Konport zot konman sitwayen Rwayonm!
Konport zot konman sitwayen Rwayonm!
“Konport zot dan en fason ki an-akor avek levanzil.”—FILI. 1:27.
KI OU POU REPONN?
Lekel ki kapab vin sitwayen Rwayonm Bondye?
Ki ou bezwen fer konsernan langaz, listwar ek lalwa Rwayonm Bondye?
Ki mannyer bann sitwayen Rwayonm Bondye i montre ki zot kontan lalwa Bondye?
1, 2. Akoz konsey Pol pour kongregasyon Filip ti annan en sinifikasyon spesyal?
ZAPOT Pol ti ankouraz kongregasyon Filip pour “konport zot dan en fason ki an-akor avek levanzil.” (Lir Filipyen 1:27.) Sa lekspresyon Grek ki Pol ti servi pour sa mo “konport” i kapab osi ganny tradwir “konport zot konman bann sitwayen.” Sa fraz ti annan en sinifikasyon spesyal pour kongregasyon Filip. Akoz? Parski i paret ki Filip ti enn parmi serten lavil kot bann zabitan ti kapab ganny sitwayennte Romen. Bann sitwayen Romen dan lavil Filip e partou dan Lanpir Romen ti fyer pour annan sa sitwayennte e zot ti ganny proteze anba lalwa Romen.
2 Bann manm kongregasyon Filip ti annan plis rezon ankor pour zot fyer. Pol ti rapel zot ki konman bann Kretyen swazir zot ti pou ganny sitwayennte “dan lesyel.” (Fili. 3:20) Zot pa ti sitwayen en lanpir imen, me plito sitwayen Rwayonm Bondye. Dan sa fason, zot ti pou ganny proteksyon ek byenfe ki okenn lezot rwayonm pa ti pou kapab donn zot.—Efe. 2:19-22.
3. (a) Lekel ki annan loportinite pour vin sitwayen Rwayonm? (b) Ki nou pou egzaminen dan sa lartik?
3 Konsey Pol pour konport zot konman bann sitwayen i aplik premyerman pour sa bann ki pou diriz ansanm avek Kris dan lesyel. (Fili. 3:20) Me, i osi kapab aplik pour sa bann ki pou lo later konman sitwayen Rwayonm Bondye. Akoz? Parski tou Kretyen batize i servi menm Lerwa e sa se Zeova, e zot viv an armoni avek menm standar. (Efe. 4:4-6) Ozordi, bann dimoun i travay dir pour zot ganny sitwayennte en pei ris. Eski pa nou devret apresye sa loportinite ki nou annan pour vin sitwayen Rwayonm Bondye? Pour ogmant nou lapresyasyon pour sa privilez, annou vwar detrwa similarite ant bann rekomandasyon pour vin sitwayen en pei ek sitwayen Rwayonm Bondye. Nou pou vwar trwa keksoz ki nou devret fer pour kontinyen gard sa privilez konman en sitwayen Rwayonm.
REKOMANDASYON POUR GANNY SITWAYENNTE
4. Ki si sa sa langaz pir e ki mannyer nou “koz” li?
4 Aprann sa langaz. Serten gouvernman imen i ekspekte ki bann dimoun ki pe fer laplikasyon pour ganny sitwayennte dan sa pei i koz langaz ofisyel sa pei. Menm apre ki zot ganny zot sitwayennte, bann dimoun pou fer zefor pour plizyer lannen pour koz byen sa nouvo langaz. Petet zot pou deswit aprann lareg gramer sa langaz, me i pou pran en pe letan pour zot kapab pronons sa bann mo korekteman. Pareyman, Rwayonm Bondye i ekspekte ki son bann sitwayen i aprann sa ki Labib i apel sa “langaz pir.” (Lir Tsefanya 3:9. *) Ki sa langaz? Sa langaz se laverite lo Bondye ek son plan ki ganny trouve dan Labib. Dan en sans, nou “koz” sa langaz pir kan nou kondwit i annakor avek lalwa ek prensip Bondye. Bann sitwayen Rwayonm Bondye i kapab aprann vitman bann lansennyman de baz dan Labib e batize. Me, menm apre ki zot batize, zot devret fer bokou zefor pour “koz” sa langaz pir pli byen ankor. Dan ki fason? Nou tou nou bezwen fer zefor pour aplik sa ki nou aprann.
5. Akoz nou devret aprann tou sa ki nou kapab konsernan lorganizasyon Zeova lo later?
5 Etidye listwar. En dimoun ki oule vin sitwayen en pei i petet bezwen aprann serten keksoz konsernan son listwar. Pareyman, sa bann ki anvi vin sitwayen Rwayonm Bondye i bezwen aprann tou sa ki zot kapab lo Rwayonm Bondye. Get legzanp ki bann garson Kora dan letan lontan Izrael in kite. Zot ti pran plezir dan Zerizalenm ek son landrwa ladorasyon e zot ti koz lo listwar sa lavil. Zot pa ti enpresyonnen par bann ros ek mortar, me plito avek sa ki sa lavil ek landrwa ladorasyon ti reprezante. Zerizalenm ti “lavil [Zeova, sa] Gran Lerwa” akoz i ti sant vre ladorasyon. Lanmenm laba kot Lalwa Zeova ti ganny ansennyen. Zeova ti demontre son labonte leker anver bann dimoun ki ti ganny dirize par Lerwa Zerizalenm. (Lir Psonm 48:1, 2, 9, 12, 13. *) Parey zot, eski ou annan sa dezir pour etidye e koz lo listwar lorganizasyon Zeova lo later? Pli ou aprann konsernan lorganizasyon Zeova ek lafason ki i siport son pep, pli Rwayonm Bondye pou vin reel pour ou. Ou dezir pour pres sa bon nouvel pou natirelman ogmante.—Zer. 9:24; Lik 4:43.
6. Akoz i toutafe normal pour Zeova ekspekte ki nou aprann e obeir lalwa ek prensip son Rwayonm?
6 Konn bann lalwa. Bann gouvernman imen i ekspekte ki son bann sitwayen i aprann e obeir lalwa sa pei. I toutafe normal alor ki Zeova i ekspekte ki nou aprann e obeir bann lalwa ek prensip ki ganny servi pour gouvern tou bann sitwayen Rwayonm Bondye. (Iza. 2:3; Zan 15:10; 1 Zan 5:3) Lalwa imen i souvan annan defo avek e i kapab enzis tou. Me, “lalwa Zeova i parfe.” (Ps. 19:7) Eski nou kontan lalwa Bondye e lir son Parol sak zour? (Ps. 1:1, 2) Sel fason ki nou kapab aprann lalwa Bondye se kan nou etidye li pour nou menm. Personn pa kapab fer li pour nou.
SITWAYEN RWAYONM BONDYE I KONTAN LALWA BONDYE
7. Ki standar pli siperyer bann sitwayen Rwayonm Bondye i viv annakor avek?
7 Pour reste en sitwayen Rwayonm Bondye, nou pa zis bezwen konn lalwa Bondye, me nou bezwen kontan li osi. Bokou sitwayen en pei i dir ki zot dakor avek bann lalwa ek standar en pei kot zot pe reste. Me, kan en lalwa pa dan zot faver e zot santi ki personn pa pe get zot, zot kas sa lalwa. Souvan zot obeir lalwa zis pour ‘fer lezot dimoun plezir.’ (Kol. 3:22) Me bann sitwayen Rwayonm Bondye i viv annakor avek en standar pli siperyer. Nou volonterman obeir lalwa Bondye, menm kan lezot imen pa pe get nou. Akoz? Parski nou kontan sa Enn ki fer lalwa.—Iza. 33:22; lir Lik 10:27.
8, 9. Ki mannyer ou pou konnen si ou vreman kontan lalwa Bondye?
8 Ki mannyer ou kapab montre ki ou vreman kontan lalwa Bondye? Get lafason ki ou reazir kan ou ganny en konsey lo en keksoz ki ou santi i ou swa personnel, par egzanp, dan domenn resanz ek laparans. Avan ki ou ti vin en sitwayen Rwayonm Bondye, ou ti petet abitye sanz devergonde ouswa dan en fason provokan. Anmezir ou lanmour pour Zeova in ogmante, ou’n aprann pour sanz dan en fason ki onor li. (1 Tim. 2:9, 10; 1 Pyer 3:3, 4) Petet ou santi ki aprezan ou sanz dan en fason respektab. Me si en ansyen i dir ou ki sa kalite lenz ki ou swazir pour mete i annan en move lefe lo serten proklanmater dan kongregasyon? Ki mannyer ou pou reazir? Eski ou pou ofanse, ankoler ouswa antete? Enn parmi bann lalwa fondamantal Rwayonm Bondye se ki tou bann sitwayen i imit Kris. (1 Pyer 2:21) Konsernan imit legzanp Zezi, zapot Pol ti ekrir: “Sakenn antre nou i devre esey fer plezir son prosen pour fer li vin pli for dan lafwa. Kris li pa ti esey rod sa ki ti fer li plezir.” (Rom. 15:2, 3) Pour gard lape dan kongregasyon, en Kretyen matir pou pare pour aksepte pour respekte konsyans lezot volonterman.—Rom. 14:19-21.
9 Annou get ankor de topik enportan: nou latitid vizavi sèks ek nou pwennvi lo maryaz. Sa bann ki pa ankor vin sitwayen Rwayonm Bondye pa vwar nanryen mal avek omoseksyalite, pornografi, adilter ek divors. Bann sitwayen Rwayonm Bondye in rezet sa bann latitid egois e zot konsyan konsekans zot aksyon. Menm si bokou Kretyen ti oparavan annan en lavi imoral, konmela zot vwar sèks ek maryaz konman en kado sorti kot Bondye. Standar Zeova i annan gran valer pour zot e zot senserman dakor ki sa bann ki kontinyen partisip dan bann kondwit seksyel imoral pa merit vin sitwayen Rwayonm Bondye. (1 Kor. 6:9-11) Me, zot osi rekonnet ki leker i tret. (Zer. 17:9) Alor, zot kontan pour ganny bann lavertisman spesifik ki ed zot pour kontinyen gard bann standar moral ki o nivo.
SITWAYEN RWAYONM BONDYE I KONTAN BANN LAVERTISMAN
10, 11. Ki lavertisman neseser Rwayonm Bondye in donnen e ki mannyer ou santi anver sa bann lavertisman?
10 Bann gouvernman imen i kapab donn bann lavertisman konsernan manze ek latizann ki kapab en danze pour nou. Byensir, pa tou manze ouswa latizann ki move. Me si en serten prodwi i poz en danze pour lasante kominote, sa gouvernman i kapab fer lanons pour protez son sitwayen. Si sa gouvernman pa ti fer li, i ti pou koupab pour neglizans. Pareyman, Rwayonm Bondye i donn bann lavertisman neseser konsernan bann danze moral e spirityel. Par egzanp, Internet i itil dan domenn kominikasyon, ledikasyon ek divertisman. Lorganizasyon Bondye i servi Internet e i pe akonplir bokou bon keksoz atraver sa mwayen. Me, bokou sit lo Internet i danzere moralman e spirityelman. Bann sit ki promot pornografi i prezant en danze pour lasante spirityel bann sitwayen Rwayonm Bondye. Pour plizyer dizenn lannen, lesklav fidel in averti nou konsernan sa bann sit pornografik. Pa nou vreman rekonesan pour bann lavertisman konsernan sa bann danze ki kapab afekte nou lasante spirityel!
11 Tou dernyenman, en lot kalite sit in vin popiler, enn ki kapab annan en serten litilite si i ganny servi avek bokou prekosyon. Me sa bann sit, ki koni konman bann sit Web sosyal i kapab danzere. I kapab fer en dimoun tonm dan move frekantasyon. (1 Kor. 15:33) I pa drol alor ki lorganizasyon Zeova in donn nou bann lavertisman ekilibre konsernan sa bann sit. Eski ou’n lir tou bann dernyen lenformasyon ki’n ganny pibliye par lesklav fidel konsernan servi sa bann sit sosyal? Eski pa i ti pou bet pour servi sa bann sit san ki ou’n lir sa bann lenformasyon? * I pou konmsi ou pe pran en latizann for san ki ou lir letiket lo sa boutey.
12. Akoz i bet pour inyor bann lavertisman?
12 Bann ki inyor lavertisman ki lesklav fidel e pridan i donnen i kapab met zot lekor ek sa bann ki zot kontan an danze. Serten in vin adikt avek pornografi ouswa komet limoralite seksyel e anbet zot lekor an krwayan ki Zeova pa kapab vwar sa ki zot pe fer. Eski pa i bet pour krwar ki nou kapab kasyet sa ki nou fer avek Zeova? (Prov. 15:3; lir Ebre 4:13.) Bondye i oule ed sa bann dimoun e motiv son bann reprezantan lo later pour esey ed zot. (Gal. 6:1) Me zis parey bann gouvernman imen i kapab kennsel sitwayennte en dimoun ki kas serten lareg, Zeova pou kennsel sitwayennte sa bann ki kas son standar e ki pa repantir. * (1 Kor. 5:11-13) Kantmenm sa, Zeova i annan mizerikord. Sa bann ki repantir i kapab reganny laprouvasyon Bondye e reste en sitwayen Rwayonm Bondye. (2 Kor. 2:5-8) Pa i en loner pour servi sa bon Lerwa!
LEDIKASYON I ANNAN GRAN VALER POUR SITWAYEN RWAYONM BONDYE
13. Ki mannyer bann sitwayen Rwayonm Bondye i montre ki zot apresye sa ledikasyon ki zot gannyen?
13 Bokou gouvernman i travay dir pour enstrir zot bann sitwayen. Zot organiz bann lekol ki montre lir e ekrir e aprann en metye. Bann sitwayen Rwayonm i apresye sa bann lekol e zot aprann lir, ekrir e siport zot lekor finansyerman. Me, zot apresye plis sa ledikasyon ki zot gannyen konman sitwayen Rwayonm Bondye. Atraver kongregasyon, Zeova i montre nou konman pour lir. Paran i ganny ankouraze pour lir avek zot zanfan. Sak mwan, lesklav fidel e pridan i pibliy Latour Veyer ek Awake! Si ou lir detrwa paz par zour sak mwan, ou pou reste azour avek sa mwayen enportan ki sa Rwayonm pe donn lenstriksyon.
14. (a) Ki formasyon nou gannyen? (b) Ki sizesyon pour fer Ladorasyon fanmir ou’n pli kontan pour aplike?
14 Sak semenn, bann sitwayen Rwayonm i resevwar formasyon dan renyon kongregasyon. Par egzanp, pour apepre swasant an Lekol Minister Teokratik in ed bann zelev pour vin bann ansenyan efikas Parol Bondye. Eski ou dan sa lekol? Pa tro bokou letan pase, lesklav fidel in ankouraz nou pour fer Ladorasyon fanmir tou le semenn. Sa laranzman i fer bann fanmir vin pli pros avek kanmarad. Eski ou’n reisi aplik bann sizesyon ki’n ganny pibliye dan nou bann piblikasyon? *
15. Lekel enn parmi bann pli gran privilez ki nou annan?
15 Bann sitwayen gouvernman imen pa kanmi pour ralye pour siport zot parti politik, menm pour al portanport. Lo en pli gran lanpler, bann sitwayen Rwayonm i siport Rwayonm Bondye avek devouman lo semen e portanport. Anfet, parey lartik avan ti montre, Latour Veyer ki pe anons Rwayonm Zeova i aprezan sa magazin ki’n ganny plis distribye lo later. Enn parmi bann pli gran privilez ki nou annan se pour koz avek lezot lo Rwayonm Bondye. Eski ou partisip dan predikasyon avek devouman?—Mat. 28:19, 20.
16. Ki mannyer ou kapab prouve ki ou en bon sitwayen Rwayonm Bondye?
16 Byento Rwayonm Bondye pour sa sel gouvernman ki pou diriz later. I pou gouvern son bann sitwayen, pa zis dan domenn spirityel me sivil osi. Eski ou pou en bon sitwayen Rwayonm Bondye sa letan? La i lemoman pour prouve ki ou pou enn. Dan tou desizyon ki ou fer sak zour, fer tou pour laglwar Zeova, koumsa ou pou prouve ki ou pe konport ou konman en sitwayen Rwayonm Bondye.—1 Kor. 10:31.
[Not anba lo paz]
^ par. 4 Tsefanya 3:9: “Mon pou sanz langaz sa pep e fer zot koz en langaz pir, pour ki zot tou zot kriy o non Zeova, pour zot kapab servi li zepol kont zepol.”
^ par. 5 Psonm 48:1, 2, 9, 12, 13: “1 Zeova i gran e nou merit loue li bokou dan lavil nou Bondye, lo son montanny sen. 2 Montanny Siyon i zoli akoz son oter, later antye i dan lazwa akoz li, i byen lwen dan nor, i lavil sa Gran Lerwa.” “9 O Bondye, nou’n medit lo ou labonte leker, o milye ou tanp.” “12 O lepep, mars otour Siyon e fer li letour, kont son bann latour. 13 Fikse zot leker lo son baraz. Egzamin son bann latour kot dimoun i reste pour ki zot kapab rakont li avek fitir zenerasyon.”
^ par. 11 Par egzanp, vwar Awake! Zilyet 2011 lo paz 24-27; Out 2011 lo paz 10-13 ek Fevriye 2012 lo paz 3-9.
^ par. 12 Vwar Latour Veyer le 15 Mars 2012 lo paz 30-31 an Angle.
^ par. 14 Vwar Latour Veyer le 15 Out 2011 an Angle lo paz 6-7 ek Nou Minister Rwayonm Zanvye 2011 lo paz 3-6.
[Kestyon]
[Ekstre lo paz 21]
Eski ou ekout lavertisman baze lo Labib konsernan Internet?
[Portre lo paz 19]
Parey bann garson Kora, eski ou kontan vre ladorasyon ek son listwar?
[Portre lo paz 22]
Ladorasyon Fanmir i kapab ed bokou pour fer ou ek bann ki ou kontan vin bann bon sitwayen
