Annou prezerv en leta lespri pozitif dan kongregasyon

ZWE

Annou prezerv en leta lespri pozitif dan kongregasyon

“Ki lagras Senyer Zezi-Kri i a avek [“sa leta lespri ki zot demontre,” NW].” —FILI. 4:23.

KI MANNYER NOU KAPAB PROMOT EN BON LETA LESPRI DAN KONGREGASYON . . .

ler nou asosye avek nou bann frer ek ser?

atraver nou devouman dan predikasyon?

ler nou devwal bann pese grav avek bann ansyen?

1. Pour ki rezon kongregasyon Filip ek Tyatir ti ganny felisite?

BANN Kretyen kongregasyon Filip dan premye syek ti vreman pov lo plan materyel. Toudmenm, zot ti zenere e demontre en lanmour remarkab anver lezot. (Fili. 1:3-5, 9; 4:15, 16) Se pour sa rezon ki a lafen son let, zapot Pol ti kapab dir sa parol: “Ki lagras Senyer Zezi-Kri i a avek [“sa leta lespri ki zot demontre,” NW].” (Fili. 4:23) Bann Kretyen lavil Tyatir ti demontre preski menm leta lespri e Zezi ti dir zot: “Mon konn tou sa ki ou fer, mon konn ou lanmour, ou lafwa, ou devouman dan servis, ek ou perseverans. Ou bann dernyen aktivite i pli gran ki bann okonmansman.” —Rev. 2:19.

2. Ki rol nou tou nou zwe pour ki nou kongregasyon i devlop en serten leta lespri?

²Sak kongregasyon Temwen Zeova ozordi i diferan e i demontre en serten leta lespri oubyen latitid. Par egzanp, serten kongregasyon i renonmen pour sa lanmour ek lafeksyon ki zot demontre. Lezot kongregasyon i annan repitasyon pour demontre en gran devouman dan predikasyon e dan servis a plen tan. Ler nou konman bann endividi nou demontre en leta lespri pozitif, nou zwe en rol pour ki kongregasyon i ini ansanm e progrese spirityelman. (1 Kor. 1:10) De lot kote, si nou menm nou demontre en leta lespri negatif, nou kapab kontribye pour ki kongregasyon i feb oubyen tyed lo plan spirityel, oubyen menm soutir lemal dan kongregasyon. (1 Kor. 5:1; Rev. 3:15, 16) Ki leta lespri ou kongregasyon i annan? Ou, ki ou kapab fer pour promot en leta lespri pozitif dan kongregasyon?

ANKOURAZ EN LETA LESPRI POZITIF

3, 4. Ki mannyer nou kapab “loue [Zeova] dan sa gran lasanble”?

³En psalmis ti sante: “Mon oule loue ou [Zeova] dan sa gran lasanble; Mon pou loue ou parmi en pep ki annan bokou dimoun.” (Ps. 35:18) Sa psalmis pa ti ezite pour loue Zeova kan i ti avek lezot serviter Bondye. Bann renyon kongregasyon, enkli Letid Latour Veyer i donn nou loportinite pour demontre nou devouman e eksprim nou lafwa atraver nou bann komanter. Nou tou nou devret demann nou lekor: ‘Eski mon pe profit byen tou loportinite pour partisip dan bann renyon? Eski mon prepar byen pour fer bann komanter enteresan dan bann renyon? Konman sef fanmir, eski mon ed mon zanfan prepar davans bann larepons e montre zot konman pour reponn dan zot prop mo?’

⁴Dan en psonm, David ti relye sant bann kantik avek en leker ferm. I ti dir: “O Bondye, mon leker i ferm, mon anvi sante e loue ou avek bann kantik.” (Ps. 57:7) Nou bann kantik dan bann renyon i donn nou loportinite pour “sante e loue” Zeova avek en leker ferm. Si nou pa tro konn serten sa bann kantik, akoz nou pa aprann sant zot dan ladorasyon fanmir? Annou determinen pour ‘sant pour Zeova tou dilon nou lavi; e loue Zeova avek bann kantik osi lontan ki nou ankor la.’ —Ps. 104:33.

5, 6. Ki mannyer nou kapab demontre zenerozite ek lospitalite anver lezot e ki lefe sa pou annan dan kongregasyon?

⁵En lot fason pour devlop en leta lespri lanmour dan kongregasyon se par demontre lospitalite anver nou bann frer ek ser. Dan dernyen sapit let Pol pour bann Ebre, Pol ti donn sa konsey: “Persevere dan lanmour pour kanmarad konman frer. Pa oubliye ki zot devre byen resevwar sa ki vin kot zot.” (Ebr. 13:1, 2) Envit sirveyan rezyonal ek son madanm ouswa bann serviter a plen tan dan ou kongregasyon i en bon fason pour demontre lospitalite. Pa oubliy bann vev, paran tousel ek lezot dimoun ki ti kapab benefisye ler zot zwenn avek nou pour en repa oubyen dan Ladorasyon fanmir.

⁶Pol ti demann Timote pour konsey lezot pour “fer sa ki byen, e ki zot larises i konsist an bonn aksyon. Zot devre montre zot zenere e touzour pare pour partaz avek lezot. Alor zot ava anmas en bon e solid trezor pour lavenir, e koumsa zot ava ganny vre lavi.” (1 Tim. 6:17-19) Pol ti pe sizere ki son bann frer ek ser dan kongregasyon i devlop sa leta lespri pour demontre zenerozite. Menm si i annan bann problenm ekonomik, nou kapab demontre zenerozite. En bon fason pour fer sa, se par donn pasaz bann ki al predikasyon oubyen renyon. Ki bann ki benefisye i kapab fer? Zot pou promot en leta lespri pozitif dan kongregasyon si zot demontre lapresyasyon petet par ede kouver fre bennzin ki kout ser konmela. Deplis, si nou pas plis letan avek nou bann frer ek ser dan kongregasyon, pa zot pou santi ki nou bezwen zot e ki nou kontan zot? Ler nou fer bokou bon keksoz pour lezot “sirtou [pour] nou bann frer dan lafwa” e nou pare pour depans nou letan ek sa ki nou annan, nou lanmour pour zot pou vin pli for e i pou osi ede devlop en leta lespri pozitif kot i annan lanmour dan kongregasyon. —Gal. 6:10.

7. Akoz ler nou pa rakont bann keksoz personnel lezot, sa i promot en bon leta lespri dan kongregasyon?

⁷Annou egzamin lezot domenn kot nou lanmour dan kongregasyon i kapab ogmante, e sa se lanmitye e gard serten keksoz konfidansyel. (Lir Proverb 18:24. *) Bann vre zanmi i pa akont lezot bann keksoz personnel son zanmi. Ler nou bann frer ek ser i revel zot panse ek santiman pli profon avek nou, e zot konnen ki nou pa pe al rakont sa avek personn, sa lanmour ki egziste pou vin pli for ankor. Annou promot en bon leta lespri parey en fanmir dan kongregasyon par vin en zanmi ki diny konfyans ki pa rakont bann keksoz personnel lezot. —Prov. 20:19.

ANNOU DEVOUE DAN MINISTER

8. Ki konsey bann Kretyen Laodise ti gannyen e akoz?

⁸Zezi ti dir kongregasyon Laodise: “Mon konn ou bann aktivite, ou pa ni fre ni so, ou ti devre swa fre swa so. Alor parski ou tyed, ki ou pa ni fre ni so, mon pou vomi ou par mon labous.” (Rev. 3:15, 16) Bann dimoun dan kongregasyon Laodise ti napa ase devouman dan predikasyon. Tre probab sa latitid ti annan en lefe lo zot relasyon antre zot. Alor, Zezi ti donn zot sa konsey avek lanmour: “Tou sa bann ki mon kontan, mon reprimann e mon koriz zot. Ou bezwen ganny bokou lantousyas, e sanz ou konportman.” —Rev. 3:19.

9. Ki lefe nou latitid vizavi predikasyon i annan lo kongregasyon?

⁹Pour ki kongregasyon i annan en bon leta lespri, nou devret demontre devouman dan predikasyon. Kongregasyon in ganny organize avek bi pour rod bann dimoun ki annan en leker senser dan teritwar e batir zot spirityelman. Alors, parey Zezi, nou devret partisip dan sa travay pour fer disip avek lantouzyasm. (Mat. 28:19, 20; Lik 4:43) Pli nou demontre devouman dan predikasyon, nou pou pli ini konman bann ki “travay ansanm pour Bondye.” (1 Kor. 3:9) Anmezir ki nou obzerv lezot ki pe defann zot lafwa dan predikasyon e eksprim lapresyasyon pour bann keksoz spirityel, sa i pous nou pour kontan e respekte zot plis. Deplis, servi “zepol kont zepol” dan minister i kre en bon latmosfer dan kongregasyon. —Lir Tsefanya 3:9. *

10. Kan nou amelyor kalite nou predikasyon, ki lefe sa i annan lo lezot dan kongregasyon?

¹⁰Sa zefor ki nou fer pour amelyore dan predikasyon i osi annan en bon lefe lo lezot. Par egzanp, si nou montre plis lentere dan bann dimoun ki nou zwenn e ki nou fer nou mye pour tous leker bann dimoun ki ekout nou, pa nou pou annan plis lantouzyasm pour nou minister! (Mat. 9:36, 37) Si nou annan plis lantouzyasm dan nou minister, pa sa pou pous lezot osi pour demontre plis lantouzyasm. Zezi ti anvoy son disip pres de par de olye anvoy zot tousel. (Lik 10:1) Sa pa ti zis ede pour ankouraz e form kanmarad me osi pour ogmant zot devouman dan predikasyon. Pa nou kontan pour travay avek bann proklanmater ki devoue! Zot lantouzyasm i ankouraz nou e motiv nou dan travay predikasyon. —Rom. 1:12.

KONTAN KONPLENT EK PESE GRAV

11. Ki kalite leta lespri bann Izraelit dan letan Moiz ti devlope e ki lefe sa ti annan lo zot?

¹¹Bann Izraelit ti fek ganny formen konman en nouvo nasyon e deza zot ti’n devlop en leta lespri kontan konplent ek mekontantman. Sa ti fer zot rebel kont Zeova ek son bann reprezantan. (Egz. 16:1, 2) Zis en ptigin Izraelit ki ti kit Lezip ki ti antre dan Later Promiz. Menm Moiz pa ti antre dan Later Promiz akoz son move aksyon ek move leta lespri kongregasyon Izrael. (Det. 32:48-52) Ki nou kapab fer ozordi pour nou osi rezet sa leta lespri negatif?

12. Ki mannyer nou kapab evite devlop en leta lespri kontan konplent?

¹²Nou devret evite devlop en leta lespri kot nou kontan konplent. Menm si nou bezwen devlop limilite ek respe pour lotorite, nou bezwen osi mazinen avek lekel nou pe asosye. Bann move swa dan domenn divertisman ouswa pas bokou letan avek bann koleg travay ouswa kanmarad lekol ki napa respe pour bann prensip Bondye pou annan en lefe lo nou. I pli saz pour limit lakantite letan nou pase avek bann dimoun ki annan en leta lespri negatif ouswa endepandan. —Prov. 13:20.

13. Si en dimoun i kontan konplent, ki i ti kapab arive fer dan kongregasyon?

¹³Bann ki kontan konplent i kapab tonm dan en lot fot ki pou annan en move lefe lo zot spirityalite. Par egzanp, kontan konplent i kapab kas linite ek lape dan kongregasyon. Deplis, ler ou pe kritik ou bann frer ek ser sa i kapab fer zot ditor, me i osi kapab fer ou fer bann pese parey maltret e kalonmni lezot. (Lev. 19:16; 1 Kor. 5:11) Serten ki ti kontan konplent dan kongregasyon dan premye syek pa ti aksepte lotorite Bondye e mepriz bann ki onorab. (Zid 8, 16) Nou kapab asire ki Zeova pa ti dakor avek sa bann dimoun ki ti pe kritik bann frer responsab dan kongregasyon.

14, 15. (a) Ki lefe i kapab annan lo kongregasyon si nou kasyet en pese grav? (b) Ki nou devret fer si nou konnen ki en dimoun i enplike dan en pese grav?

¹⁴Be si nou konn en dimoun dan kongregasyon ki’n komet en pese an sekre petet abiz lalkol, get pornografi oubyen annan en lavi imoral. (Efe. 5:11, 12) Kasyet sa pese grav i kapab anpes lespri sen Zeova beni plennman sa kongregasyon e vin en menas pour sa lape ki egziste. (Gal. 5:19-23) Zis parey bann Kretyen Korent ti bezwen tir lemal dan zot kongregasyon, bann move lenfliyans i bezwen ganny tire pour ki kongregasyon i gard en leta lespri pozitif. Ki ou kapab fer pour ede pour ki kongregasyon i reste anpe?

¹⁵Parey nou’n mansyonnen pli boner, i enportan ki nou pa rakont avek lezot bann laspe personnel lavi prive nou bann frer ek ser, sirtou kan zot in eksprim zot panse ek santiman personnel. I mal e i fer ditor kan nou fann bann lenformasyon personnel ki pa konsern lezot. Me, toudmenm, kan en pese grav i ganny komet, bann ansyen ki annan sa responsabilite spirityel pour okip sa bann sityasyon i devret ganny met okouran. (Lir Levitik 5:1. *) Alor, si nou konnen ki en frer oubyen en ser in fer en pese grav, nou devret ankouraz li pour apros bann ansyen e rod led. (Zak 5:13-15) Si i pa fer li dan en serten kantite letan, nou devret koz avek bann ansyen lo la.

16. Ki mannyer koz avek bann ansyen lo en pese grav i kapab prezerv bon leta lespri kongregasyon?

¹⁶Dimoun i devret santi li an sekirite dan kongregasyon. Ler nou raport en fot grav, nou protez sa bon lanvironnman ki egziste. Ler bann ansyen i arive ed en peser ki repantir ki aksepte reprimann ek koreksyon, i nepli en danze pour leta lespri kongregasyon. Me ki pou arive si sa dimoun ki’n komet en pese grav pa repantir e pa aksepte led bann ansyen? Ler sa dimoun i ganny ekskli dan kongregasyon, i konmsi sa move lenfliyans in ganny detrir parmi nou e leta lespri kongregasyon i ganny proteze. (Lir 1 Korentyen 5:5. *) An tou ka, prezerv bon leta lespri kongregasyon i demande ki nou tou nou pran aksyon ler i neseser, korpere avek konsey ansyen e protez byennet nou bann frer ek ser.

PREZERV LINITE KI LESPRI SEN I DONNEN

17, 18. Kwa ki pou ed nou ‘prezerv linite ki lespri sen i donnen’?

¹⁷Ler zot ti “pas bokou letan pour aprann avek bann zapot,” bann premye disip Zezi ti devlop en linite dan kongregasyon. (Akt 2:42) Zot ti kontan gidans ek konsey baze lo Labib ki sa bann zonm eksperyanse ti donnen. Vi ki bann ansyen i korpere avek lesklav fidel e pridan konmela, tou dimoun dan kongregasyon i ganny ankouraze e ede pour reste ini ansanm. (1 Kor. 1:10) Kan nou aksepte lenstriksyon baze lo Labib sorti kot lorganizasyon Zeova e swiv gidans bann ansyen, nou montre ki nou pe “fer tou pour prezerv linite ki Sent-Espri i donnen par lape ki ini [nou] ansanm avek kanmarad.” —Efe. 4:3.

¹⁸Alor, annou fer tou sa ki nou kapab pour ki nou prezerv en leta lespri pozitif dan kongregasyon. Si nou fer sa, nou kapab asire “ki lagras Senyer Zezi-Kri i a avek [‘sa leta lespri ki nou demontre,’ NW].” —Fili. 4:23.

[Not anba lo paz]

^ par. 7 Proverb 18:24: “I annan bann konpanyon ki la zis pour kraz son kanmarad, me i egziste en zanmi ki pli atase ki en frer.”

^ par. 9 Tsefanya 3:9: “Mon pou sanz langaz sa pep e fer zot koz en langaz pir, pour ki zot tou zot kriy o non Zeova, pour zot kapab servi li zepol kont zepol.”

^ par. 15 Levitik 5:1: “Si en dimoun in antann en malediksyon an piblik e i en temwen, oubyen i’n vwar e i okouran sa malediksyon, me i pa raporte, i pe fer en pese. Alor i bezwen rann kont pour son fot.”

^ par. 16 1 Korentyen 5:5 (NW): “Livre en zonm koumsa avek Satan pour detri lenfliyans laser e pour sov lespri kongregasyon zour Senyer.”

[Kestyon]

[Portre lo paz 24]

Eski ou bann bon larepons i ede pour devlop en bon leta lespri dan kongregasyon?

[Portre lo paz 25]

Aprann sant byen bann kantik i fer nou annan en bon leta lespri

LATOUR VEYER