Ki pardon Zeova i vedir pour ou?
Ki pardon Zeova i vedir pour ou?
“Zeova [i] en Bondye ki annan mizerikord ek konpasyon, ki pa ankoler vitman . . . , pardonn fot, lofans ek pese.”—EGZ. 34:6, 7.
ROD LAREPONS SA BANN KESTYON
Ki mannyer Zeova ti azir anver pese David ek Manase e akoz i ti fer sa?
Akoz Zeova pa ti pardonn nasyon Izrael?
Ki mannyer nou kapab ganny pardon Zeova?
1, 2. (a) Ki kalite Bondye Zeova ti ete anver nasyon Izrael? (b) Ki kestyon nou pou egzaminen dan sa lartik?
DAN letan Neemya i ti annan en group Levit ki ti admet dan zot lapriyer an piblik ki zot zanset ti kontinyelman “refize ekout” bann komannman Zeova. Zeova ti kontinyelman montre ki i “en Bondye ki pare pour pardonnen, annan konpasyon ek mizerikord, i pa ankoler vitman e i annan en kantite labonte leker.” Zeova ti kontinyen demontre labonte leker anver sa bann Izraelit ki ti sorti an egzil dan letan Neemya.—Nee. 9:16, 17.
2 Sakenn i kapab demann son lekor: ‘Ki pardon Zeova i vedir pour mwan?’ Pour ede reponn sa kestyon enportan, annou egzamin lafason ki Zeova ti azir avek de zonm ki ti benefisye avek son pardon. Sa de zonm ti David ek Manase, de lerwa Izraelit.
BANN PESE GRAV DAVID
3-5. Ki mannyer David ti tonm dan bann pese grav?
3 Menm si David ti annan lakrent pour Bondye, i ti komet bann pese grav. De parmi son bann pese ti anmenn move konsekans lo en koup, Ouriya ek Bat-Seba. Toudmenm, lafason ki Bondye ti disiplin David i montre nou bokou lo pardon Zeova. Annou vwar ki ti arive.
4 David ti anvoy bann larme Izraelit anserkle Raba, kapital bann Amonit. I ti sitye apepre 80 kilomet les avek Zerizalenm, par lao Larivyer Zourden. Antretan, David ti lo twa son pale Zerizalenm e i ti vwar Bat-Seba, en madanm marye pe bennyen. Son msye ti’n al lager. Lefet ki David ti kontinyen get Bat-Seba, i ti devlop en sitan gran dezir pour li ki i ti fer al sers li, anmenn li kot pale, e la i ti komet adilter avek li.—2 Sam. 11:1-4.
5 Kan David ti konnen ki Bat-Seba ti ansent, i ti fer son msye Ouriya retourn Zerizalenm an krwayan ki i ti pou annan relasyon avek son madanm. Me Ouriya pa ti al kot li menm si David ti ankouraz li pour ale. Dan en let sekre ki David ti ekrir komandan larme, i ti donn lord pour met Ouriya “premye lo fron batay” e ki lezot solda i abandonn li. Ouriya ti ganny touye fasilman par lennmi, zis parey David ti’n plàn. (2 Sam. 11:12-17) Sa lerwa pa ti zis komet adilter, me pli pir ankor i ti touy en zonm inosan.
DAVID TI SANZ SON LATITID
6. Ki mannyer Bondye ti reakte kan David ti fer pese, e ki sa i montre nou lo Zeova?
6 Definitivman Zeova ti’n vwar sa ki ti’n arive. Anfet, i vwar tou keksoz. (Prov. 15:3) Menm si plitar David ti marye avek Bat-Seba, “sa keksoz ki David ti’n fer ti mal devan lizye Zeova.” (2 Sam. 11:27) Alor ki mannyer Bondye ti reakte kan David ti komet sa pese grav? I ti anvoy son profet Natann kot David. Konman en Bondye ki pare pour pardonnen, i paret ki Zeova ti anvi rod en fason pour demontre mizerikord. Pa sa fason azir Zeova i tous ou leker? I pa ti fors David pour konfese, me i ti senpleman fer Natann rakont li en zistwar pour ki i rekonnet ki i ti’n komet en pese grav. (Lir 2 Samyel 12:1-4. *) Pa i ti en bon fason ki Zeova ti servi pour rezourd sa problenm!
7. Ki mannyer David ti reakte anver zistwar Natann?
7 Sa zistwar ki Natann ti rakonte ti annan en lefe lo David. I ti panse ki sa zonm ris ti’n azir dan en fason enzis e sa ti fer li ankoler. I ti dir Natann: “Osi lontan ki Zeova i vivan, sa zonm ki’n fer sa i merit lanmor!” An plis ki sa, David ti dir ki sa zonm i merit ganny rann sa ki i ti’n perdi. Me apre, David ti sirprann kan Natann ti dir li: “Ou menm ou sa zonm!” I ti osi dir David ki akoz konsekans son aksyon, “en lepe” pa pou kit son lakour e son fanmir pou rankontre en kantite problenm. I ti pou osi ganny imilye devan pep an antye pour son pese. David ti realiz gravite son aksyon e admet: “Mon’n fer pese kont Zeova.”—2 Sam. 12:5-14.
LAPRIYER DAVID EK PARDON BONDYE
8, 9. Ki mannyer Psonm 51 i revel santiman profon David, e ki sa i ansenny nou lo Zeova?
8 Dan en kantik ki Lerwa David ti konpoze apre sa lensidan i montre ki i ti senserman regret sa ki i ti’n fer. Psonm 51 i rikord sa lapriyer tousan ki David ti fer avek Zeova e i montre klerman ki i ti fer plis ki zis admet son pese, i ti osi repantir. David ti pli enterese avek son relasyon avek Bondye. I ti dir: “Kont ou, zis ou menm, ki mon’n fer pese.” I ti sipliy Zeova: “Kre dan mwan en leker pir, e met dan mwan en nouvo lespri, enn ki ferm. . . . Fer mwan reganny lazwa pour ganny sove par ou, e ki ou siport mwan menm avek en leta lespri volonter.” (Ps. 51:1-4, 7-12) Eski ou senser e pare pour devwal tou avek Zeova kan ou koz avek li lo ou bann fot?
9 Zeova pa ti eparny David move konsekans son pese. I ti pou bezwen fer fas avek konsekans son pese tou dilon son lavi. Par kont, kan Zeova ti vwar ki David ti annan “en leker kase e brize,” setadir ki i ti’n senserman repantir, Zeova ti pardonn li. (Lir Psonm 32:5; * Ps. 51:17) Bondye Tou Pwisan i konn vre santiman ek rezon ki fer en dimoun fer pese. Dan plas les bann ziz imen ziz David ek Bat-Seba dapre Lalwa Moiz e met zot a mor, Zeova ti demontre mizerikord e ziz sa ka li menm. (Lev. 20:10) Bondye ti menm fer zot garson Salomon vin sa lot lerwa Izrael.—1 Kron. 22:9, 10.
10. (a) Ki sa lot rezon ki ti’n kapab pous Zeova pour pardonn David? (b) Ki fakter ki pous Zeova pour pardonn nou?
10 Petet en lot fakter ki ti pous Zeova pour pardonn David, se ki David li menm ti demontre mizerikord anver Sail. (1 Sam. 24:4-7) Parey Zezi ti eksplike, Zeova i tret nou dapre fason ki nou tret lezot. I ti dir: “Pa zize e ou pa ava ganny zize. Parski Bondye pou ziz ou parey ou ziz lezot, e i pou servi menm mezir pour ou, parey ou’n servi pour lezot.” (Mat. 7:1, 2) Pa i en soulazman pour konnen ki Zeova pou pardonn nou menm si nou’n komet bann pese grav parey adilter oubyen mert! I pou pardonn nou si nou pare pour pardonn lezot, si nou konfes nou pese avek li, e si nou demontre ki nou’n sanz nou latitid anver nou move aksyon. Zeova pou “donn [nou] letan pour renouvle [nou] lafors spirityel” si nou senserman repantir.—Lir Akt 3:19, 20.
MANASE TI FER PESE GRAV, ME I TI REPANTIR
11. Dan ki fason Lerwa Manase ti fer sa ki mal dan lizye Bondye?
11 Annou vwar en lot legzanp dan Labib ki montre ziska ki degre Zeova i pare pour pardonnen. Apepre 360 an apre ki David ti lo tronn, Manase ti vin lerwa Zida. Son 55 lannen renny ti ranpli avek move keksoz e pour sa, Zeova ti kondann li. Serten keksoz ki Manase ti fer ti konstri en lotel pour ador Baal, “ador tou bann larme lesyel,” fer son bann garson pas dan dife, e promot bann pratik demonyak. Wi, i “ti fer en kantite keksoz ki ti mal dan lizye Zeova.”—2 Kron. 33:1-6.
12. Ki mannyer Manase ti retourn ver Zeova?
12 Evantyelman Manase ti ganny pran dan son pei natal e ganny anmennen dan prizon Babilonn. Laba i ti’n kapab rapel sa parol ki Moiz ti dir avek pep Izrael: “Kan ou dan bann sityasyon difisil e ki ou mazin sa bann parol, a lafen di zour, ou pou bezwen retourn ver Zeova ou Bondye e ekout son lavwa.” (Det. 4:30) Manase ti retourn ver Zeova. Ki mannyer? I ti “kontinyen abes son lekor en kantite” e “kontinyen priy” Bondye (parey i montre lo paz 23). (2 Kron. 33:12, 13) Nou pa konn egzakteman ki Manase ti dir dan son lapriyer, me nou kapab mazinen ki son lapriyer ti parey lapriyer David dan Psonm 51. Antouka, leker Manase ti sanz konpletman.
13. Akoz Zeova ti pardonn Manase?
13 Ki mannyer Zeova ti reazir anver lapriyer Manase? “I ti les li ganny enplore par [Manase] e I ti antann son demann pour ganny faver.” Parey David avan li, Manase ti rekonnet gravite son pese e i ti senserman repantir. Se sa alor ki ti fer Bondye pardonn Manase e fer li revin lerwa Zerizalenm. An rezilta sa, “Manase ti arive konnen ki Zeova i sa vre Bondye.” (2 Kron. 33:13) Pa i vreman tous nou leker pour konnen ki nou Bondye mizerikord i pare pour pardonn bann ki senserman repantir!
ESKI ZEOVA I TOULTAN PARDONNEN?
14. Kwa ki determinen si Zeova pou pardonn en dimoun?
14 Laplipar parmi pep Bondye ozordi pa pou zanmen bezwen demann Zeova pardon pour en pese sitan grav parey sa ki pour David ek Manase. Lefet ki Zeova ti pare pour pardonn sa de lerwa, sa i ed nou realize ki nou Bondye i pare pour pardonn menm bann pese grav si nou vreman repantir.
15. Ki mannyer nou konnen ki Zeova pa otomatikman pardonn pese?
15 Byensir, nou pa kapab dir definitivman ki Zeova i otomatikman pardonn pese tou dimoun. Konsernan sa, annou konpar latitid David ek Manase ki ti diferan avek latitid dezobeisan pep Izrael ek Zida. Kan David ti fer pese, Bondye ti anvoy Natann kot li pour donn li sa loportinite pour sanz son latitid. David ti aksepte led. Kan Manase ti vwar li dan bann sityasyon difisil, i ti senserman repantir. Par kont, souvandfwa bann zabitan Izrael ek Zida pa ti repantir. Alor, Zeova pa ti pardonn zot. O kontrer, i ti kontinyelman anvoy son bann profet dir zot ki mannyer i ti vwar zot kondwit. (Lir Neemya 9:30. *) Menm apre ki bann Izraelit ti retourn dan zot pei natal sorti Babilonn, Zeova ti kontinyen anvoy bann mesaze fidel parey pret Ezra ek profet Malaki kot zot. Kan sa pep ti azir an armoni avek lavolonte Zeova, zot ti eksperyans bokou lazwa.—Nee. 12:43-47.
16. (a) Ki konsekans nasyon Izrael ti sibir akoz zot pa ti repantir? (b) Ki loportinite Zeova in donn desandans nasyon Izrael?
16 Apre ki Zezi ti ganny anvoye lo later e prezant son lekor konman sakrifis, Zeova ti nepli aksepte sakrifis zannimo ki bann Izraelit ti ofer. (1 Zan 4:9, 10) Konman en zonm, Zezi ti reflekte fason panse son Papa kan i ti dir sa parol tousan: “Zerizalenm, Zerizalenm, ou ki touy bann profet e saboul a kou-d-ros bann ki Bondye in anvoy kot ou! Konbyen fwa mon’n oule rasanble ou zanfan ansanm parey en mer poul i rasanble son bann piti anba son lezel, me ou pa’n oule.” Alor Zezi ti dir: “Lala! ou lakaz aprezan in ganny abandonnen.” (Mat. 23:37, 38) Nasyon Izrael pa ti pare pour repantir e alor zot ti ganny ranplase par Izrael spirityel. (Mat. 21:43; Gal. 6:16) Me ki nou pou dir konsernan desandans nasyon Izrael? Zot osi zot kapab benefisye avek pardon ek mizerikord Zeova par egzers lafwa dan Li ek sakrifis Zezi Kri. Bann dimoun ki’n mor san repantir, pou osi benefisye avek pardon ek mizerikord Zeova si zot ganny resisite dan nouvo lemonn.—Zan 5:28, 29; Akt 24:15.
BYENFE ATRAVER PARDON ZEOVA
17, 18. Ki mannyer nou kapab ganny pardon Zeova?
17 Vi ki Zeova i pare pour pardonnen, ki nou devret fer? Nou devret azir parey David ek Manase. Nou devret admet ki nou’n fer pese, repantir, e sipliy Zeova pour pardonn nou. Demann li pour kre dan nou en leker pir. (Ps. 51:10) Si nou’n fer en pese grav, nou devret rod led avek bann ansyen. (Zak 5:14, 15) Nenport ki sityasyon nou ladan, i rekonfortan pour gard antet ki Zeova i parey sa ki I ti dir avek Moiz lo li menm, ki i “en Bondye ki annan mizerikord ek konpasyon, ki pa ankoler vitman, e ki annan en kantite labonte leker ek laverite, prezerv labonte leker pour plizyer milye, pardonn fot, lofans ek pese.” Zeova pa’n sanze.—Egz. 34:6, 7.
18 Par servi en konparezon pwisan, Zeova ti promet bann Izraelit ki i ti pou efas zot pese konpletman si zot ti repantir. I ti dir ki menm si zot pese ti “byen rouz,” zot ti pou vin blan parey “lanez.” (Lir Izai 1:18. *) Alor, ki pardon Zeova i vedir pour nou? Nou pou ganny konpletman pardonnen si nou demontre lapresyasyon pour pardon ki Zeova i akord nou e montre ki nou repantir.
19. Ki nou pou egzaminen dan lartik ki swiv?
19 Vi ki Zeova i pardonn nou, ki mannyer nou kapab imit li dan nou relasyon avek lezot? Ki mannyer nou kapab evite annan sa latitid pour pa pardonn bann ki’n fer en pese grav me ki’n repantir senserman? Sa lot lartik pou ed nou egzamin nou prop leker pour nou kapab imit latitid nou Papa Zeova ki “bon e pare pour pardonnen.”—Ps. 86:5.
[Not anba lo paz]
^ par. 6 2 Samyel 12:1-4: “1 Zeova ti anvoy Natann kot David. I ti vin kot li e dir li: ‘I ti annan de zonm dan menm lavil, enn ris ek enn pov. 2 Sa zonm ris ti annan en kantite mouton ek bef; 3 me sa zonm pov ti napa preski nanryen, zis en pti femel mouton ki i ti’n aste. I ti pe gard li vivan, e i ti pe grandi ansanm avek li ek son bann garson. I ti manz son morso dipen, bwar dan son lakoup, e dormi lo son lestoman, e i ti parey en fiy pour li. 4 Apre en serten letan en viziter ti vin kot sa zonm ris, me sa zonm pa ti pran son prop mouton ek son prop bef pour prepare pour sa viziter ki ti’n vin kot li. I ti plito pran sa sel femel mouton ki sa zonm pov ti annan e i ti prepar li pour sa zonm ki ti’n vin kot li.’”
^ par. 9 Psonm 32:5: “Finalman mon ti konfes mon pese avek ou, e mon fot, mon pa ti kasyet. Mon ti dir: ‘Mon pou konfes mon lofans avek Zeova.’ Ou menm, ou’n pardonn mon bann pese.”
^ par. 15 Neemya 9:30: “Me pandan tou sa bann lannen ou pa’n azir dan en fason dir avek zot e ou ti kontinyen temwanny kont zot par mwayen ou lespri par servi ou bann profet, e zot pa ti ekoute. Finalman ou ti les zot tonm dan lanmen bann nasyon.”
^ par. 18 Izai 1:18: “Zeova i dir: ‘Aprezan, vini zot lepep, annou remet keksoz drwat antre nou. Menm si zot pese i byen rouz, zot pou vin blan parey lanez; menm si zot menm kouler avek latwal rouz fonse, zot pou vin blan parey lalenn.’”
[Kestyon]
[Portre lo paz 26]
Manase ti revin lerwa Zerizalenm akoz Zeova ti pardonn li
