Akoz sa Enn ki ekout lapriyer i les nou soufer?

SERTEN dimoun i doute si Bondye i vreman egziste menm si zot priye. Akoz zot doute? Petet se akoz zot vwar en kantite soufrans dan sa lemonn. Eski ou’n deza demann ou lekor akoz Bondye i les nou soufer?

Eski Bondye ti kre bann imen enparfe par ekspre pour zot soufer? Nou pa ti pou kapab annan respe pour en bondye ki anvi nou soufer. Me reflesir en kou: Si ou ti pe admir en zoli loto nef e apre ou vwar ki i annan en bout ki’n ganny andomaze, eski ou ti pou mazinen ki sa ki’n fer sa loto in fer li koumsa par ekspre? Byensir ki non! Ou ti pou mazinen ki sa dimoun in fer li dan en fason “parfe” me ki en lot dimoun oubyen keksoz ki’n andomaz sa loto.

Pareyman, ler nou admir lanatir, lafason ki tou keksoz in ganny fer avek lord, me apre remark bann dezord ek koripsyon ki afekte bann imen, ki konklizyon nou merit tonm lo la? Labib i dir ki Bondye ti kre sa premye koup imen parfe, me ki plitar, zot menm zot ti fer ditor zot prop lekor. (Deterononm 32:4, 5) Sa bon nouvel se ki Bondye in promet pour repar sa domaz par fer bann imen obeisan vin parfe. Me, akoz i’n esper tou sa letan?

Akoz i’n esper tou sa letan?

Rezon i annan pour fer avek sa kestyon: ‘Lekel ki annan drwa diriz limanite?’ Zeova pa ti kre bann imen pour zot diriz zot menm. Li ki ti pou zot Dirizan. Labib li menm i dir: “I pa pour en imen ki pe marse pour diriz son lepa.” (Zeremi 10:23) Malerezman, sa premye koup ti swazir pour rebel kont dominasyon Bondye. Zot dezobeisans ti fer zot vin bann peser. (1 Zan 3:4) An  rezilta sa, zot ti vin enparfe e sa ti annan en lefe lo zot menm ek zot desandans.

Pour plizyer milye lannen, Zeova in permet bann imen diriz zot lekor, me listwar in montre ki imen napa sa abilite pour diriz zot prop lekor. I montre ki tou bann gouvernman imen i fer soufer lezot. Napa ni enn ki’n deza met en lafen avek lager, krim, lenzistis oubyen maladi.

Ki mannyer Bondye pou repar sa domaz?

Dan Labib, Bondye i promet ki i pou annan en nouvo later kot i pou annan lazistis. (2 Pyer 3:13) Zis bann ki swazir lo zot menm pour demontre lanmour anver lezot e anver Bondye ki pou ganny sa loportinite pour viv lo la.​—Deterononm 30:15, 16, 19, 20.

Labib i osi dir ki pandan “sa zour zizman” ki pe aprose byen vit, Bondye pou met en lafen avek soufrans ek tou bann ki fer soufer lezot. (2 Pyer 3:7) Apre sa, sa Enn ki Bondye in swazir pour dirize, setadir Zezi Kri, pou gouvern bann imen obeisan. (Danyel 7:13, 14) Ki Zezi konman lerwa pou akonplir? Labib i dir: “Bann dimoun ki annan limilite pou posed later, e zot pou sirman trouv bokou plezir dan labondans lape.”​—Psonm 37:11.

Konman Lerwa dan lesyel, Zezi pou repar tou domaz, enkli maladi, lavyeyes ek lanmor ki bann imen ti gannyen apre ki zot ti’n rebel kont Zeova, “sours lavi.” (Psonm 36:9) Zezi pou geri tou bann ki aksepte son bon dominasyon. Anba son dominasyon, sa de promes ki dan Labib pou vin vre:

▪ “Okenn zabitan pa pou dir: ‘Mon malad.’ Fot bann dimoun ki pe reste dan sa pei pou ganny pardonnen.”​—Izai 33:24.

▪ “[Bondye] pou eswiy tou larm dan zot  lizye. Lanmor pou nepli egziste. Pou nepli annan ni dey, ni plere, ni soufrans, parski lemonn ansyen in disparet.”​—Revelasyon 21:4.

Pa i rekonfortan pour konnen ki byento Bondye pou akonplir son promes pour met en lafen avek tou soufrans? Antretan, nou kapab asire ki i ekout nou lapriyer menm si pour lemoman i permet soufrans.

Bondye i egziste. I kapab tann ou, menm ler ou pe soufer oubyen dan sagrinasyon. I vreman anvi vwar ou la pour rezwir sa letan kot ou pou nepli annan okenn dout ek douler.