“Lekel ki pou efrey mwan?”
“Lekel ki pou efrey mwan?”
“Menm si i pou annan lager kont mwan, kantmenm sa mon pou annan konfyans.” —PS. 27:3.
DAPRE SA BANN VERSE, KWA KI KAPAB ED OU DEVLOP KOURAZ?
1. Ki Psonm 27 pou ed nou konpran?
AKOZ nou pe fer plis dan predikasyon menm si kondisyon sa lemonn i kontinyen deteryore? Akoz nou donn tou nou letan ek lenerzi menm si nou pe eksperyans problenm ekonomik? Ki mannyer nou kapab reste kouraze kantmenm en kantite dimoun i per sa ki kapab arive dan lavenir? Sa kantik ki Lerwa David ti ganny enspire pour ekrir dan Psonm 27 i donn nou larepons.
2. Ki lafreyer i kapab fer en dimoun fer e ki konfyans nou annan?
2 David i konmans sa Psonm avek sa bann parol: “Zeova i mon lalimyer e sa enn ki sov mwan. Lekel mon pou per? Zeova i mon proteksyon tou dilon mon lavi. Lekel ki pou efrey mwan?” (Ps. 27:1) Lafreyer i kapab fer en dimoun sitan fay ki i pa kapab fer nanryen. Me en dimoun ki annan konfyans dan Zeova i kouraze e napa okenn lafreyer. (1 Pyer 3:14) Si nou fer Zeova vin nou proteksyon, nou “pou reste an sekirite” e “pou viv dan trankilite san per maler.” (Prov. 1:33; 3:25) Akoz nou dir sa?
“ZEOVA I MON LALIMYER E SA ENN KI SOV MWAN”
3. Dan ki sans Zeova i nou lalimyer e ki nou devret fer?
3 Sa metafor “Zeova i mon lalimyer” i montre ki Zeova i liber nou dan linyorans ek fernwanr spirityel. (Ps. 27:1) Dan en sans literal, lalimyer i fer nou vwar bann danze oubyen lobstak dan nou semen, me i pa retir zot. Nou bezwen azir avek lasazes apre ki nou’n idantifye sa danze oubyen lobstak. Pareyman, Zeova i revel avek nou sinifikasyon bann levennman ki arive dan lemonn. I averti nou konsernan bann danze dan sa move lemonn. I donn bann prensip Labib ki toultan marse, me nou bezwen aplik sa ki nou aprann. Si nou fer sa, nou pou vin pli saz ki nou bann lennmi oubyen nou bann ansenyan.—Ps. 119:98, 99, 130.
4. (a) Akoz David ti kapab dir avek konviksyon: “Zeova i . . . sa enn ki sov mwan”? (b) Kan ki Zeova pou definitivman vin sa enn ki sov nou?
4 Sa ki David ti dir dan Psonm 27:1 i montre ki i ti’n bezwen rapel ki mannyer Zeova ti sov li plizyer fwa. Par egzanp, Zeova ti sov li avek en lyon ek en lours. Zeova ti osi donn li laviktwar lo Golyat. Pli tar, sak fwa ki Lerwa Sail ti esey touy David avek son lans, Zeova ti sov li. (1 Sam. 17:37, 49, 50; 18:11, 12; 19:10) I normal alor ki David ti dir avek konviksyon: “Zeova i . . . sa enn ki sov mwan”! Zeova pou definitivman sov son bann serviter parey i ti fer avek David. Dan ki fason? Par sov zot dan sa “gran ladetres” ki pe vini.—Rev. 7:14, NW; 2 Pyer 2:9.
RAPEL SAK FWA KI ZEOVA I ED OU
5, 6. (a) Ler nou rapel nou prop leksperyans ki mannyer sa i kapab ed nou devlop kouraz? (b) Ki mannyer lafason ki Zeova in azir anver son bann serviter i donn ou plis kouraz?
5 Psonm 27:2, 3 (Lir. *) i fer nou vwar en fakter enportan pour devlop kouraz. David ti rapel bann moman kot i ti eksperyans delivrans avek led Zeova. (1 Sam. 17:34-37) Sa bann souvenir ti donn li bokou konfyans pour fer fas avek bann sityasyon pli difisil. Letan ou mazin ou prop leksperyans, eski ou santi parey David? Par egzanp, eski ou ti priy bokou konsernan en problenm ki ou ti pe rankontre? Eski ou ti vwar konman Zeova ti donn ou lasazes oubyen lafors pour fer fas avek sa leprev? Eski ou rapel ki mannyer Zeova ti retir bann lobstak ki ti anpes ou trouv lazwa dan ou servis? Oubyen, eski ou rapel konman en gran laport ti ganny ouver pour ou fer en gran travay? (1 Kor. 16:9) Ki lefe sa i annan lo ou ler ou mazin sa bann moman ki Zeova in ed ou? Pa sa bann souvenir i konvenk ou ki Zeova i kapab ed ou sirmont oubyen andir bann leprev ek lobstak pli difisil?—Rom. 5:3-5.
6 Me meton en gouvernman i anvi detrir lorganizasyon Temwen Zeova. En kantite dan nou letan in esey fer sa, me zot pa’n reisi. Letan nou rapel lafason ki Zeova ti ed son pep dan lepase, sa pou donn nou plis konfyans pour fer fas avek lavenir.—Dan. 3:28.
ANNAN LAPRESYASYON POUR VRE LADORASYON
7, 8. (a) Dapre Psonm 27:4, ki David ti demann Zeova? (b) Kwa sa gran tanp spirityel Zeova e ki mannyer nou ador li ladan?
7 En lot fakter enportan pour devlop kouraz, se lapresyasyon pour vre ladorasyon. (Lir Psonm 27:4. *) Dan letan David, tabernak ti “lakaz Zeova.” David li menm ki ti fer laranzman pour ki son garson Salomon i konstri en zoli landrwa ladorasyon. Plizyer syek pli tar, Zezi ti montre ki i ti nepli neseser pour al kot tanp pour ador Zeova. (Zan 4:21-23) Dan Ebre sapit 8 a 10, zapot Pol ti montre ki en gran tanp spirityel ti vin an egzistans zour Zezi ti batize lannen 29 N.L. kan i ti prezant son lekor avek Zeova pour fer son lavolonte. (Ebr. 10:10) Sa gran tanp spirityel i laranzman ki Zeova in fer pour ki atraver nou lafwa dan sakrifis Zezi nou a kapab ador li dan en fason akseptab. Ki mannyer nou ador Bondye dan sa tanp? Par priye “avek en leker senser, avek en lasirans konplet dan lafwa,” par koz lo nou lafwa piblikman san lafreyer, par rode ki mannyer pour pous e ankouraz kanmarad ler nou vin renyon e pandan ladorasyon an fanmir. (Ebr. 10:22-25) Lapresyasyon pour vre ladorasyon i fortifye nou dan sa bann dernyen zour ki difisil.
8 Bann serviter Zeova dan lemonn antye pe ogmant zot partisipasyon dan predikasyon par aprann bann nouvo langaz e al kot i annan en bezwen pour plis proklanmater. Zot aksyon i demontre ki parey sa psalmis, zot annan zis en keksoz pour demann Zeova. Zot anvi vwar labote Zeova e ador li nenport kwa ki arive.—Lir Psonm 27:6. *
ANNAN KONFYANS KI BONDYE POU ED OU
9, 10. Ki Psonm 27:10 i promet nou?
9 Bann parol David i montre ki i ti annan en kantite konfyans ki Zeova ti pou ed li: “Si mon papa e mon manman i kit mwan, Zeova i a pran mwan.” (Ps. 27:10) Dapre 1 Samyel sapit 22, nou kapab dir ki bann paran David pa ti abandonn li. Par kont, i annan en kantite dimoun ki’n ganny rezete par zot fanmir. Me bokou ki’n ganny abandonnen in ganny proteksyon ek lanmour dan kongregasyon Kretyen.
10 Vi ki Zeova i pare pour siport son bann serviter kan lezot i abandonn zot, pa i pou osi siport zot dan nenport ki leprev a lavenir? Si par egzanp nou enkyet lo konman pour fourni bezwen materyel nou fanmir, pa nou devret asire ki Zeova pou ed nou? (Ebr. 13:5, 6) I konpran sirkonstans ek bezwen tou son bann serviter fidel.
11. Ki lefe nou konfyans dan Zeova i kapab annan lo lezot? Donn en legzanp.
11 Annou pran legzanp Victoria, en etidyan Labib Liberya. Letan i ti pe fer progre pour pran batenm, sa msye ki i ti pe reste avek ti kit li ek son trwa zanfan. I ti kontinyen fer progre spirityel menm si i ti napa landrwa reste e i pa ti pe travay. Apre son batenm, fiy Victoria ki ti annan 13 an ti anmas en portfey ki ti ranpli avek larzan. Pour zot pa ganny tante, zot pa ti ni menm kont sa larzan. Zot ti plito kontakte deswit sa solda ki ti’n perdi son portfey. I ti dir zot ki si tou dimoun ti onnet parey Temwen Zeova, lemonn antye ti pou pli meyer e anpe. Victoria ti montre sa solda dan Labib promes ki Zeova ti’n fer konsernan en nouvo lemonn. Sa solda ti sitan enpresyonnen avek lafwa ek lonnekte Victoria ki i ti donn li en bon sonm larzan dan sa larzan ki i ti’n rann li. Tou dimoun i konnen ki Temwen Zeova i toultan onnet, sa i akoz zot annan konfyans total dan Zeova ki i pou pran swen avek zot.
12. Ki nou pe demontre kan nou kontinyen servi Zeova malgre nou perdi keksoz materyel? Donn en legzanp.
12 Imazinen ki mannyer Thomas, en proklanmater ki pa ti ankor batize Siera Leonn ti’n bezwen santi. I ti pe travay konman en ansenyan dan en lekol segonder pour pros enn an, me i pa ti kapab ganny peye ziska ki tou son bann formalite ti’n fini konplete. Ki formalite Thomas ti bezwen konplete avan ki i ti kapab ganny peye? I ti bezwen fer en entervyou avek direkter sa lekol ki ti en pret. Sa pret ti eksplike ki son lekol pa aksepte lansennyman Temwen Zeova. I ti ensiste ki Thomas i swazir ant son travay ek son krwayans relizye. Thomas ti kite dan sa louvraz menm si i ti pou perdi tou sa larzan ki i pa ti’n ganny peye pour pros enn an. Me apre i ti ganny en lot louvraz pour aranz radyo ek mobayl. Parey sa legzanp ek plizyer lezot ankor i montre, si nou annan konfyans dan Zeova, nou pa devret per ki nou pou mank nanryen akoz Zeova, Kreater tou keksoz, ki protez nou e pran swen avek nou.
13. Ki mannyer travay predikasyon pe progrese dan bann pei pov?
13 Dan plizyer pei pov, bann frer ek ser pe fer bokou plis dan predikasyon. Akoz? En biro brans i eksplike: “Bokou parmi bann ki aksepte letid Labib pa travay e alor zot annan plis letan pour etidye pandan lazournen. Bann frer osi i annan plis letan pour prese. Nou pa bezwen dir bann dimoun ki viv dan bann rezyon ki’n pli ganny afekte akoz bann problenm ekonomik ki nou pe viv pandan bann dernyen zour akoz i evidan pour zot.” En misyonner ki dan sa servis pour plis ki 12 an dan en pei kot sak proklanmater i fer an mwayenn plis ki trwa letid Labib i ekrir: “Vi ki laplipar bann proklanmater i viv en lavi senp san bann gran distraksyon, zot annan plis letan pour prese e fer bann letid Labib.”
14. Ki mannyer Bondye i kapab protez sa gran lafoul?
14 Nou annan konfyans dan sa promes ki Zeova in fer pour ed, protez e sov son pep konman en group fizikman e spirityelman. (Ps. 37:28; 91:1-3) Sa gran lafoul ki pou sirviv “sa gran ladetres” pou bezwen vreman gran. (Rev. 7:9, 14, NW) Alor sa gran lafoul, konman en group, pou ganny proteze e pa pou ganny eksterminen pandan sa bann dernyen zour ki reste. Zot pou ganny fourni avek tou sa ki zot bezwen pour andir persekisyon e pour protez zot relasyon avek Zeova. Zeova pou osi protez son pep pandan dernyen faz sa peryod gran ladetres.
“MONTRE MWAN OU SEMEN, O ZEOVA”
15, 16. Ki byenfe nou gannyen kan nou swiv bann gidans sorti kot Bondye? Donn en legzanp.
15 Pour nou kapab reste kouraze, nou bezwen kontinyelman les nou ganny ansennyen par Bondye. Nou vwar sa klerman dan sa ki David ti sipliy Zeova: “Montre mwan ou semen, O Zeova e gid mwan dan ou santye ladrwatir akoz mon bann lennmi.” (Ps. 27:11) Si nou azir an armoni avek sa lapriyer, nou pou port bokou latansyon lo bann gidans ki nou gannyen atraver lorganizasyon Zeova ki baze lo Labib e aplik zot deswit. Bokou dimoun ki’n debaras zot avek bann det i kapab dir ki zot in ganny bokou byenfe sirtou pandan sa kriz ekonomik ki nou’n fek pas atraver akoz zot in aplik sa konsey saz pour senplifye zot lavi. Dan plas rod bann keksoz materyel ki zot mwayen i nepli permet, zot in annan plis letan pour pas dan predikasyon. I pou byen si sakenn antre nou i demann nou lekor: ‘Eski mon pe aplik tou sa ki mon lir dan Labib e dan bann piblikasyon sorti kot lesklav fidel e pridan menm si sa i demann bokou sakrifis lo mon par?’—Mat. 24:45.
16 Si nou les Zeova ansenny nou e gid nou dan santye ladrwatir, nou pou napa okenn lafreyer. Kan en frer ki ti pe fer pionye ordiner Leta-z-ini ti fer laplikasyon pour en travay ki ti pou ed li ek son fanmir kontinyen dan servis a plen tan, son soupervayzer ti dir li ki i pa pou zanmen ganny sa louvraz san en degre liniversite. Si sa ti’n ariv avek ou, eski ou ti pou regrete ki ou pa’n al fer letid avanse pour antre dan servis a plen tan? De semenn pli tar, sa soupervayzer ti perdi son travay e sa soupervayzer ki ti ranplas li ti demann sa frer ki son lobzektif. Sa frer ti eksplike ki li ek son madanm ti minis Temwen Zeova a plen tan e ki zot ti anvi reste dan sa servis. Avan ki sa frer ti kapab dir en lot mo, sa soupervayzer ti dir li: “Mon ti konnen ti annan en keksoz diferan avek ou! Kan mon papa ti pros pour mor, de zot bann dimoun ti vin kot li e lir Labib avek li tou le zour. Mon ti fer en promes ki si zanmen mon ganny sans pour ed en Temwen Zeova, mon pou fer li.” Lannmen bomaten, sa frer ti ganny sa menm louvraz ki sa soupervayzer avan ti’n refiz li. Pa kan nou met Rwayonm Bondye premye dan nou lavi, Zeova i tenir son promes avek nou e donn nou tou keksoz materyel ki nou vreman bezwen!—Mat. 6:33.
LAFWA EK LESPWAR I ESANSYEL
17. Kwa ki pou ed nou fer fas avek lavenir avek konfyans?
17 David i montre nesesite pour annan lafwa ek lespwar par dir: “Si mon pa ti’n annan lafwa ki mon ti pou vwar labonte Zeova dan pei bann vivan . . . !” (Ps. 27:13) Kot nou ti pou ete si nou ti napa sa lespwar ki Bondye i donn nou e lapresyasyon pour sa bann keksoz ki ganny mansyonnen dan Psonm 27? Annou kontinyen priye avek konfyans pour ganny lafors e ganny delivre anmezir nou fer fas avek bann levennman ki pou arive ziska Armagedon.—Lir Psonm 27:14. *
[Not anba lo paz]
^ par. 5 Psonm 27:2, 3: “2 Kan bann move dimoun ti pe vin touy mwan, zot ki ti mon bann adverser ek mon bann lennmi, zot tou zot ti fer en fo pa e tonbe. 3 Menm si zot pik zot latant pour atak mwan, mon pa pou per. Menm si i pou annan lager kont mwan, kantmenm sa mon pou annan konfyans.”
^ par. 7 Psonm 27:4: “Mon’n demann Zeova en keksoz, sanmenm ki mon pou rode, se pour mwan kapab reste dan lakaz Zeova tou mon lavi, pour vwar labote Zeova e pour get son tanp avek ladmirasyon.”
^ par. 8 Psonm 27:6: “Mon latet pou par lao tou mon bann lennmi otour mwan. Mon oule fer bann sakrifis kot mon kriye avek lazwa kot son latant. Mon pou sante e loue Zeova avek lanmizik.”
^ par. 17 Psonm 27:14: “Met ou lespwar dan Zeova, pran kouraz e fodre ki ou leker i for. Wi, met ou lespwar dan Zeova.”
[Kestyon]
[Portre lo paz 23]
David ti ganny lafors kan i ti rapel bann moman kot Zeova ti delivre li
[Portre lo paz 25]
Eski nou vwar problenm ekonomik konman en loportinite pour fer plis dan predikasyon?
