Zeova i protez nou pour ki nou ganny sove
Zeova i protez nou pour ki nou ganny sove
“Zot ki pe ganny proteze par pwisans Bondye atraver zot lafwa pour en delivrans ki’n pare pour ganny revele dan letan lafen.”—1 PYER 1:5, NW.
KI OU POU REPONN?
Dan ki fason Zeova in atir nou ver vre ladorasyon?
Dan ki fason nou kapab les Zeova gid nou atraver son bann konsey?
Dan ki fason Zeova i donn nou lankourazman?
1, 2. (a) Akoz nou asire ki Zeova pou ed nou gard nou lentegrite? (b) Ki kantite Zeova i konn nou?
“SA KI reste fidel ziska lafen pou ganny sove.” (Mat. 24:13) Parol Zezi i montre klerman ki pour nou reste vivan kan Bondye i egzekit zizman lo lemonn Satan, nou bezwen gard nou lentegrite ziska lafen. Me sa pa vedir ki Zeova i ekspekte ki nou andire ziska lafen par depan lo nou prop lafors oubyen lasazes. Dan Labib, nou annan sa lasirans: “Bondye i fidel dan son promes, e i pa pou permet ki nou ganny tante plis ki nou kapab siporte, me avek tantasyon i osi donn mwayen pour sorti pour ki ou kapab siporte.” (1 Kor. 10:13) Ki sa i enplike?
2 Pour ki Zeova i tenir son promes ki nou pa ganny tante plis ki nou kapab siporte i bezwen konn tou keksoz lo nou. Sa i enkli bann defi ki nou rankontre, sa ki nou vreman ete e ki kantite leprev nou kapab siporte. Eski Zeova i sitan konn nou ziska sa degre? Wi. Labib i asir nou tou ki Zeova i konn nou tre byen. I konn tou sa ki nou fer e nou bann labitid. I menm konn sa ki nou panse e sa ki dan nou leker.—Lir Psonm 139:1-6. *
3, 4. (a) Ki mannyer leksperyans David i montre ki Zeova i port en latansyon spesyal lo nou? (b) Ki travay remarkab Zeova pe fer ozordi?
3 Eski i en pti pe egzazere pour krwar ki Bondye i demontre sa kalite lentere dan bann senp imen parey nou? Psalmis David ti demann Zeova sa kestyon: “Kan mon vwar ou lesyel, travay ou ledwa, lalin ek zetwal ki ou’n fer, ki imen i ete ki ou gard li antet, e en senp imen ki ou pran swen avek li?” (Ps. 8:3, 4) Petet i ti demann sa kestyon akoz son prop leksperyans. Akoz? Parski i ti pli zenn parmi bann garson Zese, e se li ki Zeova ti’n trouve konman “en zonm ki fer plezir son leker” e i ti’n ganny swazir kan i ti ankor pe “swiv troupo pour vin en dirizan” lo Izrael. (1 Sam. 13:14; 2 Sam. 7:8) Zis mazinen ki mannyer David ti’n bezwen santi kan i ti konnen ki Kreater liniver ti’n port en latansyon spesyal anver son meditasyon ek refleksyon, li en zenn berze!
4 Pa i vreman remarkab ki Zeova i pran en lentere personnel dan nou osi ozordi! I pe rasanble “bann keksoz presye sorti dan tou nasyon” ver vre ladorasyon e i pe ed son bann serviter pour gard zot lentegrite. (Aga. 2:7) Pour pli byen konpran dan ki fason Zeova i ed nou gard nou lentegrite, annou reflesir lo lafason ki i atir bann dimoun ver vre ladorasyon.
BONDYE I ATIR NOU
5. Dan ki fason Zeova i atir bann dimoun senser anver son Garson? Donn legzanp.
5 Zezi ti dir: “Personn pa kapab vin kot mwan, si mon Papa ki’n anvoy mwan, pa atir li kot mwan.” (Zan 6:44) Sa parol i montre ki nou bezwen led Bondye pour kapab vin en disip Kris. Dan ki fason Zeova i atir bann dimoun senser anver son Garson? Atraver predikasyon sa bon nouvel ek lespri sen. Par egzanp, kan Pol ek lezot misyonner ti dan lavil Filip, zot ti zwenn en madanm ki ti apel Lidi e zot ti konmans partaz sa bon nouvel avek li. Sa resi i dir: “Senyer ti ouver son lespri pour li ekout byen tou sa ki Pol ti pe dir.” Wi, Bondye ti servi son lespri sen pour ed li konpran sa mesaz e finalman Lidi ek son fanmir ti ganny batize.—Akt 16:13-15.
6. Ki mannyer Bondye in atir nou tou ver vre ladorasyon?
6 Eski leksperyans Lidi ti inik? Sirman non. Si ou en Kretyen batize, ou osi ou’n ganny atire par Bondye ver vre ladorasyon. Zis parey nou Papa dan lesyel ti vwar en bon keksoz dan leker Lidi, i ti vwar en bon keksoz dan ou leker osi. Kan ou ti konmans ekout sa bon nouvel, Zeova ti ed ou pour konpran laverite atraver son lespri sen. (1 Kor. 2:11, 12) Kan ou ti fer zefor pour aplik sa ki ou’n aprann, i ti beni ou zefor. I ti kontan kan ou ti dedye ou lavi avek li. Depi ki ou’n konmans ou lakours pour lavi, Zeova in toultan la pour gid ou dan tou laspe ou lavi.
7. Ki mannyer nou konnen ki Bondye pou ed nou reste fidel?
7 Zeova in ed nou pour konmans servi li, alor i pa pou zanmen kit nou tousel pour ki nou kontinyen reste fidel avek li. I konnen ki zis parey nou pa ti vin dan laverite lo nou menm, nou pa pou reste dan laverite lo nou menm. Pyer ti ekrir bann Kretyen swazir: “Zot ki’n ganny proteze par pwisans Bondye atraver zot lafwa pour en delivrans ki’n pare pour ganny revele dan letan lafen.” (1 Pyer 1:5, NW) An realite, sa parol i aplik pour tou bann Kretyen e i devret enteres nou tou ozordi. Akoz? Parski nou tou nou bezwen led Bondye pour reisi reste fidel.
BONDYE I KAPAB ANPES NOU FER EN FOT
8. Akoz nou devret fer atansyon pour pa fer en fot?
8 Bann presyon lavi e nou prop lenperfeksyon i kapab fer nou aret konsantre lo bann keksoz spirityel. Sa i kapab fer nou fer bann fot san ki nou realize e finalman i vin en danze pour nou spirityalite. (Lir Galat 6:1.) Sa i kler atraver en lensidan ki ti arive dan lavi David.
9, 10. Ki mannyer Zeova ti anpes David fer en fot e ki I fer pour nou ozordi?
9 Lerwa Sail ti zalou e i ti pe tay deryer David pour touy li, me sa ki ti byen se ki David ti kontrol son lekor pour ki i pa lager avek sa lerwa. (1 Sam. 24:2-7) Me, en pe letan apre sa, David ti les son lakoler kontrol li. I ti bezwen bann provizyon pour son bann zonm e avek respe i ti al demann led avek en Izraelit apele Nabal. Kan Nabal ti konmans maltret li, David ti sitan ankoler ki i ti met li pare pour al lager avek Nabal ek son fanmir antye san realize ki i ti pe al touy bann inosan e sa ti pou fer li koupab devan Bondye. Abigail, madanm Nabal ti ariv a tan pour anpes David fer sa gro fot. David ti realize ki Zeova ti’n entervenir, alor i ti dir Abigail: “Beni Zeova Bondye Izrael ki’n anvoy ou ozordi pour rankontre mwan! Beni ou bon zizman, e ki ou ganny beni akoz ou’n anpes mwan koupab pour mert ozordi e ou’n anpes mwan servi mon prop lanmen pour delivre mwan.”—1 Sam. 25:9-13, 21, 22, 32, 33.
10 Ki leson nou aprann avek sa resi? Zeova ti servi Abigail pour anpes David fer en fot. I fer preski menm parey pour nou. Byensir, nou pa ekspekte ki Bondye pou anvoy en dimoun pour entervenir a sak fwa ki nou pe al fer en fot. Nou pa zanmen konn egzakteman ki mannyer Bondye pou azir dan nenport ki sityasyon ouswa sa ki i pou les arive pour akonplir son plan. (Ekle. 11:5) Toudmenm, nou kapab asire ki Zeova i toultan konn nou sityasyon e i pou ed nou reste fidel avek li. I asir nou: “Mon pou fer ou annan bon zizman e mon pou enstrir ou dan sa semen ki ou devret pran. Mon lizye pou lo ou pour konsey ou.” (Ps. 32:8) Ki mannyer Zeova i konsey nou? Ki mannyer nou kapab benefisye avek son konsey? Akoz nou kapab asire ki Zeova pe gid son pep konmela? Remarke, ki mannyer liv Revelasyon i reponn sa bann kestyon.
KONSEY I PROTEZ NOU
11. Ki kantite Zeova i konnen konsernan bann keksoz ki arive dan kongregasyon?
11 Dan en vizyon ki ganny rikorde dan Revelasyon sapit 2 ek 3, Zezi Kri pe enspekte sa set kongregasyon Lazi Miner. Sa vizyon i montre ki Kris pa zis vwar bann keksoz an zeneral, me i vwar tou bann pti detay. Dan serten sityasyon, i menm mansyonn non serten dimoun, i felisit e donn bann konsey apropriye. Ki sa i montre? Dan sa vizyon, sa set kongregasyon i reprezant bann Kretyen swazir apre 1914, e sa konsey ki i ti donn sa set kongregasyon i kapab aplik pour tou bann kongregasyon pep Bondye partou dan lemonn ozordi. Alors nou kapab dir ki Zeova pe gid son pep atraver son Garson. Ki mannyer nou kapab benefisye avek sa gidans?
12. Dan ki fason nou kapab les Zeova gid nou?
12 En fason nou benefisye avek bon gidans Zeova se atraver letid personnel. Atraver bann piblikasyon ki lesklav fidel e pridan i fourni, Zeova i donn nou en kantite konsey baze lo Labib. (Mat. 24:45) Pour nou benefisye avek sa bann konsey fodre absoliman nou pran letan pour etidye e aplik sa ki nou aprann. Letid personnel i en mwayen kot Zeova i kapab “prezerv [nou] e anpes [nou] tonbe.” (Zid 24) Eski ou’n deza etidye en lartik dan nou piblikasyon ki ou a krwar ti’n ganny ekrir pour ou? Ou devret aksepte sa koreksyon konmsi i sorti kot Zeova. Zis parey en zanmi ti pou tous ou lo ou zepol pour ou port latansyon lo en keksoz, Zeova i kapab servi son lespri sen pour atir ou latansyon lo serten laspe dan ou konportman ouswa personnalite ki ou, ensi ki bokou lezot osi i bezwen travay lo la pour amelyore. Si nou les lespri sen diriz nou, nou pe les Zeova gid nou. (Lir Psonm 139:23, 24. *) Pour sa rezon, i byen pour nou egzamin lafason nou etidye.
13. Akoz i byen pour nou egzamin lafason ki nou etidye?
13 Pas tro bokou letan dan bann divertisman i kapab pran sa letan ki nou ti kapab servi pour etidye personnelman. En frer ti dir: “I fasil pour pa fer letid personnel. Divertisman i partou kote, plis ki oparavan, e i pli bonmarse ki avan. I annan lo televizyon, lo konpiter e lo telefonn. I partou kote.” Si nou pa fer atansyon, sa letan ki nou devret pran pour fer en letid personnel o profon i kapab diminyen ptitapti ziska nou pa fer letid ditou. (Efe. 5:15-17) I byen pour nou tou demann nou lekor: ‘Konbyen fwa mon pran letan pour etidye o profon Parol Bondye? Eski mon fer li zis ler mon annan en diskour ouswa partisipasyon dan renyon?’ Si wi, petet i’n ler pour fer sanzman e servi byen sa letan ki’n ganny met dekote pour ladorasyon fanmir ouswa letid personnel pour apresye lasazes Zeova ki protez nou pour ganny delivrans.—Prov. 2:1-5.
LANKOURAZMAN I SOUTENIR NOU
14. Ki mannyer Labib i montre ki Zeova i konn byen nou santiman?
14 David ti fer fas avek bokou sityasyon difisil dan son lavi. (1 Sam. 30:3-6) Son parol enspire i montre ki Zeova ti konn son santiman. (Lir Psonm 34:18; 56:8. *) Bondye i konn nou bann santiman osi. I vin pli pros avek nou ler nou ‘leker i brize’ oubyen ler nou “lespri i fatige.” Lefet ki nou konn sa, sa i kapab rekonfortan, parey David ki ti sante: “Mon anvi zwaye e rezwir akoz ou labonte leker, akoz ou’n vwar mon soufrans; ou konnen ki mon dan ladetres.” (Ps. 31:7) Zeova pa zis remarke ki nou pe soufer, me i osi soutenir nou par rekonfort e ankouraz nou. En fason i fer sa i atraver nou bann renyon.
15. Ki leson nou kapab aprann avek leksperyans Azaf?
15 Leksperyans Azaf i montre nou lenportans pour asiste bann renyon. Ler Azaf ti pe konsantre lo bann lenzistis, i ti tant pour kestyonn lenportans pour servi Bondye. Sa ti dekouraz li. I ti dir: “Mon leker ti anmer e mon ti santi en gro douler dan mon ronnyon.” Pour fini kont, i ti pros pour aret servi Zeova. Kwa ki ti ed Azaf pour reganny son lekilib spirityel? I ti dir: “Prezan mon ti antre dan gran sanktyer Bondye.” Letan i ti laba, parmi bann adorater Zeova, i ti annan en pli bon fason panse. I ti vwar ki lareisit sa bann move dimoun ti zis tanporer e ki Zeova ti pou sirman azir. (Ps. 73:2, 13-22) I parey pour nou osi. Sa presyon pour fer fas avek bann lenzistis dan lemonn Satan i kapab epwiz nou. Kan nou zwenn ansanm avek nou bann frer ek ser dan kongregasyon, nou ganny ankouraze e sa i ed nou pour gard nou lazwa dan servis Zeova.
16. Ki nou aprann avek legzanp Ana?
16 Me ki ou pou fer si en sityasyon dan kongregasyon i fer li difisil pour ou asiste renyon? Petet ou’n perdi en privilez dan kongregasyon e ou anbarase, ouswa ou annan en problenm avek en frer oubyen ser dan kongregasyon. Si wi, legzanp Ana i kapab ed ou. Kekfwa ou rapel ki i ti bezwen siport Penina, lot madanm Elkana ki ti touzour sifok li. Sa sityasyon ti vin pli pir tou le-z-an sak fwa ki sa fanmir ti al Silo pour ofer sakrifis avek Zeova. Sa ti telman fatig Ana ki i ti zis “plere e pa manze.” Me, i pa ti les sa sityasyon anpes li al ador Zeova. Zeova ti remark son fidelite e i ti beni li.—Lir 1 Samyel 1:4-8 *, 11, 20.
17, 18. (a) Dan ki fason nou ganny lankourazman dan renyon? (b) Ki mannyer ou santi lefet ki Zeova i pran swen avek ou e protez ou ziska delivrans?
17 Bann Kretyen ozordi i annan bon rezon pour imit legzanp Ana. Nou bezwen asiste nou bann renyon regilyerman. Parey nou tou nou’n eksperyanse, renyon i ankouraz nou en kantite. (Ebr. 10:24, 25) Sa lanmour ki egziste dan kongregasyon i rekonfort nou. En senp parol dan en diskour ouswa en komanter i kapab tous nou leker. Dan en konversasyon avan ouswa apre renyon, en konpanyon Kretyen i kapab ekout nou ouswa dir nou en parol konsolan. (Prov. 15:23; 17:17) Ler nou sant pour Zeova avek tou nou leker, nou ganny fortifye. Nou sirtou bezwen lankourazman ki nou gannyen pandan renyon kan i annan ‘bokou keksoz ki pe fatig nou’ e Zeova i soutenir nou avek son prop “konsolasyon” e i siport nou pour ed nou reste fidel avek li.—Ps. 94:18, 19.
18 Avek tandres, Zeova i pran swen avek nou, sa i fer nou santi parey psalmis Azaf ki ti sante: “Ou’n tyonbo mon lanmen drwat. Avek ou konsey, ou pou gid mwan.” (Ps. 73:23, 24) Pa nou vreman rekonesan ki Zeova i protez nou pour nou ganny sove!
[Not anba lo paz]
^ par. 2 Psonm 139:1-6: “1 O Zeova, ou’n egzamin mwan, e ou konn mwan. 2 Ou’n arive konnen ler mon asize e ler mon leve. Depi dan lwen ou’n obzerv mon panse. 3 Kan mon vwayaze e kan mon alonze, ou’n vey lo mwan. Ou’n abitye avek tou sa ki mon fer. 4 Tou parol ki ankor lo mon lalang, ou’n deza konnen ki mon pe al dir, O Zeova. 5 Par devan e par deryer ou’n antour mwan. Avek ou lanmen ou protez mwan. 6 I vreman difisil pour mwan konn tou sa bann keksoz. Parski mon pa kapab konpran, telman zot ekstraordiner.”
^ par. 12 Psonm 139:23, 24: “23 O Bondye, fouy dan mwan e konn mon leker. Egzamin mwan, e dekouver bann panse ki pe fatig mwan. 24 Gete si ou vwar okenn keksoz ki anmenn douler dan mwan, e kondir mwan pour touzour lo sa semen letan endefini.”
^ par. 14 Psonm 34:18: “Zeova i pre avek sa bann ki annan leker brize; e i sov bann ki zot lespri i fatige.” 56:8: “Mon mars an tayan, ou menm ou’n dir. Met mon larm dan ou boutey lapo. Eski pa zot dan ou liv?”
^ par. 16 1 Samyel 1:4-8: “4 En zour Elkana ti al fer sakrifis e i ti donn bann porsyon son madanm Penina ek tou son bann garson ek fiy, 5 me i ti donn Ana zis en porsyon. Selman se Ana ki i ti kontan e Zeova ti’n ferm son matris. 6 Me sa lot madanm ti touzour pe sifok Ana lefet ki i ti dekonserte akoz Zeova ti’n ferm son matris. 7 Se koumsa ki i ti fer lannen apre lannen, sak fwa ki i ti al kot lakaz Zeova. Koumsa menm ki i ti sifok li pour ki i plere e pa manze. 8 Apre Elkana son mari ti dir li: ‘Ana, akoz ou plere, e akoz ou pa manze, e akoz ou leker i dan lapenn? Eski mon pa vo plis ki dis garson pour ou?’”
[Kestyon]
[Portre lo paz 29]
Ou osi Zeova in atir ou
[Portre lo paz 30]
Nou ganny proteze kan nou aplik konsey Bondye
[Portre lo paz 31]
Nou vin for atraver lankourazman ki nou gannyen
