Fer fas avek difikilte denozour avek kouraz
Fer fas avek difikilte denozour avek kouraz
“Bondye i en refiz ek lafors pour nou, en led ki fasilman ganny trouve pandan ladetres.”—PS. 46:1.
ESKI OU KAPAB REPONN?
Ki mannyer nou kapab anpes difikilte dekouraz nou?
Ki rezon nou annan pour demontre kouraz?
Ki provizyon Zeova in fer pour ed nou fer fas avek difikilte?
1, 2. Ki difikilte bokou in eksperyanse, me ki sak serviter Bondye ti pou kontan fer?
NOU pe viv dan en letan ranpli avek difikilte. Later in sibir en kantite dezas. Par egzanp tranblemandter, tsounami, dife, linondasyon, volkan, gro divan, ek siklonn in ravaz limanite. Pa fini la, i annan osi bann problenm fanmir e personnel ki fer dimoun per e soufer. Zis parey Labib i dir: “Letan ek levennman san ekspekte i ariv lo zot tou.”—Ekle. 9:11.
2 Bann serviter Bondye konman en group in kapab fer fas avek sa bann sityasyon difisil. Me endividyelman, nou tou nou ti pou kontan pare pour fer fas avek nenport ki difikilte nou kapab rankontre anmezir ki lafen i aprose. Ki mannyer nou pou kapab fer fas avek sa bann defi san ki nou dekouraze? Kwa ki pou donn nou kouraz pour fer fas avek bann difikilte ki nou rankontre denozour?
APRANN AVEK BANN KI’N DEMONTRE KOURAZ
3. Parey Romen 15:4 i montre, ki mannyer nou ganny konsolasyon ler nou pe fer fas avek bann sityasyon difisil?
3 Menm si bann sityasyon difisil i afekte plis dimoun ki zanmen oparavan, sa bann problenm ki fer soufer i pa nouvo pour imen. Annou vwar ki nou kapab aprann avek bann serviter Bondye dan lepase ki ti arive fer fas avek sa bann sityasyon avek kouraz.—Rom. 15:4.
4. Ki sityasyon difisil David ti fer fas avek e kwa ki ti ed li?
4 Annou egzamin legzanp David. I ti bezwen fer fas avek lakoler en lerwa, latak lennmi, son bann madanm ti ganny kidnap, i ti ganny trai, e menm soufer emosyonnelman. (1 Sam. 18:8, 9; 30:1-5; 2 Sam. 17:1-3; 24:15, 17; Ps. 38:4-8) Bann resi Labib lo lavi David i montre klerman ki i ti soufer akoz bann difikilte ki i ti pas ladan. Me par kont, sa bann difikilte pa ti dekouraz li spirityelman. Avek bokou lafwa, i ti dir: “Zeova i mon proteksyon tou dilon mon lavi. Lekel ki pou efrey mwan?”—Ps. 27:1; lir Psonm 27:5, 10. *
5. Kwa ki ti ed Abraam ek Sara fer fas avek zot sityasyon difisil?
5 Preski tou zot lavi, Abraam ek Sara ti reste dan latant konman bann etranze dan bann landrwa ki zot pa ti konnen. Zot lavi pa ti touzour fasil. Me, zot ti arive fer fas avek bann sityasyon difisil parey lafamin ek bann nasyon danzere dan zalantour. (Zen. 12:10; 14:14-16) Ki mannyer zot ti arive fer sa? Labib i dir nou ki Abraam “ti pe esper sa lavil avek fondasyon solid, ki Bondye i limenm arsitek e konstrikter.” (Ebr. 11:8-10) Abraam ek Sara ti reste konsantre lo bann keksoz ki ti pou vini, zot pa ti les zot ganny dekouraze par sa lemonn otour zot.
6. Ki mannyer nou kapab imit Zob?
6 Zob ti soufer en kantite. Zis mazinen ki mannyer i ti santi ler tou keksoz dan son lavi ti al mal. (Zob 3:3, 11) Pour fer keksoz pli pir, i pa ti ni menm konpran akoz tou sa bann keksoz ti pe ariv avek li. Kantmenm sa, i pa ti zanmen abandonnen. I ti gard son lentegrite ek son lafwa dan Bondye. (Lir Zob 27:5. *) Pa sa i en bon legzanp pour nou imite!
7. Ki Pol ti eksperyanse konman en serviter Bondye, me kwa ki ti donn li kouraz pour kontinyen?
7 Aprezan, annou egzamin legzanp zapot Pol. I ti eksperyans “danze dan bann lavil, dan dezer, [e] dan lanmer.” I ti koz konsernen ‘lafen ek laswaf, lafreser ek mank lenz.’ Pol ti osi mansyonnen ki i ti “pas en lazournen ek en lannwit lo en tyak dan lanmer,” apre ki sa bato ki i ti lo la ti koule. (2 Kor. 11:23-27) Malgre tousala, i enteresan pour note sa ki i ti dir apre ki i ti’n mank lanmor pandan son servis pour Bondye. I ti dir: “Sa ti montre nou pour pa plas nou konfyans dan noumenm, me dan Bondye ki kapab resisit sa ki’n mor. Limenm ki’n delivre nou dan en tel danze lanmor e nou krwar ki i pou delivre nou ankor.” (2 Kor. 1:8-10) Napa bokou parmi nou ki’n pas dan bann sityasyon sitan difisil parey Pol. Annefe bokou parmi nou in kapab santi parey li e ganny rekonforte par son legzanp kouraz.
EVITE LES NOU GANNY DEKOURAZE PAR KEKSOZ NEGATIF
8. Ki mannyer bann problenm ozordi i kapab afekte nou? Eksplike.
8 Ozordi i annan en kantite problenm, defi ek presyon ki fer bokou dimoun dekouraze. Menm serten Kretyen in santi koumsa parfwa. Lani, * en ser ki reste Lostrali ki ti dan servis a plen tan avek son msye i dir ki ler i ti dekouver ki i ti ganny kanser tete, sa nouvel ti vreman tap li. I ti dir: “Sa tretman ti fer mwan vreman malad e mon ti santi konmsi mon ti napa valer.” An plis ki sa, i ti bezwen pran swen avek son msye ki ti’n fek fer en loperasyon ledo. Si nou dan en tel sityasyon, ki nou kapab fer?
9, 10. (a) Ki nou devret anpes Satan fer? (b) Ki latitid ki pou ed nou fer fas avek sa bann “soufrans” ki Akt 14:22 i koz lo la?
9 Pa oubliye ki Satan i servi bann sityasyon difisil pour afeblir nou lafwa. Me, nou pa devret les li fer nou perdi nou lazwa. Proverb 24:10 i dir: “Eski ou’n montre ou dekouraze dan letan ladetres? Ou lafors pou ptigin.” Ler nou medit lo bann legzanp dan Labib, parey sa ki nou’n diskit lo la, sa pou ed nou ganny kouraz pour fer fas avek bann difikilte.
10 I osi enportan ki nou gard antet ki nou pa kapab rezourd tou problenm. Annefe, nou bezwen ekspekte ki nou pou eksperyans bann difikilte. (2 Tim. 3:12) Dan Akt 14:22 i dir: “[Nou] bezwen pas par bokou soufrans pour antre dan Rwayonm Bondye.” Olye les bann difikilte dekouraz ou, akoz ou pa vwar zot konman bann loportinite pour demontre ou lafwa dan abilite ki Bondye i annan pour ed ou?
11. Ki mannyer nou kapab evite les bann sityasyon difisil dekouraz nou?
11 Nou bezwen konsantre lo bann keksoz pozitif. Parol Bondye i dir: “En leker zwaye i annan bon lefe lo figir, me akoz douler dan leker, lespri i deprimen.” (Prov. 15:13) Bann resers medikal ki’n ganny fer i montre ki valer en leta lespri pozitif i annan lo en dimoun. Parler bann pasyan i santi zot soulaze kan dokter i donn zot en pilil disik menm si sa pilil napa okenn valer medikal, pourvi zot santi ki zot pe ganny ede. Lekontrer i osi vre. Lasante en pasyan i deteryore si i ganny dir ki sa medikaman pou annan en move lefe. Sa legzanp i montre ki si nou toultan pe konsantre lo sa ki nou pa kapab sanze, sa pou zis fer nou dekouraze. De lot kote, Zeova pa donn nou pilil disik. O kontrer, dan letan difisil i donn nou vre led atraver bann lankourazman dan son Parol, sipor nou bann frer ek ser, e lafors atraver lespri sen. Si nou konsantre lo bann keksoz parey, sa pou ed nou. Dan plas konsantre lo bann keksoz negatif esey fer sa ki ou kapab pour fer fas avek sak problenm e konsantre lo bann keksoz pozitif dan lavi.—Prov. 17:22.
12, 13. (a) Kwa ki’n ed bann serviter Bondye fer fas avek dezas? Donn en legzanp. (b) Ki mannyer dezas i fer nou realize kwa ki pli enportan dan lavi?
12 Denozour serten pei i eksperyans bann gro dezas. Remarke ki serten frer ek ser dan sa bann pei in demontre en landirans remarkab. Sa pa vedir ki i ti fasil pour zot. O konmansman lannen 2010, en gro tranblemandter ek tsounami an Sili ti detrir lakaz ek keksoz personnel en kantite nou bann frer ek ser, e serten ti menm perdi zot travay. Malgre tousala, sa bann frer ek ser ti kontinyen reste for spirityelman. Samuel, en frer ki son lakaz ti ganny detrir konpletman ti dir: “Menm dan sa sirkonstans vreman difisil, mon madanm ek mwan pa ti zanmen mank renyon ek predikasyon. Mon krwar ki sa bann bon labitid ki nou ti annan ti ed nou pour pa dezespere.” Ansanm avek lezot frer ek ser, zot ti konsantre lo zot servis pour Zeova olye konsantre lo sa dezas.
13 An Septanm 2009, i ti annan gro lapli e plis ki 80 poursan kapital Filipin, Manila ti ganny inonde. En zonm ris ki ti perdi son bann byen ti dir: “Sa linondasyon ti fer ris ek pov vin egal akoz zot tou zot ti soufer e perdi sa ki zot ti annan.” Sa i fer nou mazin lavertisman Zezi ki dir: “Plito akimil zot larises dan lesyel, kot i pa pou ganny detri ni par lever, ni par larouy, kot voler pa pou kapab kas laport e vole.” (Mat. 6:20) Si nou santre nou lavi lo bann keksoz materyel ki nou kapab perdi fasilman, sa i souvan anmenn dezapwentman. Pa i ti pou pli saz pour konsantre lo nou relasyon avek Zeova ki pa pou zanmen dezapwent nou nenport kwa ki arive!—Lir Ebre 13:5, 6.
REZON POUR DEMONTRE KOURAZ
14. Ki rezon nou annan pour demontre kouraz?
14 Zezi ti dir pou annan problenm pandan letan son prezans, me i ti osi dir: “Pa ganny lafreyer.” (Lik 21:9) Avek li konman nou Lerwa e osi avek led Kreater liniver, nou annan tou rezon pour annan konfyans. Pol ti ankouraz Timote an dizan: “Bondye pa’n donn ou en lespri timidite, me okontrer, en lespri ki ranpli nou avek lafors, lanmour ek moderasyon.”—2 Tim. 1:7.
15. Donn legzanp bann serviter ki ti annan konviksyon dan Bondye, e eksplike ki mannyer nou kapab fer parey.
15 Remark serten lekspresyon ki bann serviter Bondye ti servi pour eksprim zot konviksyon dan Bondye. David ti dir: “Zeova i mon lafors e mon boukliye. Dan li mon leker i annan konfyans, e mon’n ganny led e mon leker i rezwir.” (Ps. 28:7) Pol ti eksprim son konviksyon an dizan: “Dan tousala nou sorti avek laviktwar konplet par sa enn ki’n kontan nou.” (Rom. 8:37) Kan danze ti pe aprose, Zezi ti dir: “Mon pa pou tousel, akoz mon Papa i avek mwan.” Sa i montre ki Zezi pa ti oule kit okenn dout dan lespri son bann zapot ki i ti annan en relasyon solid avek son Papa. (Zan 16:32) Ki sa bann lekspresyon i montre? Zot revel konfyans solid dan Zeova. Si nou devlop en tel konfyans dan Bondye, sa pou donn nou kouraz pour fer fas avek nenport ki difikilte nou rankontre ozordi.—Lir Psonm 46:1-3. *
BENEFISYE AVEK PROVIZYON POUR GARD NOU KOURAZ
16. Akoz letid Labib i enportan pour nou?
16 Bann Kretyen pa depan lo zot menm pour ganny kouraz. O kontrer, zot ganny kouraz par aprann konn Bondye e depan lo li. Nou kapab fer sa par etidye son Parol Labib. En ser ki soufer avek depresyon i eksplike kwa ki ed li: “Mon relir plizyer fwa bann verse Labib rekonfortan.” Eski nou pe swiv sa rekomandasyon pour fer ladorasyon an fanmir regilyerman? Sa bann keksoz pou fer nou annan menm latitid avek sa psalmis ki ti dir: “Pa mon vreman kontan ou lalwa! Tou dilon lazournen mon mazin sanmenm.”—Ps. 119:97.
17. (a) Ki provizyon ki kapab ed nou devlop kouraz? (b) Ki mannyer bann leksperyans dan nou piblikasyon in ed ou?
17 Nou osi annan lenformasyon dan bann piblikasyon baze lo Labib ki fortifye nou konfyans dan Zeova. Bann leksperyans dan nou magazin i’n ed bokou frer ek ser. En ser Lazi ki soufer avek en kalite depresyon ki apel bipolar mood disorder ti vwar en lartik lo en frer ki ti misyonner ki’n arive fer fas avek sa maladi. Sa leksperyans ti ankouraz sa ser, i ti ekrir: “I’n ed mwan konpran mon prop problenm e donn mwan lespwar.”
18. Akoz nou devret toultan fer lapriyer?
18 Lapriyer i kapab ed nou dan tou sort sityasyon. Zapot Pol ti met lanfaz lo valer sa provizyon an dizan: “Pa bezwen enkyet pour nanryen, me dan tou sirkonstans par lapriyer ek siplikasyon demann Bondye tou sa ki zot bezwen avek en leker rekonnesan. Ki lape Bondye ki depas tou konpreansyon imen i ava gard zot leker ek zot lespri dan Kris-Zezi.” (Fili. 4:6, 7) Eski nou toultan fer lapriyer pour ganny lafors kan nou pe fer fas avek difikilte? Alex, en frer Grannbretanny ki’n soufer avek depresyon pour bokou letan, i dir: “Koz avek Zeova dan lapriyer e ekout li par lir son Parol i endispansab pour mwan.”
19. Ki mannyer nou devret vwar bann renyon Kretyen?
19 Lasosyasyon avek nou bann frer ek ser Kretyen kot lasal i en lot led vreman enportan. En psalmis ti ekrir: “Mon nanm in vreman anvi e annan en gran dezir pour al dan lakour Zeova.” (Ps. 84:2) Eski nou santi parey? Lani, sa ser ki’n ganny mansyonnen pli o i eksplik lafason ki i vwar bann renyon Kretyen: “Pour asiste bann renyon pa ti zis en swa. Mon ti konnen ki mon ti bezwen la si mon ti ekspekte Zeova ed mwan.”
20. Ki mannyer partisipasyon dan predikasyon i ed nou?
20 Nou osi ganny lankourazman kan nou reste aktif dan predikasyon pour anons Rwayonm Bondye. (1 Tim. 4:16) En ser Lostrali ki ti’n eksperyans en kantite problenm i dir: “Predikasyon ti sa dernyen keksoz ki mon ti anvi fer, me en ansyen ti envit mwan pour pres avek li. Mon ti ale. Zeova ti’n bezwen pe ed mwan akoz sak fwa ki mon ti al predikasyon, mon ti santi mwan zwaye.” (Prov. 16:20) Bokou in eksperyanse ki ler zot ed lezot fortifye zot lafwa, an realite zot fortifye zot prop lafwa dan Zeova. An fezan sa, zot aret mazin zot problenm e konsantre lo sa ki pli enportan.—Fili. 1:10, 11.
21. Ki lasirans nou annan letan nou rankontre difikilte?
21 Zeova in donn nou bokou led pour ganny kouraz pour fer fas avek difikilte ki nou rankontre ozordi. Par profit tou sa bann provizyon e medit lo bon legzanp bann serviter Bondye ki’n demontre kouraz, nou annan lasirans ki nou pou reisi fer fas avek nenport difikilte. Kantmenm bokou keksoz negatif i kapab arive anmezir ki sa lemonn i ariv ver son lafen, nou kapab santi parey Pol ki ti dir: “Nou ganny rabat, me nou pa ganny detri. . . . Nou pa perdi kouraz.” (2 Kor. 4:9, 16) Avek led Zeova, nou kapab ganny kouraz pour fer fas avek difikilte ki nou rankontre ozordi.—Lir 2 Korentyen 4:17, 18.
[Not anba lo paz]
^ par. 4 Psonm 27:5, 10: “5 I pou kasyet mwan dan son landrwa pandan zour maler. I pou kasyet mwan dan en landrwa sekre dan son latant. I pou met mwan lo en ros byen o.” “10 Si mon papa ek mon manman i kit mwan, Zeova i a pran mwan.”
^ par. 6 Zob 27:5: “Zanmen mon pou deklar zot drwat! Ziska mon lanmor mon pa pou perdi mon lentegrite!”
^ par. 8 Serten non in ganny sanze.
^ par. 15 Psonm 46:1-3: “1 Bondye i en refiz ek lafors pour nou, en led ki fasilman ganny trouve pandan ladetres. 2 Se pour sa rezon nou pa pou per, kantmenm later i sanze, kantmenm bann montanny i pros pour tonm dan fon lanmer; 3 kantmenm son delo i azite e ranpli avek lekim, kantmenm montanny i sakouye e fer dibri.”
[Kestyon]
[Portre lo paz 14]
Letan ou rankontre difikilte, profit tou sa bann provizyon ki sorti kot Zeova
