Aprann avek Parol Bondye

Eski Labib i predir lavenir?

Sa lartik i soulev bann kestyon ki petet ou’n demande e i montre kote ou kapab trouv larepons sa bann kestyon dan ou Labib. I pou en plezir pour Temwen Zeova ed ou pour trouv larepons sa bann kestyon.

1. Eski bann profesi Labib i presi?

Zis Bondye Tou Pwisan ki kapab predir lavenir dan en fason presi. (Amos 3:7) Par egzanp, depi byen boner i ti predir larive en dimoun ki ti pou ganny apele Mesi oubyen Kris. Mesi ti pou en desandans Abraam, en zonm fidel. I ti pou vin en dirizan ki ti pou fer li posib pour bann imen obeisan viv en lavi parfe san okenn maladi. (Zenez 22:18; Izai 53:4, 5) Sa Mesi ti pou sorti dan lavil Betleenm. ​—Lir Mika 5:2.

Zezi ki ti vin sa Mesi. Plis ki set syek davans, Labib ti predir ki manman Mesi ti pou en vyerz e ki dimoun ti pou ay li. I ti pou donn son lavi pour pese bokou dimoun e i ti pou ganny antere parmi bann ris. (Izai 7:14; 53:3, 9, 12) Labib ti osi anonse apepre senk syek davans ki Mesi ti pou antre Zerizalenm lo en bourik e ki i ti pou ganny trai pour trant pyes larzan. Tou sa bann detay ti vin vre. ​—Lir Zekarya 9:9; 11:12.

2. Eski Bondye i predir bann dat?

Plis ki senk syek davans, Labib ti profetiz sa lannen egzakt ki Mesi ti pou vini. Labib ti anonse ki plizyer semenn lannen ti pou pase avan son larive. Sak “semenn” ti set lannen. I ti pou annan 7 azout 62 sa bann semenn, setadir 69 semenn lannen an tou, andotmo 483 lannen. Kan ki sa peryod letan ti konmanse? Dapre Labib, i ti konmans ler Neemya, en serviter Bondye ti ariv Zerizalenm e konmans rekonstri sa lavil. Listwar bann Pers i montre ki sa ti lannen 455 A.N.L. (Neemya 2:1-5) Zezi ti batize e vin Mesi 483 lannen pli tar, lannen 29 N.L., egzakteman sa lannen ki sa profesi ti’n ganny predir. ​—Lir Danyel 9:25.

  3. Eski bann profesi Labib pe vin vre la konmela?

Zezi ti profetiz bann keksoz vreman enportan ki ti pou arive dan nou letan. Sa profesi ti mansyonnen ki sa bon nouvel Rwayonm ti pou anmenn en soulazman pour tou dimoun ki kontan Bondye partou lo later. Sa Rwayonm pou anmenn en lafen avek sa move lemonn ki nou pe viv ladan. ​—Lir Matye 24:14, 21, 22.

Bann profesi Labib i dekrir an detay bann dernyen zour sa move lemonn. Menm si nou ti pou ekspekte ki dan nou letan i ti pou annan progre, Labib i dir ki dimoun ti pou gat later. Soufrans ki lager, lafamin, tranblemandter ek lepidemi ti pou anmennen ti pou ogmante. (Lik 21:11; Revelasyon 11:18) Standar moral ti pou pli degrade. Dan sa bann letan difisil, bann disip Zezi ti pou anons sa bon nouvel lo Rwayonm Bondye partou lo later. ​—Lir Matye 24:3, 7, 8; 2 Timote 3:1-5.

4. Ki lavenir pour limanite?

Bondye Tou pwisan in anmas bann bon keksoz pour bann imen fidel. Zezi Kri oubyen Mesi ansanm avek bann ki i’n swazir pou diriz lo later. Zot form sa gouvernman dan lesyel ki pou dirize pour mil an. Bann dimoun ki’n mor pou resisite e zot pou ganny en loportinite pour ganny lavi eternel. Deplis, sa Rwayonm pou geri tou dimoun ki pou lo later sa letan. Maladi ek lanmor pou nepli egziste.​—Lir Revelasyon 5:10; 20:6, 12; 21:4, 5.

Pour plis lenformasyon, vwar paz 23-25 ek 197-201 dan liv Ki Labib i vreman dir?.