Problenm ki madanm i andire

“Ler mon vwar ki mannyer bann madanm i ganny trete, mon vreman pa anvi vin enn.”​—ZAHRA, 15 AN, magazin GEO, edisyon Franse.

PAROL sa zenn fiy ki’n ganny site kote drwat i montre konman dan lemonn antye vyolans ek diskriminasyon i afekte bann fiy ek madanm diran tou zot lavi. Annou egzamin sa bann fe.

● Diskriminasyon kont bann madanm. Dan Lazi, laplipar paran i prefere annan garson ki fiy. En rapor ki ti ganny fer par Nasyon-z-ini an 2011 i estimen ki dan sa parti lemonn i mank apepre 134 milyon madanm dan popilasyon akoz lavortman, neglizans ouswa akoz zot in ganny touye apre nesans.

● Ledikasyon. Dan lemonn antye, de tyer madanm ek fiy in lekol pour mwens ki kat-r-an.

● Labi seksyel. Plis ki 2.6 bilyon madanm pe viv dan bann pei kot vyol dan maryaz i ankor pa ganny konsidere konman en krim.

● Lasante. Dan bann pei ki pe devlope, apepre tou le de minit en madanm i mor swa akoz konplikasyon pandan lansentman oubyen ler pe donn nesans akoz move swen medikal.

● Drwa pour annan propriyete. Menm si bann madanm ki travay dan bann plantasyon e prodwir lanmwatye manze pour popilasyon lemonn, dan bokou pei zot napa drwa legal pour annan zot prop propriyete oubyen erit en bout later.

Akoz bann madanm napa menm drwa parey tou dimoun? Dan serten kiltir, dimoun i swiv bann krwayans ek pratik relizye ki ankouraz e menm zistifye labi ek vyolans kont bann madanm. En zournal Franse ti sit sa ki en avoka Endyen ki apel Chandra Chopra ti fer: “Tou larelizyon i annan en keksoz an komen. Zot tou zot siport diskriminasyon kont bann madanm.”

Eski ou partaz menm pwennvi? Eski ou krwar ki Labib, parey lezot liv relizye i mepriz bann madanm? I annan dimoun ki ganny sa lenpresyon ler zot lir serten verse Labib. Me ki mannyer Bondye, loter Labib, i vreman konsider bann madanm? Menm si sa size i kapab enn ki delika, si nou egzamin Labib atantivman e dan en fason onnet, nou pou trouv larepons sa bann kestyon.

[Portre sorti kot lo paz 3]

© G.M.B. Akash/Panos Pictures