Lekel sa Enn ki ekout lapriyer?
Lekel sa Enn ki ekout lapriyer?
SI I annan Enn ki ekout lapriyer, i fer sans pour krwar ki i bezwen Kreater tou keksoz. Lekel apard ki sa Enn ki’n kre laservel imen ki pou kapab lir ou bann panse? Lekel ankor ki kapab ekout lapriyer e donn bann imen sa led ki zot bezwen? Me petet ou kapab demann ou lekor: ‘Eski i fer sans pour krwar dan en Kreater?’
En kantite dimoun i panse ki pour krwar dan en Kreater oubyen Bondye, ou bezwen rezet bann levidans syantifik. Me sa pa vre. Annou vwar akoz.
▪ En serve in ganny fer resaman avek 1,646 profeser lasyans dan 21 pli gran liniversite Leta-z-ini. Sa serve i montre ki zis en tyer sa bann profeser ti dir: “Mon pa krwar dan Bondye.”
Larealite se ki bokou syantis i krwar ki Bondye i egziste.
Levidans ki i annan en Kreater
Eski nou bezwen aksepte ki sa Enn ki ekout lapriyer i egziste san okenn laprev? Ditou. Sa krwayans ki lafwa i vedir krwar dan en keksoz san okenn levidans i fo. Labib i dir ki lafwa i “sertitid [oubyen “levidans konkret,” NW] keksoz ki ou pa’n war.” (Ebre 11:1, nou ki’n met an italik.) En lot tradiksyon Labib i dir ki lafwa i “asir nou ki keksoz ki nou pa vwar i en realite.” (The New English Bible) Pran legzanp ou telefonn, menm si ou pa vwar bann sinyal envizib ki transmet lavwa, ou aksepte ki sa bann sinyal envizib i egziste. Pareyman, menm si nou pa kapab vwar sa Enn ki ekout lapriyer, nou kapab revwar bann levidans ki pou konvenk nou ki i vreman egziste.
Kote nou kapab trouv levidans ki Bondye i egziste? Nou zis bezwen get otour nou. Labib i rezonn avek nou dan sa fason: “Wi, tou lakaz i bezwen annan en dimoun ki’n konstri li, me konstrikter tou keksoz se Bondye.” (Ebre 3:4) Eski sa verse i fer sans pour ou? Ler ou reflesir lo lafason ki liniver i organize, lorizin lavi, oubyen nou laservel ki’n ganny fer dan en fason pli konplike ki okenn lezot keksoz lo later, petet ou mazinen ki i bezwen annan en Bondye ki egziste. *
Me i annan en limit lo sa ki lanatir i kapab ansenny nou lo Bondye. Egzamin levidans konsernan Bondye dan kreasyon i konmsi ou pe tann en dimoun vini deryer en laport ki’n fermen. Ou konnen ki i annan en dimoun, me ou pa konnen lekel. Pour ou konnen, ou bezwen ouver laport. Pareyman, nou bezwen fer menm zafer pour idantifye sa Enn ki’n kre tou keksoz.
Labib i parey en laport ver konnesans lo Bondye. Ler ou ouver sa laport e egzamin bann detay lo bann profesi ek zot lakonplisman, ou pou trouv levidans ki Bondye i vreman egziste. * Me an plis ki sa, Labib i osi koz lo lafason ki Bondye ti tret bann dimoun e sa i revel personnalite sa Enn ki ekout lapriyer.
Ki mannyer sa Enn ki ekout lapriyer i ete?
Labib i montre ki sa Enn ki ekout lapriyer i en personnaz reel, enn ki ou kapab konnen. Sirman zis en vre personnaz ki kapab ekoute e konpran nou. I ankourazan pour lir parol en psalmis: “Ou ki ekout lapriyer, tou kalite dimoun pou vin ver ou.” (Psonm 65:2) I ekout bann ki priy li avek lafwa. I osi annan en non. Labib i dir: “Zeova i byen lwen avek bann move dimoun, me i ekout lapriyer bann ki drwat.”—Proverb 15:29.
Zeova i annan santiman. I en “Bondye lanmour” e i ganny apele “en Bondye ere.” (2 Korentyen 13:11; 1 Timote 1:11, NW) Konsernan lafason ki i ti azir ler i ti annan en kantite mesanste lo later, Labib i dir: “Sa ti fer son leker fer mal.” (Zenez 6:5, 6) Dimoun i dir ki Bondye i fer nou soufer pour teste nou, me sa pa vre. Labib i dir: “Zanmen sa vre Bondye pou azir dan en move fason.” (Zob 34:10) Me petet ou pou dir: ‘Si Bondye i sa Kreater tou pwisan, akoz i kontinyen les nou soufer?’
Zeova in donn bann imen sa liberte pour swazir e sa i dir nou en keksoz lo kalite Bondye i ete. Eski pa nou apresye nou liberte pour swazir konman nou viv nou lavi? Me malerezman, bokou dimoun i mal servi zot liberte e sa i fer zot menm ensi ki lezot soufer. Aprezan, la en kestyon ki vo lapenn pran letan pour reflesir lo la: Ki mannyer Bondye i kapab elimin soufrans me an menm tan les nou lib pour swazir? Nou pou egzamin sa kestyon dan prosen lartik.
[Not anba lo paz]
^ par. 8 Pour plis detay lo levidans ki montre ki Bondye i egziste, vwar brosir The Origin of Life—Five Questions Worth Asking ek sa liv Is There a Creator Who Cares About You?, pibliye par Temwen Zeova.
^ par. 10 Sa pti liv A Book for All People ek liv The Bible—God’s Word or Man’s? in ganny pibliye par Temwen Zeova pour ed ou vwar levidans ki Labib in ganny enspire par Bondye.
[Bwat lo paz 5]
Eski larelizyon i fer ou doute?
I malere pour dir, me i vre ki se larelizyon li menm ki fer bokou dimoun doute ki i annan en Bondye konpasyon ki ekout lapriyer. Lefet ki larelizyon i enplike dan lager, terorizm e i toler labi zanfan, sa in fer ki menm bann ki relizye in dir: “Mon pa krwar dan Bondye.”
Akoz larelizyon i souvan motiv dimoun pour fer sa ki mal? Senpleman, i akoz bann dimoun i fer bann move keksoz o non larelizyon. Labib ti predir ki bann move dimoun ti pou pran kontrol lo larelizyon Kretyen e servi zot pour fer sa ki mal. Zapot Pol ti dir bann ansyen dan kongregasyon: “Parmi zot pou annan dimoun ki pou leve pour ansenny bann mansonz pour fer bann krwayan swiv zot.”—Akt 20:29, 30.
Bondye in ganny ase avek fo larelizyon. Anfet, Parol Bondye, Labib, i dir ki bann fo larelizyon i responsab pour ‘disan tou sa ki’n ganny touye lo later.’ (Revelasyon 18:24) Lefet ki fo larelizyon pa’n ansenny dimoun lo sa vre Bondye lanmour, sa bann larelizyon i koupab dan lizye Bondye.—1 Zan 4:8.
Sa Enn ki ekout lapriyer i konpran ki mannyer bann ki ganny oprimen par larelizyon i santi. Byento, akoz son lanmour pour limanite, Bondye pou servi Zezi pour ziz tou bann ipokrit. Zezi ti dir: “Bokou pou dir mwan, ‘Senyer, Senyer! an ou non nou’n profetize’ . . . Alor mon a reponn zot, ‘Mon pa’n zanmen konn zot. Sorti la, zot ki pratik lemal!’” —Matye 7:22, 23.
