“Obei byen sa ki mon ansenny zot”

“Si zot obei byen sa ki mon ansenny zot, zot a vin vreman mon disip. Zot a konn laverite e laverite i ava fer zot lib.”​—ZAN 8:31, 32.

Ki sa i vedir: Sa ki Zezi ti ansenny son bann disip ti sorti kot son Papa parski i ti dir: “Mon Papa ki’n anvoy mwan in donn mwan lord sa ki mon pou dir e ansennyen.” (Zan 12:49) Dan lapriyer ki Zezi ti fer avek Zeova son Papa dan lesyel i ti dir: “Ou parol i laverite.” Souvan Zezi ti sit bann verse Labib pour siport son lansennyman. (Zan 17:17; Matye 4:4, 7, 10) Alor bann vre Kretyen i ‘obeir byen sa ki Zezi i ansenny zot’ setadir aksepte sa ki Labib i dir konman “laverite” e baz zot krwayans ek kondwit inikman lo sa bann lansennyman.

Fason ki bann Kretyen dan premye syek ti demontre sa karakteristik: Zapot Pol, sa ekriven ki’n ekrir plis liv dan Labib, ti annan menm respe pour Parol Bondye ki Zezi. I ti ekrir: “Tou Lekritir i enspire par Bondye e i itil.” (2 Timote 3:16) Bann zonm ki ti ganny swazir pour ansenny zot bann konpanyon Kretyen ti bezwen “gard byen Parol Bondye ki sir e diny konfyans.” (Tit 1:7, 9, The Amplified Bible) Sa bann premye Kretyen ti ganny demande pour rezet “bann fo largiman filozofi, ki pa baze lo Kris, me lasazes imen, e ki fonde lo tradisyon zonm.”​—Kolosyen 2:8.

Lekel ki pe vreman demontre sa karakteristik? Dan konstitisyon ki Vatikan ti enplimante an 1965 (Dogmatic Constitution on Divine Revelation) e ki ti ganny mansyonnen pli tar dan liv katesis “Catechism of the Catholic Church,” i dir: “I pa zis dan Lekritir Sakre ki Legliz [Katolik] i met son krwayans ladan konsernan tou bann keksoz ki’n ganny revele. Alor, Tradisyon ek Lekritir i annan menm lenportans e tou le de i devret ganny respekte.” En lartik dan magazin Maclean’s ti sit en kestyon ki en minis Toronto, Kanada ti demande: “Akoz nou bezwen parol en ‘revolisyoner’ ki ti viv de mil an pase pour gid nou? Nou annan bann bon nide ki toultan pe perdi valer zis akoz nou bezwen relye zot avek Zezi ek Lekritir.”

New Catholic Encyclopedia i dir sa lo Temwen Zeova: “Zot konsider Labib konman sa sel sours pour zot krwayans e lareg lo konportman.” Tou dernyenman, en zonm Kanada ti enteronp en Temwen Zeova letan i ti pe entrodwir son lekor e dir: “Mon konnen lekel ou, ou Labib ki fer mwan konn ou.”