumsa, ki bann frer ek ser dan kongregasyon ti kapab fer?
13, 14. (a) Ki mannyer kongregasyon ti azir ler Pyer ti ganny anprizonnen? (b) Ki nou kapab aprann atraver legzanp bann Kretyen dan premye syek konsernan lapriyer?
13 Kongregasyon ti konnen ki pour fer egzakteman. Verse 5 i dir: “Pandan ki Pyer ti dan prizon, bann manm [“kongregasyon,” NW] ti pe priy Bondye pour li avek bokou lafwa.” Wi, zot ti fer bann lapriyer entans e senser pour zot frer. Sa i montre ki lanmor Zak pa ti’n fer zot dezespere oubyen fer zot krwar ki zot lapriyer ti anven. Me o kontrer, zot ti konnen ki Zeova i vreman kontan ekout lapriyer son bann adorater fidel. Si sa bann lapriyer i an armoni avek son lavolonte, i reponn zot.—Ebr. 13:18, 19; Zak 5:16.
14 Ki nou aprann atraver lafason ki bann frer ek ser Kretyen ti azir? Kontinyen veye i enplik priy pa zis pour nou menm me osi pour nou bann frer ek ser. (Efe. 6:18) Eski ou konn bann frer ek ser dan kongregasyon ki pe fer fas avek bann leprev? Serten i kapab pe andir persekisyon, oubyen zot anba restriksyon ki gouvernman in met lo zot, ouswa zot pe fer fas avek dezas natirel. Akoz ou pa mazin zot dan ou lapriyer senser? Petet ou konn serten lezot ki pe andir lezot leprev ki pa sitan evidan. I kapab ki zot pe esey fer fas avek problenm fanmir, dekourazman oubyen problenm lasante. Akoz ou pa esey mazin bann dimoun spesifik ki ou kapab mansyonn zot non anmezir ki ou koz avek Zeova, sa Enn “ki ekout lapriyer”?—Ps. 65:2.
15, 16. (a) Dekrir konman ki en lanz Zeova ti liber Pyer dan prizon. (Vwar sa portre anba.) (b) Akoz i ankourazan pour reflesir lo lafason ki Zeova ti sov Pyer?
15 Me ki ti arive avek Pyer? Pandan son dernyen lannwit dan prizon, ler i ti pe dormi ant de gard, Pyer ti eksperyans diferan keksoz enkrwayab. (Lir Akt 12:7-11.) Dan ou lespri, esey vwar sa senn: En sel kou, en gro lalimyer ti kler sa kaso. En lanz ti pe debout la, me aparaman bann gard pa ti vwar li. Deswit, i ti lev Pyer. Bann lasenn ki ti avek son lanmen ti tonm en sel kou! Sa lanz ti gid Pyer an deor kaso, zot ti pas devan bann gard e ariv kot baro an fer ki ti ouver “tou sel.” Ler zot ti ariv an deor prizon lanz ti disparet. Pyer ti lib!
16 Ler nou reflesir lo pwisans ki Zeova i annan pour sov son bann serviter, eski pa sa i ranforsi nou lafwa? I vre ki nou pa ekspekte ki Zeova pou sov nou dan en fason mirakile konmela, me nou annan lafwa ki i pou servi son pwisans an faver son pep. (2 Kron. 16:9) Par mwayen son lespri sen pwisan, i kapab donn nou lafors pour fer fas avek nenport leprev. (2 Kor. 4:7; 2 Pyer 2:9) Byento, Zeova pou osi donn son Garson pouvwar pour liber plizyer milyon dimoun dan lanmor. (Zan 5:28, 29) Nou lafwa dan promes Bondye i kapab donn nou bokou kouraz ler nou rankontre bann leprev ozordi.
RANN TEMWANNYAZ PLENNMAN MALGRE DIFIKILTE
17. Ki bon legzanp zapot Pol in kite konsernan pres avek devouman e san tarde?
17 I annan en trwazyenm leson nou kapab aprann avek bann zapot konsernan kontinyen veye. Zot ti kontinyen rann temwannyaz plennman malgre difikilte. Pour nou kontinyen veye, i enportan pour nou prese avek devouman e san tarde. Zapot Pol i en bon legzanp dan sa domenn. I ti devoue dan predikasyon, i ti vwayaz en kantite e form en kantite kongregasyon. Menm si i ti eksperyans en kantite difikilte, i pa ti zanmen perdi son devouman oubyen tarde pour anons sa bon nouvel.—2 Kor. 11:23-29.
18. Ki mannyer Pol ti kontinyen donn temwannyaz menm si i ti anba sirveyans?
18 Dernyen fwa nou lir konsernan Pol dan liv Akt i dan sapit 28. Pol ti ariv Ronm kot i ti pou al devan Lanperer Nero. Ler i ti ariv laba, i ti ganny demande pour reste dan en lakaz prive avek en solda ki ti vey li. Petet son lanmen ti dan lasenn, atase avek sa solda. Pourtan, napa okenn lasenn ki ti kapab anpes sa zapot devoue koze. Pol ti kontinyen rod lezot fason pour donn en temwannyaz. (Lir Akt 28:17, 23, 24.) Trwa zour apre, Pol ti envit bann sef Zwif pour ki i donn zot en temwannyaz. En lot zour ki bann Zwif ti’n swazir, i ti donn en pli gran temwannyaz ankor. Verse 23 i dir: “Zot ti fikse en zour avek li, e sa zour la pli bokou zot ti vin war li kot i ti pe reste. Depi bomaten ziska aswar i ti eksplike e anons zot Rwayonm Bondye e esey konvenk zot konsernan Zezi atraver Lalwa Moiz ek liv bann Profet.”
19, 20. (a) Akoz Pol ti ganny bann bon rezilta dan son travay predikasyon? (b) Ki mannyer Pol ti reazir ler serten dimoun pa ti aksepte sa bon nouvel?
19 Akoz Pol ti ganny bann bon rezilta dan son travay predikasyon? Verse 23 i donn detrwa rezon. (1) I ti met lanfaz lo Rwayonm Bondye e lo Zezi Kri. (2) I ti esey tous leker son lodyans par “konvenk” zot. (3) I ti servi Lekritir pour rezonn avek zot. (4) I ti pli enterese avek bann dimoun ki avek son prop lekor akoz i ti donn temwannyaz “bomaten ziska aswar.” Pol ti donn en temwannyaz pwisan, me pa tou dimoun ki ti aksepte sa bon nouvel. Verse 24 i dir: “I annan ki ti aksepte sa ki i ti pe dir, me i annan ki pa ti krwar.” Sa ti kre divizyon e bann dimoun ti ale.
20 Eski zapot Pol ti dekouraze akoz pa tou dimoun ki ti aksepte sa bon nouvel? Non! Akt 28:30, 31 i dir: “Pol ti reste pandan de-z-an dan lakaz ki i ti’n lwe. I ti resevwar tou bann ki ti vin war li. I ti pres Rwayonm Bondye e ansennyen konsernan Senyer Zezi-kri avek lasirans san okenn lanpesman.” Liv Akt i fini lo sa not byen tousan.
21. Ki nou kapab aprann atraver legzanp Pol ler i ti en prizonnyen dan son lakaz?
21 Ki nou kapab aprann atraver legzanp Pol? Ler i ti en prizonnyen dan son lakaz, Pol pa ti kapab pres portanport. Me, i ti reste pozitif e i ti donn temwannyaz tou bann ki ti vin kot li. Pareyman ozordi, en kantite serviter Bondye i gard zot lazwa e kontinyen prese malgre zot ganny anprizonnen akoz zot lafwa. Serten pa kapab sorti dan zot lakaz oubyen menm zot reste dan en kazern akoz lavyeyes oubyen maladi. Me dapre zot sirkonstans, zot pres avek bann dokter ek staf, viziter ek lezot ki vin kot zot. Zot anvi rann en temwannyaz plennman lo Rwayonm Bondye. Pa nou vreman apresye zot bon legzanp!
22. (a) Kwa ki pe ed nou pour benefisye avek liv Akt? (Vwar bwat.) (b) Ki ou determinen pour fer anmezir ou esper lafen sa move lemonn?
22 Dan liv Akt, i kler ki i annan bokou pour nou aprann avek bann zapot ek lezot Kretyen dan premye syek ki’n ganny mansyonnen pour nou kapab kontinyen veye. Anmezir ki nou esper lafen sa move lemonn, annou determinen pour nou kontinyen imit sa bann Kretyen dan premye syek pour donn en temwannyaz avek bokou devouman ek lardyes. Napa en pli gran privilez ki nou kapab annan ki rann en temwannyaz pli plennman lo Rwayonm Bondye!—Akt 28:23.
[Kestyon]
[Portre lo paz 17]
“LIV AKT PA POU ZANMEN PAREY POUR MWAN ANKOR”
Apre ki i ti’n lir liv “Bearing Thorough Witness” About God’s Kingdom, en sirveyan rezyonal ti dir: “Liv Akt pa pou zanmen parey pour mwan ankor. Plizyer fwa mon’n lir resi dan liv Akt. Me i ti konmsi mon ti pe mars avek en labouzi dan fernwanr, dan en linet sal. La mon santi konmsi mon’n ganny beni, sa laklerte soley in ekler mwan.”
[Portre lo paz 16]
En lanz ti gid Pyer an deor en gran baro an fer
