En mesaz ki “donn lavi eternel”

“Ou’n donn li pouvwar lo tou dimoun pour donn lavi eternel. . . . Savedir ki zot konn ou konman sel vre Bondye, ek Zezi-Kri ki ou’n anvoye.”​—ZAN 17:2, 3.

KONNESANS i kapab sov lavi. Kan en pti baba dis mwan ki apel Nouhou ti tonm malad, son manman ki ti en travayer kominoter pour lasante Nizer ti konnen ki pour fer. I ti fer en melanz disik, disel ek delo prop pour son zanfan bwar pour ranplas sa delo ek mineral ki i ti pe perdi. Dapre UNICEF, vi ki sa manman ti “reakte vitman e i ti annan akse avek klinik dan son kominote, son zanfan ti byen vitman.”

Konnesans lo Labib osi i kapab sov lavi. Moiz, premye ekriven Labib ti ekrir: “Sa bann parol pa bann parol ki napa valer pour zot me i vedir lavi pour zot, e par sa parol zot kapab viv lontan.” (Deterononm 32:47) Eski Labib i vreman kapab fer nou viv pli lontan? Ki mannyer son mesaz i kapab donn nou lavi eternel?

Sa senk premye lartik dan sa seri in montre ki Labib i en liv ki diferan avek lezot liv lefet ki son bann profesi i toultan vin vre, i annakor avek listwar ek lasyans, tou son bann liv i koz en sel parol e i pratik dan nou letan. Pa Labib i en liv inik? Alor, kan i dir ki i kapab donn nou gidans lo konman pour viv pli lontan e menm pour touzour, eski pa nou merit egzamin li byen?

Nou ankouraz ou pour aprann ki mannyer konnesans egzakt lo Labib i kapab donn ou lape lespri konmela menm e vre boner dan lavenir. Temwen Zeova pou byen kontan montre ou konman pour ganny sa konnesans.

[Bwat lo paz 9]

Labib i osi en liv inik akoz zis li ki kapab donn larepons satisfezan pour bann kestyon enportan ki nou demande:

• Akoz nou la lo later?

• Akoz i annan sitan en kantite soufrans?

• Ki pou arive avek bann dimoun ki mon kontan ki’n mor?

Ou kapab trouv larepons ki Labib i donnen lo sa bann kestyon dan liv Ki Labib i vreman dir? pibliye par Temwen Zeova.