Eski ou vreman apresye maryaz konman en kado sorti kot Bondye?

“Ki Zeova i donn zot en kado e zot trouv en landrwa repo sakenn dan lakaz zot msye.”​—RIT 1:9.

ROD SA BANN LAREPONS:

Akoz nou kapab dir ki bann serviter Bondye dan lepase ti apresye maryaz konman en kado sorti kot li?

Ki mannyer nou konnen ki Bondye i enterese avek sa kalite dimoun ki nou swazir pour marye avek?

Ki konsey Labib lo maryaz ou pe plàn pour met an pratik dan ou lavi?

1. Dekrir reaksyon Adan kan i ti ganny son madanm.

“LA LA anfen lezo sorti dan mon lezo e laser sorti dan mon laser. Sa enn pou ganny apele Madanm, akoz in ganny tire avek zonm.” (Zen. 2:23) Zis imazinen ki mannyer sa premye zonm Adan ti bezwen ere kan i ti ganny en madanm! I pa drol ki dan son lakontantman i ti koz dan en fason poetik! Zeova ti fer Adan tonm dan en profon sonmey e pandan ki i ti pe dormi, Zeova ti servi enn son kot pour kre sa zoli madanm. Plitar Adan ti apel li Ev. Bondye ti marye zot e zot ti vin msye ek madanm. Vi ki Bondye ti servi kot Adan pour kre Ev, zot ti sa koup ki ti pli pros avek kanmarad ki okenn koup dan nou letan.

2. Akoz bann zonm ek fanm i santi zot atire anver kanmarad?

² Avek son gran lasazes ki personn pa kapab imite, Zeova ti kre imen avek sa abilite pour santi e demontre lanmour romantik. I sa kalite lanmour ki atir en zonm ek en fanm avek kanmarad. The World Book Encyclopedia i dir: “En zonm ek en fanm i marye avek lespwar pour annan relasyon seksyel ek santiman romantik pour kanmarad pour touzour.” Sa in arive plizyer fwa parmi pep Zeova.

MARYAZ TI EN KADO KI ZOT TI APRESYE

3. Ki mannyer Izaak ti ganny son madanm?

³ Abraam, en zonm fidel ti annan bokou respe pour maryaz. I ti anvoy son pli vye serviter Mezopotami pour rod en madanm pour Izaak. Sa serviter ti demann led Zeova atraver lapriyer e sa ti anmenn bon rezilta. Rebeka ki ti annan lakrent pour Bondye ti vin madanm byenneme Izaak e i ti zwe en rol dan laranzman ki Bondye ti’n fer pour prezerv desandans Abraam. (Zen. 22:18; 24:12-14, 67) Menm si  nou annan bon lentansyon, sa pa vedir ki nou kapab deside lo nou menm pour ankouraz de dimoun pour devlop lanmour romantik pour kanmarad. Dimoun konmela i pli kontan desid pour zot menm avek lekel zot pou marye. Ni menm Bondye pa fer sa desizyon pour nou, me i pou gid bann Kretyen dan sa laspe ek lezot laspe zot lavi si zot demann li son led atraver lapriyer e les zot ganny gide par son lespri sen.​—Gal. 5:18, 25.

4, 5. Kwa ki konvenk ou ki sa fiy Soulamit ek sa berze ti anmoure?

⁴ En zoli fiy Soulamit ki ti viv an Izrael dan letan lontan pa ti anvi son bann zanmi met presyon lo li pour vin enn bann madanm Lerwa Salomon. I ti dir: “Mon’n fer zot fer en serman, bann fiy Zerizalenm, pour pa esey fer mwan kontan oubyen tonm anmoure san ki mwan menm mon anvi.” (Sal. 8:4) Sa fiy Soulamit ti anmoure avek en lot dimoun ki ti en berze. Avek limilite sa fiy ti dir: “Mon parey en pti fler safran dan laplenn lo lakot, en lis dan laplenn.” Me, sa berze ti reponn: “Mon konpanyon parmi bann fiy, i parey en lis parmi bann pye pikan”! (Sal. 2:1, 2) Zot ti vreman kontan kanmarad.

⁵ Lefet ki sa fiy Soulamit ek sa berze ti dabor annan lanmour pour Bondye, si zot ti marye zot maryaz ti pou vreman solid. Anfet, sa fiy ti dir avek sa berze: “Met mwan parey en bag lo ou leker, parey en bag lo ou ledwa, akoz lanmour i osi for ki lanmor, i demann en latasman zis pour li tousel zis parey Seol ki pa oule sede. Lanmour i parey en laflanm dife, laflanm Ya [akoz i sorti kot li]. En ta delo pa kapab tenny lanmour, menm bann larivyer pa pou kapab trenn li. Si en zonm i donn tou bann keksoz valer dan son lakaz pour lanmour, dimoun ti pou ay sa bann keksoz.” (Sal. 8:6, 7) Pa sa de Kretyen ki pe deside pour marye i devret annan menm standar ek langazman, parey sa berze ek sa fiy Soulamit!

OU SWA I ENPORTAN DEVAN BONDYE

6, 7. Ki mannyer nou konnen ki Bondye i enterese avek sa kalite dimoun ki nou swazir pour marye avek?

⁶ Zeova i enterese avek ki kalite dimoun ki ou pou swazir pour marye avek. I ti averti bann Izraelit kont bann zabitan Kanaan an dizan: “Ou pa devret form en lalyans maryaz avek zot. Ou fiy ou pa devret donn son garson e son fiy ou pa devret pran pour ou garson. Akoz i pou fer ou garson aret swiv mwan e sirman zot pou servi lezot bondye e Zeova pou vreman ankoler avek ou e san okenn dout i pa pou tarde pour detrir ou.” (Det. 7:3, 4) Plizyer syek pli tar, pret Ezra ti dir: “Zot in azir enfidel akoz zot in marye avek bann madanm etranze zis pour fer Izrael vin pli koupab.” (Ezra 10:10) Zapot Pol osi ti dir avek son bann konpanyon Kretyen: “En madanm marye i ganny atase avek son mari toultan ki son mari i vivan; me si son mari i mor, i lib pour marye avek sa ki fer li plezir, me i devre fer li selon Senyer.”​—1 Kor. 7:39, nou ki’n met an italik.

⁷ Si en Kretyen ki’n dedye son lavi avek Zeova i marye avek en dimoun ki pa Temwen, i dezobeir Bondye. Bann Izraelit dan letan Ezra ti demontre zot enfidel par “marye avek bann madanm etranze.” I pou mal pour esey rod leskiz pour pa obeir lalwa Bondye. (Ezra 10:10; 2 Kor. 6:14, 15) En Kretyen ki marye avek en dimoun ki pa Temwen i en move legzanp pour lezot e i napa lapresyasyon pour maryaz, sa kado ki Bondye in donn nou. En Kretyen batize ki fer sa i kapab perdi serten privilez parmi pep Bondye. I pa pou fer sans pour ekspekte Bondye beni nou kan nou pe an menm tan dir li dan lapriyer: ‘Zeova mon’n dezobeir ou par  ekspre, me kantmenm sa beni mwan silvouple.’

NOU PAPA KI DAN LESYEL I PLI KONNEN KI NOU

8. Eksplike akoz nou devret swiv gidans Bondye lo maryaz.

⁸ En dimoun ki’n envant en masin i konn tre byen ki mannyer sa masin i marse. Si en zour en dimoun i bezwen mont sa masin, sa enn ki ti envant li pou kapab donn sa dimoun bann detay neseser lo sa masin. Me ki pou arive si nou pa ekout lenstriksyon e mont sa masin dan nou prop fason? Tre probab i pa pou marse. Alor, si nou ti a kontan annan en lavi maryaz ki ere, nou bezwen swiv lenstriksyon Zeova akoz se li Loter maryaz.

9. Akoz nou kapab dir ki Zeova i konpran ki mannyer en dimoun ki tousel i santi e osi sa lazwa ki nou kapab gannyen dan maryaz?

⁹ Zeova i konn tou lo imen ek maryaz. I ti kre imen avek en bezwen seksyel pour zot kapab “ranpli later e domin li.” (Zen. 1:28) Bondye i konpran ki mannyer en dimoun ki tousel i santi e se pour sa rezon ki avan i ti kre sa premye madanm i ti dir: “I pa bon pour zonm kontinyen reste li tousel. Mon pou fer en led pour li, enn ki pou al byen avek li.” (Zen. 2:18) Zeova i konn tre byen sa lazwa ki nou kapab gannyen dan maryaz.​—Lir Proverb 5:15-18. *

10. Ki mannyer en koup Kretyen i devret konsider relasyon seksyel?

¹⁰ Napa okenn maryaz ozordi ki parfe akoz nou’n erit pese ek lenperfeksyon atraver Adan. Me lavi maryaz bann serviter Zeova i kapab ere si zot swiv Son Parol. Par egzanp, annou vwar konsey kler ki Pol ti donnen konsernan relasyon seksyel dan maryaz. (Lir 1 Korentyen 7:1-5.) Labib pa dir ki en koup i devret annan relasyon seksyel selman avek bi pour fer zanfan. Relasyon seksyel i satisfer bezwen emosyonnel e fizik en dimoun. Me Bondye pa kontan ditou bann pratik ki moralman sal. Bann koup Kretyen alor pou anvi fer sir ki zot tret kanmarad avek tandres e demontre vre lafeksyon pour kanmarad akoz relasyon seksyel i en laspe enportan zot lavi. De lot kote, zot pa devret fer bann aksyon ki pa fer plezir Zeova.

11. Ki benediksyon Rit ti gannyen pour son fidelite anver Zeova?

¹¹ Maryaz i devret ranpli avek lazwa  ek lakontantman. Lakour en Kretyen i devret enn ki annan lape ek trankilite. Mazin sa ki ti arive apepre 3,000 an pase kan Naomi avek son de bel fiy, Orpa ek Rit ti pe al Zida sorti Moab. Sa letan, Naomi ti’n avanse dan laz e zot tou le trwa ti’n vin vev. Naomi ti dir avek sa de zenn madanm pour retourn dan zot pei Moab. Me Rit pa ti anvi retourn kot son bann fanmir, i ti plifere reste avek Naomi. I ti fidel avek sa vre Bondye e akoz sa, i ti ganny dir ki ‘i ti pou ganny en saler parfe sorti kot Zeova, anba lezel sa enn ki i’n vin rod refiz.’ (Rit 1:9; 2:12) Rit ti vreman apresye maryaz konman en kado sorti kot Bondye e i ti marye avek Boaz, en vre adorater Zeova ki ti bokou pli vye ki li. Kan Rit pou resisite dan nouvo lemonn Bondye, i pou byen kontan pour konnen ki i ti en zanset Zezi Kri. (Mat. 1:1, 5, 6; Lik 3:23, 32) Pa Rit in ganny bokou benediksyon akoz i ti fidel anver Zeova!

KONSEY POUR FER EN MARYAZ REISI

12. Kote nou kapab ganny bon konsey lo maryaz?

¹² Loter maryaz i dir nou sa ki nou devret konnen pour en maryaz reisi. Napa okenn dimoun ki annan menm konnesans lo maryaz parey li. Labib i toultan koz laverite e tou sa ki anvi bann bon konsey lo maryaz pou bezwen swiv sa bann standar ki dan Labib. Par egzanp, zapot Pol ti ganny enspire pour ekrir: “Fodre ki sak mari i kontan son madanm parey son prop lekor e ki sak madanm i respekte son mari.” (Efe. 5:33) Sa bann konsey sorti dan Labib i pa difisil pour en Kretyen matir konpran. Me eski zot pou aplik Parol Zeova? Wi, zot pou aplik konsey Zeova si zot vreman apresye maryaz konman en kado ki sorti kot li. *

13. Ki i kapab arive si en msye pa ekout sa konsey ki dan 1 Pyer 3:7?

¹³ En msye Kretyen i devret tret son madanm avek lanmour. Zapot Pyer ti ekrir: “Zot osi bann msye, zot devre viv dan larmoni sakenn avek son madanm e rekonnet ki bann madanm i annan en natir pli feb. Tret zot avek respe parski bann madanm, zot osi partaz ansanm avek zot, sa kado lavi ki Bondye in donnen. Dan sa fason zot lapriyer pa pou ganny okenn lobstak.” (1 Pyer 3:7) Zeova i kapab pa ekout lapriyer en msye si i pa pe aplik son konsey. Relasyon ki en msye ek son madanm i annan avek Zeova i kapab ganny afekte en kantite. Sa i kapab anmenn bokou presyon lo zot maryaz, fer zot dispit e tret kanmarad dir.

14. Ki lenfliyans en madanm ki annan lanmour i kapab annan lo lavi son fanmir?

¹⁴ En madanm ki les Parol Zeova ek son lespri sen gid li, pou kapab fer son lakour vin en landrwa kot i annan lape ek lazwa. I natirel pour en msye ki annan lakrent pour Bondye kontan son madanm e anvi protez li fizikman e spirityelman. En madanm i anvi son msye kontan li e pour sa arive, i bezwen demontre bann kalite ki pou fer son msye kontan li plis ankor. Proverb 14:1 i dir: “En madanm ki vreman saz in batir son lakour, me sa enn ki bet i kas sa lakaz avek son prop lanmen.” En madanm ki  annan lasazes ek lanmour pou kapab fer son maryaz reisi e annan en lavi fanmir ki ere. I osi demontre ki i vreman apresye maryaz konman en kado sorti kot Bondye.

15. Ki Efezyen 5:22-25 i konsey nou pour fer?

¹⁵ Bann msye ek madanm ki swiv legzanp Zezi dan lafason ki i tret son kongregasyon, i montre ki zot apresye maryaz konman en kado sorti kot Bondye. (Lir Efezyen 5:22-25.) Pa bann koup i ganny bokou benediksyon kan zot vreman kontan kanmarad e kan zot pa les lorgey, bokou letan pase san koz avek kanmarad oubyen lezot move tre afekte zot maryaz!

PERSONN PA DEVRET SEPAR ZOT

16. Akoz serten Kretyen i reste selibater?

¹⁶ Menm si laplipar dimoun i plàn pour marye en zour, i annan serten serviter Zeova ki reste selibater akoz zot pa arive trouv en konzwen ki zot kontan e ki Zeova i aprouve. Lezot i kontan pour reste selibater, zot konsider sa konman en kado sorti kot Bondye. Lefet ki zot napa sa responsabilite maryaz, zot annan plis letan pour fer plis dan servis Zeova. Byensir, en dimoun i kapab profit son lavi selibater dapre bann limit ki Zeova in etablir.​—Mat. 19:10-12; 1 Kor. 7:1, 6, 7, 17.

17. (a) Ki parol Zezi konsernan maryaz ki nou devret gard antet? (b) Ki en Kretyen i devret fer san tarde si i konmans devlop sa dezir pour anvi konzwen en lot dimoun?

¹⁷ Ki swa nou selibater oubyen marye, nou tou nou devret gard antet sa bann parol ki Zezi ti dir: “Zot pa’n lir, ki depi okonmansman kreater ti fer zot mal ek femel, e ti dir: ‘Pour sa rezon, en zonm pou kit son papa ek son manman pour ini avek son madanm, e toulede zot vin en sel laser.’ Zot nepli de me en sel. Alor sa ki Bondye in ini ansanm zonm pa devre separe.” (Mat. 19:4-6) I en pese pour anvi madanm oubyen msye nou prosen. (Det. 5:21) Si en Kretyen i konmans devlop sa dezir dan son leker, i devret azir vitman pour retir sa move dezir. Nou devret fer sa menm si i afekte nou emosyonnelman. (Mat. 5:27-30) I enportan ki nou koriz sa fason panse e anpes sa move dezir devlope dan nou leker ki tret.​—Zer. 17:9.

18. Ki mannyer nou devret konsider maryaz, sa kado sorti kot Bondye?

¹⁸ Menm bann dimoun ki pa’n konn bokou oubyen ditou lo maryaz ek lo Zeova i’n a en serten degre, demontre lapresyasyon pour sa kado. Pa nou ki’n dedye nou lavi avek “sa Bondye ere” Zeova, i devret kontan tou sa ki i’n donn nou e montre ki nou apresye maryaz konman en kado sorti kot li!​—1 Tim. 1:11, NW.

[Not anba lo paz]

[Kestyon]

[Ekstre lo paz 16]

En bon maryaz i onor Zeova e i kapab fer tou dimoun dan sa fanmir vreman ere

[Portre lo paz 15]

Rit ti demontre lapresyasyon pour maryaz konman en kado sorti kot Bondye

[Portre lo paz 17]

Eski ou montre ki ou vreman apresye maryaz konman en kado sorti kot Zeova?