“Kontan kanmarad”

“La mon donn zot en komannman nouvo: kontan kanmarad. Zot devre kontan kanmarad parey mwan mon’n kontan zot. Dimoun pou war ki zot mon bann disip si zot kontan kanmarad.”​—ZAN 13:34, 35.

Ki sa i vedir: Kris ti dir son bann disip ki zot devret kontan kanmarad parey li i’n kontan zot. Ki mannyer Zezi ti montre ki i ti kontan zot? I ti kontan tou dimoun kantmenm dan son lepok bann dimoun pa ti kontan serten nasyon e ti kontan maltret bann madanm. (Zan 4:7-10) Lanmour ti pous Zezi pour donn son letan ek lenerzi e i ti menm sakrifye son repo pour ed dimoun. (Mark 6:30-34) Finalman, Kris in demontre lanmour dan en fason pli ekstraordiner. I ti dir: “Mwanmenm bon berze. Bon berze i donn son lavi pour son bann mouton.”​—Zan 10:11.

Fason ki bann Kretyen dan premye syek ti demontre sa karakteristik: Bann Kretyen dan premye syek ti apel kanmarad “frer” ek “ser.” (Filemon 1, 2) Zot ti akeyir bann dimoun sorti dan nenport ki landrwa lo later dan kongregasyon Kretyen akoz zot pa ti fer “okenn distenksyon ant Zwif ek Grek; zot tou zot annan menm Senyer.” (Romen 10:11, 12) Apre Lapannkot 33 N.L., bann disip Zerizalenm “ti vann zot propriyete ek tou zot byen e zot ti distribye larzan ki zot ti gannyen antre zot tou dapre zot bezwen.” Akoz zot ti fer sa? Pour sa bann disip ki ti’n fek batize kapab reste Zerizalenm e kontinyen “pas bokou letan pour aprann avek bann zapot.” (Akt 2:41-45) Kwa ki ti pous zot pour fer en tel aksyon? Mwens ki 200-z-an apre lanmor bann zapot, Tertullian ti ekrir sa ki bann dimoun ti dir lo bann Kretyen: “Zot vreman kontan kanmarad . . . e pare pour mor pour kanmarad!”

Lekel ki pe vreman demontre sa karakteristik? Liv The History of the Decline and Fall of the Roman Empire (1837) ti fer resorti ki pour plizyer syek ki’n pase bann ki ti dir ki zot Kretyen “ti ganny trete pli byen avek bann payen ki avek zot bann kanmarad Kretyen.” En letid ki ti ganny fer resaman Leta-z-ini i montre ki i annan en lyen ant bann dimoun relizye ek bann problenm rasis e laplipar sa bann dimoun relizye i bann ki apel zot lekor Kretyen. Souvan bann dimoun dan menm larelizyon ki viv dan diferan pei zot pa ini avek kanmarad e alor zot pa kapab oubyen zot napa sa lanvi pour ed kanmarad kan difikilte i arive.

An 2004, apre ki kat siklonn ti frap Florid enn deryer lot dan lespas de mwan, tyermenn Emergency Operations Committee ti fer sir ki tou bann provizyon ti pe ganny byen servi. I ti dir ki ti napa en lot group ki ti pli byen organize ki Temwen Zeova e i ti pare pour donn zot okenn provizyon ki zot ti pou bezwen. Avan sa, an 1997 en group Temwen Zeova ti anmenn latizann, manze ek lenz Repiblik Demokratik Kongo pour ed zot bann frer ek ser ek lezot dimoun ki ti dan bezwen. Temwen Zeova Lerop ti’n fer bann donasyon lavaler 734,000 ero.