En kestyon pour Zezi

I annan bokou dimoun ki senserman krwar dan Bondye me ki an menm tan panse ki larelizyon i devret enplike dan politik. Zot krwar ki larelizyon i kapab zwe en rol enportan pour rezourd bann problenm ki imen pe rankontre. Par kont, i annan lezot dimoun relizye ki panse ki larelizyon pa devret mel dan politik. Ki ou panse, eski larelizyon i devret zwe en rol dan politik? Eski zot devret travay lanmen dan lanmen?

ZEZI KRI in ganny dekrir konman sa “personnaz ki’n annan plis lenfliyans dan listwar larelizyon.” Aprezan, meton nou ti kapab demann li si larelizyon i sipoze mel dan politik, ki ou krwar i ti pou reponn? Kan Zezi ti lo later, i ti reponn sa kestyon atraver son parol ek aksyon. Par egzanp, dan son Sermon lo Montanny ki bokou dimoun i konnen, Zezi ti donn son bann disip bann lenstriksyon lo ki rol zot devret zwe dan zot kominote. Annou vwar serten sa bann pwen dan sa sermon byen koni.

Annan en lenpak lo lavi lezot

Zezi ti dekrir ki mannyer son bann disip i devret azir dan sa lemonn. I ti dir: “Se zot disel later. Me si disel i perdi son gou, ki mannyer ou pou fer li revin sale? I pa bon pour nanryen; i bon zis pour zet deor e dimoun a mars lo la. Se zot lalimyer lemonn. . . .  Alor zot lalimyer i devre klere devan tou dimoun, pour ki zot war byen zot bann bonn aksyon e glorifye zot Papa ki dan lesyel.” (Matye 5:13-16) Akoz Zezi ti konpar son bann disip avek disel ek lalimyer?

Sa parol ki Zezi ti dir i montre ki son bann disip ti pou parey disel pa zis pour en pti group dimoun, me pour tou dimoun lo later. De menm, zot lalimyer pa ti pou kler zis en group dimoun, me tou sa ki ti anvi vwar byen kler. Zezi ti servi sa bann legzanp pour montre klerman ki i pa ti anvi ki son bann disip i izol zot avek lasosyete. Akoz nou dir sa?

Remark sa bann pwen: Disel pa kapab prezerv manze si i pa’n ganny byen melanze avek sa manze. En lalanp pa kapab kler en lasanm antye si i pa dan sa lasanm. I pa drol alor ki Zezi pa’n zanmen komann son bann disip pour al reste dan en landrwa izole e form en kominote zis pour zot. I pa ti ni menm ankouraz son bann disip pour viv en lavi kot zot napa nanryen pour fer avek bann dimoun ki napa menm krwayans avek zot. O kontrer, zis parey disel i bezwen partou dan sa manze e lalanp i bezwen kler partou, bann Kretyen i bezwen annan en lenpak lo lavi lezot dimoun.

“Pa fer parti lemonn”

Par kont, lefet ki Zezi in donn son bann disip lenstriksyon ki zot devret viv ansanm avek tou dimoun, sa i soulev en kestyon vreman enportan konsernan latitid bann Kretyen anver politik. Akoz sa kestyon i ganny demande? Zis avan son lanmor, Zezi ti priy avek Bondye pour son bann disip. I ti demande: “Mon pa demann ou pour tir zot dan lemonn, me mon demann ou, pour prezerv zot kont sa enn ki apel Malen. Zot pa fer parti lemonn parey mwan mon pa fer parti lemonn.” (Zan 17:15, 16) Alor, ki mannyer i posib pour bann Kretyen pa fer parti sa lemonn e an menm tan zwe en rol dan lakominote? Annou vwar larepons sa de lezot kestyon ki pou ed nou konpran parol Zezi:

• Ki mannyer Zezi ti konsider politik?

• Eski bann Kretyen i devret mel dan politik?