Limanite pou benefisye avek servis en group pret rwayal
Limanite pou benefisye avek servis en group pret rwayal
“Zot en ras ki’n ganny swazir, en group pret rwayal, en nasyon sen, en pep ki pour Bondye.”—1 PYER 2:9.
ESKI OU KAPAB EKSPLIKE?
Kan ki en group pret rwayal ti ganny promet pour premye fwa?
Dan ki fason en group pret rwayal in vin an egzistans gras a nouvo lalyans?
Ki byenfe limanite pou gannyen atraver servis sa group pret rwayal?
1. Akoz “repa Senyer” i osi ganny apele Memoryal e ki son bi?
SA ZOUR swar le 14 Nizan lannen 33 N.L., Zezi Kri ek son 12 zapot ti selebre ansanm Lapak Zwif pour dernyen fwa. Apre ki i ti’n fer Zida Iskaryot, sa tret ale, Zezi ti entrodwir en selebrasyon ki pli tar in ganny apele “repa Senyer.” (1 Kor. 11:20) Sa levennman i osi ganny apele Memoryal lanmor Kris akoz de fwa Zezi ti dir “fer sa an mon souvenir.” (1 Kor. 11:24, 25) Pour obeir sa lord, Temwen Zeova dan lemonn antye i selebre Memoryal tou le-z-an. Pour lannen 2012, dapre kalandriye Labib, le 14 Nizan i konmans Zedi le 5 Avril, apre soley kouse.
2. Ki Zezi ti dir lo sa dipen ek diven ki i ti servi sa zour?
2 Dan zis de verse, Lik i rezim sa ki Zezi ti fer e dir sa zour. I ti ekrir: “I ti pran dipen, e apre ki i ti’n remersi Bondye, i ti kas li an morso e i ti donn zot an dizan, ‘Sa i [“reprezant,” NW] mon lekor ki’n ganny ofer pour zot. Fer sa an mon memwar.’ I ti osi pran lakoup apre repa an dizan, ‘Sa lakoup i nouvo lalyans ki’n ganny sele par mon disan, verse pour zot.’” (Lik 22:19, 20) Ki mannyer bann zapot ti konpran sa bann parol?
3. Ki mannyer bann zapot ti konpran sinifikasyon sa dipen ek sa diven?
3 Vi ki bann zapot ti bann Zwif, zot ti deza familye avek sakrifis zannimo ki bann pret ti ofer Bondye kot tanp Zerizalenm. Sa bann lofrann ti ganny ofer pour ganny faver Zeova e bokou parmi ti ganny ofer pour kouver pese dan en sans senbolik. (Lev. 1:4; 22:17-29) Sa i vedir ki bann zapot ti konpran ki Zezi ti pe al donn son lavi parfe konman en sakrifis kan i ti dir zot ki i ti pou ‘ofer son lekor e vers son disan pour zot.’ I ti pou en sakrifis ki ti pou annan bokou plis valer ki bann sakrifis zannimo.
4. Ki Zezi ti pe esey dir kan i ti dir: “Sa lakoup i nouvo lalyans ki’n ganny sele par mon disan”?
4 Me ki Zezi ti pe esey dir kan i ti dir: “Sa lakoup i nouvo lalyans ki’n ganny sele par mon disan”? Bann zapot ti konn sa profesi konsernan sa nouvo lalyans dan Zeremi 31:31-33. * (Lir.) Parol Zezi ti pe montre ki la aprezan i ti pe entrodwir sa nouvo lalyans ki ti pou ranplas lalyans Lalwa ki Zeova ti’n fer avek nasyon Izrael par lentermedyer Moiz. Eski sa de lalyans ti relye avek kanmarad?
5. Ki lespwar bann Izraelit ti annan gras a lalyans Lalwa?
5 I kler ki sa de lalyans ti mars ansanm. Kan i ti pe entrodwir lalyans Lalwa, Zeova ti dir nasyon Izrael: “Si zot fer tou sa ki mon’n dir e ki zot vreman gard mon lalyans, alor zot pou sirman vin mon propriyete spesyal parmi tou lezot pep, akoz later antye i pour mwan. Zot pou vin en rwayonm pret ek en nasyon sen pour mwan.” (Egz. 19:5, 6) Ki sa parol ti vedir pour bann Izraelit?
EN GROUP PRET RWAYAL I GANNY PROMET
6. Ki promes ki ti ganny realize atraver lalyans Lalwa?
6 Bann Izraelit ti konpran sa mo “lalyans” akoz Zeova ti’n fer lalyans oubyen lagreman avek zot zanset Noe ek Abraam. (Zen. 6:18; 9: 8-17; 15:18; 17:1-9) Dan sa lalyans ki i ti fer avek Abraam, Zeova ti fer sa promes: “Atraver ou desandans tou nasyon lo later pou sirman ganny beni.” (Zen. 22:18) Sa lalyans Lalwa ti ganny fer pour ki sa promes i ganny realize. Dapre lalyans Lalwa, bann Izraelit ti kapab vin “propriyete spesyal [Zeova] parmi tou lezot pep.” Pour ki rezon zot ti pou vin son propriyete spesyal? Pour ki zot “vin en rwayonm pret ek en nasyon sen” pour Zeova.
7. Ki sa lekspresyon “en rwayonm pret” i vedir?
7 Bann Izraelit ti konn byen sa laranzman konsernan bann lerwa ek pret, me Melkisedek ti sa sel zonm dan lepase ki’n okip tou le de fonksyon an menm tan avek laprouvasyon Zeova. (Zen. 14:18) Aprezan, nasyon Izrael ti pou kapab vin “en rwayonm pret.” Parey Labib i eksplike, sa i vedir ki bann Izraelit ti annan sa loportinite pour form en group pret rwayal, andotmo, bann lerwa ki an menm tan ti pou bann pret.—1 Pyer 2:9.
8. Ki responsabilite bann pret ki ti ganny apwente par Bondye ti annan?
8 Normalman, en lerwa i dirize. Me, ki en pret i fer? Ebre 5:1 i eksplike: “Tou Gran-Pret i ganny swazir parmi bann zonm e ganny etabli an faver zonm dan zot relasyon avek Bondye pour prezant lofrann ek sakrifis pour bann pese.” Dan sa ka, en pret ki Zeova ti apwente ti reprezant lepep devan Bondye, ti ofer bann sakrifis akseptab devan Zeova e i ti demann Li pour pardonn pese lepep. Deplis, en pret ti osi reprezant Zeova devan lepep e i ti ansenny zot bann lalwa ki Bondye ti donnen. (Lev. 10:8-11; Mal. 2:7) Dan sa bann fason, en pret ki ganny swazir par Bondye i ede pour rekonsilye lepep avek Li.
9. (a) Ki bann Izraelit ti devret fer pour ki zot “vin en rwayonm pret”? (b) Akoz Zeova ti swazir bann pret parmi bann Izraelit? (c) Dapre lalyans Lalwa, akoz bann Izraelit pa ti vin “en rwayonm pret”?
9 Alor, dapre lalyans Lalwa, dan pep Izrael i ti pou annan en group pret rwayal ki ti pou anmenn byenfe pour “tou lezot pep.” Me, i ti annan en keksoz ki zot ti pou bezwen fer pour ganny sa loportinite spesyal. Zeova ti demann zot pour ‘fer tou sa ki i ti’n dir e vreman gard son lalyans.’ Eski bann Izraelit ti pou kapab ‘fer tou sa ki Zeova ti’n dir zot’? Ziska en serten degre, wi. Eski zot ti pou kapab fer li parfetman? Non. (Rom. 3:19, 20) Sanmenm rezon ki Zeova ti swazir en group pret parmi bann Izraelit, ki pa ti pou bann lerwa. Zot ti pou ofer bann zannimo konman sakrifis pour zot pese e osi pour pese bann Izraelit. (Lev. 4:1–6:7; Ebr. 5:1-3; 8:3) Menm si Zeova ti aksepte sa bann kalite sakrifis, sa bann sakrifis pa ti kouver pese bann Izraelit konpletman. Bann pret ki ti pe servi anba lalyans Lalwa pa ti konpletman kapab rekonsilye bann Izraelit senser avek Bondye. Zapot Pol i dir: “I enposib pour disan toro ek bouk fer disparet pese.” (Ebr. 10:1-4) Lefet ki zot ti kontinyen kas Lalwa, bann Izraelit ti tonm anba en malediksyon. (Gal. 3:10) Pour sa rezon, zot pa ti pou kapab servi konman en group pret rwayal pour tou lezot pep lo later.
10. Ki ti bi lalyans Lalwa?
10 Eski promes ki Zeova ti fer avek bann Izraelit konmkwa parmi zot i ti pou annan “en rwayonm pret” ti zis dan vid? Pa ditou. Si zot ti senserman esey obeir, zot ti pou annan sa loportinite, me pa ler zot ti ankor anba Lalwa. Akoz? (Lir Galat 3:19-25.) Pour konpran sa, nou bezwen konpran bi lalyans Lalwa. I ti protez ladorasyon pir pour bann ki ti fidelman obeir li. Lalwa ti fer bann Zwif konsyan ki zot ti fer pese e ki zot ti bezwen en sakrifis ki annan plis valer ki sa bann ki gran pret ti ofer. Lalwa ti en gardyen ziska ki Kris ouswa Mesi i vini. Sa de tit i vedir “sa Enn ki’n ganny swazir.” Me selman, ler Mesi ti pou arive, i ti pou entrodwir sa nouvo lalyans ki Zeremi ti predir. Sa bann ki ti aksepte Kris ti ganny envite pour form par sa nouvo lalyans e zot ti pou vin “en rwayonm pret.” Annou vwar ki mannyer.
EN GROUP PRET RWAYAL GRAS A NOUVO LALYANS
11. Ki mannyer sa group pret rwayal ti vin an egzistans?
11 Lannen 29 N.L., Zezi sorti Nazaret ti vin Mesi. A laz 30 an, i ti batize pour montre ki i ti volonterman pare pour fer sa ki Zeova ti ekspekte avek li. Zeova ti apel li Son “Garson byenneme.” I pa ti vid delwil lo li me plito i ti vers son lespri sen pour swazir li. (Mat. 3:13-17; Akt 10:38) Par vers Son lespri sen lo Zezi, Bondye ti swazir li konman Gran Pret pour tou bann krwayan lo later e Zezi ti pou osi vin zot Lerwa pli tar. (Ebr. 1:8, 9; 5:5, 6) Gras a li, sa group pret rwayal ti pou vin an egzistans.
12. Kwa ki’n posib gras a sakrifis Zezi?
12 Konman Gran Pret, ki sakrifis Zezi ti kapab ofer ki ti pou konpletman kouver pese erediter bann krwayan? Parey i ti montre kan i ti entrodwir Memoryal son lanmor, sa sakrifis ki ti pou ganny ofer se son lavi parfe konman en imen. (Lir Ebre 9:11, 12.) Depi son batenm lannen 29 N.L. ziska son lanmor, Zezi konman Gran Pret ti ganny teste e prepare. (Ebre 4:15; 5:7-10) Apre ki i ti ganny resisite, i ti mont dan lesyel e prezant valer son sakrifis avek Zeova. (Ebr. 9:24) Depi sa, Zezi in kapab pled avek Zeova pour pardonn pese sa bann ki demontre lafwa dan son sakrifis e i ed zot pour servi Zeova avek lespwar pour ganny lavi eternel. (Ebr. 7:25) Se son sakrifis ki ti fer sa nouvo lalyans vin an fors. —Ebr. 8:6; 9:15.
13. Ki lespwar sa bann ki ganny envite dan sa nouvo lalyans ti pou annan?
13 Sa bann ki ti ganny envite pour form parti sa nouvo lalyans ti pou osi bezwen ganny swazir par lespri sen. (2 Kor. 1:21) Bann Zwif fidel e pli tar bann non Zwif ti pou form parti sa lalyans. (Efe. 3:5, 6) Ki lespwar sa bann ki dan sa nouvo lalyans ti pou annan? Zot pese ti pou konpletman ganny pardonnen. Zeova ti’n promet: “Mon pou pardonn zot fot, e mon pa pou mazin zot pese ankor.” (Zer. 31:34) Lefet ki legalman zot pese i ganny efase, prezan zot kapab vin “en rwayonm pret.” Pyer ti ekrir sa pour bann Kretyen swazir: “Me zot, zot en ras ki’n ganny swazir, en group pret rwayal, en nasyon sen, en pep ki pour Bondye, ki i’n swazir pour proklanm bann keksoz merveye konsernan sa enn ki’n apel zot pour sorti dan fernwanr pour vin dan son lalimyer merveye.” (1 Pyer 2:9, nou ki’n met an italik.) La Pyer pe sit parol ki Zeova ti’n dir nasyon Izrael kan i ti entrodwir Lalwa e i ti pe aplik li avek bann Kretyen ki ganny swazir dan sa nouvo lalyans. —Egz. 19:5, 6.
LIMANITE I BENEFISYE AVEK SERVIS SA GROUP PRET RWAYAL
14. Kote sa bann ki dan sa nouvo lalyans i akonplir zot servis?
14 Kote sa bann ki dan sa nouvo lalyans i akonplir zot servis? Ler zot lo later, konman en group, zot servi konman pret dan sa sans ki zot reprezant Zeova devan lepep par ‘proklanm bann keksoz merveye’ partou e donn nouritir spirityel. (Mat. 24:45; 1 Pyer 2:4, 5) Apre zot lanmor ek rezireksyon, zot akonplir zot servis ansanm avek Kris dan lesyel konman lerwa ek pret e okip tou le de fonksyon an menm tan. (Lik 22:29; 1 Pyer 1:3-5; Rev. 1:6) Pour konfirm sa, zapot Zan ti ganny en vizyon kot i ti vwar bann kreatir spirityel o bor tronn Zeova dan lesyel. Zot ti sant “en nouvo kantik” pour “Lanyo” an dizan: “Par ou disan, ou’n raste pour Bondye, zonm dan tou ras, tou langaz, tou pep ek tou nasyon. Ou’n fer zot vin en rwayonm pret pour servi non Bondye, e zot pou rennyen lo later.” (Rev. 5:8-10) Dan en vizyon ki i ti gannyen pli tar, Zan ti dir sa lo sa bann dirizan: “Zot pou vin pret pour Bondye e pour Kris, e zot pou renny avek li pandan 1000 an.” (Rev. 20:6) Ansanm avek Kris, zot form en group pret rwayal ki pou anmenn byenfe pour limanite antye.
15, 16. Ki byenfe bann imen pou gannyen avek servis sa group pret rwayal?
15 Ki byenfe sa bann ki lo later pou gannyen gras a servis sa 144,000? Revelasyon sapit 21 i dekrir zot konman en lavil dan lesyel, Nouvel Zerizalenm e i ganny apele “madanm Lanyo.” (Rev. 21:9) Verse 2 a 4 i dir: “E mon ti war desann sorti dan lesyel kot Bondye lavil sent, Nouvel-Zerizalenm, ki ti’n dekore parey en nouvel-marye ki’n abiye pour son msye. E mon ti tann en lavwa for sorti kot tronn kriye: ‘La aprezan Bondye in fer son demer parmi zonm. I pou reste avek zot. Zot pou vin son pep, e i pou vin zot Bondye. I pou eswiy tou larm dan zot lizye. Lanmor pou nepli egziste. Pou nepli annan ni dey, ni plere, ni soufrans, parski lemonn ansyen in disparet.’” Tou sa la i bann benediksyon merveye, pa i vre! Vi ki lanmor pou’n ganny eliminen, dey, larm, plere ek soufrans pou nepli egziste. Bann imen fidel pou gradyelman vin parfe e zot pou finalman rekonsilye avek Bondye dan en fason konplet.
16 Revelasyon 22:1, 2 i donn plis detay lo bann byenfe ki limanite pou gannyen atraver servis sa group pret rwayal. I dir: “I ti montre mwan larivyer delo lavi, ki ti kler konman kristal, sorti kot tronn Bondye ek Lanyo, e ki ti koul omilye lari dan lavil [Nouvel Zerizalenm]. Lo de bor sa larivyer, ti annan pye dibwa lavi, ki prodwi douz rekolt, en rekolt sak mwan. Fey sa pye dibwa pou servi pour gerizon tou bann nasyon.” Atraver sa provizyon senbolik, “bann nasyon” ouswa limanite pou’n ganny geri avek lenperfeksyon ki zot in erite avek Adan. Vreman, bann keksoz lepase pou nepli egziste.
SA GROUP PRET RWAYAL I FINI SON TRAVAY
17. Ki sa group pret rwayal pou finalman akonplir?
17 A lafen sa 1,000 an, sa group pret rwayal pou’n fini akonplir son misyon pour ki bann imen i vin parfe. Konman Gran Pret ek Lerwa, Kris pou prezant sa bann imen parfe avek Zeova. (Lir 1 Korentyen 15:22-26.) Sa group pret rwayal pou’n fini akonplir son lobzektif.
18. Apre ki sa group pret rwayal pou’n akonplir zot travay, ki mannyer Zeova pou servi zot?
18 Apre sa, ki mannyer Zeova pou servi sa bann ki’n annan sa gran privilez pour travay avek Kris? Dapre Revelasyon 22:5, “zot pou renny pour touzour.” Lo lekel ki zot pou dirize? Labib pa dir. Me sa kalite lavi ek leksperyans ki zot pou’n gannyen dan pe ed bann imen enparfe pour ariv ziska perfeksyon pou fer zot kalifye pour annan en pozisyon rwayal dan plan Zeova pour touzour.
19. Kwa ki pou dan lespri bann ki asiste Memoryal?
19 Kan nou zwenn ansanm pour selebre Memoryal lanmor Zezi le 5 Avril 2012, sa bann lansennyman Labib pou dan nou lespri. Sa pti group Kretyen swazir ki ankor reste lo later pou pran dipen san lelven ek diven rouz, ki montre ki zot en partisipan dan sa nouvo lalyans. Sa bann lanblenm ki reprezant sakrifis Kris i rapel zot sa privilez ek responsabilite merveye ki zot annan dan plan eternel Bondye. Nou tou, annou asiste Memoryal avek en gran lapresyasyon pour sa provizyon ki Zeova in fer pour ki nou benefisye avek servis en group pret rwayal.
[Not anba lo paz]
^ par. 4 Zeremi 31:31-33: “31 La sa ki Zeova in dir: ‘Ekoute! Bann zour pe vini kot mon pou fer en nouvo lalyans avek pep Izrael ek pep Zida, 32 pa en lalyans parey sa enn ki mon ti fer avek zot zanset letan mon ti atrap zot lanmen pour tir zot Lezip.’ La sa ki Zeova in dir: ‘Mon lalyans ki zot menm zot ti kase, menm si mon ti konman zot msye.’ 33 La sa ki Zeova in dir: ‘Sa i lalyans ki mon pou fer avek pep Izrael apre sa bann zour. Mon pou met mon lalwa dan zot, e mon pou ekrir li dan zot leker. Mon pou vin zot Bondye, e zot pou vin mon pep.’”
[Kestyon]
[Portre lo paz 31]
Limanite pou benefisye pour touzour atraver servis sa group pret rwayal
