Les Zeova gid ou ver vre laliberte
Les Zeova gid ou ver vre laliberte
“Egzamin byen lalwa parfe, lalwa laliberte.”—ZAK 1:25.
ESKI OU KAPAB EKSPLIKE?
Ki lalwa ki anmenn ver vre laliberte e lekel ki benefisye avek sa lalwa?
Ki sa sel mwayen pour trouv vre laliberte?
Ki kalite laliberte bann ki reste lo sa bon semen pou gannyen?
1, 2. (a) Ki pe arive avek laliberte dan sa lemonn e akoz? (b) Ki sa laliberte ki bann serviter Zeova pou gannyen?
NOU pe viv dan en letan kot vorasite, vyolans e fer sa ki mal pe kontinyen ogmante. (2 Tim. 3:1-5) Pour met lord, bann gouvernman i fer plis lalwa, ranforsi zot lafors lapolis e enstal bann kamera. Dan serten pei, dimoun i enstal bann sistenm alarm kot zot lakaz, azout plis lok avek zot laport e menm met kouran avek zot baraz pour protez zot lekor. Bokou zot pa al okenn par aswar ni menm les zot zanfan zwe deor san sipervizyon ki swa lizour oubyen aswar. I evidan ki dimoun pe deplizanpli perdi zot laliberte e sa sityasyon pa paret pou amelyore.
2 Dan zarden Edenn, Satan ti dir ki pour en dimoun ganny vre laliberte i bezwen endepandan avek Zeova. Pa sa ti en gro mansonz! Pli dimoun pa pran an kont bann standar moral ek spirityel ki Bondye in etablir, pli lasosyete an zeneral i soufer. Sa kondisyon ki pe vin pli grav i osi afekte bann serviter Zeova. Me nou annan lespwar ki en zour limanite pou sorti dan lesklavaz pese ek koripsyon e zot pou ganny sa ki Labib i apel “laliberte ek laglwar bann zanfan Bondye.” (Rom. 8:21) Anfet, Zeova in deza fini konmans prepar son bann serviter pour sa laliberte. Dan ki fason?
3. Ki lalwa Zeova in donn son bann serviter e ki kestyon ki nou pou egzaminen?
3 Nou kapab trouv larepons dan sa ki Zak, en ekriven Labib i apel “lalwa parfe, lalwa laliberte.” (Lir Zak 1:25.) Lezot versyon Labib i tradwir sa fraz konman “lalwa ki fer nou lib” (The New English Bible) oubyen “lalwa parfe laliberte” (The New American Bible). Normalman dimoun i asosye lalwa avek bann restriksyon, pa avek laliberte. Me ki savedir “lalwa parfe, lalwa laliberte”? Ki mannyer sa lalwa i fer nou lib?
SA LALWA KI FER NOU LIB
4. Ki savedir “lalwa parfe, lalwa laliberte” e lekel ki benefisye avek sa lalwa?
4 “Lalwa parfe, lalwa laliberte” i pa Lalwa Moiz akoz sa lalwa ti met o kler bann fot e i ti ganny akonplir atraver Kris. (Mat. 5:17; Gal. 3:19) Avek ki lalwa alor Zak ti pe refer avek? I ti annan antet “lalwa Kris” ki osi ganny apele “lalwa lafwa” ek “lalwa en pep lib.” (Gal. 6:2; Rom. 3:27, NW; Zak 2:12, NW) Alor, sa “lalwa parfe” i tou sa ki Zeova i demann nou pour fer. Bann Kretyen swazir ek ‘lezot mouton’ i benefisye avek sa lalwa.—Zan 10:16.
5. Akoz sa lalwa laliberte ki parfe i pa en fardo?
5 Kontrerman avek lalwa bokou pei, sa “lalwa parfe” pa ni konplike ni en fardo, me i bann komannman ek prensip ki senp. (1 Zan 5:3) Zezi ti dir: “Mon zoug i fasil e mon fardo i leze.” (Mat. 11:29, 30) Deplis, sa “lalwa parfe” pa bezwen en gran lalis lareg ek pinisyon akoz i fonde lo lanmour e i ganny grave lo lespri ek leker, pa lo plak ros.—Lir Ebre 8:6, 10.
FASON KI “LALWA PARFE” I FER NOU LIB
6, 7. Ki nou kapab dir konsernan bann standar Zeova e ki lalwa laliberte i kapab ed nou pour fer?
6 Bann standar ki Zeova in etablir pour son bann serviter i pour zot prop byenfe ek proteksyon. Pran par egzanp lalwa dan lanatir ki kontrol lenerzi ek matyer. Dimoun pa konplent ki sa bann lalwa i en fardo pour zot. O kontrer, zot apresye e realize ki sa bann lalwa i neseser pour zot byennet. Pareyman, bann standar moral e spirityel Zeova ki ganny reflekte dan “lalwa parfe” Kris i benefisye tou dimoun.
7 Apard protez nou, sa lalwa laliberte ki parfe i fer li posib pour nou satisfer tou nou bann dezir ki apropriye san ki nou fer ditor nou lekor ouswa afekte drwa ek laliberte lezot. Alor, pour nou kapab vin vreman lib e fer sa ki nou anvi, nou bezwen devlop bann dezir apropriye ki an armoni avek personnalite ek standar Zeova. Andotmo, nou bezwen aprann kontan sa ki Zeova i kontan e ay sa ki i pa kontan. Lalwa laliberte ki parfe i ed nou pour fer sa.—Amos 5:15.
8, 9. Ki byenfe bann ki obeir lalwa laliberte ki parfe i kapab gannyen? Donn en legzanp.
8 Akoz nou lenperfeksyon, i difisil pour nou kontrol nou bann move dezir. Toutfwa, anmezir ki nou obeir fidelman lalwa laliberte ki parfe, nou santi nou lib menm la konmela. Par egzanp, en nouvo etidyan Labib ki apel Jay ti adikt avek sigaret. Kan i ti aprann ki Bondye pa ti kontan sa move labitid, i ti bezwen fer en desizyon. Eski i ti pou kontinyen les son dezir pour fimen kontrol li oubyen i ti pou obeir Zeova? I ti fer sa bon desizyon pour servi Zeova menm si i ti difisil pour li aret fimen. Ki mannyer i ti santi apre ki i ti’n aret sa move labitid? I ti dir: “I ti vreman enkrwayab pour santi mwan lib e vreman zwaye.”
9 Bann dimoun ki “ganny kontrole par natir imen” i lib pour satisfer zot bann move dezir. Me Jay ti aprann par leksperyans ki anfet zot vin lesklav pese. Me laliberte ki Zeova i donnen kan nou ‘les nou ganny kontrole par lespri sen’ i fer nou vreman lib e i anmenn “lavi ek lape.” (Rom. 8:5, 6) Kote Jay ti ganny lafors pour aret sa move labitid ki ti fer li vin en lesklav? I pa ti sorti kot li me kot Bondye. I ti dir: “Mon ti etidye Labib regilyerman, demann Zeova son lespri sen atraver lapriyer e rod led dan kongregasyon Kretyen.” Sa bann provizyon i kapab ed nou osi pour ganny vre laliberte. Annou vwar ki mannyer.
EGZAMIN BYEN PAROL BONDYE
10. Ki savedir “egzamin byen” lalwa Bondye?
10 Zak 1:25 i dir: “Sa ki egzamin byen lalwa parfe, lalwa laliberte e ki persevere, . . . Bondye pou beni li dan tou son laktivite.” (Nou ki’n met an italik.) Sa mo Grek ki’n ganny tradwir “egzamin byen” i vedir “bese pour get en keksoz atantivman” ki enplik zefor ek konsantrasyon. Si nou anvi lalwa laliberte ki parfe enfliyans nou lespri ek nou leker, nou devret fer bokou zefor pour etidye Labib e medit lo sa ki nou lir.—1 Tim. 4:15.
11, 12. (a) Ki mannyer Zezi ti met lanfaz lo fer laverite vin nou fason viv? (b) Dapre sa portre anler, ki danze bann zenn an partikilye i devret evite?
11 Me an menm tan nou devret “persevere” oubyen andire dan nou zefor pour aplik Parol Bondye. Si nou fer sa, laverite pou vin nou fason viv. Zezi ti dir en keksoz parey avek bann ki ti krwar dan li: “Si zot obei byen sa ki mon ansenny zot, zot a vin vreman mon disip. Zot a konn laverite e laverite i ava fer zot lib.” (Zan 8:31, 32, nou ki’n met an italik.) En liv referans i dir ki sa mo ‘konnen’ parey i’n ganny servi dan sa konteks, i osi vedir annan lapresyasyon akoz “sa keksoz ki nou konnen i annan valer oubyen lenportans pour sa enn ki konn li.” Alor nou montre ki nou “konn” byen laverite kan nou fer laverite vin nou fason viv. Si nou fer sa, nou pou kapab dir ki “parol Bondye” i “aktif” dan nou e i pe sanz nou personnalite e fer nou reflekte pli byen personnalite nou Papa ki dan lesyel.—1 Tesa. 2:13.
12 Demann ou lekor: ‘Eski mon vreman konn laverite? Eski mon’n fer laverite vin mon fason viv? Oubyen mon ankor anvi sa “laliberte” ki lemonn i ofer?’ En ser ki ti grandi dan laverite ti ekrir sa konsernan son zenes: “Kan ou grandi dan laverite, Zeova i toultan la. Me dan mon ka, mon pa ti vreman konn li. Mon pa ti zanmen aprann ay sa ki i pa kontan. Mon pa ti krwar ki sa ki mon ti fer ti enportan pour li e mon pa ti zanmen tourn ver li kan mon ti dan problenm. Mon ti depan lo mon prop konprenezon me aprezan mon realize ki sa ti bet akoz mon pa ti konn nanryen.” Erezman sa ser ti realize pli tar ki son fason panse ti vreman mal e i ti fer bann gran sanzman enportan. I ti menm vin pionye ordiner.
VIN LIB AVEK LED LESPRI SEN
13. Ki mannyer lespri sen Bondye i kapab ed nou vin lib?
13 Dan 2 Korentyen 3:17 i dir: “La kot Lespri Senyer i ete, i annan laliberte.” Ki mannyer lespri sen i kapab ed nou vin lib? I ed nou pour devlop bann kalite ki enportan pour nou vin lib parey “lanmour, lazwa, lape, pasyans, [“fer dibyen lezot,” NW], labonte, [“lafwa,” NW], ladouser, [ek] kontrol lo nou prop lekor.” (Gal. 5:22, 23) San sa bann kalite, espesyalman lanmour, nou pa pou zanmen kapab ganny vre laliberte. I annan bokou levidans dan lemonn ki prouve ki sa i vre. I enteresan pour note ki apre ki zapot Pol ti mansyonn bann laspe fri lespri, i ti azoute: ‘Napa lalwa kont sa bann keksoz.’ Ki i ti pe esey dir? Napa okenn lalwa ki kapab anpes bann laspe fri lespri Bondye devlope dan en dimoun. (Gal. 5:18) I pa ti pou fer sans pour annan en tel kalite lalwa, pa i vre? I lavolonte Zeova ki nou devlop bann kalite ki Kris i annan pour touzour e pour demontre sa bann kalite dan tou sirkonstans.
14. Ki mannyer lespri sa lemonn i fer dimoun vin lesklav?
14 Bann ki les lespri sa lemonn kontrol zot e ki pe satisfer zot bann dezir enparfe i kapab krwar ki zot lib. (Lir 2 Pyer 2:18, 19.) Me larealite i tou lekontrer. Bann gouvernman i bezwen met en kantite lareg ek regilasyon pour met move konportman ek dezir bann dimoun anba kontrol. Pol ti dir: “Lalwa pa’n fer pour bann zis, me pour bann malfeter ek bann rebel.” (1 Tim. 1:9, 10) Par ‘swiv bann dezir zot lekor,’ zot vin lesklav pese, en met vreman kriyel. (Efe. 2:1-3) Zot parey bann zensek ki ganny atire par keksoz dou dan en bol e finalman zot tonm ladan.—Zak 1:14, 15.
VIN LIB ATRAVER KONGREGASYON KRETYEN
15, 16. Akoz i enportan pour asosye avek kongregasyon Kretyen e ki mannyer sa i fer nou lib?
15 Letan ou ti konmans asosye avek kongregasyon Kretyen, i pa ti konmsi ou ti pe antre dan en klib pour fer zanmi. Ou ti plito vin dan kongregasyon akoz Zeova ti atir ou. (Zan 6:44) Kwa ki ti pous li pour fer sa? Eski i ti vwar ou konman en dimoun ki drwat e ki annan lakrent pour li? Petet ou kapab dir: “Zanmen!” Alor ki Bondye ti vwar dan ou? I ti vwar en leker ki ti pare pour obeir son lalwa ki fer en dimoun lib, enn ki ti pare pour les li ganny enfliyanse par Li. Zeova in pran swen avek ou atraver kongregasyon Kretyen par donn ou nouritir spirityel, fer ou aret vin lesklav bann fo lansennyman ek siperstisyon ki fo larelizyon i ansennyen e par ansenny ou ki mannyer pour devlop en personnalite parey pour Kris. (Lir Efezyen 4:22-24.) An rezilta, ou’n ganny sa privilez pour vin parmi sa sel group dimoun dan lemonn ki vreman lib.—Zak 2:12.
16 Annou pran en legzanp. Kan ou parmi bann dimoun ki kontan Zeova avek tou zot leker, eski ou per? Eski tanzantan ou pe get deryer ou? Letan ou pe koze kot Lasal Rwayonm, eski ou pe vey ou bann keksoz pangar i disparet? O kontrer, ou santi ou alez e lib! Eski ou ti pou santi ou koumsa si ou ti dan en lot landrwa? Pa vreman! Anfet, sa laliberte ki ou gannyen parmi pep Bondye i zis en avangou sa ki ou pou kapab gannyen tre byento.
“LALIBERTE EK LAGLWAR BANN ZANFAN BONDYE”
17. Ki mannyer laliberte imen i relye avek “sa moman kan Bondye pou revel son bann garson”?
17 Kan Pol ti pe refer avek sa laliberte ki Zeova pou donn son bann serviter lo later, i ti ekrir: “Lemonn antye ki Bondye in kree pe esper avek pasyans sa moman kan Bondye pou revel son bann garson.” Apre i ti azoute: “Kreasyon pou ganny libere en zour avek pouvwar destrikter ki pe gard li dan lesklavaz, pour partisip dan laliberte ek laglwar bann zanfan Bondye.” (Rom. 8:19-21) Sa lekspresyon “lemonn” oubyen “kreasyon” pe refer avek tou imen ki annan lespwar pour viv lo later, setadir bann ki pou benefisye avek sa moman kan Bondye pou “revel” son bann garson ki i’n swazir. Bondye pou konmans revel son “bann garson” kan bann Kretyen swazir dan lesyel i travay ansanm avek Kris pour retir tou sa ki move lo later, sov en “gran lafoul” e gid zot dan nouvo lemonn.—Rev. 7:9, 14.
18. Ki mannyer bann imen obeisan pou ganny plis laliberte e ki kalite laliberte ki finalman zot pou rezouir?
18 Bann imen ki pou’n ganny sove pou eksperyans en kalite laliberte ki pou totalman diferan akoz zot pa pou anba lenfliyans Satan ek bann demon. (Rev. 20:1-3) Pa sa pou en gran soulazman! Apre sa, Kris ansanm avek sa 144,000 lerwa ek pret pou kontinyen liber limanite ptitapti atraver bann byenfe ki sakrifis Zezi i donnen ziska ki tou tras lenperfeksyon ki nou’n erite avek Adan i disparet. (Rev. 5:9, 10) Apre ki zot pou’n demontre ki zot fidel menm dan leprev, imen pou’n ganny sa laliberte parfe ki Zeova ti anvi pour zot, setadir sa “laliberte ek laglwar bann zanfan Bondye.” Zis mazinen! Ou pa pou zanmen lite pour fer sa ki byen dan lizye Bondye ankor akoz ou lekor, leker ek lespri pou parfe e ou pou kapab imit personnalite Bondye dan en fason parfe.
19. Ki nou bezwen kontinyen fer pour nou kapab reste lo sa semen vre laliberte?
19 Eski ou ti a kontan ganny sa “laliberte ek laglwar bann zanfan Bondye”? Si wi, les ou lespri ek leker kontinyen ganny enfliyanse par sa “lalwa parfe, lalwa laliberte.” Kontinyen etidye Labib. Fer laverite vin ou fason viv. Demann Bondye led son lespri sen atraver lapriyer. Apresye lasosyasyon avek kongregasyon Kretyen ek sa nouritir spirityel ki Zeova i fourni. Pa les Satan fer ou krwar ki Bondye i demann tro bokou avek ou parey i ti fer avek Ev. Dyab i byen rize, me parey nou pou vwar dan lartik ki swiv, nou kapab evite “ganny anbete par Satan, parski nou konn byen son bann lentansyon.”—2 Kor. 2:11.
[Kestyon]
[Portre lo paz 14]
Eski mon ankor anvi sa “laliberte” ki lemonn i ofer?
[Portre lo paz 14]
Eski mon’n fer laverite vin mon fason viv?
