Kan ki lager Armagedon pou vini?

“Mon ti regarde, i ti annan en gran lafoul devan mwan ki personn pa ti kapab konte, sorti dan tou nasyon, tribi, pep ek lalang . . . ki’n sorti dan sa gran ladetres.”​—REVELASYON 7:9, 14, New International Version.

ARMAGEDON in fini pare pour konmanse. Dan ki fason?

I deza annan en group dimoun dan lemonn antye ki pe servi Zeova e pe viv dapre son bann prensip o nivo. Avek sipor Bondye plizyer milyon dimoun ki sorti dan tou nasyon, tribi, pep ek lalang pe zwenn ansanm pour form en lasosyasyon frer ek ser ki ini dan lanmour. Sa fraternite i egziste parmi Temwen Zeova.​—Zan 13:35.

Tre byento Satan pou rasanble son larme e pou lans en latak pli feros lo sa pep ki kontan lape e ki paret san defans. (Ezekyel 38:8-12; Revelasyon 16:13, 14, 16) Ki mannyer ou kapab asire ki sa pou arive? Labib i dekrir serten levennman spesifik ki ed nou pour konnen kan ki lager Armagedon pou vini. En kantite sa bann levennman ki ti ganny predir pe akonplir ozordi.

Bann levennman ki ou vwar pe ganny akonplir

Bann disip Zezi ti demann li ki mannyer dimoun pou konnen kan ki “lafen” i pros pour arive. (Matye 24:3) Dan larepons ki Zezi ti donn zot, i ti pe refer avek en peryod letan dan lavenir kot “nasyon pou lager kont nasyon, rwayonm kont rwayonm e pou annan lafamin ek tranblemandeter dan plizyer landrwa.” I ti osi azoute: “Tou sa bann levennman pou zis parey bann premye douler ki en madanm ansent i gannyen avan lakousman.” (Matye 24:7, 8) Zapot Pol ti dekrir sa menm peryod letan konman “bann dernyen zour” an dizan ki i ti pou en letan “difisil.” (2 Timote 3:1) Eski ou santi ki sa bann profesi pe dekrir bann levennman ki pe arive ozordi?

Akoz sa peryod letan pou difisil? Zapot  Zan i dir nou akoz. I ti predir ki Satan ek son bann demon pou ganny anvoye lo later pour “zis en pti pe letan.” Pandan sa peryod letan, Satan pou dan “en gran lakoler.” (Revelasyon 12:7-12) Ou pa remarke ki konmela dimoun i pran lakoler pli vitman e zot vin pli vyolan, pa zis dan en landrwa, me dan lemonn antye?

Zezi ti osi dir ki pandan sa peryod letan byen difisil, i pou annan en travay ekstraordiner ki pou ganny fer. I ti dir: “Sa Bonn Nouvel Rwayonm [Bondye] pou ganny anonse partou dan lemonn pour tou dimoun konnen; e apre sa, lafen pou arive.” (Matye 24:14) Ozordi, dan plis ki 235 pei e plis ki 500 langaz, sa bonn nouvel konsernan Rwayonm Bondye pe ganny anonse par Temwen Zeova. Latour Veyer ek Awake!, de zournal baze lo Labib ki zot pibliye, i sa de magazin ki’n ganny distribye plis dan lemonn antye ki okenn lezot magazin. Zot in osi tradwir Labib dan anviron 100 langaz. Sa travay i ganny fer e finanse lo en baz volonter. Eski i posib ki sa travay enpresyonan i lakonplisman enn bann profesi Zezi?

Labib i osi koz lo bann levennman ki pou deklans sa lager ant Zeova ek bann ki opoz li. Annou vwar trwa profesi ki pou ganny akonplir.

Bann levennman ki ou pou vwar arive tre byento

Profesi 1. Labib i dir ki bann nasyon ki pa pe servi Bondye pou fer en deklarasyon ki “tou i an-pe e an sekirite.” I posib ki zot pou krwar ki zot in ariv lo en staz kot zot kapab rezourd bann problenm pli difisil ki imen pe fer fas avek. Par kont, bann levennman ki pou arive zis apre sa deklarasyon pou tou lekontrer avek lape.​—1 Tesalonisyen 5:1-3.

Profesi 2. Apre sa, i pou annan plizyer gouvernman ki pou deside pour vir kont bann lorganizasyon relizye dan lemonn. Labib i dekrir sa bann gouvernman konman en bebet feros e tou fo larelizyon dan lemonn konman en fanm prostitye ki pe asiz lo ledo sa bebet. (Revelasyon 17:3, 15-18) Sa bebet san realize pou fer travay Bondye par detrir bann fo larelizyon.

Dan en fason senbolik, zapot Zan ti dekrir sa levennman koumsa: “Sa dis korn ki ou ti war, zot ek sa bebet pou ay sa prostitye. Zot pou depouy li avek tou sa ki i posede e kit li touni. Zot pou devor son laser e bril li avek dife. Parski Bondye in plas dan zot leker lavolonte pour akonpli son plan.”​—Revelasyon 17:16, 17.

Profesi 3. Apre ki Satan pou’n reisi dan son latak kont fo larelizyon, i pou fer sa bann dimoun ki elwannyen avek Bondye lans en latak lo bann ki pe ador Zeova.​—Revelasyon 7:14; Matye 24:21.

Ki mannyer sa pou afekte ou?

Si ou pa’n zanmen ganny sans pour etidye Labib o profon, ou kapab vwar li difisil pour krwar ki sa bann levennman ki’n fek ganny dekrir pou vreman arive. Me i annan bon rezon pour krwar ki sak pti detay dan sa bann profesi pou ganny akonpli e ki sa bann levennman pou arive tre byento. Sa kantite profesi dan Labib ki’n fini ganny akonpli i donn lasirans ki sa pou arive. *

Akoz ou pa pran en pe letan pour rode akoz Temwen Zeova i konvenki ki “sa gran zour Bondye Toupisan” i pros pour arive e akoz ou napa okenn rezon pour per sa zour? Pa ezite pour demann zot pour koz lo sa ki Labib i dir en dimoun i devret fer pour ganny proteksyon Zeova. (Revelasyon 16:14) Sa ki ou pou aprann i kapab sanz lafason ki ou vwar lavenir.

[Not anba lo paz]

[Ekstre lo paz 8]

Eski i posib ki sa travay ki Temwen Zeova pe fer i lakonplisman enn bann profesi Labib?