Abraam en zonm kouraze

Abraam i get son fanmir ek son bann serviter anmezir zot met pare pour al Kanaan. (Zenez 12:1-5) Abraam i realize ki i annan en gro responsabilite anver zot anmezir i get sa gran group dimoun ki depan lo li pour zot dekwa. Ki mannyer i pou pran swen avek zot bann bezwen materyel dan en pei ki li menm i pa ni konnen? Eski sa latas ti pou’n pli fasil Our, sa gran lavil byen prospere kot i annan ase zerb pour zannimo, kot later i fertil e kot i annan ase delo? Ki pou arive si i malad ouswa mor dan sa nouvo pei? Lekel ki pou pran swen avek son fanmir? Menm si petet i enkyet pour sa bann keksoz, i pa pe les lafreyer paraliz li. I determinen pour ekout lord Bondye, malgre nenport kwa ki kapab arive. I demontre sa vre kouraz.

KI SI SA KOURAZ? Kouraz i ler en dimoun i for, ardyese e brav, i lekontrer avek kanmi ouswa timid. En dimoun ki kouraze pa neseserman vedir ki i pa per. Plito, avek sa kouraz ki Bondye i donnen, en dimoun i kapab pran aksyon malgre son lafreyer.

DAN KI FASON ABRAAM TI DEMONTRE KOURAZ? Abraam ti pare pour fer lekontrer avek sa ki lamazorite dimoun ti pe fer. Abraam ti grandi dan en lanvironnman kot bann dimoun ti ador plizyer bondye ek zidol. Pourtan, i pa ti les sa ki lezot ti panse anpes li fer sa ki i ti konnen i byen. Plito, avek kouraz, Abraam ti deside swiv en lot semen, i ti swazir pour ador Zeova, sa “Bondye Tre O.” ​—Zenez 14:21, 22.

Abraam ti met ladorasyon pour sa vre Bondye premye olye rod keksoz materyel. I ti pare pour abandonn son lavi konfortab Our e al dan en dezer avek konfyans ki Zeova ti pou pran swen avek son bann bezwen materyel. Byensir, anmezir letan ti pase, i kapab ki Abraam ti mazin sa konfor ki i ti annan Our. Me, Abraam ti asire ki Zeova ti pou toultan pran swen avek li ek son fanmir. Abraam ti reste atase avek Zeova konman sa personnaz pli enportan dan son lavi, e i ti ganny sa kouraz pour obeir bann lord Bondye.

KI LESON NOU TIRE? Devlop kouraz pour obeir Zeova menm si lezot otour nou pa pe fer parey, koumsa nou ava pe imit Abraam. Par egzanp, Labib i dir ki sa bann ki defann zot lafwa dan Zeova pou ganny opoze par zot bann zanmi ouswa fanmir ki kapab anvi sa ki paret pli byen pour zot. (Zan 15:20) Par kont, kan nou konvenki konsernan sa ki nou’n aprann lo Zeova, nou pou defann nou krwayans dan en fason respektab. ​—1 Pyer 3:15, 16.

 Nou osi kapab annan konfyans dan promes Zeova konmkwa i pou pran swen avek sa bann ki annan lafwa dan li. Sa konfyans i donn nou kouraz pour konsantre lo bann keksoz spirityel dan nou lavi olye lo bann keksoz materyel. (Matye 6:33) Annou vwar ki mannyer en fanmir in fer sa.

Menm si zot annan de pti garson, Doug ek Becky ti anvi al dan en pei kot i annan plis bezwen pour pres sa bon nouvel ki dan Labib. Apre ki zot ti fer resers e priy bokou lo sa size, zot ti deside fer sa ki zot ti’n dir. Doug i dir: “I ti demann kouraz pour pran tou nou zafer e ale, san konnen ki mannyer keksoz pou ete pour nou. Me, letan nou ti pe mazin lo sa lide pour premye fwa, nou ti koz lo legzanp Abraam ek Sara. Nou ti reflesir lo zot konfyans dan Zeova e lefet ki i pa ti abandonn zot, e sa ti ed nou en kantite.”

An rapor avek zot fason viv dan en lot pei, Doug i dir: “Nou’n ganny beni dan bann fason ekstraordiner.” I eksplike: “Vi ki nou viv en lavi senp, nou pas plis letan ansanm konman en fanmir pour prese, koz avek kanmarad e zwe avek nou de garson. Napa ase mo pour dekrir sa liberte ki nou annan.”

Byensir, pa tou dimoun ki dan en pozisyon pour fer sa sanzman enportan. Me, nou tou nou kapab imit legzanp Abraam, nou ladorasyon pour Bondye i devret premye dan nou lavi e nou devret annan konfyans ki i pou la pour siport nou. Kan nou fer sa, nou pe swiv konsey Labib pour ki “nou kapab dir avek kouraz: ‘Senyer i mon sekour, mon pa per personn.’” ​—Ebre 13:5, 6.

[Bwat/​Portre lo paz 7]

En bon madanm ki ti annan respe pour Bondye

Sara ti marye avek en zonm ki ti annan en lafwa remarkab. Me sa madanm ki ti annan respe pour Bondye in kit en legzanp ki bon pour nou gard antet. Anfet, trwa fwa Labib i nonm son non konman en dimoun ki ti annan respe pour Bondye e i en legzanp ki bon nou imite. (Izai 51:1, 2; Ebre 11:11; 1 Pyer 3:3-6) Menm si Labib pa koz sitan bokou lo sa madanm remarkab, sa ptigin ki i dir lo li i sifi pour montre nou ki i ti en dimoun eksepsyonnel.

Mazin par egzanp, premye reaksyon Sara kan Abraam ti dir li ki Bondye ti’n demann zot pour kit lavil Our. Eski i ti demande kote e akoz zot pe ale? Eski i ti enkyet pour zot bann bezwen materyel? Eski i ti sagren pour kit son bann zanmi ek fanmir, san konnen si i ti pou revwar zot ankor? Sirman i ti’n bezwen mazin tou sa la. Me kantmenm sa, i ti pare pour kit Our e i ti annan konfyans ki Zeova ti pou beni li pour son lobeisans. ​—Akt 7:2, 3.

Apard en serviter Bondye obeisan, Sara ti en bon madanm. I pa ti fer son dominer avek son msye pour li kontrol lafanmir, plito, i ti les tou dan lanmen son msye. I ti annan gran respe pour li e siport li avek lanmour anmezir i ti gid son fanmir. Par fer sa, sa bann kalite ti fer li annan en labote enteryer. ​—1 Pyer 3:1-6.

Eski bann madanm dan nou letan i benefisye avek son legzanp? En madanm ki apel Jil e ki’n marye pour 30 an i dir: “Legzanp Sara in montre mwan ki mon devret santi mwan alez pour koze e eksprim mon santiman avek mon msye.” I kontinyen an dizan: “Me, an menm tan, konman sef lafanmir, mon msye ki annan sa responsabilite pour fer desizyon final. Enn fwa ki i’n fer li, mwan mon fer tou pour ki son desizyon i mars byen.”

Petet legzanp pli tousan nou aprann avek Sara se sa: Menm si i ti vreman zoli fizikman, i pa ti les son labote fer li vin en dimoun ki tro fyer. (Zenez 12:10-13) Plito, i ti imilye son lekor e siport Abraam dan botan e menm dan movetan tou dilon zot lavi. San okenn dout, Abraam ek Sara ti fidel, annan limilite e en bon koup ki ti en led pour kanmarad.