Zeova i konnen ki mannyer i pou delivre son pep
Zeova i konnen ki mannyer i pou delivre son pep
“Bondye i konnen ki mannyer i pou delivre bann dimoun ki atase avek li dan difikilte.”—2 PYER 2:9.
AKOZ NOU KAPAB ANNAN KONFYANS KI ZEOVA:
I konnen kan en levennman i bezwen arive pour akonplir son plan?
Pou servi son pouvwar pour entervenir pour son pep?
I konnen ki mannyer bann levennman enportan pou arive?
1. Ki pou arive letan “gran ladetres” i konmanse?
EGZEKISYON zizman Bondye lo sa lemonn Satan pou ariv en sel kou san ekspekte. (1 Tesa. 5:2, 3) Ler “gran zour Zeova” i konmanse, lemonn pou dan en konfizyon enkrwayab. (Tsef. 1:14-17) Lavi pou difisil e keksoz pou manke. I pou en letan pli terib “ki tou sa ki’n deza annan avan, depi konmansman lemonn ziska konmela.”—Lir Matye 24:21, 22. *
2, 3. (a) Ki pep Bondye pou pas atraver pandan “gran ladetres”? (b) Kwa ki pou fortifye nou pour sa ki pou arive byento?
2 Anmezir “gran ladetres” i ariv lo son pik, “Gog sorti dan pei Magog” pou lans en gran latak lo pep Bondye. Pandan sa latak, “en gran larme militer” parey “nyaz pour kouver later” pou atak pep Bondye. (Ezek. 38:2, 14-16) Napa okenn lorganizasyon imen ki pou kapab defann pep Zeova. Zis Bondye ki pou kapab delivre zot. Ki mannyer zot pou reazir ler zot pou nen-an-nen avek lanmor?
3 Si ou en serviter Zeova, eski ou annan lafwa ki Zeova i kapab e i pou delivre son pep pandan gran ladetres? Zapot Pyer ti ekrir: “Bondye i konnen ki mannyer i pou delivre bann dimoun ki atase avek li dan difikilte, e pou gard bann ki move pour pinisyon pour zour zizman.” (2 Pyer 2:9) Nou pou ganny fortifye si nou medit lo lafason ki Zeova ti azir dan lepase pour sov son bann serviter. Annou vwar trwa legzanp ki pou fer nou annan konfyans dan abilite ki Zeova i annan pour delivre son pep.
ZOT TI SIRVIV DELIZ
4. Kwa ki ti bezwen ganny fer avan Deliz?
4 Premyerman, annou egzamin sa resi lo sa Deliz ki ti arive dan letan Noe. Pour ki lavolonte Zeova i ganny akonplir, serten keksoz ti bezwen ganny fer avan Deliz i konmanse. Sa gro travay pour konstri lars ti devret terminen e bann zannimo ti devret ganny mete sen e sof dan sa lars avan ki gro lapli ti konmans tonbe. Liv Zenez i montre ki Zeova pa ti fer konstri lars e apre deside kan ki i ti pou anmenn sa Deliz, konmsi dat Deliz ti pou sanze zis an ka lars pa ti fini aler. Plito, en bann letan avan ki i ti demann Noe pour konstri lars, Bondye ti’n fini fikse en dat pour Deliz konmanse. Ki mannyer nou konn sa?
5. Ki Zeova ti dir dan Zenez 6:3 e kan ki sa desizyon ti ganny pran?
5 Labib i dir nou ki Zeova ti fer desizyon e anons sa desizyon dan lesyel. Dapre Zenez 6:3, i ti dir: “Mon pa pou kontinyen toler zonm pour touzour parski i laser apre tou. Alor son bann zour pou fini dan san ven-t-an.” Sa pa ti en deklarasyon konsernan lakantite letan ki imen i viv. Plito, i ti en desizyon kot Zeova ti pe dir kan ki i ti pou azir pour met en lafen avek mesanste lo later. * Vi ki Deliz ti konmans lannen 2370 A.N.L., nou mazinen ki Bondye ti dir sa parol lannen 2490 A.N.L. Sa letan Noe ti annan 480-z-an. (Zen. 7:6) Apepre 20-t-an plitar lannen 2470 A.N.L., Noe ti konmans annan zanfan. (Zen. 5:32) I ti reste preski san-t-an avan ki Deliz ti pou konmanse, me Zeova pa ti ankor dir Noe nanryen konsernan sa rol ki i ti pou zwe pour prezerv lavi bann imen. Konbyen letan Bondye ti pou espere avan i ti dir Noe?
6. Kan ki Zeova ti donn lord Noe pour konstri lars?
6 Aparaman Zeova ti esper plizyer deseni avan dir Noe ki I ti pe al fer. Akoz nou kapab dir sa? Labib i montre ki bann garson Noe ti’n fini grandi e marye ler Bondye ti demann Noe pour konstri lars. Zeova ti dir li: “Mon pe fer en lalyans avek ou; e ou, ou bann garson, ou madanm ek madanm ou bann garson i devret antre dan lars avek ou.” (Zen. 6:9-18) Alor, i posib ki ler Noe ti ganny sa lord pour konstri lars, i ti reste zis 40 ouswa 50 an avan Deliz ti konmanse.
7. (a) Dan ki fason Noe ek son fanmir ti demontre lafwa? (b) Kan ki Bondye ti finalman dir Noe sa dat ki Deliz ti pou konmanse?
7 Anmezir konstriksyon lars ti kontinyen, manke Noe ek son fanmir ti pe mazinen ki mannyer Zeova ti pou akonplir son plan e kan ki Deliz ti pou vini. Pourtan, sa ptigin ki zot ti konnen pa ti anpes zot konstri sa lars. Labib i dir: “Noe ti fer tou dapre sa ki Bondye ti’n donn li lord pour fer. I ti fer egzakteman sanmenm.” (Zen. 6:22) Set zour avan ki gro lapli ti tonbe, Zeova ti finalman dir Noe kan Deliz ti pou konmanse, e sa ti permet Noe ek son fanmir annan ase letan pour met bann zannimo dan lars. Alor, kan gro lapli ti konmans tonbe “disetyenm zour, dezyenm mwan, sis santyenm lannen lavi Noe,” tou keksoz ti’n pare.—Zen. 7:1-5, 11.
8. Ki mannyer sa resi lo Deliz i donn nou konfyans ki Zeova i konnen kan i pou delivre son pep?
8 Sa resi lo Deliz i montre ki Zeova i konn pli bon moman pour azir e pli bon fason pour sov son pep. Anmezir lafen sa move lemonn i aprose, nou kapab asire ki tou sa ki Zeova in predir pou ariv egzakteman sa “zour e sa ler” ki i’n plàn.—Mat. 24:36; lir Abakouk 2:3. *
DELIVRANS KOT LANMER ROUZ
9, 10. Dan ki fason Zeova ti servi son pep pour anbet bann larme Ezipsyen pour zot tonm dan en latrap?
9 Ziska aprezan, nou’n vwar ki Zeova i annan kontrol lo lafason ki bann levennman pou deroule pour akonplir son plan. Dezyenm legzanp ki nou pou egzaminen i met lanfaz lo en lot rezon akoz nou kapab annan konfyans ki Zeova i kapab delivre son pep. Sa rezon se ki I pou servi son pouvwar san limit pour fer sir ki son lavolonte i ganny fer. Zeova i touzour kapab sov son pep, me parler i les zot pas atraver bann sityasyon difisil pour kapab met son lennmi dan latrap. Sanmenm ki ti arive kan i ti delivre bann Izraelit dan lesklavaz Lezip.
10 Petet i ti annan apepre trwa milyon Izraelit ki ti kit Lezip. Zeova ti fer Moiz diriz zot dan en fason ki Faraon ti krwar ki zot pa ti konnen kot zot pe ale. (Lir Egzod 14:1-4. *) Faraon ti tonm dan sa latrap e i ti konmans tay deryer son bann lesklav ki ti’n paret pri kot Lanmer Rouz. I ti paret ki zot ti napa semen sove. (Egz. 14:5-10) Me anfet, bann Izraelit pa ti an danze. Akoz? Parski Zeova ti pe al entervenir pour delivre zot.
11, 12. (a) Dan ki fason Zeova ti entervenir pour son pep? (b) Ki ti finalman arive lefet ki Bondye ti’n entervenir e ki sa resi i ansenny nou lo Zeova?
11 Sa “kolonn nyaz” ki ti par devan pour gid bann Izraelit ti al deryer zot, pour anpes larme Ezipsyen apros zot. Sa kolonn nyaz ti fer en fernwanr terib lo kote bann Ezipsyen, me i ti donn laklerte bann Izraelit pandan lannwit. (Lir Egzod 14:19, 20. *) Apre sa, Zeova ti separ sa lanmer avek en gro divan les e “fer sa fon lanmer vin sek.” Sirman sa ti pran en bon pti pe letan akoz sa resi i dir: “Finalman bann garson Izrael ti travers o milye sa lanmer lo later sek.” Kontrerman avek larme Faraon ki ti dan zot saret lager, bann Izraelit ti pran bokou letan pour zot avanse. Pourtan, i pa ti posib pour bann Ezipsyen zwenn zot akoz Zeova ki ti pe lager pour bann Izraelit. “I ti fer bann Ezipsyen konfize. E i ti kontinyen tir larou lo zot saret pour ki zot kondwir zot saret avek difikilte.”—Egz. 14:21-25.
12 Enn fwa ki tou bann Izraelit ti sen e sof lo lot kote Lanmer Rouz, Zeova ti dir Moiz: “Fil ou lanmen par lao lanmer, pour ki delo i kouver bann Ezipsyen, zot bann saret lager ek zot kavalye.” Ler bann solda ti esey sove, “Zeova ti fer bann Ezipsyen reste dan milye lanmer.” Zot ti napa okenn fason pour sove. “Napa ni menm enn parmi zot ki ti reste.” (Egz. 14:26-28) Dan sa fason Zeova ti demontre ki i annan sa pouvwar pour delivre son pep dan okenn sityasyon.
SOV DESTRIKSYON ZERIZALENM
13. Ki lenstriksyon Zezi ti donn son bann disip e ki petet son disip ti’n kapab mazinen?
13 Zeova i konn egzakteman sa ki pou arive pour ki son plan i ganny akonplir. Nou trouv sa atraver sa trwazyenm legzanp ler bann solda ti anserkle Zerizalenm dan premye syek. Atraver son Garson, Zeova ti donn lenstriksyon ki ti pou sov lavi bann Kretyen ki ti pe viv Zerizalenm ek Zide avan ki i ganny detrir lannen 70 N.L. Zezi ti dir: “Kan zot a war sa [“keksoz degoutan ki anmenn,” NW] dezolasyon ki profet Danyel ti koz lo la, debout dan landrwa Sen, . . . alor fodre bann ki dan Zide, sov dan montanny.” (Mat. 24:15, 16) Me, ki mannyer bann disip Zezi ti pou konnen ki sa profesi ti pe ganny akonplir?
14. Ki ti arive Zerizalenm ki ti ed bann Kretyen konpran parol Zezi?
14 Anmezir bann levennman ti arive, sinifikasyon parol Zezi ti vin pli kler. Lannen 66 N.L., larme Romen anba komann Sestis Galis ti ariv Zerizalenm pour aret rebelyon bann Zwif. Kan bann Zwif rebel, renonmen konman bann Zelot ti rod refiz dan tanp, bann solda Romen ti konmans kas miray tanp. Pour bann Kretyen ki ti pe veye, zot ti konpran ki sa ti vedir. En larme payen ki ti vin avek bann senbol oubyen zidol (“sa keksoz degoutan,” NW) ti ariv ziska kot miray tanp (“landrwa Sen”). I ti’n ariv ler pour bann disip Zezi “sov dan montanny.” Me ki mannyer zot ti pou kit en lavil ki’n antoure avek solda? Sityasyon ti pe al sanz en sel kou.
15, 16. (a) Ki lenstriksyon presi Zezi ti donnen e akoz i ti enportan pour son bann disip swiv sa lenstriksyon? (b) Nou delivrans pou depan lo kwa?
15 Nou pa konnen akoz me Sestis Galis ek son latroup ti kit Zerizalenm en sel kou. Bann Zelot ti tay deryer zot. Vi ki sa bann rebel ensi ki larme Romen ti’n ale, bann disip Zezi ti ganny en sans pour zot sove. Zezi ti’n spesifikman demann zot pour les zot bann keksoz materyel deryer zot e kit sa landrwa deswit. (Lir Matye 24:17, 18.) Eski i ti vreman neseser pour zot kit lavil deswit? Larepons ti vin pli kler plitar. Pa tro bokou letan apre, bann Zelot ti retourn ankor e zot ti konmans fors bann zabitan Zerizalenm ek Zida pour zwenn ansanm avek zot dan zot rebelyon. Sityasyon dan sa lavil pa ti tarde pour deteryore anmezir plizyer group Zwif ti lager pour pran kontrol. I ti vin deplizanpli difisil pour sove dan sa lavil. Kan bann Romen ti retourn Zerizalenm lannen 70 N.L., i ti enposib pour kit lavil. (Lik 19:43) Tou sa bann ki ti’n tarde ti pri. Bann Kretyen ki ti’n ekout lavertisman Zezi pour sov dan montanny ti sirviv. Zot ti vwar pour zot menm ki Zeova i konnen ki mannyer i pou sov son pep. Ki leson nou tire avek sa resi?
16 Anmezir bann levennman i arive pandan gran ladetres, bann Kretyen pou bezwen ekout bann lenstriksyon sorti dan Parol Bondye ek son lorganizasyon. Par egzanp, sa lord ki Zezi ti donnen pour “sov dan montanny” i annan en sinifikasyon dan nou letan. Nou pa konnen ki mannyer nou pou ganny sove. * Me, nou kapab asire ki Zeova pou fer nou konpran sa bann lenstriksyon ler sa letan pou’n arive. Lefet ki nou delivrans pou depan lo nou lobeisans, i byen pour demann nou lekor: ‘Ki mannyer mon reazir anver bann lenstriksyon ki Zeova pe donn son pep la konmela? Eski mon azir deswit ouswa mon ezite pour obeir?’—Zak 3:17, NW.
LAFORS POUR FER FAS AVEK LAVENIR
17. Ki nou aprann atraver profesi Abakouk konsernan sa latak ki pou arive byento lo pep Bondye?
17 Annou aprezan retourn lo sa latak ki Gog pou fer ki nou ti koz lo la o konmansman. Dan en profesi ki relye avek sa, Abakouk ti dir: “Mon ti tande e mon vant ti bourye; akoz sa tapaz, mon lalev ti tranble, mon lezo ti konmans pouri e sa sityasyon ti pe fatig mwan e mon ti reste trankil e esper sa zour ladetres kan [Bondye] pou al ver sa pep [setadir bann larme ki pe menase], pour li atak zot.” (Aba. 3:16) Zis akoz i ti’n tande ki pep Bondye ti pou ganny atake, lestoman sa profet ti gronnyen, son lalev ti tranble e i ti santi li napa lafors. Reaksyon Abakouk i montre nou ki degre terib sityasyon pou ete kan latroup Gog pou vin atak nou. Toudmenm, sa profet ti pare pour esper gran zour Zeova trankilman. I ti annan konfyans ki Zeova ti pou delivre son pep. Nou osi nou kapab annan menm lasirans.—Aba. 3:18, 19.
18. (a) Akoz nou pa devret per sa latak ki pou arive byento? (b) Ki nou pou vwar dan prosen lartik?
18 Sa trwa legzanp ki nou’n vwar i montre klerman ki Zeova i konnen ki mannyer i pou delivre son pep. Son plan pou sirman ganny akonpli. Me, pour vwar lakonplisman sa gran laviktwar, nou bezwen reste fidel ziska lafen. Ki mannyer Zeova i ed nou pour gard nou lentegrite la konmela? Lot lartik pou koz lo la.
[Not anba lo paz]
^ par. 1 Matye 24:21, 22: “21 Sa pou en lepok gran soufrans [oubyen “gran ladetres,” NW], pli terib ki tou sa ki’n deza annan avan, depi konmansman lemonn ziska konmela, e pa pou zanmen ariv ankor. 22 Me si sa bann zour pa ti’n diminyen personn pa ti pou sove. Me sa bann zour in ganny diminyen akoz son pep ki in swazir.”
^ par. 5 Vwar Latour Veyer le 15 Desanm 2010 lo paz 30-31 an Angle.
^ par. 8 Abakouk 2:3: “Parski sa vizyon i pour letan fikse, e i kontinyen depese ziska lafen, e i pa pou en mansonz. Menm si i devret tarde, kontinyen esper li, sirman i pou arive. I pa pou an retar.”
^ par. 10 Egzod 14:1-4: “1 Zeova ti koz avek Moiz an dizan: 2 ‘Dir avek bann garson Izrael, ki zot devret retournen e zot devret kanpe devan Piairot ant Migdol ek sa lanmer anfas Baal-Tsefonn. Zot pou bezwen kanp dan sa landrwa o bor lanmer. 3 E Faraon pou sirman dir lo bann garson Izrael, “Zot pe ale vini dan en konfizyon dan sa pei. Zot in pri dan dezer.” 4 Mon pou les leker Faraon vin dir, e i pou sirman tay deryer zot e mon pou ganny laglwar pour mwan menm atraver Faraon ek tou son lafors militer; e bann Ezipsyen pou sirman konnen ki mwan mon Zeova.’ E se sanmenm ki zot ti fer.”
^ par. 11 Egzod 14:19, 20: “19 Apre sa, lanz sa vre Bondye ki ti pe ale par devan kan Izrael ti sorti e al deryer kan Izrael e sa kolonn nyaz ki ti par devan zot ti al deryer zot. 20 Alor, sa kolonn nyaz ti vin ant kan bann Ezipsyen ek kan Izrael. Lo en kote, sa kolonn ti en nyaz ek fernwanr. E lo lot kote i ti donn laklerte pandan lannwit. E sa group isi pa ti koste avek sa group laba lannwit antye.”
^ par. 16 Vwar Latour Veyer le 1 Me 1999 lo paz 19 an Angle.
[Kestyon]
