Akoz koripsyon i kontinyen?

“Zonm in domin zonm e sa in fer ditor zot menm.”​—EKLEZYAST 8:9.

SA DEKLARASYON i dekrir byen listwar dominasyon imen. Dominasyon imen in anmenn en kantite soufrans ek sagrinasyon. Diran tou bann lannen ki’n pase, i’n annan bann dimoun avek bon lentansyon ki’n esey zot mye pour etablir en sosyete pli zis me zot plan in souvan tonm dan delo akoz vorasite ek koripsyon. Akoz sa? Akoz i kontinyen annan koripsyon? Sa i prensipalman akoz trwa move lenfliyans.

1. Lenfliyans pese.

Labib i klerman dir ki nou tou nou “anba dominasyon pese.” (Romen 3:9) Pese i zis parey en maladi erediter ki napa okenn gerizon. I “reste” dan nou. Pour plizyer mil lannen, pese in “rennyen” lo limanite konman en lerwa. Son “lalwa” pe kontinyen travay dan nou. Sa tandans ki nou annan pour komet pese in fer bokou met zot prop lentere avan sa ki pour lezot oubyen zot santre zot lavi zis pour anmas byen materyel ouswa ganny pozisyon par kas anba zot kanmarad.​—Romen 5:21; 7:17, 20, 23, 25.

2. Lenfliyans sa move lemonn ki nou ladan.

Dan sa lemonn ki nou pe viv ladan bokou dimoun i voras e egois. Dan sa kalite lanvironnman i difisil pour nou pa fer parey. Akoz zot lanbisyon egois, zot vin bann dimoun ki annan laswaf pouvwar. Zot osi devlop en dezir entans pour ganny plis larzan ek keksoz materyel ki sa ki neseser. Me, malerezman zot fer sa dan en fason malonnet. Olye reziste sa bann move lenfliyans, sa bann dimoun i “swiv lafoul avek move lentansyon.”​—Egzod 23:2.

3. Lenfliyans Satan oubyen Dyab.

Satan i sa lanz rebel ki pe “tronp lemonn antye.” (Revelasyon 12:9) I pran plezir pour manipil dimoun. I kapab zwe lo nou dezir pour ganny en lavi konfortab ek byennet finansyel ziska ki nou menm kapab vin malonnet.

Eski sa i vedir nou bann maryonnet dan lanmen Satan e oblize obeir sak fwa ki i redi lakord? Nou pou vwar larepons dan lartik ki swiv.