Tasyon pyez Dyab!
Tasyon pyez Dyab!
“Debaras zot dan pyez . . . dyab.”—2 TIM. 2:26.
KI OU POU REPONN?
Ki kalite analiz personnel nou bezwen fer si nou annan sa tandans pour kritik lezot?
Atraver legzanp Pilat ek Pyer, ki nou aprann konsernan lafreyer ek presyon lezot?
Dan ki fason ou kapab evite santi ou tro koupab?
1, 2. Ki pyez Dyab nou pou egzaminen dan sa lartik?
DYAB pe misouk bann serviter Zeova. Son bi se pa neseserman pour detrir zot konmsi i en saser profesyonnel ki pe touy en zannimo. Plito, bi prensipal ki Dyab i annan se pour atrap son viktim vivan e servi sa dimoun dan sa fason ki li i oule.—Lir 2 Timote 2:24-26.
2 Pour arive atrap en zannimo vivan, en saser i kapab servi diferan latrap. Petet i pou esey fer sa zannimo sorti dan kler kot i pou kapab atrap li avek en la. Ouswa i kapab servi en pyez ki kasyet pour sirprann sa zannimo. Dyab i servi preski menm pyez pour tyonbo bann serviter Bondye vivan. Si nou pa oule tonm dan en latrap, nou bezwen reste vizilan e ekout lavertisman ki endike ki i annan en latrap oubyen pyez Satan pa tro lwen. Sa lartik pou eksplike ki mannyer nou kapab veye pour pa tonm dan trwa latrap Dyab ki souvan marse e sa se (1) pa kontrol nou lalang (2) lafreyer ek presyon lezot e (3) ler nou santi nou tro koupab. Lot lartik pou koz lo de lezot latrap ouswa pyez Satan.
TENNY DIFE LALANG
3, 4. Ki i kapab arive si nou pa kontrol nou lalang? Donn en legzanp.
3 Pour arive fer bann zannimo sorti dan zot landrwa kasyet, en saser i kapab met dife dan en bout lafore e atrap bann zannimo ler zot pe esey sove. Dan en sans senbolik, Dyab i oule met dife dan kongregasyon. Si i reisi, i kapab fer bann manm kongregasyon sorti dan sa refiz e tonm dan son grif. Dan ki fason nou kapab envolonterman korpere avek li e tonm dan son latrap?
4 Disip Zak ti konpar lalang avek dife. (Lir Zak 3:6-8.) Si nou pa reisi kontrol nou lalang, nou kapab alim en gro dife senbolik dan kongregasyon. Ki mannyer sa i kapab arive? Annou reflesir lo sa legzanp: Pandan renyon, en lanons i ganny fer ki en ser in vin pionye ordiner. Apre renyon, de proklanmater i koz lo sa lanons. Enn i eksprim son lazwa ek lakontantman pour sa nouvo pionye. Sa lot i kestyonn motivasyon sa pionye e dir ki i pe fer sa zis pour li ganny rekonnet dan kongregasyon. Lekel parmi sa de proklanmater ki ou ti a kontan annan konman zanmi? I pa difisil pour vwar lekel ki ti a kapab met dife dan kongregasyon par son parol.
5. Pour nou kapab kontrol nou lalang, ki analiz personnel nou bezwen fer?
5 Ki mannyer nou kapab tenny dife ki lalang i alimen? Zezi ti dir: “Labous i koz sa ki deborde dan leker.” (Mat. 12:34) Premye letap se pour egzamin nou prop leker. Eski nou kontrol nou bann move santiman ki kapab fer nou mal servi nou lalang? Par egzanp, kan nou tande ki en frer pe fer bokou zefor pour ganny bann privilez dan servis, eski nou vreman krwar ki i annan en bon motivasyon ouswa nou krwar i fer li akoz son lanbisyon egois? Si nou annan sa tandans pour ziz motivasyon lezot, i byen pour nou rapel ki Dyab osi ti kestyonn motivasyon Zob, sa serviter fidel Bondye. (Zob 1:9-11) Olye soupsonn nou frer, i byen pour nou vwar akoz nou pe kritik li. Eski nou vreman annan bon rezon pour rezonn dan sa fason? Ouswa eski nou leker pe ganny anpwazonnen avek sa mank lanmour ki egziste dan sa bann dernyen zour?—2 Tim. 3:1-4.
6, 7. (a) Akoz nou kapab tant pour kritik lezot? (b) Ki mannyer nou devret azir kan nou ganny ensilte?
6 Annou egzamin detrwa lezot rezon akoz nou kapab tant pour kritik lezot. Enn se ki nou kapab anvi ganny rekonnet akoz en keksoz ki nou’n fer. Anfet, petet nou pe esey pas nou pour pli siperyer par fer lezot pas pour pli enferyer. Ouswa nou pe rod leskiz akoz nou menm nou pa’n reisi fer bann bon desizyon. Ki swa akoz nou orgeye, groker ouswa mank konfyans dan nou lekor, son rezilta i kapab katastrofik.
7 I kapab osi ki nou krwar nou annan rezon pour kritik en lot dimoun. Petet li osi i’n deza koz an mal lo nou oparavan. Si sa i le ka, rann laparey pa sa bon solisyon. Si nou fer li, i pou konmsi nou pe azout bennzin dan dife e sanmenm ki Satan i oule, pa Bondye ki oule sa. (2 Tim. 2:26) I byen pour imit Zezi dan sa domenn. Ler i ti pe ganny ensilte “i pa ti reponn par lensilt.” O kontrer, “i ti met tou dan lanmen Bondye ki rann lazistis.” (1 Pyer 2:21-23) Zezi ti annan konfyans ki Zeova ti pou azir lafason ki Li i ti oule e dan son letan pour li. Nou osi nou devret annan menm konfyans dan Bondye. Kan nou servi nou parol pour ankouraz lezot, nou pe ede pour prezerv ‘sa lape ki ini nou ansanm’ dan nou kongregasyon.—Lir Efezyen 4:1-3.
SORTI DAN LA, LAFREYER EK PRESYON
8, 9. Akoz Pilat ti kondann Zezi?
8 En zannimo ki’n pri dan en latrap i perdi son liberte pour mouvmante. Pareyman, en dimoun ki per ouswa les lezot met presyon lo li i kapab perdi serten kontrol lo son lavi. (Lir Proverb 29:25. *) Annou vwar legzanp de zonm vreman diferan ki ti les presyon ek lafreyer kontrol zot e vwar ki leson nou kapab aprann avek zot leksperyans.
9 Pons Pilat, gouverner Romen ti konnen ki Zezi ti inosan e aparaman i pa ti oule fer Zezi ditor. Anfet, Pilat ti dir ki Zezi pa ti’n “fer nanryen pour li merit lanmor.” Kantmenm sa, Pilat ti kondann li a mor. Akoz? Parski Pilat ti per presyon lafoul. (Lik 23:15, 21-25) Bann opozan ti kriye e dir: “Si ou larg sa zonm ou pa en zanmi Sezar.” Dan sa fason, zot ti pe met presyon lo li pour zot ganny sa ki zot ti oule. (Zan 19:12) Petet Pilat ti per ki i ti pou perdi son pozisyon ouswa menm son lavi si i ti pran kote Kris. Alor, i ti les li ganny antrennen pour fer lavolonte Dyab.
10. Kwa ki ti pous Pyer pour dir ki i pa konn Kris?
10 Zapot Pyer ti enn parmi bann zanmi pli pros Zezi. I ti deklare piblikman ki Zezi ti Mesi. (Mat. 16:16) Pyer ti reste fidel kan leres disip ti abandonn Zezi apre ki zot pa ti’n konpran sinifikasyon sa ki Zezi ti pe dir. (Zan 6:66-69) Kan bann lennmi ti vini pour aret Zezi, Pyer ti servi en lepe pour defann son Met. (Zan 18:10, 11) Me selman, plitar, Pyer ti les lafreyer kontrol li e i ti dir ki i pa konn Zezi Kri. Pour en pti pe letan, sa zapot ti’n tonm dan sa latrap pour per zonm e sa ti anpes li kontinyen annan kouraz.—Mat. 26:74, 75.
11. Ki move lenfliyans nou bezwen fer fas avek?
11 Konman Kretyen, nou bezwen reziste sa presyon pour fer bann keksoz ki pa pou fer plezir Bondye. Bann anplwayer ouswa lezot i kapab esey fors ou pour dezonnet ouswa esey ankouraz ou pour pratik limoralite seksyel. Bann zanfan lekol i bezwen siport zot bann kanmarad lekol ki met presyon lo zot pour kopye dan legzanmen, get pornografi, fimen, servi drog, abiz lalkol ouswa pour annan bann kondwit seksyel imoral. Alor, kwa ki kapab ed nou pour sap sa latrap pour per ouswa les lezot met presyon lo nou pour fer bann keksoz ki depler Zeova?
12. Ki leson nou aprann avek Pilat ek Pyer?
12 Annou vwar ki nou kapab aprann avek legzanp Pilat ek Pyer. Pilat pa ti konn preski nanryen lo Kris. Me, i ti konnen ki Zezi ti inosan e ki i pa ti en nenport ki. Pilat ti mank limilite ek lanmour pour sa vre Bondye. Dyab ti fasilman atrap li vivan. Pyer ti annan en bon konnesans e en vre lanmour pour Bondye. Me, parler i pa ti konn son limit, i ti per e i ti les lezot met presyon lo li. Avan ki Zezi ti ganny arete, byen vantar Pyer ti dir: “Menm si tou lezot i abandonn ou, mwan mon pa pou abandonn ou.” (Mark 14:29) Si sa zapot ti’n prepar li davans pour bann tes ki i ti pou gannyen, i ti pou’n pran menm pozisyon ki sa psalmis ki ti met konfyans dan Bondye e ki ti sante: “Zeova i avek mwan; mon pa pou per. Ki imen i kapab fer mwan?” (Ps. 118:6) Dernyen lannwit son lavi lo later, Zezi ti pran Pyer ek de lezot zapot avek li en pe pli lwen dan zarden Zetsemane. Me, olye kontinyen veye, Pyer ek son bann konpanyon ti tonm dormi. Zezi ti lev zot e dir: “Veye e priye pour zot pa tonm dan tantasyon.” (Mark 14:38) Me Pyer ti retonm dormi ankor e plitar i ti per e les lezot met presyon lo li.
13. Ki mannyer nou kapab reziste sa presyon pour fer en keksoz mal?
13 Legzanp Pilat ek Pyer i montre nou en lot leson enportan: Pour reisi reziste presyon i enportan ki nou annan konnesans egzakt, limilite, konn nou limit, lanmour pour Bondye ek lakrent pour Zeova e non pa pour bann imen. Si nou lafwa i baze lo konnesans egzakt, nou pou kapab koz avek kouraz ek konviksyon lo nou lafwa. Sa pou ed nou reziste presyon e reisi sirmont lafreyer pour zonm. Byensir, nou pa devret depan zis lo nou prop lafors. Plito, nou devret rekonnet avek limilite ki nou bezwen pwisans Bondye pour arive reziste tantasyon. Nou bezwen priye pour ganny lespri sen Zeova e nou merit les nou lanmour pour li motiv nou pour siport son non ek son standar. Deplis, nou bezwen prepar nou pour reziste presyon menm avan ki nou fer fas avek enn. Par egzanp, si nou prepar davans e priye, sa pou kapab ed nou zanfan pour byen reisi fer fas avek zot kanmarad lekol ki met presyon lo zot pour fer sa ki mal.—2 Kor. 13:7. *
SANTI TRO KOUPAB, EN PYEZ KI KRAZE
14. Konsernan nou bann fot lepase, ki Dyab i oule nou mazinen?
14 Parler en latrap i kapab en gro bout dibwa ouswa en gro ros ki’n ganny anmare anler kot bann zannimo i souvan pas pase. En zannimo i kapab tap dan en pti wayer ater e sa dibwa ouswa sa ros i kapab tonbe e plati sa zannimo. Bann santiman negatif akoz en fot ki nou’n fer i kapab ganny konpare avek sa gro ros ki kapab aplati nou. Kan nou mazin lo bann fot lepase, nou kapab santi nou “vreman ganny kraz kraze.” (Lir Psonm 38:3-5, 8. *) Satan ti a voudre ki nou mazinen ki Zeova pa pou zanmen demontre mizerikord anver nou e ki nou pa pou reisi fer sa ki I demann nou.
15, 16. Ki mannyer ou kapab evit sa latrap pour santi ou tro koupab?
15 Ki mannyer ou kapab evit sa latrap ki kraze? Si ou’n fer en pese grav, pran aksyon deswit pour rebatir ou lanmitye avek Zeova. Koz avek bann ansyen e demann zot led. (Zak 5:14-16) Fer sa ki ou kapab pour koriz sa ki mal. (2 Kor. 7:11) Si ou ganny disiplinen, pa dekouraze. Disiplin i en laprev konkret ki Zeova i kontan ou. (Ebr. 12:6) Reste determinen pour pa repet menm fot ankor, evit bann sityasyon ki kapab fer ou refer sa fot. Apre ki ou’n repantir e aret fer sa ki ou ti pe fer, annan lafwa ki sakrifis Zezi Kri i vreman kapab kouver ou fot.—1 Zan 4:9, 14.
16 Serten endividi i kontinyen santi zot koupab pour bann pese ki zot in ganny pardonnen. Si sa i le ka pour ou, rapel byen ki Zeova ti pardonn Pyer ek lezot zapot ler zot ti abandonn Son Garson byenneme dan sa letan ki i ti pli bezwen zot. Zeova ti pardonn sa zonm ki plitar ti repantir apre ki i ti’n ganny ekskli dan kongregasyon Korent akoz i ti’n komet bann aksyon imoral vreman sokan. (1 Kor. 5:1-5; 2 Kor. 2:6-8) Parol Bondye i koz lo bann dimoun ki ti fer bann pese grav e ki Bondye ti pardonn zot.—2 Kron. 33:2, 10-13; 1 Kor. 6:9-11.
17. Ki sakrifis Zezi i kapab fer pour nou?
17 Zeova pou pardonn ou e oubliy ou bann fot lepase si ou vreman repantir e aksepte son mizerikord. Pa zanmen krwar ki sakrifis Zezi pa pou kapab kouver ou pese. Si ou krwar sa, ou pou vin en viktim pyez Satan. Nenport kwa ki Dyab i oule ou krwar, sakrifis Zezi i kapab kouver pese tou sa bann ki’n fer pese grav e ki’n repantir. (Prov. 24:16) Lafwa dan sa sakrifis i kapab retir sa pwa lour lo ou zepol e i kapab donn ou lafors pour servi Zeova avek tou ou leker, lespri ek nanm.—Mat. 22:37.
NOU KONN BYEN LENTANSYON SATAN
18. Ki mannyer nou kapab evit bann latrap Dyab?
18 Satan pa fatig li avek ki pyez ki i kapab tyonbo nou, si i tyonbo nou, sa i ase. Vi ki nou konn tre byen lentansyon Satan, nou pou evite les Dyab anbet nou. (2 Kor. 2:10, 11) Nou pa pou ganny atrape dan son pyez ouswa latrap si nou priye pour ganny lasazes pour sirmont nou leprev. Zak ti ekrir: “Si i annan parmi zot ki mank lasazes, ki i demann Bondye e Bondye a donn li parski i donn tou dimoun zenerezman san fer okenn repros.” (Zak 1:5) Nou bezwen azir an armoni avek nou lapriyer par etidye personnelman regilyerman e par aplik Parol Bondye. Bann piblikasyon baze lo Labib ki lesklav fidel e pridan i fourni i ed nou vwar bann latrap ki Dyab i plas devan nou e i ed nou pour evit zot.
19, 20. Akoz nou devret ay sa ki mal?
19 Lapriyer ek letid Labib i kapab pous nou pour kontan sa ki byen. Me i vreman enportan ki nou osi devlop laenn pour sa ki mal. (Ps. 97:10) Si nou medit lo konsekans pour les nou ganny kontrole par nou bann dezir egois, sa i kapab ed nou pour rezet zot. (Zak 1:14, 15) Kan nou aprann pour ay sa ki mal e vreman kontan sa ki byen, nou pa pou anval sa labwet ki Satan i servi dan son latrap, nou pa pou les li anbet nou.
20 Nou vreman rekonesan ki Bondye i ed nou pour ki nou pa les Satan pran kontrol lo nou. Atraver son lespri sen, son Parol ek Son lorganizasyon, Zeova i delivre nou avek sa enn move. (Mat. 6:13) Dan lot lartik, nou pou aprann ki mannyer nou kapab evit ankor de lezot pyez ki Dyab in vwar efikas e ki i servi pour atrap bann serviter Bondye vivan.
[Not anba lo paz]
^ par. 8 Proverb 29:25: “Tranble devan zonm se sa ki vin en latrap, me sa ki met konfyans dan Zeova pou ganny proteze.”
^ par. 13 I byen pour bann paran koz lo sa “Peer-Pressure Planner” dan liv Questions Young People Ask—Answers That Work, Volim 2 lo paz 132-133. Sa bann lenformasyon i kapab ganny servi dan Ladorasyon Fanmir.
^ par. 14 Psonm 38:3-5, 8: “3 Napa bout lo mwan ki san defo akoz ou’n kondann mwan. Napa lape dan mon lezo akoz mon pese. 4 Parski mon bann fot in depas mon latet; zot parey en gro fardo ki tro lour pour mwan. 5 Mon bann blesir in vin pi, zot in enfekte, akoz mon sotiz.” “8 Mon santi mwan angourdi e konmsi mon’n vreman ganny kraz kraze; Mon’n gronnyen akoz mon leker pe zemir.”
[Kestyon]
[Portre lo paz 24]
Nou kapab met dife dan kongregasyon si nou pa kontrol nou lalang
[Portre lo paz 27]
Ou kapab zet sa fardo kot ou santi ou tro koupab
