Reziste e evit bann latrap Satan!

“Reziste kont tou bann riz Dyab.”​—EFE. 6:11.

KI OU POU REPONN?

Ki mannyer en serviter Zeova i kapab evite tonm dan pyez tay deryer keksoz materyel?

Kwa ki kapab ed en koup Kretyen pour pa tonm dan trou adilter?

Akoz ou krwar i enportan pour reziste sa dezir pour tay deryer keksoz materyel e komet limoralite seksyel?

1, 2. (a) Akoz Satan napa okenn konpasyon pour bann Kretyen swazir ek ‘lezot mouton’? (b) Ki latrap nou pou koz lo la dan sa lartik?

SATAN napa konpasyon pour bann imen, sirtou pour bann ki pe servi Zeova. Anfet, Satan pe fer en lager avek bann Kretyen swazir ki ankor lo later. (Rev. 12:17) Sa bann Kretyen fidel in diriz sa travay predikasyon mondyal dan nou letan e zot in ekspoz Satan konman dirizan sa lemonn. Dyab napa lanmour pour ‘lezot mouton’ osi akoz zot siport bann Kretyen swazir, annan lespwar pour viv pour touzour, en lespwar ki Satan li menm i nepli annan. (Zan 10:16) I pa drol ki i ankoler! Ki swa nou annan lespwar pour viv dan lesyel ouswa lo later, Satan pa enterese ditou avek nou byennet. I zis anvi nou vin enn son viktim.​—1 Pyer 5:8.

² Pour akonplir son bi, Satan in enstal diferan latrap ouswa pyez dan nou semen. Vi ki i’n avegle lespri bann non krwayan, zot pa aksepte sa bon nouvel e zot pa pe kapab vwar son bann latrap. Me, Dyab i osi arive tyonbo serten ki’n aksepte sa mesaz lo Rwayonm. (2 Kor. 4:3, 4) Lartik avan ti montre nou ki mannyer nou kapab evit trwa latrap Satan: (1) pa kontrol nou lalang (2) lafreyer ek presyon lezot e (3) ler nou santi nou tro koupab. Annou aprezan vwar ki mannyer nou kapab reziste de lezot latrap ouswa pyez Satan e sa se tay deryer keksoz materyel ek sa tantasyon pour komet adilter.

TAY DERYER KEKSOZ MATERYEL, EN LATRAP KI TOUFE

3, 4. Ki mannyer traka dan sa lemonn i kapab fer en dimoun tay deryer keksoz materyel?

³ Dan en parabol, Zezi ti koz lo lagrenn ki ti tonm dan pikan. I ti dir ki i reprezant en dimoun ki tann  parol Bondye “me traka, plezir lavi ek larzan i touf son lafwa e i pa raport okenn fri.” (Mat. 13:22) Tay deryer keksoz materyel i en pyez ki nou lennmi Satan i servi.

⁴ I annan de fakter ki kontribye pour touf lafwa en dimoun. En fakter se ‘traka’ ki nou gannyen dan sa lemonn. Dan sa “letan difisil,” i annan en kantite keksoz ki kapab trakas ouswa enkyet nou. (2 Tim. 3:1) Avek pri lavi ek mankman lanplwa ki kontinyelman ogmante, ou kapab vwar li difisil pour zwenn en bout avek en lot. Petet ou enkyet pour lavenir e ou mazinen: ‘Eski mon pou annan ase reveni kan mon pou pran retret?’ Sa bann kalite lenkyetid in fer serten tay deryer larzan an krwayan ki larises pou garanti zot sekirite.

5. Ki mannyer tay deryer larzan i kapab anbet ou?

⁵ Zezi ti koz lo en dezyenm fakter e sa se ‘larzan’ ouswa pyez pouvwar larises. Tay deryer larzan ek traka i kapab touf parol Bondye. Labib i montre klerman ki “larzan i fourni en proteksyon.” (Ekle. 7:12) Me i pa byen pour tay deryer larzan. Bokou in dekouver ki pli zot rente pour rod larises, pli zot tonm dan sa pyez pour tay deryer keksoz materyel. Serten in menm vin lesklav larises.​—Mat. 6:24.

6, 7. (a) Ki mannyer tay deryer keksoz materyel i kapab vin en danze kot en dimoun i travay? (b) Kwa ki en Kretyen i devret pran an konsiderasyon ler i pe mazin lo sa posibilite pour travay overtaym?

⁶ Sa dezir pour vin ris i kapab devlope san ki nou realize. Par egzanp, egzamin sa senaryo. Ou anplwayer i apros ou e dir: “Mon annan en bon nouvel pour ou! Nou lakonpannyen in siny en gro kontra. Sa i vedir ki ou pou bezwen travay overtaym ase souvan pour sa detrwa mwan ki vini. Me mon kapab asir ou ki lapey pou pey fre pour sa bann overtaym.” Ki mannyer ou pou reazir si ou ganny ofer sa sans? Byensir, i en gro responsabilite pour pran swen avek ou fanmir dan domenn materyel, me i pa sa sel responsabilite ki ou annan. (1 Tim. 5:8) I annan detrwa lezot keksoz ki ou devret pran an konsiderasyon. Ki kantite overtaym ou pou bezwen fer? Eski ou travay pou enterfer avek ou bann aktivite spirityel parey renyon kongregasyon ek Ladorasyon Fanmir?

⁷ Kan ou pe reflesir, kwa ki devret pli enportan? Eski lefe ki i pou annan lo ou kont labank ouswa lefe ki i pou annan lo ou spirityalite? Eski sa lanvi pour fer plis larzan pou anpes ou met lentere Rwayonm premye dan ou lavi? Eski ou kapab vwar ki mannyer tay deryer keksoz materyel pou annan lefe lo ou si ou ti pou  negliz ou spirityalite ek sa ki pour ou fanmir? Eski sanmenm ki pe ariv ou la konmela? Ki mannyer ou kapab reziste e pa les larzan oubyen keksoz materyel touf ou?​—Lir 1 Timote 6:9, 10.

8. Ki legzanp dan Labib ki pou ed nou pour evalye nou fason viv?

⁸ Pour anpese ki tay deryer keksoz materyel i trangle ou, tanzantan, reflesir lo ou fason viv. Ou sirman pa ti pou anvi vin parey Ezai ki ti demontre par son aksyon ki i ti pran alalezer bann keksoz spirityel! (Zen. 25:34; Ebr. 12:16) Ou definitivman pa devret vin parey sa zonm ris ki ti ganny demande pour vann tou sa ki i ti posede, donn bann pov e apre swiv Zezi. Olye fer sa, sa zonm “ti ale byen tris, akoz i ti annan gran larises.” (Mat. 19:21, 22) Lefet ki i ti’n tonm dan pyez larises, sa zonm ti perdi en gran privilez pour swiv sa zonm pli enportan ki’n deza viv lo later! Fer sir ki ou pa perdi sa privilez pour vin en disip Zezi Kri.

9, 10. Ki pwennvi Labib konsernan bann keksoz materyel?

⁹ Pour arive pa tro trakase pour bann keksoz materyel, swiv konsey Zezi ki ti dir: “Pa bezwen pran traka e demann zot lekor, ‘Ki nou pou manze? Ki nou pou bwar? Ki nou pou mete?’ Bann payen ki rod tousala. Me zot Papa ki dan lesyel i konn tou sa ki zot bezwen.”​—Mat. 6:31, 32; Lik 21:34, 35.

¹⁰ Plito ki vin en viktim pyez larises, fer bokou zefor pour annan menm pwennvi ki Agour, en ekriven Labib ki ti dir: “Pa les mwan vin tro mizer ouswa tro ris. Donn mwan zis sa ki mon bezwen.” (Prov. 30:8, Contemporary English Version) I kler ki Agour ti konpran ki larzan i anmenn en serten proteksyon e ki i osi kapab en pyez. Nou devret realize ki nou kapab pov spirityelman si nou les traka lavi ek larises kontrol nou. Si nou tro enkyet pour bann keksoz materyel, sa i kapab pran bokou nou letan, lenerzi e fer nou napa ditou ouswa pa sitan motive pour pourswiv lentere Rwayonm. Alor, reste determinen pour pa tay deryer keksoz materyel, ki en pyez Satan!​—Lir Ebre 13:5.

ADILTER, EN TROU KI BYEN KASYET

11, 12. Ki mannyer en Kretyen i kapab tonm dan sa latrap pour komet adilter kot travay?

¹¹ Bann saser ki oule tyonbo en gro zannimo i parfwa bezwen fouy en gran trou kot sa zannimo i souvan pase. Sa trou i souvan ganny kouver avek bann morso dibwa ek later. Enn parmi bann tantasyon Satan ki mars tre byen i parey sa enn latrap. Sa se pour komet limoralite seksyel. (Prov. 22:14; 23:27) En kantite Kretyen in tonm dan sa trou ler zot in met zot dan en sityasyon kot i sitan fasil pour zot fer konpromi. Serten Kretyen ki’n marye in arive komet adilter apre ki zot in devlop en lentere romantik pour en lot dimoun.

¹² En tel relasyon i kapab devlope dan landrwa travay. Anfet, en letid i montre ki plis ki lanmwatye madanm e 3 zonm lo 4 ki’n komet adilter in fer li avek en koleg travay. Eski dan ou travay ou bezwen asosye avek bann koleg lot sèks? Si wi, ki mannyer ou relasyon i ete avek zot? Eski ou’n etablir bann limit pour ki zot gard bann relasyon profesyonnel e pa plis ki sa? Par egzanp, si en ser Kretyen i toultan pe koz avek enn son koleg travay zonm, i kapab tant pour met konfyans dan sa zonm e dir li tou son bann problenm menm bann ki i pe rankontre dan son lavi maryaz. Dan en lot sityasyon, apre ki i’n vin zanmi avek en koleg madanm, en msye Kretyen i kapab mazinen: “I konpran mwan e i vreman ekoute kan mon koz avek li. I vreman apresye mwan. Si zis mon ti santi menm  zafer kot lakour!” Eski ou vwar ki mannyer en Kretyen ki dan en sityasyon parey i kapab an danze pour komet adilter?

13. Ki mannyer en relasyon romantik ki pa apropriye i kapab devlope dan kongregasyon?

¹³ En relasyon romantik ki pa apropriye i kapab devlope dan kongregasyon. Reflesir lo sa vre zistwar. Daniel ek son madanm Sarah * ti pionye ordiner. Parey Daniel i dir, i ti “en ansyen ki pa ti zanmen kapab dir non.” I ti volonterman aksepte tou privilez ki i ti gannyen. Dan son minister, i ti kondwir senk letid Labib avek bann zonm, trwa parmi ti batize. Sa bann nouvo frer ti bezwen bokou led. Kan Daniel ti okipe dan son bann responsabilite teokratik, Sarah ti souvan pe donn sa led neseser. Finalman, sa ti vin en labitid, kan sa bann ansyen etidyan ti bezwen led emosyonnel se Sarah ki ti donn zot. Sarah ti bezwen latansyon li osi e i ti ganny li avek bann ansyen etidyan Daniel. En latrap danzere ti’n ganny fouye. Daniel ti dir: “Apre plizyer mwan ki i ti’n donn tou pour tou, mon madanm ti’n epwize spirityelman e emosyonnelman. Deplis, vi ki mon ti pe negliz li, sa ki ti swiv ti katastrofik. Mon madanm ti komet adilter avek enn mon ansyen etidyan Labib. I ti’n afeblir spirityelman lanmenm la o bor mwan e mon ti telman preokipe avek mon bann responsabilite ki mon pa ti ni menm remarke.” Ki mannyer ou kapab evit sa trazedi?

14, 15. Kwa ki kapab ed bann koup Kretyen pour pa tonm dan pyez adilter?

¹⁴ Pour evite tonm dan trou adilter, reflesir lo sinifikasyon ou langazman maryaz. Zezi ti dir: “Sa ki Bondye in ini ansanm zonm pa devre separe.” (Mat. 19:6) Pa bezwen krwar ki bann responsabilite teokratik i pli enportan ki ou konzwen. Deplis, mazinen ki kan ou pas bokou letan lwen avek ou konzwen dan bann aktivite ki pa neseser, sa i kapab en siny ki ou maryaz pe afeblir e i kapab fer en dimoun ganny tante e menm arive fer en pese grav.

¹⁵ Me si ou en ansyen, ki ou pou fer avek troupo? Zapot Pyer ti ekrir: “Pran byen swen troupo Bondye ki’n ganny konfye avek zot konman berze; pa fer li kontre-ker me avek bonn volonte, konman Bondye i oule. Pa fer li pour ganny larzan me avek devouman.” (1 Pyer 5:2) Ou pa devret inyor bann manm kongregasyon ki ou pe pran swen avek. Me, ou responsabilite konman en berze pa devret anpes ou desarz ou responsabilite konman en msye marye. I pa vo lapenn e i menm danzere pour donn tou ou letan pour nouri kongregasyon tandis ki ou konzwen li i pe “mor lafen” kot lakour. Daniel i dir: “Ou pa devret tro preokipe pour pran swen avek bann responsabilite kongregasyon ki finalman ou negliz ou prop fanmir.”

16, 17. (a) Ki mezir pratik en koup Kretyen i kapab pran kot zot travay pour ki zot montre klerman ki zot pa oule devlop relasyon romantik avek personn? (b) Donn legzanp dan bann lenformasyon ki’n ganny pibliye ki kapab ed bann Kretyen pour pa komet adilter.

¹⁶ Dan Latour Veyer ek Awake! i annan bann bon konsey ki kapab ed bann koup Kretyen pour evite tonm dan pyez adilter. Par egzanp, Latour Veyer le 1 Oktob 2006 ti donn sa konsey: “Fer atansyon bann sitiasyon dan landrwa travay oubyen lezot landrwa ki kapab fer nou devlop bann relasyon entim. Par egzanp, si nou travay byen pros avek en dimoun lot sèks apre ler travay, sa i kapab fer nou tonm dan tantasyon. Si ou’n marye, ou bezwen fer kler par ou parol e osi fason ki ou konport ou ki ou pa disponib pour annan okenn relasyon avek personn. En  dimoun ki atase avek Bondye pa pou anvi atir tro bokou latansyon lo li, swa par sanz dan en fason provokan oubyen dan okenn lezot fason. . . . Si ou met portre ou konzwen ek ou zanfan dan ou landrwa travay, i kapab rapel ou ek lezot otour ou ki ou fanmiy i tre enportan pour ou. Determinen pour pa zanmen ankouraz oubyen menm les en lot dimoun fer bann lapros romantik avek ou.”

¹⁷ Sa lartik avek tit “Marital Fidelity​—What Does It Really Mean?” dan Awake! Avril 2009 i averti nou konsernan mazin bann aksyon seksyel avek en dimoun ki pa ou konzwen. Sa lartik ti montre ki bann tel panse i kapab ogmant sa risk pour ou komet adilter. (Zak 1:14, 15) Si ou’n marye, i byen pour ou ek ou konzwen revwar ansanm sa bann lenformasyon de tanzantan. Maryaz i en laranzman ki Zeova li menm in enstitye e i sakre. Si ou met letan dekote pour koz avek ou konzwen lo zot maryaz, sa i en bon fason pour montre ki ou apresye valer sa laranzman sakre.​—Zen. 2:21-24.

18, 19. (a) Ki konsekans adilter i annan? (b) Ki byenfe bann ki fidel dan zot maryaz i annan?

¹⁸ Si ou trouv ou pe ganny tante pour devlop en relasyon romantik ki pa apropriye, medit lo bann konsekans danzere ki limoralite seksyel ek adilter i kapab annan. (Prov. 7:22, 23; Gal. 6:7) Sa bann ki komet limoralite seksyel pa pe fer plezir Zeova e zot pe fer ditor zot konzwen ek zot prop lekor. (Lir Malaki 2:13, 14. *) De lot kote, reflesir byen lo bann byenfe ki sa bann ki annan en kondwit ki pir i gannyen. Zot pa zis annan lespwar pour viv pour touzour, me zot annan sa pli meyer lavi la konmela e i enplik en konsyans kler osi.​—Lir Proverb 3:1, 2. *

¹⁹ En psalmis ti sante: ‘Bann ki kontan lalwa Bondye i annan labondans lape, e napa okenn lobstak ki fer zot tonbe.’ (Ps. 119:165) Alor, kontan laverite e “fer byen atansyon ki mannyer [nou] viv. Pa viv konman bann dimoun inyoran, me konman bann dimoun saz” dan sa move lemonn. (Efe. 5:15, 16) Sa semen ki nou swiv i ranpli avek bann pyez ki Satan i servi pour tyonbo bann vre adorater. Me nou byen ekipe pour protez nou lekor. Zeova in donn nou sa ki nou bezwen pour “reziste” e “tenny dife tou bann dart alimen ki Dyab i anvoye”!​—Efe. 6:11, 16.

[Not anba lo paz]

[Kestyon]

[Portre lo paz 29]

Tay deryer keksoz materyel i kapab touf en dimoun spirityelman. Pa les sa ariv ou

[Portre lo paz 32]

Rod latraksyon ouswa les en dimoun fer lapros i kapab fer ou vin viktim adilter