Traizon, en siny enkyetan dan nou letan!

“Nou konportman avek zot bann krwaryan ti sen [oubyen “fidel,” NW], zis e san repros.”​—1 TESA. 2:10.

ROD SA BANN PWEN:

Ki leson nou aprann atraver legzanp Dalila, Absalonm ek Zida Iskaryot?

Ki mannyer nou kapab imit fidelite Yonatann ek Pyer?

Ki mannyer nou kapab kontinyen reste fidel dan maryaz e osi avek Zeova?

1-3. (a) Ki siny enkyetan ki komen dan nou letan e ki sa i enplike? (b) Ki sa trwa kestyon ki nou pou reponn?

KWA ki Dalila, Absalonm ek Zida Iskaryot i annan an komen? Zot tou zot ti tret. Dalila pa ti fidel avek Ziz Sanmson en zonm ki ti kontan li, Absalonm ti azir parey anver son papa Lerwa David ensi ki Zida anver son Met Zezi Kri. Dan tou le trwa ka, zot bann move aksyon ti anmenn en kantite problenm lo lezot. Me akoz sa i devret enteres nou?

² En ekriven dan nou letan i enkli traizon parmi en lalis bann move tre ki pli komen konmela. Sa pa drol akoz kan Zezi ti koz lo siny ki pou endik “konklizyon sa sistenm,” i ti dir: ‘En kantite pou trai kanmarad.’ (Mat. 24:3, 10) Trai en dimoun i vedir livre li oubyen met li dan lanmen son bann lennmi e sa i en form enfidelite. Sa mank fidelite i montre san dout ki nou pe viv dan sa “bann dernyen zour” ki Pol ti predir, kot dimoun ti pou “enfidel, . . .  tret.” (2 Tim. 3:1, 2, 4, NW) Menm si bann ekriven ek bann ki fer film i montre enfidelite ek traizon konman en keksoz romantik e eksitan dan zot bann film ek liv, sa bann move aksyon i koz bokou ditor ek soufrans dan lavi tou le zour. Sa bann move aksyon i definitivman en siny enkyetan dan nou letan!

³ Ki leson nou kapab aprann atraver legzanp bann dimoun dan Labib ki pa ti fidel? Legzanp fidelite lekel ki nou kapab imite? Avek lekel ki nou devret toultan reste fidel? Annou vwar.

BANN LEGZANP LAVERTISMAN DAN LEPASE

4. Ki mannyer Dalila ti trai Sanmson e akoz sa ti en keksoz vreman deplorab?

⁴ Premyerman annou egzamin legzanp Dalila, en madanm annsou ki Ziz Sanmson ti’n tonm anmoure avek. Sanmson ti determinen pour konbat kont  bann Filisten pour defann pep Bondye. Petet sa bann Filisten ti konnen ki Dalila pa ti kontan Sanmson avek tou son leker e pour sa rezon ki sa senk sef Filisten ti ofer Dalila en gro sonm larzan pour li rod sekre lafors Sanmson pour zot kapab touy li. Dalila ti pran zot larzan e fer sa ki zot ti demande. Trwa fwa i ti esey rod sekre lafors Sanmson me i pa ti reisi. Alor, Dalila ti kontinyen met presyon lo Sanmson “avek son bann parol e i ti kontinyen ensiste avek li.” Finalman, Sanmson “ti telman irite ziska ki i ti nepli kapab tenir.” I ti dir Dalila ki i pa’n zanmen koup son seve e si i ti fer sa i ti pou perdi tou son lafors. * Apre ki Dalila ti’n konn sa, i ti fer en dimoun raz latet Sanmson pandan ki i ti pe dormi lo son lazanm e apre i ti donn li dan lanmen son bann lennmi pour zot fer sa ki zot anvi fer avek li. (Ziz 16:4, 5, 15-21) Pa sa ki i ti fer ti vreman deplorab! Zis akoz i ti kontan larzan, Dalila ti trai en dimoun ki ti kontan li.

5. (a) Ki mannyer Absalonm ti demontre son enfidelite anver David e ki kalite dimoun sa i montre i ti ete? (b) Ki mannyer traizon Aitofel ti afekte David?

⁵ Annou aprezan egzamin legzanp Absalonm ki ti en tret. I ti sitan annan en gran dezir pour ganny pouvwar ki sa ti pous li pour pran tronn Lerwa David atraver en koudeta. Premye keksoz ki Absalonm ti fer, sete “vol leker bann Izraelit” par fer zot krwar ki i ti kontan zot e fer bann fo promes avek zot pour fer zot kontan li. I ti may e anbras zot e fer konmsi i ti vreman enterese avek zot ek zot bann problenm. (2 Sam. 15:2-6) Absalonm ti menm reisi fer Aitofel, sa zonm dan ki David ti annan bokou konfyans, vin dan son kote e fer li rebel kont David. (2 Sam. 15:31) David ti eksplike ki mannyer sa enfidelite lo la par Aitofel ti vreman afekte li dan Psonm 3 ek 55. (Ps. 3:1-8; Lir Psonm 55:12-14. *) Sa plan ki Absalonm ti fer kont sa lerwa ki Zeova ti’n apwente li menm i montre ki i ti napa okenn respe pour drwa Zeova pour dirize. (1 Kron. 28:5) A lafen, sa koudeta pa ti marse e David ti reste konman sa lerwa ki Zeova ti’n swazir.

6. Dan ki fason Zida ti trai Zezi e ki sa non i fer nou mazinen?

⁶ Aprezan mazin lafason ki Zida ti trai Kris. Pandan sa dernyen Lapak ki Zezi ti selebre avek son 12 zapot, i ti dir zot: “An verite, mon dir zot, enn parmi zot pou trai mwan.” (Mat. 26:21) Plitar sa menm swar kan zot ti dan zarden Zetsemane, Zezi ti dir avek Pyer, Zak ek Zan: “La i pe vini sa ki pou trai mwan!” A sa moman Zida ti arive avek en lafoul dimoun. I “ti apros Zezi e dir, ‘Mon salye ou Met!’ Apre i ti anbras li.” (Mat. 26:46-50; Lik 22:47, 52) Zida ti “livre disan inosan” Zezi dan lanmen son bann lennmi. Pour ki rekonpans sa zonm ki ti kontan larzan ti trai Zezi? Zis pour trant pyes larzan! (Mat. 27:3-5) Depi sa zour, sak fwa ki non Zida i ganny mansyonnen sa i fer nou mazin en dimoun ki tret espesyalman enn ki trai son prosen par fer krwar ki i ti son zanmi.

7. Ki leson nou aprann atraver lavi (a) Absalonm ek Zida e (b) Dalila?

⁷ Ki nou’n aprann atraver sa bann legzanp lavertisman? Absalonm ek Zida tou le de ti trai en dimoun ki Zeova ti’n apwente e pour fini kont zot ti mal fini. (2 Sam. 18:9, 14-17; Akt 1:18-20) Sak  fwa ki dimoun pou tann nonm non Dalila zot pou mazin son enfidelite ek son lanmour ki pa ti senser. (Ps. 119:158) I vreman enportan alor ki nou rezet bann tandans egois parey lanvi pouvwar ek kontan larzan ki kapab fer nou perdi laprouvasyon Zeova! Eski sa pa i en lavertisman pour nou pour rezet sa bann move tre ki kapab fer nou vin enfidel?

IMIT BANN KI TI RESTE FIDEL

8, 9. (a) Akoz Yonatann ti fer en lalyans ki i ti pou toultan fidel avek David? (b) Ki mannyer nou kapab imit Yonatann?

⁸ Labib i osi koz lo bann dimoun ki ti fidel. Annou egzamin de parmi sa bann legzanp e vwar ki nou kapab aprann avek zot. Annou konmans avek legzanp en zonm ki ti toultan fidel avek David. Yonatann, premye garson Lerwa Sail, ti pou’n probableman vin lerwa apre son papa, me i ti annan en keksoz ki ti anpes sa arive. Zeova ti swazir David pour vin sa lot lerwa Izrael dan son plas e Yonatann ti respekte sa desizyon ki Bondye ti’n pran. I pa ti zalou e konsider David konman son rival, o kontrer i ti “vin atase avek David” e i ti fer en lalyans avek li ki i ti pou toultan reste fidel avek li. I ti menm donn David son bann lenz, son sab, fles ek sang pour demontre loner anver David. (1 Sam. 18:1-4) Yonatann ti fer tou sa ki i ti kapab pour ‘ed David,’ i ti menm riske son prop lavi pour protez David kont Sail. Son fidelite ti pous li pour dir sa avek David: “Ou pou vin lerwa Izrael e mwan mon pou sa enn dezyenm apre ou.” (1 Sam. 20:30-34; 23:16, 17) I pa drol alor ki apre lanmor Yonatann, David ti fer en sanson pour eksprim son sagrinasyon ek lanmour pour li.​—2 Sam. 1:17, 26.

⁹ Yonatann ti konnen avek lekel ki i ti devret demontre fidelite. I ti soumet avek Zeova, Souvren liniver e i ti donn David tou son sipor konman sa enn ki Zeova in swazir. Pareyman ozordi, menm si nou pa’n ganny donnen en responsabilite spesyal dan kongregasyon, nou devret pare pour siport sa bann frer ki pe desarz bann responsabilite.​—1 Tesa. 5:12, 13; Ebr. 13:17, 24.

10, 11. (a) Akoz Pyer ti reste fidel avek Zezi? (b) Ki mannyer nou kapab imit Pyer e ki sa i devret motiv nou pour fer?

¹⁰ Sa lot bon legzanp ki nou pou egzaminen i legzanp zapot Pyer ki ti dir ki i ti pou toultan reste fidel avek Zezi. Bokou disip Zezi ti soke e aret swiv li akoz zot pa ti konpran en legzanp ki i ti servi pour eksplik lenportans pour demontre lafwa dan son sakrifis ki i ti pe al fer. (Zan 6:53-60, 66) Alor Zezi ti tourn ver son 12 zapot e demann zot: “E zot, zot pa anvi ale, zot osi?” Pyer ti reponn an dizan: “Senyer, kot lekel nou pou ale? Ou annan parol lavi eternel. Aprezan, nou, nou krwar e nou konnen ki oumenm ou sa Sen ki sorti kot Bondye.” (Zan 6:67-69) Eski sa i  vedir ki Pyer ti konpran tou sa ki Zezi ti dir konsernan sa sakrifis ki I ti pe al fer? I tre probab ki non. Me kantmenm sa, Pyer ti determinen pour reste fidel avek sa Enn ki Bondye ti’n swazir.

¹¹ Pyer pa ti mazinen ki Zezi pa ti pe rezonn byen e ki avek letan I ti pou realize e koriz sa ki I ti’n dir. O kontrer, Pyer ti annan limilite e i ti rekonnet ki Zezi ti “annan parol lavi eternel.” Pareyman ozordi, ki mannyer nou reazir si i annan en pwen dan nou bann piblikasyon Kretyen sorti kot “sa serviter fidel” ki difisil pour konpran oubyen ki pa annakor avek nou fason panse? Nou devret fer nou mye pour konpran sa lenformasyon byen plito ki ekspekte ki i pou annan en sanzman pli tar ki pou an armoni avek nou pwennvi.​—Lir Lik 12:42.

RESTE FIDEL AVEK OU KONZWEN

12, 13. Ki mannyer traizon i kapab arive dan en lavi maryaz e akoz laz en dimoun i pa en leskiz pour trai son konzwen?

¹² Dan nenport ki fason ki en dimoun i trai en lot sa i en move aksyon e nou pa devret les sa kas linite ek lape dan nou fanmir ek kongregasyon Kretyen. Avek sa antet, annou vwar ki mannyer nou kapab toultan reste fidel avek nou konzwen e avek nou Bondye.

¹³ Adilter i enn parmi bann form traizon ki koz plis ditor ek soufrans. Sa dimoun ki’n fer adilter in kas son fidelite avek son konzwen e enteres li avek en lot dimoun. Sa konzwen ki’n ganny trai i vwar li tousel en sel kou e son lavi in vin anbalao. Ki mannyer sa i kapab arive avek de dimoun ki ti kontan kanmarad? Premye keksoz ki arive souvan se ki sa de konzwen i nepli annan lafeksyon pour kanmarad. En ansenyan Sosyolozi, Gabriella Turnaturi, ti eksplike ki traizon i kapab arive dan en lavi maryaz kan en koup i aret fer tou sa ki zot kapab pour gard zot relasyon solid. Sa i menm kapab arive avek bann dimoun ki dan zot senkant an. Par egzanp, en zonm senkant an ti kit son madanm marye ki ti’n fidel avek li pour vennsenk an akoz i ti ganny atire par en lot madanm. Serten dimoun i dir ki sa i normal e i arive avek nenport ki dimoun ler zot ariv sa laz, zot dir ki i zis en faz dan lavi. Me olye dir ki sa i en keksoz normal, an realite i en form traizon. *

14. (a) Ki mannyer Zeova i santi konsernan traizon dan maryaz? (b) Ki Zezi ti dir konsernan enfidelite dan maryaz?

¹⁴ Ki mannyer Zeova i santi konsernan bann dimoun ki kit zot konzwen pour en rezon ki pa dapre Labib? Nou Bondye i ‘ay divors’ e i’n koz serye konsernan bann ki abiz e kit zot konzwen. (Lir Malaki 2:13-16. *) Zezi ti annan menm pwennvi ki son Papa konsernan enfidelite dan maryaz. I ti ansennyen ki en dimoun pa devret divors son konzwen ki inosan e fer konmsi napa nanryen ki’n arive.​—Lir Matye 19:3-6, 9.

15. Ki mannyer bann ki’n marye i kapab reste fidel avek zot konzwen?

¹⁵ Ki mannyer bann ki’n marye i kapab kontinyen reste fidel avek zot konzwen? Parol Bondye i dir: “Trouv lazwa avek madanm [oubyen msye] ou zenn tan” e “viv lavi avek sa madanm [oubyen msye] ki ou  kontan.” (Prov. 5:18; Ekle. 9:9) Anmezir ki laz i antre, tou le de konzwen i devret fer tou sa ki zot kapab pour fer zot relasyon reste for fizikman e emosyonnelman. Sa i enkli enteres zot avek kanmarad, pas letan avek kanmarad e vin pli pros avek kanmarad. Zot devret konsantre lo batir zot maryaz ek zot relasyon avek Zeova. Pour zot arive fer sa, bann koup marye i devret etidye Labib ansanm, pres regilyerman ansanm e demann Zeova son benediksyon atraver lapriyer ansanm.

RESTE FIDEL AVEK ZEOVA

16, 17. (a) Ki mannyer nou fidelite avek Zeova i kapab ganny teste dan fanmir ek kongregasyon? (b) Mansyonn en legzanp ki montre ki si nou aret asosye avek en manm fanmir ki’n ganny ekskli dan kongregasyon sa i kapab anmenn bon rezilta.

¹⁶ I annan bann dan kongregasyon ki ti komet bann pese grav e ki ti ganny reprimande “severman, pour ki zot lafwa i a vin for.” (Tit 1:13) Akoz zot move kondwit, sa bann dimoun ti bezwen ganny ekskli dan kongregasyon. Pour bann ki’n “ganny disiplinen,” sa disiplin in ed zot pour rebatir zot spirityalite. (Ebr. 12:11) Meton nou annan en manm fanmir oubyen zanmi pros ki’n ganny ekskli dan kongregasyon, ki mannyer nou pou demontre ki nou fidel? Nou pou bezwen demontre ki nou fidel avek Zeova, non pa avek sa dimoun. Zeova pe gete pour vwar si nou pou obeir son komannman pour pa annan okenn kontak avek personn ki’n ganny ekskli dan kongregasyon.​—Lir 1 Korentyen 5:11-13.

¹⁷ Annou vwar en legzanp kot en fanmir ki ti obeir komannman Zeova pour pa asosye avek en manm zot fanmir ki ti’n ganny ekskli dan kongregasyon e ki byenfe sa ti anmennen. En zenn frer ti’n ganny ekskli dan kongregasyon pour plis ki di-z-an e pandan tou sa bann letan son papa, manman ek son kat frer ti aret “asosye” avek li. Enn de fwa i ti esey enkli li dan bann aktivite son fanmir me sak manm son fanmir ti fer sir ki zot pa ti annan okenn kontak avek li. Apre ki i ti’n ganny reentegre dan kongregasyon, i ti dir ki i ti toultan mank sa bann bon moman ki i ti pase avek son fanmir, espesyalman dan aswar kan i ti tousel. I ti dir ki si son fanmir ti pas menm zis en ptigin letan avek li sa ti pou sifi. Me akoz son fanmir pa ti annan okenn kontak avek li sa dezir ki i ti annan pour asosye avek zot ti pous li pour retourn ver Zeova. Si i arive en zour ou ganny tante pour dezobeir Zeova par asosye avek en manm ou fanmir ki’n ganny ekskli dan kongregasyon, mazin sa legzanp.

18. Apre ki nou’n vwar valer fidelite ek move konsekans enfidelite, ki ou pou fer?

¹⁸ Nou pe viv dan en lemonn ki ranpli avek traizon ek enfidelite. Me pourtan, nou kapab trouv legzanp bann dimoun fidel dan kongregasyon ki nou kapab imite. Lafason ki zot viv zot lavi i montre ki zot “sen [oubyen “fidel,” NW], zis e san repros.” (1 Tesa. 2:10) Alor, annou kontinyen gard nou fidelite avek Bondye e avek kanmarad!

[Not anba lo paz]

[Kestyon]

[Portre lo paz 16]

Pyer ti reste fidel avek sa Enn ki Bondye ti’n swazir menm si lezot ti rezet Li