Aprann avek Parol Bondye

Ki mannyer bann lanz ek demon i enfliyans nou?

Sa lartik i soulev bann kestyon ki petet ou’ n deza demande e i montre kote ou kapab trouv larepons sa bann kestyon dan ou Labib. I pou en plezir pour Temwen Zeova ed ou pour trouv larepons sa bann kestyon.

1. Lekel bann lanz?

Bann lanz i bann lespri envizib ki viv dan lesyel. Zot pli siperyer ki bann imen. Sa vre Bondye ki li menm li i en lespri ti kre bann lanz avan i ti kre later. (Zob 38:4, 7; Matye 18:10) I annan plizyer milyon lanz fidel ki servi Zeova.​—Lir Psonm 103:20, 21; Danyel 7:9, 10.

2. Eski bann lanz i kapab ed dimoun?

Bann lanz ti ed en zonm drwat ki ti apel Lot. I ti reste dan en lavil ki Bondye ti’n deside pour detrir akoz bann move keksoz ki dimoun ti pe fer. De lanz ti averti Lot ek son fanmir pour sove. Serten dimoun ti krwar ki sa lavertisman ti zis en dyok, alor zot ti inyor li. Me Lot ek son de fiy ti sirviv akoz zot ti obeir lavertisman ki Bondye ti donn zot par mwayen bann lanz.​—Lir Zenez 19:1, 13-17, 26.

Dapre Labib, bann lanz pe ed dimoun ozordi par diriz travay sa bann ki pe fidelman anons sa bon nouvel lo Rwayonm Bondye. (Matye 24:14) Sa bon nouvel i osi enkli en lavertisman. Parey sa lavertisman ki ti ganny donnen avek Lot, i pa en dyok. I sorti kot Bondye atraver bann lanz.​—Lir Revelasyon 1:1; 14:6, 7.

Bondye i kapab servi bann lanz pour donn nou lafors ler nou dan leprev. I ti servi en lanz pour ankouraz Zezi.​—Lir Lik 22:41-43.

Byento Bondye pou servi bann lanz pour detrir bann move dimoun ki fer lezot soufer. Sa pou anmenn en gran soulazman pour limanite.​—Lir 2 Tesalonisyen 1:6-8.

  3. Ki mannyer bann demon i enfliyans nou?

Zis parey en kantite dimoun lo later i fer bann move keksoz par dezobeir Bondye, dan lesyel osi en kantite lanz in rebel kont Bondye. (2 Pyer 2:4) Bann lanz ki’n dezobeir Bondye i apel bann demon. Sef bann demon i Satan oubyen Dyab. Satan ek son bann demon pe tronp limanite.​—Lir Revelasyon 12:9.

Satan in servi bann biznes ek gouvernman imen ki koronpi ek bann fo larelizyon pour enfliyans bann dimoun e fer zot pa enterese avek Bondye. Alor, se Satan ki responsab pour bann lenzistis, vyolans ek soufrans ki pe afekte limanite.​—Lir 1 Zan 5:19.

4. Ki mannyer bann demon i anbet dimoun?

Satan in anbet bokou dimoun atraver lansennyman ki bann mor i vin bann lespri ki kapab kominik avek zot. Par kont, Labib i dir ki bann mor pa kapab fer nanryen ditou. (Eklezyast 9:5) Me souvan bann demon i anbet dimoun par imit lavwa en dimoun ki zot kontan me ki’n mor. (Izai 8:19) Bann demon i anbet lezot atraver bann bonnonm dibwa, sorsye ek oroskop. Parol Bondye i averti nou kont sa bann pratik. Alor, nou devret zet tou sa ki nou annan ki annan pour fer avek bann demon ek pratik demonyak.​—Lir Deterononm 18:10, 11; Akt 19:19.

Si nou kontan Zeova, nou pa bezwen per bann demon. Ler nou etidye Parol Bondye e fer sa ki i demann nou pour fer, nou pou reziste Dyab e vin pros avek Bondye. Zeova i pli pwisan ki bann demon. Son bann lanz fidel i kapab donn nou lafors ler nou dan bezwen.​—Lir Psonm 34:7; Zak 4:7, 8.

Pour plis lenformasyon, vwar sapit 10 dan liv Ki Labib i vreman dir? pibliye par Temwen Zeova.