I annakor avek lasyans

“Sa enn ki rasanble . . . in reflesir e rod byen . . . ki mannyer pour ekrir bann parol laverite ki egzakt.”​—EKLEZYAST 12:9, 10.

DAN KI FASON LABIB I DIFERAN? Dapre lasyans, i annan serten liv ansyen ki donn bann lenformasyon ki pa korek e danzere. Menm ozordi bann ekriven i bezwen reviz bann lenformasyon dan zot liv lasyans akoz bann nouvo dekouvert. Me Labib i dir ki son loter se nou Kreater e ki son Parol “i reste pour touzour.”​—1 Pyer 1:25.

EN LEGZANP: I ti annan sa komannman dan Lalwa Moiz kot bann Izraelit ti devret anter lasel dan en trou e kouver li “an deor [zot] kan.” (Deterononm 23:12, 13) Si zot ti tous en zannimo mor oubyen dimoun mor, bann Izraelit ti devret lav zot lanmen avek delo. (Levitik 11:27, 28; Nonm 19:14-16) Dan sa letan, bann lepre ti ganny met an karantenn ziska ki zot ti ganny egzaminen e konfirmen ki zot ti nepli kontazye.​—Levitik 13:1-8.

SA KI BANN DOKTER I DIR: En bon sistenm desarz, lav lanmen ek karantenn i reste sa fason pli efikas pour lalit kont bann maladi. Si napa okenn twalet oubyen sistenm sanniter, Centers for Disease Control and Prevention (CDC) Leta-z-ini i fer sa rekomandasyon: “Pas lasel omwen en zistans 30 met avek okenn landrwa kot i annan delo e kouver ou lasel.” Dapre Lorganizasyon Mondyal pour Lasante, si en kominote i annan en bon sistenm desarz pour lasel, sa pou redwir lakantite ka ladyare par 36 poursan. Bann dokter in dekouver apepre 200-z-an pase ki zot in enfekte en kantite pasyan kan zot pa ti lav lanmen apre ki zot ti’n tous en lekor mor. Sa sant i ankor pe dir ki lav lanmen “i sa sel pli bon fason pour anpes bann maladi propaze.” Me ki nou pou dir konsernan met bann lepre oubyen dimoun avek lezot maladi kontazyez an karantenn? Saudi Medical Journal ti fer sa komanter resaman: “Dan bann premye staz en lepidemi, izolasyon ek karantenn i posibleman sa sel e dernyen aksyon ki kapab ganny pran pour kontrol bann maladi ki kontazyez.”

KI OU PANSE? Eski ou ti pou ekspekte okenn lezot ansyen liv sakre tonm dakor avek lasyans? Oubyen Labib i en liv inik?

[Ekstre lo paz 6]

“Sa bann prekosyon lizyenn byen presi dan letan Moiz i vreman enpresyonan.”​—MANUAL OF TROPICAL MEDICINE, PAR DOKTER ALDO CASTELLANI EK ALBERT CHALMERS