Eski Bondye i apresye madanm?

“Pese ti konmans avek en madanm e gras a li nou tou nou bezwen mor.”​—ECCLESIASTICUS, DEZYENM SYEK A.N.L.

“Ou larantre ki Dyab in pas atraver: ou ki ti premye pour tous sa pye defandi: ou sa enn premye pour abandonn lalwa Bondye . . . Ou ti detrir fasilman resanblans Bondye, zonm.”​—TERTULLIAN, ON THE APPAREL OF WOMEN, DEZYENM SYEK N.L.

SA BANN verse in ganny ekrir depi lontan me zot pa sorti dan Labib. Pour plizyer syek zot in ganny servi pour zistifye diskriminasyon kont bann madanm. Menm ozordi, serten i kontinyen servi bann verse ki zot in tire dan bann liv relizye pour dir ki bann zonm i devret domin bann madanm, an dizan ki bann problenm ki limanite pe pas ladan i lafot bann madanm. Eski i ti lentansyon Bondye ki bann madanm i ganny meprize e abize par bann zonm? Ki Labib i dir? Annou vwar.

▪ Eski bann madanm in ganny modi par Bondye?

Non. O kontrer, i sa “serpan lantikite,” sa enn “ki apel dyab” ki Bondye in “modi.” (Revelasyon 12:9; Zenez 3:14) Ler Bondye ti dir avek Adan ki i ti pou “domin” son madanm, i pa vedir ki Bondye ti dakor ki bann msye i abiz zot madanm. (Zenez 3:16) I ti pe senpleman predir bann move konsekans ki pese ti pou anmennen lo sa premye koup.

Alor, i pa lavolonte Bondye ki bann madanm i ganny abize me plito akoz imen in ne avek sa tandans pour fer pese. Labib pa siport sa lide ki bann madanm i bezwen les bann msye maltret zot pour ki sa premye pese i ganny pardonnen.​—Romen 5:12.

▪ Eski Bondye ti kre madanm pli enferyer ki zonm?

Non. Zenez 1:27 i dir: “Bondye ti kre zonm dan son resanblans, dan resanblans Bondye i ti kre li. I ti kre zonm ek fanm.” Alor depi o konmansman, imen, setadir zonm ek fanm, ti ganny kree avek sa abilite pour reflekte bann kalite Bondye. Menm si Adan ek Ev ti diferan lo kote emosyonnel e fizik, zot tou le de zot ti resevwar menm lord e annan menm drwa devan zot Kreater.​—Zenez 1:28-31.

Avan ki Ev ti ganny kree, Bondye ti dir: “Mon pou fer en led pour li [Adan], enn ki pou al byen avek li.” (Zenez 2:18) Lefet ki Zeova ti dir ki sa madanm ti “al byen avek” sa msye, eski sa i donn lenpresyon ki en madanm i pli enferyer ki en msye? Non. Pran par egzanp rol ki en sirizyen ek en anestetis i zwe pandan loperasyon. Eski i posib pour fer loperasyon si enn ant sa de dimoun pa la? I pou difisil! Menm si i sa sirizyen ki fer  loperasyon, eski li ki pli enportan? Pa neseserman. Pareyman, Bondye in kre zonm ek fanm pour zot korpere ansanm, pa pour fer konpetisyon.​—Zenez 2:24.

▪ Kwa ki montre ki Bondye i apresye bann madanm?

Vi ki Bondye ti konnen ki bann imen enparfe ti pou fer, i ti eksprim depi byen boner son lentansyon pour protez bann madanm. Konsernan Lalwa Moiz ki ti ganny entrodwir sezyenm syek Avan Nou Lepok (A.N.L.), Laure Aynard ti ekrir sa dan son liv ki annan pour tit La Bible au féminin: “Laplipar di tan kan Lalyans Lalwa i koz konsernan en madanm, sete pour defann li.”

Par egzanp, Lalwa i dir onor e respekte nou papa e osi nou manman. (Egzod 20:12; 21:15, 17) I osi fer resorti ki konsiderasyon i ganny montre anver bann madanm ansent. (Egzod 21:22) Ozordi lalwa Bondye i ankor protez bann madanm. Sa i tou lekontrer pour bann madanm dan plizyer parti lemonn kot zot napa okenn drwa legal. Me i annan plis lalwa ankor ki montre ki Bondye i apresye madanm.

En Lalwa ki reflekte pwennvi Bondye lo bann madanm

Lalwa ki Zeova ti donn avek nasyon Izrael ti anmenn bokou byenfe pour msye ensi ki madanm, lo plan fizik, moral, e spirityel. Osi lontan ki zot ti ekoute e obeir, zot ti pou “par lao tou lezot nasyon lo later.” (Deterononm 28:1, 2) Ki plas bann madanm ti annan anba Lalwa? Annou egzamin sa bann pwen swivan:

1. Laliberte. Bann madanm Izraelit dan letan lontan ti annan bokou plis laliberte ki bann madanm dan lezot nasyon. Kantmenm i ti bann msye ki ti ganny sa responsabilite konman sef lafanmir, sa msye ti annan konfyans total dan son madanm e i ti permet li pran serten linisyativ. Par egzanp, sa madanm ti kapab ‘egzamin en bout later e apre aste’ e ‘fer en plantasyon rezen.’ Sa madanm ti menm kapab annan son prop biznes si i ti konn fer difil ek latwal. (Proverb 31:11, 16-19) Anba Lalwa Moiz bann madanm ti ganny konsidere konman en endividi ki ti annan son drwa e non pa konman en akseswar pour bann msye.

 Dan letan lontan Izrael, bann madanm ti lib pour annan en relasyon personnel avek Bondye. Par egzanp, Labib i koz lo Ana ki ti priy konsernan bann keksoz personnel e i ti menm fer en ve avek Bondye. (1 Samyel 1:11, 24-28) Dan en lavil ki ti apel Sounenm, en madanm ti annan labitid pour al vwar profet Elisa zour Saba. (2 Lerwa 4:22-25) Debora ek Oulda ti bann madanm ki Bondye ti servi konman son bann reprezantan. I enteresan pour note ki bann zonm enportan ek bann pret ti pare pour vin rod konsey avek zot.​—Ziz 4:4-8; 2 Lerwa 22:14-16, 20.

2. Akse avek ledikasyon. Vi ki bann madanm ti enkli dan Lalyans Lalwa, zot ti ganny envite pour vin ekoute ler Lalwa ti ganny lir e sa ti donn zot sa loportinite pour aprann. (Deterononm 31:12; Neemya 8:2, 8) Zot ti osi kapab resevwar en formasyon pour partisip dan serten laspe ladorasyon an piblik. Par egzanp, serten madanm ti “organiz servis” kot tabernak, tandis ki lezot ti dan lakoral ansanm avek bann msye.​—Egzod 38:8; 1 Kronik 25:5, 6.

En kantite madanm ti annan sifizaman konnesans ek abilite pour byen fer marse en biznes. (Proverb 31:24) Kontrerman avek lezot kiltir sa letan kot zis papa ki ti annan drwa ansenny son bann garson, bann madanm Izraelit ti osi ansenny zot garson ziska laz adilt.​—Proverb 31:1.

3. Onore e respekte. Dan sa dis komannman i annan enn ki dir klerman: “Respekte ou papa ek ou manman.” (Egzod 20:12) En proverb ki Lerwa Salomon ti ekrir, i dir: “Mon garson, ekout disiplin ou papa e pa abandonn lalwa ou manman.”​—Proverb 1:8.

Lalwa ti donn bann detay konsernan kondwit ki bann dimoun ki pa marye ti devret annan antre zot. Par egzanp, bann fiy ti bezwen ganny respekte. (Levitik 18:6, 9; Deterononm 22:25, 26) En bon msye ti bezwen pran an konsiderasyon limit fizik e emosyonnel son madanm.​—Levitik 18:19.

4. Drwa pour ganny proteze. Dan son Parol, Zeova i dekrir li menm konman “en papa pour bann garson ki napa papa, e i en ziz pour bann vev.” Andotmo, i ti Protekter bann ki zot drwa pa ti ganny proteze akoz zot ti napa papa oubyen mari. (Psonm 68:5; Deterononm 10:17, 18) Nou annan legzanp  sa vev ki ti’n perdi son msye ki ti en profet. I ti ganny trete dan en fason enzis par en dimoun ki i ti dwa, me Zeova ti entervenir par fer en mirak pour ki i ti kapab sirviv e gard son dinyite.​—2 Lerwa 4:1-7.

Zelofead ti en sef fanmir ki ti mor avan ki bann Izraelit ti antre dan Later Promiz e i ti napa garson. Alor son senk fiy ti demann Moiz pour donn zot “en propriyete” dan Later Promiz. Zeova ti donn zot plis ki sa ki zot ti demande. I ti dir avek Moiz: “Donn zot en propriyete konman leritaz parmi bann frer zot papa e ou devret pas leritaz zot papa lo zot.” Apartir sa moman, bann madanm Izrael ti kapab resevwar en leritaz avek zot papa e pas sa leritaz lo zot desandans.​—Nonm 27:1-8.

Pwennvi Bondye lo bann madanm i mal ganny reprezante

Anba Lalwa Moiz, bann madanm ti annan en rol onorab e zot drwa ti ganny respekte. Par kont, dan katriyenm syek A.N.L., larelizyon Zwif ti konmans ganny enfliyanse par kiltir Grek, ki ti konsider bann madanm konman enferyer.​—Vwar bwat “Diskriminasyon kont madanm dan bann ansyen liv.”

Par egzanp, en poet Grek ki ti apel Hesiod (wityenm syek A.N.L.) ti akiz bann madanm konmkwa zot ki responsab pour tou bann maler ki limanite pe fer fas avek. Dan son poem i ti koz konsernan “sa ras danzere ek tribi bann madanm ki viv parmi imen pour fer zot pli gran maler.” Sa lide ti vin popiler dan larelizyon Zwif depi o konmansman dezyenm syek A.N.L. Talmud, en liv ki ti ganny ekrir apartir dezyenm syek Nou Lepok (N.L.) ti donn sa lavertisman avek bann zonm: “Pa bezwen tro koz avek bann madanm akoz zot pou definitivman fer ou komet sa ki mal.”

Tou dilon bann syek ki’n pase, mefyans pour bann madanm i’n annan en gran lefe lo rol bann madanm dan kominote Zwif. Dan letan Zezi, i ti annan zis en landrwa dan tanp ki bann madanm ti ganny permisyon pour ale e sa ti Lakour bann Madanm. Lansennyman relizye ti zis pour bann zonm e i tre probab ki bann madanm pa ti asiz ansanm avek zot dan sinagog. Talmud i sit sa ki en profeser ti dir: “Nenport dimoun ki ansenny son fiy Torah [Lalwa] i pe ansenny lemal.” Par mal reprezant pwennvi Bondye, bann sef relizye Zwif ti fer bann zonm aprann mepriz bann madanm.

Ler Zezi ti lo later, i ti remarke ki sa move mantalite ti anrasinen dan bann tradisyon. (Matye 15:6, 9; 26:7-11) Eski sa bann lansennyman ti enfliyans lafason ki i ti azir anver bann madanm? Ki nou kapab aprann avek konportman ek latitid ki i ti annan anver zot? Eski vre larelizyon Kretyen in anmenn soulazman pour bann madanm? Dan sa lot lartik nou pou reponn sa bann kestyon.

[Bwat lo paz 7]

Diskriminasyon kont madanm dan bann ansyen liv

Depi premye syek N.L. an montan, bann ekriven parey Philo ki ti sorti Alekzandri ti konmans servi bann filozofi Grek pour eksplik resi Zenez. Pour Philo, Ev ti koupab akoz i ti komet relasyon seksyel e i ti ganny kondannen pour viv en lavi kot “i ti nepli annan laliberte e i ti bezwen soumet anba lotorite son msye.” Sa mank respe ki Philo ti annan pour bann madanm ti enfiltre dan larelizyon Zwif e osi dan bann liv Fondater Legliz.

Dan en lot liv Zwif ki apel Midrash Rabba ki ti ganny ekrir dan dezyenm syek, en profeser Zwif ti eksplike akoz i krwar bann madanm i bezwen met vwal, an dizan: “I parey en dimoun ki’n fer sa ki mal e i onte devan lezot dimoun.” Tertullian, en profeser larelizyon ki son bann liv ti popiler dan premye ek dezyenm syek N.L., ti ansennyen ki bann madanm i devret marse “konmsi Ev ki dan dey e ki pe fer penitans.” Sa move lansennyman, ki dimoun i krwar i sorti dan Labib, in promot diskriminasyon kont bann madanm.

[Portre lo paz 5]

Ev ti ganny kree pour vin en led pour Adan e enn ki ti pou al byen avek li

[Portre lo paz 6]

Bann madanm Izraelit dan letan lontan ti annan zot prop biznes