Aprann avek Parol Bondye

Ki sa bon nouvel lo larelizyon?

Sa lartik i soulev bann kestyon ki petet ou’n deza demande e i montre kote ou kapab trouv larepons sa bann kestyon dan ou Labib. I pou en plezir pour Temwen Zeova ed ou pour trouv larepons sa bann kestyon.

1. Eski tou larelizyon i bon?

Dan tou larelizyon i annan bann dimoun ki senserman anvi fer sa ki fer plezir Bondye. Bondye i vwar zot tou e i enterese avek zot. Me malerezman, i annan serten dimoun ki’n servi larelizyon pour fer bann move keksoz. Dan lepase, bann dirizan dan larelizyon in menm tortir en kantite dimoun ki ti annan diferan krwayans ki zot. (2 Korentyen 4:3, 4; 11:13-15) Dan nouvel konmela, nou tann konsernan bann dirizan dan serten larelizyon ki’n ankouraz dimoun pour fer bann aksyon teroris, siport lager oubyen zot in abiz bann zanfan.​—Lir Matye 24:3-5, 11, 12.

Labib i ansennyen ki i annan de kalite larelizyon: Larelizyon ki vre ek larelizyon ki fo. Fo larelizyon pa ansenny laverite lo Bondye. Me kant menm sa, Bondye i anvi ki tou dimoun i aprann laverite lo li.​—Lir 1 Timote 2:3-5.

2. Ki sa bon nouvel lo larelizyon?

Bondye pa anvi ki dimoun i ganny anbete par sa bann larelizyon ki dir ki zot kontan li me ki pa pe dir laverite lo li. Anfet, manm sa bann larelizyon i kontan fer zanmi avek sa lemonn ki pe ganny kontrole par Dyab. (Zak 4:4; 1 Zan 5:19) Parol Bondye i dekrir bann larelizyon ki siport bann gouvernman imen dan plas sa ki pour Bondye konman en prostitye. Labib i apel sa prostitye “Gran Babilonn,” en non ki en lavil dan letan lontan ti annan. Sa lavil ti ranpli avek bann fo larelizyon ki ti konmans ganny entrodwir zis apre Deliz dan letan Noe. Tre byento, Bondye pou detrir larelizyon ki anbet e abiz bann imen, zot destriksyon pou ariv en sel kou.​—Lir Revelasyon 17:1, 2, 5, 17; 18:8, 23, 24.

  3. Ki mannyer Bondye pou anmenn lazwa partou lo later?

Sa zizman ki Bondye pou anmennen lo fo larelizyon i sirman en bon nouvel. I pou soulaz tou dimoun lo later ki pe soufer. Fo larelizyon pa pou zanmen diviz e anbet dimoun ankor. Tou dimoun pou ador sa sel vre Bondye.​—Lir Izai 11:9; Revelasyon 18:20, 21; 21:3, 4.

4. Ki bann dimoun ki senserman krwar dan Bondye i devret fer?

Zeova pa’n oubliy sa bann dimoun ki senserman krwar dan li ki en pe partou dan bann fo larelizyon lo later. I pe fer sa bann dimoun zwenn ansanm dan linite la konmela par ansenny zot laverite.​—Lir Mika 4:2, 5.

Zeova i akey bann dimoun ki anvi servi li dan son fanmir. Menm si ou bann fanmir ek zanmi pa tro kontan ki ou pe konmans servi Zeova, ou pa pe perdi bokou akoz Zeova pou vin ou zanmi. Ou pou osi kapab form parti son “fanmir” e annan lespwar pour viv pour touzour.​—Lir Mark 10:29, 30; 2 Korentyen 6:17, 18.

Pour plis lenformasyon, vwar sapit 15 ek 16 dan liv Ki Labib i vreman dir? pibliye par Temwen Zeova.

[Portre sorti kot lo paz 26]

The Complete Encyclopedia of Illustration/J. G. Heck