Aprann avek Parol Bondye

Eski Bondye pou etablir en gouvernman pour later antye?

Sa lartik i soulev bann kestyon ki petet ou’n deza demande e i montre kote ou kapab trouv larepons sa bann kestyon dan ou Labib. I pou en plezir pour Temwen Zeova ed ou pour trouv larepons sa bann kestyon.

1. Akoz limanite i bezwen zis en gouvernman?

Ozordi, bann problenm ki imen i rankontre i global. Dan serten pei, lamazorite dimoun i pov e ganny abize, tandis ki dan lezot pei bokou dimoun i annan plis ki sa ki zot bezwen. Pour kapab partaz byen bann resours later, sa bann resours pou bezwen dan lanmen zis en gouvernman.​—Lir Eklezyast 4:1; 8:9.

2. Nou kapab annan konfyans dan lekel pour dirize?

Bokou dimoun pa pou dakor avek sa lide pour annan zis en dirizan parski imen pa pou kapab fer sa travay byen. Napa personn ki pou ganny aksepte par tou dimoun. Mazinen osi, imen pou toultan ganny koronpi par pouvwar. Tou dimoun i per kan zot mazinen ki i pou annan en sel dirizan dominer.​—Lir Proverb 29:2; Zeremi 10:23.

Zeova in swazir son Garson Zezi pour diriz limanite pour touzour. (Lik 1:32, 33) Zezi in deza eksperyans lavi lo later. Pandan son letan lo later, i ti geri bann malad, ansenny bann ki ti pare pour aprann, e pas letan avek bann zanfan. (Mark 1:40-42; 6:34; 10:13-16) Alor Zezi i sa meyer Dirizan.​—Lir Zan 1:14.

  3. Eski i posib pour annan en sel gouvernman?

Bondye in apwent son Garson pour diriz later. (Danyel 7:13, 14) Zezi pa pou bezwen vin lo later pour diriz limanite, zis parey en Dirizan imen pa bezwen dan sak lavil oubyen distrik ki anba son lotorite.​—Lir Matye 8:5-9, 13.

Eski tou dimoun pou aksepte Zezi konman Dirizan? Non. Zis bann dimoun ki kontan fer sa ki byen ki pou aksepte li. Zezi i en dirizan ki kontan imen e kontan fer sa ki byen. Zeova pou detrir tou bann ki kont lafason ki Zezi pou dirize.​—Lir Matye 25:31-33, 46.

4. Konman Dirizan later antye, ki Zezi pou fer?

Zis parey en berze i rasanble son bann mouton, Zezi i deza pe rasanble bann dimoun ki pare pour aprann partou lo later e ansenny zot pour kontan kanmarad parey Bondye i kontan zot. (Zan 10:16; 13:34) Sa bann dimoun pe siport avek tou zot leker lafason ki Zezi i dirize. (Psonm 72:8; Matye 4:19, 20) Zot pe osi anons partou lo later ki Zezi in vin Lerwa.​—Lir Matye 24:14.

Tre byento, Zezi pou retir limanite anba dominasyon bann gouvernman koronpi. I’n swazir serten son bann siporter fidel pour diriz later konman lerwa ansanm avek li dan lesyel. (Danyel 2:44; 7:27) Zezi, sa dirizan dan Rwayonm, pou fer tou dimoun aprann konn Zeova e fer later vin sa paradi ki limanite ti perdi.​—Lir Izai 11:3, 9; Matye 19:28.

Pour plis lenformasyon, vwar sapit 8 dan liv Ki Labib i vreman dir? pibliye par Temwen Zeova.