Eski nou devret kestyonn Bondye?

SERTEN i dir ki nou pa devret kestyonn Bondye. Petet zot mazinen ki i en mank respe pour demande akoz Bondye i fer oubyen pa fer serten keksoz. Eski ou osi ou mazin koumsa?

Si i le ka, petet ou pou sirprann pour aprann ki dan lepase, i’n annan plizyer bon dimoun ki’n kestyonn Bondye. Sa i serten kestyon ki zot in demande:

Zob, en zonm fidel: “Akoz bann move i kontinyen viv, zot vyeyi, e zot osi vin pli ris ki lezot?”​—Zob 21:7.

Abakouk, en profet fidel: “Akoz ou get bann ki pe mal azir, ou reste trankil kan en move dimoun i anval en dimoun ki pli drwat ki li?”​—Abakouk 1:13.

Zezi Kri: “Mon-dye, Mon-dye akoz ou’n abandonn mwan?”​—Matye 27:46.

Si ou lir sa paragraf ki avan e apre sa bann verse ki’n ganny site, ou pou remarke ki Zeova * pa ti ofanse ler zot ti demann li sa bann kestyon senser. Sa pa drol, akoz Bondye pa ofanse ler nou demann li pour satisfer nou bann bezwen fizik ki gard nou lekor an bonn sante. I en plezir pour Li donn nou sa bann keksoz. (Matye 6:11, 33) Bondye i osi pare pour donn nou lenformasyon ki kapab ed nou reste an bonn sante mantalman e emosyonnelman. (Filipyen 4:6, 7) Annefe, Zezi ti dir son bann disip: “Demande zot a gannyen.” (Matye 7:7) Dapre lezot verse dan sa sapit, Zezi pa ti pe zis koz lo ganny keksoz materyel me osi lo ganny larepons bann kestyon enportan.

Si ou ti annan sa loportinite, lekel parmi sa bann kestyon ou ti pou demann Bondye?

● Ki bi mon lavi?

● Ki pou arive ler mon mor?

● Akoz ou les mwan soufer?

Vi ki “tou Lekritir i enspire par Bondye,” ou pou trouv larepons ki Bondye i donnen dan son Parol, Labib. (2 Timote 3:16) Annou vwar akoz serten dimoun in demann sa trwa kestyon anler e osi larepons ki Labib i donnen.

[Not anba lo paz]