En pwennvi pozitif malgre difikilte dan maryaz
En pwennvi pozitif malgre difikilte dan maryaz
“Avek bann ki’n marye mon donn sa lord: sa pa mwan ki dir me Senyer.”—1 KOR. 7:10.
ESKI OU KAPAB EKSPLIKE?
Dan ki sans Bondye in ini sa de konzwen?
Ki mannyer bann ansyen i kapab ed bann Kretyen ki pe rankontre problenm dan maryaz?
Ki mannyer nou devret konsider maryaz?
1. Ki mannyer bann Kretyen i devret konsider maryaz e akoz?
KAN bann Kretyen i marye, zot fer en ve devan Bondye e sa i en responsabilite ki pa devret ganny pran alalezer. (Ekle. 5:4-6) Konman Loter maryaz, Zeova in “ini” bann dimoun ki marye. (Mark 10:9) Sa linyon ant en koup marye i egziste devan Bondye menm si lalwa en pei i dir lekontrer. Bann serviter Zeova i devret konsider maryaz konman en laranzman ki pa devret ganny kase menm si zot pa ti ankor vin enn son serviter kan zot ti marye.
2. Ki kestyon ki nou pou egzaminen dan sa lartik?
2 Maryaz i kapab anmenn bokou boner pour en koup. Me ki sa koup i kapab fer si zot pe rankontre difikilte dan zot lavi maryaz? Eski zot kapab amelyor zot maryaz? Ki led bann koup i kapab gannyen si i napa lape dan zot maryaz?
ESKI I POU EN MARYAZ ERE OUBYEN MALERE?
3, 4. Ki kapab arive si en dimoun pa demontre lasazes kan i pe swazir en konzwen?
3 I en plezir kan maryaz en Kretyen i mars byen e sa i anmenn loner pour Zeova. Si sa maryaz pa reisi, i kapab fer sa de dimoun malere. En Kretyen ki anvizaze marye i annan sa sans pour konmans son lavi maryaz byen par swiv bann gidans Bondye. De lot kote, si i pa demontre lasazes kan i pe swazir en konzwen, i kapab eksperyans dezapwentman ek sagrinasyon. Par egzanp, i annan serten zenn ki konmans pwente kan zot pa ni menm ankor pare pour pran responsabilite ki vin avek en lavi maryaz. I annan dimoun ki rod en konzwen lo Internet e taye pour marye e i pa pran bokou letan avan ki zot rankontre difikilte dan maryaz. Serten i komet en pese grav kan zot pe pwente e konmans zot lavi maryaz avek en mank respe pour kanmarad.
4 I annan serten Kretyen ki pa marye “selon Senyer” e zot sibir move konsekans. (1 Kor. 7:39) Si ou dan sa sityasyon, demann Zeova son pardon ek led atraver lapriyer. Zeova pa retir konsekans pese, me i ed bann ki’n repantir pour fer fas avek zot difikilte. (Ps. 130:1-4) Fer tou pour fer plezir Zeova la konmela e pour touzour e ‘lazwa ki sorti kot Zeova pou vin ou lafors.’—Nee. 8:10.
KAN MARYAZ I PROS POUR KASE
5. Ki fason panse ki bann ki pe eksperyans difikilte dan zot maryaz i devret evite?
5 Bann dimoun ki eksperyans difikilte dan zot relasyon maryaz i kapab mazinen: ‘Eski i vo lapenn pour esey sov mon maryaz? Si zis mon ti kapab rekonmans tou avek en lot dimoun!’ Zot kapab mazin divorse e dir dan zot menm: ‘Pa i ti pou gou pour vin lib ankor! Akoz mon pa rod en divors? Kantmenm si mon napa en rezon dapre Labib pour divorse, mon kapab separe e retrouv lazwa dan mon lavi?’ Dan plas mazin dan sa fason, bann Kretyen i devret fer zot mye pour amelyor zot maryaz par rod e swiv gidans Bondye.
6. Eksplik sa parol ki Zezi ti dir ki’n ganny rikorde dan Matye 19:9.
6 Si en Kretyen i deside divorse, dapre Labib i pou kapab oubyen pa pou kapab remarye. Zezi ti dir: “Si en zonm i divors son madanm pour okenn rezon, eksepte si i’n tronp li, e i marye avek en lot madanm, i komet adilter.” (Mat. 19:9) Sa lekspresyon “tronp li” dan son sans orizinal i enplik adilter ek lezot pese ki relye avek sèks. I vreman enportan pour en Kretyen demann Bondye son gidans atraver lapriyer si i pe mazin divorse kan li oubyen son konzwen pa’n komet limoralite seksyel.
7. Ki bann dimoun i kapab panse si maryaz en Kretyen i kase?
7 Kan en maryaz i kase, sa i kapab montre ki relasyon enn oubyen toulede dimoun avek Bondye pa ti for. Zapot Pol ti demann sa kestyon vreman serye: “Si en dimoun pa konn diriz son prop lakour, ki mannyer i pou kapab pran swen [“avek kongregasyon,” NW] Bondye?” (1 Tim. 3:5) Anfet, kan maryaz en koup Kretyen i kase, bann dimoun otour zot i kapab panse ki sa koup pa ti pe vreman pratik sa ki zot ti pe ansennyen.—Rom. 2:21-24.
8. Kote sa koup in al mal si zot deside pour separe?
8 Kan tou le de konzwen batize i deside pour separe oubyen divorse dapre en rezon ki pa dan Labib, definitivman i bezwen annan en problenm dan zot relasyon avek Zeova. I posib ki enn oubyen zot tou le de pa pe aplik bann prensip Labib. Si zot ti pe vreman ‘met konfyans dan Zeova avek tou zot leker,’ zot pa ti pou mazinen ki sa bann difikilte ki zot pe rankontre dan zot maryaz pa kapab ganny rezourd.—Lir Proverb 3:5, 6. *
9. Ki byenfe bann Kretyen in gannyen akoz zot zefor ek pasyans dan zot maryaz?
9 Parfwa en maryaz ki ti paret pros pour kase i vin enn ki solid. Bann Kretyen ki kontinyen persevere menm si zot maryaz i difisil, i souvan rekolte bann byenfe. Annou vwar sa ki kapab arive dan en lakour kot zis en konzwen ki Temwen. Zapot Pyer ti ekrir: “Zot bann madanm, soumet sakenn avek son msye, pour ki, par zot kondwit, si serten parmi zot msye pa obei parol Bondye, zot a kapab kanmenm aksepte lafwa san laparol. Sa bann zonm i a war ki zot kondwi zot dan en fason drwat e avek respe.” (1 Pyer 3:1, 2) Sa i montre nou ki atraver bon kondwit son konzwen, en dimoun ki pa Temwen i kapab aksepte laverite. Lefet ki sa Kretyen pou’n sov son maryaz, sa pou anmenn loner lo Bondye e i kapab vin konman en gran benediksyon pour sa msye, sa madanm ek zanfan si zot annan.
10, 11. Ki problenm ki kapab arive san ekspekte dan en maryaz, me ki lasirans en Kretyen i annan?
10 Akoz zot anvi fer plezir Zeova, laplipar Kretyen i marye avek en dimoun ki’n dedye son lavi avek Bondye. Me kantmenm sa, sityasyon i kapab sanze san ekspekte. I kapab arive kot en konzwen i devlop en problenm emosyonnel vreman serye. I posib osi ki apre maryaz, en konzwen i vin en proklanmater inaktif. Annou pran legzanp Linda, * en Kretyen e manman byen devoue ki ti pas atraver sa sityasyon. I ti vwar son msye ki ti en frer batize swazir pour al kont sa ki Labib i dir e ganny ekskli dan kongregasyon. I pa ti konnen ki pour fer. Ki en Kretyen i devret fer si i pas dan en sityasyon parey pour Linda?
11 Petet ou kapab demann ou lekor: ‘Eski mon devret kontinyen esey fer mon maryaz marse malgre nenport kwa ki kapab arive?’ Personn pa kapab oubyen devret fer en desizyon pour ou. Kantmenm sa, i annan bann bon rezon pour pa abandonn ou maryaz menm si i paret pros pour kase. Bann msye ek madanm Kretyen ki andir en maryaz difisil akoz zot konsyans pa permet zot kit zot konzwen, i presye dan lizye Bondye. (Lir 1 Pyer 2:19, 20. *) Atraver son Parol ek lespri sen, Zeova pou ed en Kretyen ki fer bokou zefor pour fer zot maryaz marse menm si i pa fasil.
ZOT PARE POUR EDE
12. Ki mannyer bann ansyen pou vwar ou si ou vin rod zot led?
12 Si ou pe rankontre problenm dan ou maryaz, pa ezite pour rod led spirityel avek bann Kretyen matir. Bann ansyen i travay konman bann berze ki pran swen avek troupo e zot pou vreman kontan pour ed ou atraver bann konsey ki trouve dan Labib. (Akt 20:28; Zak 5:14, 15) Pa bezwen krwar ki bann ansyen pou perdi respe pour ou ek ou konzwen si ou rod zot led e koz lo bann problenm ki ou pe rankontre dan ou maryaz. Zot lanmour pour ou pou ogmante anmezir ki zot pou vwar ki ou vreman anvi fer plezir Bondye.
13. Ki konsey nou gannyen dan 1 Korentyen 7:10-16?
13 Bann ansyen i kapab donn bann koup ki zot konzwen pa Temwen bann konsey parey sa ki Pol ti ekrir: “Avek bann ki’n marye mon donn sa lord: sa pa mwan ki dir me Senyer, ki en madanm pa devre separe avek son mari. Si i fer li, i devre reste tousel ou sinon retourn avek son mari, e en mari pa devre divors son madanm. . . . Annefe, eski ou madanm, ou konnen si ou pou arive sov ou mari? Ou mari, eski ou konnen si ou pou arive sov ou madanm?” (1 Kor. 7:10-16) Pa i vreman en gran benediksyon kan en konzwen ki pa Temwen i vin en serviter Zeova!
14, 15. Dan ki sirkonstans en Kretyen i kapab deside pour separe avek son konzwen, me akoz i bezwen priy en kantite e analiz son sityasyon dan en fason onnet?
14 Dan ki sirkonstans en madanm Kretyen i kapab “separe avek son mari”? Serten in deside pour separe akoz zot konzwen pa ti oule siport zot fanmir. Lezot in separe akoz zot i’n ganny abize en kantite fizikman oubyen akoz zot spirityalite ti an danze.
15 Pour separe oubyen non i en desizyon personnel. Par kont, sa konzwen ki’n batize i bezwen priy en kantite lo sa size e analiz son sityasyon dan en fason onnet. Par egzanp, eski zis son konzwen ki pa Temwen ki’n met son spirityalite an danze oubyen eski pa li menm li ki pe negliz son letid Labib, pe souvan mank renyon e pa pe sorti dan predikasyon regilyerman?
16. Akoz en Kretyen pa devret taye pour divorse?
16 Lefet ki nou relasyon avek Zeova i presye e ki nou apresye maryaz konman en kado sorti kot li, sa i devret anpes nou taye pour divorse. Konman bann serviter Zeova nou anvi ki son non sen i ganny glorifye. Sirman alor, nou pa pou divorse avek nou konzwen akoz nou annan plan pour marye avek en lot dimoun.—Zer. 17:9; Mal. 2:13-16.
17. Dan ki sirkonstans nou kapab dir ki Bondye in apel bann koup Kretyen pour viv dan lape?
17 En Kretyen ki’n marye avek en dimoun ki pa Temwen i devret fer bokou zefor pour prezerv son maryaz. Par kont, si menm apre tou sa zefor ki i’n fer son konzwen i deside pour separe, sa Kretyen pa devret santi li koupab. Pol ti ekrir: “Si sa non-krwaryan i oule separe les li. Dan en tel ka, sa konpanny krwaryan, frer ou ser i lib, parski Bondye in apel nou pour viv dan lape.”—1 Kor. 7:15. *
MET OU LESPWAR DAN ZEOVA
18. Menm si nou pa kapab fer nou maryaz marse apre bokou zefor, ki byenfe sa i kapab anmennen?
18 Kan nou pe fer fas avek okenn problenm dan maryaz, annou rod led Zeova e toultan met lespwar dan li. (Lir Psonm 27:14. *) Annou pran legzanp Linda ki nou ti mansyonnen pli boner. Pour fini kont, i ti bezwen divors son msye menm si i ti fer bokou zefor pour plizyer lannen pour esey fer son maryaz marse. Eski Linda i santi ki in gaspiy son letan? I ti reponn: “Pa ditou. Zefor ki mon ti fer ti donn en bon temwannyaz bann dimoun otour nou. Mon konsyans i kler. Sa ki mon pli kontan se ki tou sa bann lannen ki mon’n esey fer mon maryaz marse, sa in ed nou fiy akoz i’n nobou reste for dan laverite. I’n batize konman en Temwen Zeova e i byen devoue.”
19. Ki kapab arive si nou fer zefor pour sov nou maryaz?
19 En madanm Kretyen ki apel Marilyn ti byen kontan ki i ti met son konfyans dan Zeova e pour fer ankor plis zefor pour sov son maryaz. I ti rakonte: “Mon ti pros pour separe avek mon msye akoz i pa ti pe siport mwan finansyerman e mon relasyon avek Zeova ti an danze. Pourtan mon msye ti en ansyen avan ki i ti konmans angaz li dan bann biznes ki ti afekte nou. I ti konmans mank renyon e nou ti aret koz avek kanmarad. En latak teroris ki ti arive dan lavil ti telman fer mwan per ki mon ti antre dan mon lakok. Apre mon ti realize ki mwan osi mon ti annan tor. Nou ti rekonmans koze, rekonmans nou letid fanmir e atenn renyon regilyerman. Bann ansyen ti vreman zantiy e zot ti ed nou en kantite. Nou ti retrouv sa lazwa ki nou ti’n perdi dan nou maryaz. Avek letan, mon msye ti kalifye pour reganny privilez dan kongregasyon. I pa ti fasil, me tou keksoz ti fini byen.”
20, 21. Ki nou devret determinen pour fer konsernan maryaz?
20 Ki swa nou selibater ouswa marye, annou toultan azir avek kouraz e met nou lespwar dan Zeova. Si nou pe rankontre problenm dan maryaz, nou devret fer bokou zefor pour rezourd sa bann problenm. Nou bezwen toultan gard antet ki bann ki’n marye, zot “nepli de me en sel.” (Mat. 19:6) Mazinen osi ki si nou andire malgre nou lavi maryaz pa fasil, nou konzwen ki pa Temwen i kapab sanze e ador sa vre Bondye e sa pou fer nou vreman kontan.
21 Dan nenport ki sirkonstans nou ladan, annou determinen pour azir dan en fason ki pou donn bann dimoun an deor kongregasyon en bon temwannyaz. Si nou pe rankontre difikilte dan nou maryaz, annou priy bokou, onnetman egzamin nou motivasyon, medit o profon lo sa ki Labib i dir e rod led spirityel avek bann ansyen. Pli enportan ankor, annou determinen pour fer plezir Zeova dan tou sa ki nou fer e demontre vre lapresyasyon pour maryaz, sa zoli kado ki Zeova in ofer nou.
[Not anba lo paz]
^ par. 8 Proverb 3:5, 6: “5 Met ou konfyans dan Zeova avek tou ou leker e pa apiy lo ou prop konprenezon. 6 Dan tou ou semen pran li an konsiderasyon e li i pou fer drwat ou bann santye.”
^ par. 10 Non in ganny sanze.
^ par. 11 1 Pyer 2:19, 20: “19 Annefe, i en benediksyon si en dimoun i siport par lanmour pour Bondye [oubyen “akoz son konsyans devan Bondye”, NW], bann soufrans enzisteman. 20 Ki benefis en dimoun i gannyen, si i bezwen siport move tretman pour fot ki i’n fer? Me si ou soufer avek pasyans pour sa ki ou’n byen fer, sa i ganny aprouve par Bondye.”
^ par. 17 Vwar liv “Reste dan lanmour Bondye” lo paz 219-221; Latour Veyer le 1 Novanm 1988 paz 26-27 an Angle; le 15 Septanm 1975 paz 575 an Angle.
^ par. 18 Psonm 27:14: “Met ou lespwar dan Zeova, pran kouraz e fodre ki ou leker i for. Wi, met ou lespwar dan Zeova.”
[Kestyon]
[Ekstre lo paz 20]
Bann Kretyen ki kontinyen fer zefor pour sov zot maryaz i kapab ganny en bon rekonpans
[Ekstre lo paz 22]
Toultan met ou lespwar dan Zeova e rod led avek li pour ganny kouraz
[Portre lo paz 19]
Zeova i beni bann koup Kretyen ki fer bokou zefor pour fer zot maryaz marse menm si i pa fasil
[Portre lo paz 21]
Kongregasyon Kretyen i kapab vin en sours rekonfor ek led spirityel pour nou
