“I annan en sel Zeova” e i pe rasanble son fanmir

‘Mon sipliy zot pour prezerv linite ki lespri sen i donnen.’ ​—EFE. 4:1, 3.

KI OU POU EKSPLIKE?

Ki bi ladministrasyon Bondye?

Ki mannyer nou ‘prezerv linite ki lespri sen i donnen’?

Ki mannyer nou kapab ‘vin bon anver kanmarad’?

1, 2. Ki plan Zeova pour later ek limanite?

FANMIR. Kwa ki vin dan ou lespri ler ou tann sa mo? Tandres? Lazwa? Travay ansanm pour atenn menm lobzektif? Eski i fer ou mazin en landrwa kot ou santi ou an sekirite, kot ou kapab grandi, aprann e partaz lide? I tre probab ki ou pou mazin koumsa si ou pe viv dan en fanmir ere. Zeova li menm ki Fondater lafanmir. (Efe. 3:14, 15) I ti annan plan ki tou lanz dan lesyel ek imen lo later i viv an sekirite, annan konfyans dan kanmarad e konn sa vre linite.

² Apre ki zot ti fer pese, bann imen ti nepli form parti fanmir iniversel Bondye, me son plan pa’n sanze. I pou fer sir ki desandans Adan ek Ev i ranpli Paradi lo later. (Zen. 1:28; Iza. 45:18) I’n fini fer tou preparasyon neseser pour ki son plan i ganny akonplir. Nou kapab trouv serten sa bann laranzman dan liv Efezyen ki koz konsernan linite. Aprezan annou egzamin serten verse dan sa liv e vwar ki mannyer nou kapab korpere avek plan Zeova kot i pou reini bann lanz ek imen.

LADMINISTRASYON E SON BI

3. Ki si sa ladministrasyon Bondye ki Efezyen 1:10 i koz lo la e kan ki sa premye faz ti konmanse?

³ Moiz ti dir avek bann Izraelit: “Zeova i nou Bondye, i annan en sel Zeova.” (Det. 6:4) Tou sa ki Zeova i fer i an armoni avek son plan. Alor, “a lafen letan fikse” Bondye ti met an plas “en ladministrasyon” setadir en laranzman pour reini tou bann lanz dan lesyel ek imen lo later. (Lir Efezyen 1:8-10, NW. *)  Ladministrasyon Bondye pou fer sa dan de faz. Dan premye faz, Zeova i prepar bann Kretyen swazir pour viv dan lesyel anba lotorite Zezi Kri. Sa ti konmans zour Lapannkot lannen 33 N.L., ler Zeova ti konmans rasanble tou bann ki ti pou rennyen avek Kris dan lesyel. (Akt 2:1-4) Lefet ki bann Kretyen swazir in ganny konsidere konman drwat pour ganny lavi lo baz sakrifis Kris, zot konnen ki zot in ganny adopte konman “garson Bondye.”​—Rom. 3:23, 24; 5:1; 8:15-17.

4, 5. Ki dezyenm faz sa ladministrasyon?

⁴ Dan dezyenm faz, Zeova i prepar bann imen ki pou viv dan Paradi lo later anba dominasyon Rwayonm Bondye ki Kris pou dirize konman lerwa. Sa “gran lafoul” pou sa bann premye dimoun ki pou viv dan Paradi. (Rev. 7:9, 13-17; 21:1-5) Pandan sa mil an ki Kris pou dirize, i pou osi annan plizyer bilyon dimoun ki pou ganny resisite e zot pou zwenn ansanm avek sa gran lafoul. (Rev. 20:12, 13) Zis mazinen ki mannyer sa linite pou vin pli evidan ankor atraver rezireksyon! A lafen sa mil an, bann “keksoz lo later” pou pas atraver en tes final. Sa bann ki reste fidel pou ganny adopte konman “zanfan Bondye” lo later.​—Rom. 8:21; Rev. 20:7, 8.

⁵ Ozordi, tou le de faz ladministrasyon Bondye i an mars, setadir i pe prepar bann Kretyen swazir pour viv dan lesyel e bann imen pour viv lo later. Me ki mannyer sakenn antre nou i kapab korpere avek ladministrasyon Bondye la konmela menm?

‘PREZERV LINITE KI LESPRI SEN I DONNEN’

6. Ki Labib i dir konsernan rasanbleman bann Kretyen?

⁶ Labib i endike ki bann Kretyen i bezwen rasanble avek kanmarad. (1 Kor. 14:23; Ebr. 10:24, 25) Sa i vedir plis ki pas en pe letan ansanm dan menm landrwa, zis parey ler ou al anvil oubyen kot stad pour get en aktivite sportif. Nou eksperyans sa vre linite kan nou aplik lenstriksyon Zeova e les nou ganny gide par son lespri sen.

7. Ki savedir ‘prezerv linite ki lespri sen i donnen’?

⁷ Lefet ki nou annan lafwa dan sakrifis Kris, Zeova i konsider nou tou konman drwat, bann Kretyen swazir konman son bann zanfan e lezot mouton konman son bann zanmi. Me tan ki nou pe viv dan sa move lemonn, i pou toultan annan dezakor. (Rom. 5:9; Zak 2:23) Otreman, i pa ti pou neseser pour Labib donn nou sa konsey pour kontinyen “siport kanmarad.” Ki nou bezwen fer pour viv ini ant frer ek ser Kretyen? Nou bezwen devlop ‘limilite ek ladouser.’ Deplis, Pol i demann nou pour fer bokou zefor ‘pour prezerv linite ki lespri sen i donnen par lape.’ (Lir Efezyen 4:1-3.) Nou pou kapab aplik sa konsey si nou soumet anba lenfliyans lespri sen Bondye e les li prodwir son fri dan nou. Sa fri i kapab rezourd bann problenm ant bann dimoun tandis ki aktivite natir imen i toultan diviz zot.

8. Dan ki sans aktivite natir imen i kre divizyon?

⁸ Remarke konman “bann aktivite natir imen” i kre divizyon. (Lir Galat 5:19-21.) Aksyon imoral oubyen fornikasyon i separ en dimoun avek Zeova ek kongregasyon. Adilter i fer soufer en fanmir akoz i kapab separ bann zanfan avek zot paran e bann konzwen inosan avek zot msye oubyen madanm. Lenpirte i afekte linite ki en dimoun i annan avek Bondye ek sa bann ki kontan li. En dimoun ki pe esey kol de keksoz ansanm i konnen  ki tou le de sirfas i bezwen prop si i oule ki zot tenir byen ansanm. Vis i demontre en mank respe total pour bann lalwa drwat Bondye. Larestan aktivite natir imen ki Galat i mansyonnen i osi separ nou avek Zeova ek lezot. Zeova i deteste tou sa la.

9. Ki kestyon nou bezwen demann nou lekor pour konnen si nou pe ‘fer tou pour prezerv linite ki lespri sen i donnen’?

⁹ Alor, nou tou nou bezwen demann nou lekor: ‘Eski mon pe fer bokou zefor pour esey “prezerv linite ki [lespri sen] i donnen par lape”? Ki mannyer mon reazir kan problenm i leve? Eski mon rakont laplipar mon bann zanmi sa ki’n arive pour esey fer zot tonm dakor avek mwan? Eski mon ekspekte ki bann ansyen i rezourd sa problenm dan mon plas pour evite al koz avek sa dimoun an personn pour fer lape avek li? Si mon konnen en dimoun i annan en keksoz kont mwan, eski mon inyor li zis pour evite koz lo sa problenm?’ Eski bann latitid parey ti pou montre ki nou pe azir an armoni avek lavolonte Zeova pour reini ankor tou keksoz dan Kris?

10, 11. (a) Akoz i enportan pour anpe avek nou bann frer ek ser? (b) Ki nou bezwen fer pour promot lape e ganny benediksyon Zeova?

¹⁰ Zezi ti dir: “Si alor, ou vin prezant Bondye ou lofrann devan lotel, e ki la ou rapel ki ou frer i annan keksoz kont ou, kit ou lofrann devan lotel, e al fer lape avek ou frer; apre retournen e prezant ou lofrann. . . . Depese fer zanmi avek li.” (Mat. 5:23-25) Zak ti ekrir ki “fri lazistis i ganny senmen dan lape par bann ki viv dan lespri lape.” (Zak 3:17, 18) Alor, nou pa kapab gard en bon kondwit si nou pa anpe avek lezot.

¹¹ Annou pran en legzanp. Dan serten pei ki’n ganny ravaze par lager i annan plis ki 35 poursan later ki bann fermye pa kapab servi akoz bann min ki’n ganny kasyet anba la. Kan en min i eksploze, sa plantasyon i ganny abandonnen par bann fermye, i vin difisil pour bann dimoun trouv en travay dan sa vilaz e pour ganny manze dan bann lavil. Pareyman, nou pa pou progrese spirityelman si nou annan bann tre dan nou personnalite ki kapab anpes nou anpe avek nou bann frer ek ser. Me si nou azir deswit pour pardonn e fer dibyen anver lezot, sa pou promot lape e nou pou ganny benediksyon Zeova.

12. Ki mannyer bann ansyen i kapab ed nou promot linite?

¹² Deplis, Bondye in donn nou bann zonm konman “kado” pour promot linite. Zot in ganny donnen pour ed nou “kapab ansanm ariv dan linite nou lafwa.” (Efe. 4:8, 13) Kan bann ansyen i  travay avek nou dan servis sakre e donn nou bann konsey baze lo Labib, zot ed nou pour devlop nou personnalite Kretyen. (Efe. 4:22-24) Kan bann ansyen i donn ou konsey, eski ou realize ki Zeova pe servi zot pour prepar ou pour viv dan sa nouvo lemonn anba dominasyon son Garson? Ansyen, eski ou esey ed lezot koriz zot pwennvi dan en fason ki montre ki ou pe ed zot pour antre dan nouvo lemonn?​—Gal. 6:1.

‘VIN BON ANVER KANMARAD’

13. Ki konsekans i pou annan si nou pa swiv sa konsey dan Efezyen 4:25-32?

¹³ Efezyen 4:25-29 i fer mansyonn bann kondwit ki nou devret evite annan. Sa i enkli koz manti, pran lakoler, fer pares e dir bann move parol dan plas koz sa ki itil pour ed lezot progrese. Si en dimoun pa swiv sa konsey i pou ofans lespri sen Bondye, akoz lespri sen i en lafors ki promot linite. (Efe. 4:30) Pour kontinyen promot linite nou bezwen aplik sa ki Pol ti dir: “Debaras zot avek tou move santiman, tou iritasyon, tou lakoler. Fer disparet tou kriye ek lensilt. Evite annan okenn santiman mesanste. Okontrer vin bon, ranpli avek lafeksyon pour kanmarad; e pardonn kanmarad, parey Bondye in pardonn zot dan Kris.”​—Efe. 4:31, 32.

14. (a) Ki savedir ‘vin bon’? (b) Kwa ki pou ed nou vin bon?

¹⁴ Sa lekspresyon ‘vin bon’ i vedir ki nou pa’n toultan bon anver lezot e ki nou bezwen amelyore. Pa i ti pou apropriye alor pour fer zefor pour fer pase santiman lezot avan sa ki pour nou! (Fili. 2:4) Petet parler nou anvi dir en keksoz pour fer riye e pour montre ki nou entelizan, me eski sa ti pou montre ki nou bon? Si nou reflesir avan ki nou koze, sa pou ed nou pour “vin bon.”

APRANN DEMONTRE RESPE EK LANMOUR DAN FANMIR

15. Ki mannyer Efezyen 5:28 i ed bann msye konpran konman pour imit Kris?

¹⁵ Labib i konpar relasyon ki Zezi ti annan avek kongregasyon avek sa relasyon ant en msye ek son madanm. Legzanp Kris i devret ed en msye pour konpran ki i bezwen gid, kontan e pran swen avek son madanm. Son madanm osi i bezwen konpran ki i bezwen soumet avek son msye. (Efe. 5:22-33) Kan Pol ti dir: “Bann zonm devre alor, kontan zot madanm parey zot kontan zot prop lekor,” akoz i ti dir “alor”? (Efe. 5:28, nou ki’n met an italik.) Son bann parol presedan i atir latansyon lo fason ki “Kris in kontan [kongregasyon] e in donn son lavi pour li, . . . i’n pirifye li par delo ek son parol.” Pol ti pe konsey bann mari pour kontan zot madanm parey ki Kris ti kontan kongregasyon. Anfet, pour travay an armoni avek lavolonte Zeova pour reini ankor tou keksoz dan Kris, en msye i devret pran swen avek son fanmir lo plan spirityel.

16. Ki i arive ler bann paran i desarz byen sa responsabilite ki Zeova in donn zot?

¹⁶ Bann paran i devret rapel ki Zeova ki’n donn zot sa responsabilite pour pran swen avek zot zanfan. Malerezman, en kantite ozordi i “annan leker dir” e zot pa demontre okenn lafeksyon. (2 Tim. 3:1, 3) En kantite papa pa pran zot responsabilite o serye e sa i annan en move lefe lo zot zanfan e sa i fer zot soufer. Me Pol i donn sa konsey: “Zot, bann papa, pa eksit lakoler zot zanfan, me okontrer, elve zot dan en ledikasyon ek lenstriksyon Senyer.” (Efe. 6:4) Eski i annan lezot landrwa apard ki dan fanmir ki bann zanfan i kapab aprann konsernan lanmour ek respe pour lotorite? Bann paran ki reisi ansenny zot zanfan konsernan sa bann keksoz i korpere  avek ladministrasyon Zeova. Si nou lakour i en landrwa kot napa lakoler ek bann move parol e ki nou demontre lanmour anver nou zanfan, nou pe montre zot konman pour demontre lanmour ek respe pour lotorite. Sa pou prepar zot pour viv dan sa nouvo lemonn Bondye.

17. Ki nou bezwen fer pour nou reziste Dyab?

¹⁷ Nou bezwen realize ki Satan, sa premye personnaz ki ti kas lape dan liniver pou toultan opoz bann ki anvi fer lavolonte Bondye. Lakantite divors ki pe ogmante, bann dimoun ki prefere viv dan menaz olye marye e bann maryaz omoseksyel i montre ki plan Satan pe ganny akonplir. Me nou nou pa pe imit konportman ek latitid ki egziste dan lemonn konmela. Nou swiv legzanp Kris. (Efe. 4:17-21) I pour sa rezon ki nou ganny konseye pour ‘met lo nou tou bann lekipman batay ki Bondye i donnen’ pour nou kapab reisi reziste Dyab ek son bann demon.​—Lir Efezyen 6:10-13.

‘KONTINYEN LES ZOT GANNY KONTROLE PAR LANMOUR’

18. Kwa ki fer bann Kretyen annan linite antre zot?

¹⁸ Se lanmour ki fer bann Kretyen annan linite antre zot. Avek en leker ranpli avek lanmour pour nou “sel Senyer” Zezi e nou “sel Bondye” Zeova e pour kanmarad, nou determinen ‘pour prezerv linite ki lespri sen i donnen par lape.’ (Efe. 4:3-6) Zezi ti priy lo sa kalite lanmour: “Mon pa priy zis pour zot, me osi pour tou bann ki pou krwar mwan akoz zot mesaz. Pour ki zot tou, zot ava vin en sel. Parey ou mon Papa ou dan mwan e mwan mon dan ou, ki zot osi zot ava dan nou. . . .  Mon’n fer zot konn ou, e mon pou kontinyen fer li, pour ki zot a annan sa menm lanmour avek lekel, ou’n kontan mwan, e ki mwanmenm mon a dan zot.”​—Zan 17:20, 21, 26.

19. Ki ou determinen pour fer?

¹⁹ Si nou pe lite avek nou lenperfeksyon, annou les lanmour pous nou pour priye parey sa psalmis ti fer: “Inifye mon leker pour annan lakrent pour ou non.” (Ps. 86:11) Annou reste determinen pour reziste zefor ki Dyab pe fer pour elwanny nou avek nou Papa lanmour ek bann ki i aprouve. Fer bokou zefor ‘konman bann zanfan ki Bondye i kontan pour fer tou parey li e pour kontinyen les nou ganny kontrole par lanmour’ dan nou fanmir, dan nou travay predikasyon e dan kongregasyon.​—Efe. 5:1, 2.

[Not anba lo paz]

[Kestyon]

[Portre lo paz 29]

I kit son lofrann devan lotel pour al fer lape avek son frer

[Portre lo paz 31]

Paran, ansenny ou zanfan konman pour demontre respe