“Mon avek zot”
“Mon avek zot”
“Bokou pou rod partou partou, e sa vre konnesans pou annabondans.”—DAN. 12:4.
KI OU POU REPONN?
Dan nou letan, ki mannyer “sa vre konnesans” in vin annabondans?
Ki mannyer sa bann ki’n aksepte laverite in vin “bokou”?
Dan ki fason konnesans egzakt in vin “annabondans”?
1, 2. (a) Ki mannyer nou konnen Zezi i avek son bann disip la konmela e ki i pou avek zot a lavenir? (b) Dapre Danyel 12:4, ki ti pou arive kan Lekritir ti pou ganny egzaminen o profon?
MAZINEN ki ou dan Paradi. Tou le zour ou leve, ou’n byen repoze e ou byen kontan pour konmans en nouvo zour. Ou pa santi okenn douler. Ou nepli santi ou malad. Tou ou bann sans i parfe. Ou kapab vwar byen kler, ou tann byen, ou nennen pe byen fonksyonnen, ou kapab santi avek ou lanmen e ou ganny byen gou sa ki ou met dan ou labous. Ou annan en kantite lenerzi, ou kontan travay ki ou pe fer, ou annan bokou zanmi e napa nanryen ki pe trakas ou. Sanmenm sa bann benediksyon ki ou pou gannyen anba dominasyon Rwayonm Bondye. Nou Lerwa Kris Zezi pou beni son bann sitwayen e ansenny zot konsernan Zeova.
2 Zeova pou avek son bann serviter fidel kan zot pou konmans sa travay edikasyonnel mondyal a lavenir. Pour plizyer syek, Bondye ek son Garson in avek son bann serviter fidel. Avan ki i ti mont dan lesyel, Zezi ti asir son bann disip fidel ki i ti pou avek zot. (Lir Matye 28:19, 20.) Pour ranforsi nou lafwa dan sa promes, annou vwar zis en fraz dan en profesi enspire par Bondye ki ti ganny ekrir Babilonn plis ki 2,500-z-an pase. Konsernan sa “letan lafen” ki nou pe viv ladan ozordi, profet Danyel ti ekrir: “Bokou pou rod partou partou, e sa vre konnesans pou annabondans.” (Dan. 12:4) Nou konpran ozordi ki sa lekspresyon senbolik dan langaz Ebre ki’n ganny tradwir “rod partou partou” i donn sa lide pour egzamin keksoz o profon. Bann ki fer sa ti pou ganny beni en kantite, pa i vre! Sa bann ki etidye Lekritir o profon ti pou ganny beni akoz zot ti pou ganny sa vre konnesans oubyen konnesans egzakt lo Parol Bondye. Sa profesi i osi dir ki bokou ti pou aksepte “sa vre konnesans.” Deplis, sa konnesans ti pou annabondans. I ti pou disponib partou kote e i ti pou fasil pour ganny akse avek li. Anmezir nou pou egzamin lafason ki sa profesi in ganny akonplir, nou pou vwar ki Zezi i avek son disip ozordi e ki Zeova i annan sa abilite pour akonplir son promes konpletman.
“SA VRE KONNESANS” I GANNY RETROUVE
3. Apre lanmor bann zapot, ki ti arive avek “sa vre konnesans”?
3 Apre lanmor bann zapot, sa rebelyon kont Bondye oubyen lapostazi ki ti ganny predir ti pou arive dan kongregasyon Kretyen ti konmanse e i ti propaze konmsi dife. (Akt 20:28-30; 2 Tesa. 2:1-3) Plizyer syek apre sa, “sa vre konnesans” ti nepli annabondans, pa zis parmi sa bann ki pa ti konn Labib, me osi parmi sa bann ki ti dir zot Kretyen. Menm si zot ti dir ki zot ti krwar dan Labib, bann sef larelizyon Kretyen ti ansenny “bann lansennyman demon,” andotmo, bann mansonz ki dezonor Bondye. (1 Tim. 4:1) Akoz sa, bann dimoun an zeneral pa ti konn bokou keksoz spirityelman. Krwayans bann aposta ti enkli bann fo lansennyman ki Bondye i en Trinite, ki nanm pa mor e ki serten nanm i ganny tourmante dan lanfer pour touzour.
4. Ki mannyer en group Kretyen dan bann lannen 1870 ti konmans rod “sa vre konnesans”?
4 Me, dan bann lannen 1870, apepre kat deseni avan ki “bann dernyen zour” ti konmanse, en pti group Kretyen senser Pennsylvania, Leta-z-ini ti zwenn ansanm pour etidye Labib o profon e pour rod “sa vre konnesans.” (2 Tim. 3:1) Zot ti apel zot lekor bann Etidyan Labib. Zot pa ti “bann dimoun malen e entelizan” ki Zezi ti’n dir laverite ti pou ganny kasyet avek zot. (Mat. 11:25) Plito, zot ti bann zonm ki ti annan limilite e ki ti senserman anvi fer lavolonte Bondye. Zot ti rod gidans Bondye par lapriyer, lir, diskite e medit lo Lekritir. Zot ti osi konpar bann verse Labib e etidye bann resers ki lezot dimoun ti’n fer. Gradyelman, sa bann Etidyan Labib ti arive konpran bann laverite ki ti’n ganny kasyet pour plizyer syek.
5. Ki ti bi en seri trak ki ti apel The Old Theology?
5 Menm si bann Etidyan Labib ti kontan sa ki zot ti pe aprann, zot pa ti ponp zot lekor pour sa ki zot ti konnen, e zot pa ti dir ki sa ki zot ti’n dekouver ti en keksoz nouvo. (1 Kor. 8:1) Plito, zot ti pibliy en seri trak ki ti apel The Old Theology ki ti annan pour bi fer bann lekter konn laverite ki ti’n ganny rikorde dan Labib. Sa bann premye trak ti ed bann dimoun pour etidye Labib pour ki zot kapab “rezet tou bann fo tradisyon zonm” e pour aksepte bann vre lansennyman Zezi ek son bann zapot, andotmo “sa vye teolozi.”—The Old Theology, nimero 1, Avril 1889, paz 32.
6, 7. (a) Ki laverite ki nou’n arive konpran depi bann lannen 1870? (b) Ki laverite ki ou’n kontan pour aprann?
6 Depi bann lannen 1870, Temwen Zeova in aprann bokou laverite merveye. * Sa bann laverite pa annwiyan ouswa i pa bann size akademik ki bezwen ganny diskit lo la par bann eksper larelizyon. Sa bann laverite i vreman enteresan, i liber nou avek fo lansennyman, i fer nou lavi annan sans e donn nou lazwa ek lespwar. Zot ed nou pour konn Zeova, son zoli personnalite ek son plan. Sa bann laverite i ed nou konpran rol Zezi, akoz i ti viv lo later, akoz i ti mor e ki i pe fer la konmela. Sa bann laverite presye i montre akoz Bondye i permet lemal, akoz nou mor, ki mannyer nou devret priye e ki mannyer nou kapab vreman ere.
7 Aprezan nou kapab konpran sinifikasyon bann profesi ki ti en “sekre” pour plizyer lannen me ki aprezan pe ganny akonplir pandan sa letan lafen. (Dan. 12:9) Sa i enkli bann profesi dan Labib, me sirtou dan Levanzil ek liv Revelasyon. Zeova in menm ed nou pour konpran bann levennman ki nou pa ti pou kapab vwar avek nou de lizye parey kan Zezi ti vin lerwa, sa lager dan lesyel e ler Satan ti ganny zete lo later. (Rev. 12:7-12) Bondye in ed nou pour osi konpran sinifikasyon sa ki nou kapab vwar parey lager, tranblemandter, maladi, mankman manze, ensi ki bann dimoun ki pa krwar dan Bondye ki osi kontribye anver sa “letan difisil” ki nou pe viv ladan.—2 Tim. 3:1-5; Lik 21:10, 11.
8. Lekel ki’n fer li posib pour nou konpran laverite?
8 Bokou nou pou dakor avek sa ki Zezi ti dir son bann disip: “Ere sa lizye ki war sa bann keksoz ki zot war! Parski mon dir zot, bokou profet ek lerwa ki ti a anvi war sa ki zot war, me zot pa’n war, e tann sa ki zot pe tande, me pa’n tande.” (Lik 10:23, 24) Nou remersye Zeova ki i’n permet nou vwar e konpran sa bann keksoz. Nou vreman rekonesan ki lespri sen Bondye, sa “Konsolater” ouswa sa led in ganny anvoye pour gid bann disip Zezi “dan laverite an antye.” (Lir Zan 16:7, 13.) Annou touzour apresye sa vre konnesans konman en trezor e partaz li zenerezman avek lezot.
“BOKOU” I AKSEPTE “SA VRE KONNESANS”
9. Ki lanons ki ti ganny mete dan Latour Veyer Avril 1881 an Angle?
9 An Avril 1881, mwens ki de-z-an apre ki premye Latour Veyer an Angle ti’n ganny pibliye, i ti annan en lanons pour rod 1,000 predikater. Sa lartik ti dir: “Pour bann ki krwar ki zot kapab donn lanmwatye oubyen plis zot letan zis dan travay Senyer, nou annan en sizesyon . . . , setadir: Ki ou al dan bann gran ouswa pti lavil, dapre ou abilite, konman bann Colporteurs ouswa Evanzelizater, dan tou landrwa, rod bann Kretyen devoue. Ou pou vwar ki bokou parmi zot i deza annan sa devouman pour Bondye, me pa dapre konnesans egzakt. Koz avek sa bann dimoun lo larises lagras Nou Papa e bann mervey Son parol.”
10. Ki mannyer bann dimoun ti reazir anver sa lanons pour bann predikater a plen tan?
10 Sa lanons ti montre ki bann Etidyan Labib ti rekonnet ki pres sa bon nouvel i en travay enportan pour bann vre Kretyen fer. Me zot pa ti asire si zot ti pou kapab ganny 1,000 predikater a plen tan, vi ki zis detrwa santenn dimoun ki ti pe asiste renyon bann Etidyan Labib sa letan. Me, apre ki zot ti lir en trak ouswa magazin, bokou dimoun ti rekonnet laverite e zot ti byen reazir anver sa lanons. Par egzanp, an 1882, apre ki i ti’n lir en nimero Latour Veyer an Angle ek en liv ki ti’n ganny pibliye par bann Etidyan Labib, en lekter sorti Lonn, Langleter ti ekrir: “Silvouple, montre mwan ki mannyer e kwa ki mon pou pres lo la pour ki mon akonplir sa travay sakre ki Bondye i oule i ganny fer.”
11, 12. (a) Ki lobzektif nou annan an komen avek bann predikater a plen tan? (b) Ki mannyer bann predikater a plen tan ti form bann “laklas” ouswa kongregasyon?
11 Ver 1885, apepre 300 Etidyan Labib ti pe partisip dan sa servis konman predikater a plen tan. Sa bann minis a plen tan ti annan menm lobzektif ki nou ozordi, zot ti pe fer dimoun vin disip Zezi Kri. Me, zot metod ti diferan avek pour nou. Ozordi, nou etidye avek zis en dimoun alafwa e donn lenstriksyon endividyelman. Apre sa, nou envit sa etidyan pour asosye avek en kongregasyon ki’n deza ganny etablir. Me sa letan, bann predikater a plen tan ti plas bann liv e apre rasanble bann dimoun enterese ansanm pour etidye Lekritir konman en group. Olye etidye avek zot endividyelman, zot ti form bann “laklas” ouswa kongregasyon.
12 Par egzanp, an 1907, en group predikater a plen tan ti rod bann dimoun ki ti deza annan sa liv Millennial Dawn dan en serten lavil (ki ti osi ganny apele Studies in the Scriptures). En Latour Veyer an Angle ti dir: “Sa bann [dimoun enterese] ti ganny rasanble kot lakaz enn ant zot pour en pti renyon. Bann predikater a plen tan ti koz avek zot lo Plan Bondye (Divine Plan of the Ages) sa zour Dimans antye e son Dimans answit zot ti ankouraz zot pour fer bann renyon regilyerman.” An 1911, bann frer ti modifye sa prosedir. Senkant wit sirveyan spesyal ti vwayaze pour fer bann diskour partou dan bann lavil Leta-z-ini ek Kanada. Sa bann frer ti pran non ek ladres bann dimoun enterese ki ti asiste sa bann diskour e fer laranzman pour zwenn zot dan bann lakaz prive pour form bann nouvo “laklas.” Ver 1914, i ti annan 1,200 kongregasyon bann Etidyan Labib dan lemonn.
13. Kwa ki enpresyonn ou konsernan lanpler ki “sa vre konnesans” in arive?
13 Konmela, i annan apepre 109,400 kongregasyon dan lemonn antye e apepre 895,800 frer ek ser ki pe servi konman pionye. Apepre wit milyon dimoun aprezan in aksepte “sa vre konnesans” e zot pe aplik li dan zot lavi. (Lir Izai 60:22. *) * Sa i vreman enpresyonan vi ki Zezi ti predir ki “tou dimoun [ti] pou ay” son bann disip akoz son non. I ti osi azoute ki son bann disip ti pou ganny persekite, anprizonnen e menm touye. (Lik 21:12-17) Menm si pep Zeova i rankontre lopozisyon avek Satan, son bann demon ek bann imen ki opoz zot, pep Zeova i ganny bann rezilta ekstraordiner atraver sa travay fer disip ki zot in ganny lord pour fer. Denozour, zot pe pres “partou dan lemonn,” ki swa dan bann lafore tropikal, dan gro lafreser, dan montanny, dan dezer, dan bann lavil ouswa dan bann landrwa izole dan lakanpanny. (Mat. 24:14) Si i pa ti akoz led Bondye, en travay parey pa ti pou’n kapab ganny akonplir.
“SA VRE KONNESANS” I VIN “ANNABONDANS”
14. Dan ki fason “sa vre konnesans” in vin annabondans atraver bann piblikasyon?
14 Se atraver sa kantite dimoun ki pe anons sa bon nouvel ki “sa vre konnesans” in vin annabondans. I’n osi vin annabondans atraver bann piblikasyon ki nou enprimen. An Zilyet 1879, bann Etidyan Labib ti pibliy premye nimero sa magazin an Angle, ki sa letan ti annan pour tit Zion’s Watch Tower and Herald of Christ’s Presence. Sa nimero ti ganny enprimen par en lakonpannyen ki ti enprim 6,000 kopi zis an Angle. Charles Russell ki ti annan vennset an ti ganny swazir pour vin editer sa magazin e senk lezot Etidyan Labib matir ti regilyerman ekrir bann lartik. Konmela, Latour Veyer pe ganny pibliye dan 195 langaz. I sa magazin ki’n pli ganny distribye lo later antye e sak nimero i annan 42,182,000 kopi ki ganny distribye. Dan dezyenm plas, se Awake! ki annan apepre 41,042,000 kopi ki ganny distribye dan 84 langaz. An plis ki sa, sak lannen i annan apepre 100 milyon liv ek Labib ki ganny enprimen.
15. Ki mannyer nou travay i ganny finanse?
15 Sa travay enkrwayab i ganny soutenir par bann kontribisyon volonter. (Lir Matye 10:8.) Zis sa tousel i sirprenan pour bann dimoun dan lakonpannyen ki enprimen e ki konpran ki kantite depans i enplike pour aste sa bann masin, papye, lank ek lezot materyo. En frer ki responsab aste keksoz i dir: “Bann biznesmenn ki vizit nou bann lenprimri i etonnen pour vwar ki sa teknolozi sitan avanse ki prodwir bokou literatir i ganny finanse par kontribisyon volonter. Zot menm enpresyonnen ki tou sa bann ki travay dan Betel i sitan zenn e ere.”
KONNESANS LO BONDYE POU RANPLI LATER
16. Pour ki rezon nou pe fer konnen “sa vre konnesans”?
16 I annan en rezon akoz “sa vre konnesans” in vin pli annabondans. Lavolonte Bondye se ki “tou [“sort kalite,” NW] dimoun i ganny sove e ganny konnesans laverite.” (1 Tim. 2:3, 4) Zeova i oule ki bann dimoun i konn laverite pour ki zot kapab ador li dan en fason akseptab e resevwar son benediksyon. Par fer konnen “sa vre konnesans,” Zeova in rasanble bann Kretyen swazir ki ankor lo later. I pe osi rasanble “en gran lafoul” sorti dan “tou nasyon, tribi, pep ek lalang” ki annan lespwar pour viv pour touzour lo later.—Rev. 7:9.
17. Ki sa logmantasyon dan lakantite vre adorater i montre?
17 Lakantite vre adorater dan lemonn antye in vreman ogmante diran sa 130 lannen ki’n pase e sa i montre ki Bondye ek Zezi Kri, sa Lerwa ki i’n swazir, in avek bann serviter Zeova lo later pour gid, protez, organiz e enstrir zot. Lakantite zot ki’n ogmante i montre ki bann promes Zeova pour lavenir pou sirman ganny akonplir. “Later pou vreman ranpli avek konnesans Zeova zis parey delo i kouver lanmer.” (Iza. 11:9) Pa bann imen pou vreman ganny beni!
[Not anba lo paz]
^ par. 6 Ou pou benefisye si ou get sa DVD Jehovah’s Witnesses—Faith in Action, Part 1: Out of Darkness ek Jehovah’s Witnesses—Faith in Action, Part 2: Let the Light Shine.
^ par. 13 Izai 60:22: “Sa enn ki pti pou vin en milye, e sa enn ptipti en nasyon pwisan. Mwan menm Zeova, mon pou akseler li dan son letan.”
^ par. 13 Vwar liv Isaiah’s Prophecy—Light for All Mankind II, paz 320 an Angle ouswa Franse.
[Kestyon]
[Portre lo paz 14]
Bann Etidyan Labib ti annan limilite e zot ti senserman anvi fer lavolonte Bondye
[Portre lo paz 15]
Zeova i apresye ou zefor pour ede propaz “sa vre konnesans” lo Bondye
