“Bann rezidan tanporer” ini dan vre ladorasyon

“Bann etranze pou vin zot fermye ek bann ki plant pye rezen. Kant a zot, zot pou ganny apele bann pret Zeova.”​—IZA. 61:5, 6.

KI OU POU REPONN?

Ki mannyer serten dimoun i konsider bann etranze, me ki mannyer pwennvi Labib i diferan?

Ki lenvitasyon tou dimoun dan lemonn pe gannyen?

Dan ki fason nou deza pe viv dan en lemonn ki napa etranze?

1. Ki mannyer serten dimoun i konsider bann etranze, me akoz i mal pour mazin koumsa?

PAREY nou’n vwar dan lartik presedan, dimoun i servi sa mo etranze dan en fason negatif e san respe, konmsi sa bann dimoun pa enportan konpare avek zot. I en mank respe pour en dimoun konsider bann ki sorti dan en lot pei pli enferyer ki son pei. Deplis, sa latitid i montre ki nou pa konn nanryen lo sa bann dimoun. Liv The Races of Mankind i dir: “Bann diferan ras imen i bann frer zis parey Labib i dir.” Souvan bann frer i diferan avek kanmarad, me sa pa anpes zot frer avek kanmarad.

2, 3. Ki pwennvi Zeova lo bann etranze?

² Byensir, nenport ki landrwa kot nou reste, i annan etranze parmi nou. Sa ti le ka dan letan bann Izraelit ki ti annan en relasyon spesyal avek Zeova atraver lalyans Lalwa. Bann etranze ki ti reste parmi zot ti napa menm drwa parey bann Izraelit, me pourtan, bann Izraelit ti ganny demande pour tret zot dan en fason zis e avek respe. Pa sa i en bon legzanp pour nou swiv! Bann vre Kretyen pa devret fer lapliferans oubyen annan move pwennvi lo lezot. Akoz? Zapot Pyer i dir nou: “Aprezan, mon vreman konpran ki Bondye pa fer preferans pour personn, me dan nenport ki nasyon tou dimoun ki annan respe pour li e ki fer sa ki byen Bondye i kontan li.”​—Akt 10:34, 35.

³ Sa bann etranze ti benefisye lefet ki zot ti parmi bann Izraelit. Sa ti montre ki pwennvi Zeova ti annan lo bann etranze. Detrwa lannen pli tar, zapot Pol ti dir sa konsernan Zeova: “Eski Bondye i en Bondye selman bann Zwif? Eski i pa Bondye lezot pep osi? Byen sir i Bondye lezot pep osi.”​—Rom. 3:29; Yoel 2:32.

4. Akoz nou dir ki napa etranze parmi “Izrael Bondye”?

 ⁴ Atraver nouvo lalyans, kongregasyon bann Kretyen swazir in ranplas nasyon Izrael ki ti annan en relasyon spesyal avek Bondye. Zot apel “Izrael Bondye.” (Gal. 6:16, NW) Parey Pol ti eksplike, dan sa nasyon napa “Zwif ek Non-Zwif, sirkonsi ek ensirkonsi, [“etranze,” NW], non-sivilize, dimoun primitif, lesklav ek zonm lib, me Kris i tou e dan tou.” (Kol. 3:11) Sa i montre ki ti pou napa okenn dimoun ki ti pou ganny konsidere konman etranze dan kongregasyon Kretyen.

5, 6. (a) Ki kestyon serten dimoun i kapab demande konsernan Izai 61:5, 6? (b) Lekel sa “bann pret Zeova” e lekel sa “bann etranze” ki Izai i koz lo la? (c) Ki sa de group i annan an komen?

⁵ De lot kote, serten dimoun i kapab dir ki sa profesi dan Izai sapit 61 pe ganny akonplir dan kongregasyon Kretyen. Verse 6 i mansyonn bann ki pou servi konman “bann pret Zeova.” Par kont, verse 5 i mansyonn “bann etranze” ki pou korpere e travay avek sa “bann pret.” Ki mannyer nou devret konpran sa?

⁶ Sa “bann pret Zeova” i bann Kretyen swazir ki partisip dan sa “premye rezireksyon” e ki “pou vin pret pour Bondye e pour Kris, e zot pou renny avek li pandan 1000 an.” (Rev. 20:6) I osi annan plizyer Kretyen fidel ki annan lespwar pour viv lo later. Menm si zot pe travay e asosye avek bann ki pou al servi dan lesyel, zot bann etranze dan en sans senbolik. Zot kontan pour siport e travay ansanm avek “bann pret Zeova” konman bann “fermye” oubyen “bann ki plant pye rezen.” Zot fer sa par prese e ansenny bann dimoun laverite zis parey en fermye i plant e kiltiv later, e sa i anmenn laglwar pour Bondye. Bann Kretyen swazir ek “lezot mouton” i rod e donn swen spirityel bann dimoun ki senserman anvi servi Bondye pour touzour.​—Zan 10:16, NW.

“BANN REZIDAN TANPORER” PAREY ABRAAM

7. Dan ki fason bann Kretyen ozordi i parey bann fanm ek zonm fidel dan letan lontan?

⁷ Parey nou’n vwar dan lartik presedan, bann vre Kretyen i parey bann etranze oubyen rezidan tanporer dan sa  move lemonn Satan. Zot parey sa bann fanm ek zonm fidel dan letan lontan, enkli Abraam ki Labib i dir “zot ti bann etranze e bann egzile [oubyen “rezidan tanporer,” NW] lo later.” (Ebr. 11:13) Ki swa nou annan lespwar pour viv dan lesyel oubyen lo later, nou annan sa privilez pour annan menm relasyon ki Abraam ti annan avek Zeova. Disip Zak i eksplike ki “‘Abraam ti krwar dan Bondye, akoz son lafwa i ti ganny konsidere konman zis’, e i ti ganny apele zanmi Bondye.”​—Zak 2:23.

8. Ki promes ti ganny fer avek Abraam, e ki mannyer i ti santi konsernan son lakonplisman?

⁸ Bondye ti promet ki atraver Abraam ek son bann desandans, tou fanmir lo later ti pou ganny beni, pa zis en nasyon. (Lir Zenez 22:15-18. *) Kantmenm Abraam pa ti pou vwar lakonplisman sa promes, i ti annan konfyans ki i ti pou ganny akonplir. Pour plis ki lanmwatye son lavi, li ek son fanmir ti marse sorti dan en landrwa pour al dan en lot. Pandan tou sa letan, Abraam ti kontinyen gard son lanmitye avek Zeova.

9, 10. (a) Dan ki fason nou kapab imit legzanp Abraam? (b) Ki lenvitasyon nou kapab fer pase?

⁹ Menm si Abraam pa ti konnen ki kantite letan i ti pou bezwen espere pour vwar lakonplisman promes Bondye, son lanmour ek devosyon pour Zeova pa ti zanmen diminyen. I ti toultan reste konsantre lo sa promes, e i pa ti zanmen enstal li konman en rezidan permanan parmi okenn nasyon. (Ebr. 11:14, 15) Pa i vreman saz pour swiv legzanp Abraam par viv en lavi senp e pa tro trakase avek keksoz materyel, pozisyon dan lasosyete, oubyen karyer! Eski i ti pou fer sans pour viv en swadizan lavi normal dan en lemonn ki pros pour ganny detrir? Eski i fer sans pour reste atase avek bann keksoz ki zis tanporer? Parey Abraam, nou annan en keksoz bokou pli meyer ki nou pe espere. Nou pe esper nou lespwar akonplir avek pasyans.​—Lir Romen 8:25.

¹⁰ Zeova i ankor pe envit dimoun sorti dan tou nasyon pour ganny beni atraver desandans Abraam. Bann “pret Zeova” ek “bann etranze” oubyen lezot mouton pe dir bann dimoun ki Zeova pe envit zot e zot pe fer sa dan plis ki 600 langaz.

KONTAN DIMOUN DAN TOU NASYON

11. Ki Salomon ti demande lo la par bann etranze?

¹¹ Kan tanp ti pe ganny inogire an 1026 A.N.L., Salomon ti fer en lapriyer avek Zeova e demann li pour ekout lapriyer bann dimoun sorti dan tou nasyon. Sa ki Salomon ti demande ti an armoni avek sa promes ki Zeova ti fer avek Abraam. I ti dir: “Osi sa etranze, ki pa form parti ou pep Izrael e ki sorti dan en pei byen lwen akoz ou non (akoz zot pou tann konsernan ou gran non ek ou lanmen for ek ou lebra ki’n pare pour azir), e i vini e priy ver sa lakaz, ki ou menm ou ekoute dan lesyel, sa landrwa fiks kot ou reste, e ou devret fer dapre tou sa ki sa etranze i demann ou; pour ki tou dimoun lo later i kapab konn ou non pour ki zot a annan lakrent pour ou parey ou pep Izrael i annan.”​—1 Rwa. 8:41-43.

12. Kwa ki kapab fer serten dimoun panse ki Temwen Zeova i bann dimoun drol oubyen parey etranze?

 ¹² En etranze i en dimoun ki dan en pei ki pa son pei natal, oubyen en dimoun ki kit son kominote e al viv dan en lot. Sa definisyon i dekrir byen Temwen Zeova. Zot siport zis Rwayonm Bondye ek son lerwa, Zezi Kri. I pour sa rezon ki zot pa mel ditou dan bann zafer politik menm si lezot i vwar zot konman bann dimoun drol dan lasosyete.

13. (a) Ki mannyer nou kapab aret konsider en dimoun konman en etranze? (b) Eski i ti dan plan Zeova pour nou konsider kanmarad konman etranze? Eksplike.

¹³ Souvan nou rekonnet bann etranze par bann karakteristik ki zis zot ki annan. Ou kapab rekonnet zot par zot langaz, koutim, tre fizik, oubyen menm zot fason sanze. Kantmenm zot nasyonalite ek karakteristik i diferan avek lezot dimoun, se bann keksoz ki zot annan an komen avek lezot imen ki pli enportan. Alor, en dimoun i ganny konsidere konman en etranze akoz i diferan dan serten fason. Kan nou aret konsantre lo sa ki fer lezot diferan avek nou, nou pou nepli konsider zot konman etranze. Si tou dimoun lo later ti sitwayen en sel gouvernman, i ti pou napa okenn etranze dan lemonn, pa i vre? Sanmenm sa plan Zeova depi o konmansman, ki imen i ini konman en sel fanmir anba en sel dominasyon, son dominasyon. Eski i posib ozordi pour aret konsider kanmarad konman etranze?

14, 15. Ki Temwen Zeova konman en group in reisi fer?

¹⁴ Dan sa lemonn kot dimoun i egois e krwar ki zot pei i pli enportan, i gou pour vwar bann endividi ki kontan dimoun dan tou nasyon. I vre, i kapab difisil pour pa konsider lezot konman etranze. Ted Turner, fondater lasenn televizyon CNN i fer sa komanter konsernan plizyer dimoun talante sorti dan diferan pei ki i’n travay avek: “I ti en leksperyans ekstraordiner pour travay avek zot. Mon ti nepli vwar bann dimoun ki sorti dan lezot pei konman ‘bann etranze,’ me konman bann sitwayen sa plannet parey mwan. Mon ti konmans vwar sa mo ‘etranze’ negatif e deside ki personn pa devret servi sa mo ni dan lofis ni lo televizyon. O kontrer nou ti servi sa mo ‘enternasyonal’”

¹⁵ Dan lemonn, zis Temwen Zeova konman en group ki’n adopte fason panse Bondye. Par aprann vwar keksoz lafason ki Zeova i vwar, zot in kapab sanz zot fason panse, e lafason ki zot santi anver lezot. Olye tret dimoun ki sorti dan lezot pei konman bann dimoun ki  pa diny konfyans, e menm ay zot, Temwen Zeova in aprann kontan sa varyete karakteristik ek abilite ki sa bann dimoun i annan. Eski ou’n reflesir lo sa ki Temwen Zeova in reisi akonplir e lo konman sa in benefisye ou dan lafason ki ou azir anver lezot?

EN LEMONN SAN BANN ETRANZE

16, 17. Ki lakonplisman sa profesi dan Revelasyon 16:16 ek Danyel 2:44 pou vedir pour ou?

¹⁶ Tre byento, Zezi Kri ek son bann lanz pou lager kont tou nasyon dan sa lager “ki apel Armagedon dan langaz Ebre.” (Rev. 16:14, 16; 19:11-16) Plis ki 2,500-z-an pase, profet Danyel ti ganny enspire pour predir sa ki pou arive avek bann gouvernman imen ki pa obeir Bondye. I ti ekrir: “Dan bann zour sa bann lerwa, Bondye lesyel pou etabli en rwayonm ki pa pou zanmen ganny detrir. Sa rwayonm li menm pa pou pas avek okenn lezot pep. I pou kraz e met en lafen avek tou sa bann rwayonm e li menm i pou dire pour en letan endefini.”​—Dan. 2:44.

¹⁷ Eski ou kapab imazinen ki lakonplisman sa profesi pou vedir pour ou? Sa bann frontyer ki separ bann nasyon pou nepli egziste e sa pou fer ki personn pa pou ganny konsidere konman etranze. Menm si dimoun pou ankor annan diferan laparans ek karakteristik fizik, sa pou montre sa varyete merveye dan kreasyon Bondye. Sa zoli lespwar i devret motiv nou tou pour fer nou mye pour kontinyen rann glwar e onor nou Kreater Zeova.

18. Ki devlopman ki montre nou kapab aret konsider lezot konman bann etranze?

¹⁸ Eski i vreman posib pour nepli annan etranze en zour? Byen sir! Sa mo etranze in preski perdi son sinifikasyon parmi Temwen Zeova, akoz zot pa vreman port latansyon lo nasyonalite bann dimoun parmi zot. Par egzanp, resaman plizyer zot bann pti biro brans dan diferan pei in zwenn ansanm pour amelyor lafason ki zot akonplir sa travay pour anons bon nouvel konsernan Rwayonm Bondye. (Mat. 24:14) Zot pa ti pran sa desizyon baze lo nasyonalite sa bann dimoun dan sa bann pti biro brans tan ki lalwa ti permet. Sa i en lot levidans ki prouve ki Zezi Kri, konman sa Lerwa ki Bondye in met o pouvwar, pe kas tou baryer ki imen in kree e tre byento i pou “ganny laviktwar.”​—Rev. 6:2.

19. Ki sa langaz pir in fer posib?

¹⁹ Temwen Zeova i sorti dan diferan nasyon e koz diferan langaz, me zot ini akoz zot fer zot mye pour koz en langaz pir, setadir laverite. (Lir Tsefanya 3:9. *) Menm si zot en fanmir enternasyonal, zot pa form parti sa lemonn. Sa fanmir ini i zis en avangou sa kalite lemonn ki pou egziste dan lavenir, en lemonn san okenn etranze. Tou dimoun ki pou dan sa lemonn pou eksperyans sa ki liv The Races of Mankind ki nou’n mansyonnen o konmansman i dir: “Bann diferan ras imen i bann frer zis parey Labib i dir.”

[Not anba lo paz]

[Kestyon]

[Portre lo paz 28]

Eski ou pou reste konsantre lo lakonplisman promes Bondye parey Abraam ti fer?

[Portre lo paz 30]

Dan lizye Zeova, i napa enn parmi zot ki etranze

[Ekstre lo paz 31]

Eski ou pe esper avek enpasyans sa letan kot sa frontyer ki separ bann pei ek kan sa mo etranze pou nepli egziste?