Gard nou pozisyon konman “bann rezidan tanporer”
Gard nou pozisyon konman “bann rezidan tanporer”
“Mon bann byenneme, mon demann zot antan ki etranze ek vwayazer [oubyen “bann rezidan tanporer,” NW], gard zot kont bann dezir natir imen.”—1 PYER 2:11.
KI OU POU REPONN?
Akoz bann Kretyen swazir i ganny konsidere konman rezidan tanporer?
Dan ki sans “lezot mouton” i bann rezidan tanporer?
Ki ou enpasyan pour vwar?
1, 2. Avek lekel Pyer ti pe refer ler i ti servi sa lekspresyon “bann ki’n ganny swazi” e akoz i ti apel zot bann “rezidan tanporer”?
APEPRE 30 an apre ki Zezi ti’n mont dan lesyel, zapot Pyer ti ekrir en let bann “pep egzile ki viv konman refizye, e ki’n disperse atraver provens Pon, Galasi, Kapados, Lazi ek Bitini . . . tou bann ki’n ganny swazi.” (1 Pyer 1:1, 2) I kler ki atraver sa lekspresyon “bann ki’n ganny swazi,” Pyer ti pe refer avek bann Kretyen ki ti’n ganny swazir par lespri sen e ganny en “nouvo lavi avek en lesperans vivan” pour diriz ansanm avek Kris dan lesyel. (Lir 1 Pyer 1:3, 4.) Me akoz plitar Pyer ti apel sa bann ki’n ganny swazir konman “etranze ek bann rezidan tanporer”? (1 Pyer 2:11, NW) Ki sinifikasyon sa parol i annan ozordi vi ki napa bokou Temwen Zeova ki dir ki i en Kretyen swazir?
2 I ti apropriye pour aplik sa term “rezidan tanporer” avek bann Kretyen swazir dan premye syek. Parey i le ka pour sa pti group ki ankor vivan ozordi, zot lavi lo later i zis tanporer. Zapot Pol, en manm parmi sa “pti troupo” ki’n ganny swazir, ti dir: “Nou, nou bann sitwayen lesyel, e nou pe esper avek lenpasyans . . . nou Sover, Senyer Zezi-Kris.” (Lik 12:32; Fili. 3:20) Vi ki bann Kretyen swazir i “sitwayen lesyel,” ler zot mor, zot rekonpans se lavi imortel dan lesyel. (Lir Filipyen 1:21-23.) Alor, dan en sans literal, zot “bann rezidan tanporer” lo sa later ki anba kontrol Satan.
3. Ki kestyon ki ganny souleve konsernan “lezot mouton”?
3 Me ki nou pou dir konsernan bann “lezot mouton”? (Zan 10:16, NW) Eski pa zot annan lespwar baze lo Labib pour zot vin rezidan permanan lo later? Sirman, se lo later menm ki zot pou viv pour touzour! Me pour lemoman, zot kapab ganny konsidere konman bann rezidan tanporer. Dan ki sans?
“TOU LAKREASYON BONDYE PE SOUPIRE”
4. Ki bann dirizan lemonn pa kapab fer?
4 Tan ki move lemonn Satan i egziste, tou dimoun, enkli bann Kretyen, pou kontinyen sibir konsekans rebelyon Satan kont Zeova. Romen 8:22 i dir: “Nou konnen, annefe, ki ziska aprezan tou lakreasyon Bondye pe soupire e soufer.” Menm si zot senser, bann dirizan lemonn, syantis, ek lorganizasyon led imaniter pa kapab fer nanryen pour anpes sa.
5. Depi 1914, ki plizyer milyon dimoun in fer, e akoz?
5 Depi 1914, plizyer milyon imen in swazir pour vin bann sitwayen Rwayonm Bondye anba dominasyon Lerwa Kris Zezi. Zot refize form parti e siport lemonn Satan. O kontrer, zot servi zot lavi ek zot byen pour lentere Rwayonm Bondye.—Rom. 14:7, 8.
6. Dan ki sans Temwen Zeova i kapab ganny apele bann etranze?
6 Dan plis ki 200 pei, Temwen Zeova i bann sitwayen ki obeir lalwa, me kantmenm sa zot parey bann etranze. Zot determinen pour pa enterfer dan okenn zafer politik e sosyal. Menm la konmela, zot konsider zot konman bann sitwayen sa nouvo lemonn ki Bondye in promet. Zot kontan pour vwar ki zot letan konman rezidan tanporer dan sa lemonn enparfe i pros pour terminen.
7. Ki mannyer bann serviter Bondye pou vin bann rezidan permanan, e kote?
7 Byento Kris pou egzers son lotorite e detrir move lemonn Satan. Gouvernman parfe Kris pou retir pese ek soufrans lo later. I pou elimin tou bann ki rebel kont souvrennte Zeova. Bann serviter fidel Bondye pou annan sa posibilite pour vin bann rezidan permanan dan Paradi lo later. (Lir Revelasyon 21:1-5.) Finalman, tou kreasyon pou ganny konpletman “libere en zour avek pouvwar destrikter ki pe gard li dan lesklavaz, pour partisip dan laliberte ek laglwar bann zanfan Bondye.”—Rom. 8:21.
KI BANN VRE KRETYEN I DEVRET FER?
8, 9. Eksplike ki Pyer ti pe dir kan i ti servi sa lekspresyon “gard zot kont bann dezir natir imen.”
8 Pyer ti eksplike konman bann Kretyen ti devret azir. I ti dir: “Mon bann byenneme, mon demann zot antan ki etranze ek vwayazer [oubyen “bann rezidan tanporer,” NW], gard zot kont bann dezir natir imen ki fer lager kont zot lam.” (1 Pyer 2:11) Sa konsey ti premyerman aplik pour bann Kretyen swazir, me i osi aplikab pour lezot mouton Zezi.
9 I pa mal pour satisfer serten dezir dan lafason ki Bondye i aprouve. Zot anmenn en serten plezir dan lavi. Par egzanp, apresye bann bon manze ek bwar, partisip dan bann aktivite agreab, e annan bann bon zanmi. Plezir ki en koup marye i gannyen kan zot satisfer zot dezir seksyel i normal. (1 Kor. 7:3-5) Par kont, sa bann “dezir natir imen” ki Pyer ti pe koz lo la i sa bann dezir “ki fer lager kont [nou] lam.” Pour montre pli klerman sa ki Pyer ti pe dir, serten tradiksyon Labib i tradwir sa lekspresyon konman “dezir zis pour fer sèks” (King James Version) oubyen “move dezir” (New International Version). I kler ki nou devret kontrol okenn dezir natir imen ki an konfli avek plan Zeova, e ki kapab annan en lefe negatif lo nou relasyon avek li. Si non, lespwar ki en Kretyen i annan pour reste vivan pou vreman an danze.
10. Ki metod Satan i servi pour fer bann Kretyen form parti son lemonn?
10 Lobzektif Satan se pour afeblir determinasyon bann vre Kretyen ki konsider zot lekor konman “bann rezidan tanporer” dan sa lemonn. Dezir pour keksoz materyel, ganny sedwir par limoralite seksyel, laglwar ki vin avek o pozisyon, sa dezir pour mazin zis nou menm, e vin en dimoun patriyotik, tousala i bann latrap Satan. Ler nou determinen pour pa les sa bann dezir natir imen enfliyans nou, nou montre ki nou pa oule form parti move lemonn Satan. Nou osi montre ki nou pe viv dan sa lemonn Satan zis tanporerman. Sa ki nou vreman anvi e pe fer bokou zefor pour gannyen, se pour vin en rezidan permanan dan nouvo lemonn Bondye kot pou annan lazistis.
BON KONDWIT
11, 12. Ki mannyer bann etranze i ganny konsidere e kwa ki kapab ganny dir konsernan Temwen Zeova?
11 Dan verse 12, Pyer i kontinyen son leksplikasyon konsernan kondwit ki “bann rezidan tanporer” i devret annan an dizan: “Zot devre annan bonn kondwit parmi bann payen pour ki ler zot ganny akize pour mal fer, bann payen a rekonnet zot bonn aksyon e rann glwar Bondye zour i pou vini.” Bann etranze oubyen rezidan tanporer i souvan ganny kritike. Zis akoz zot diferan avek lezot, zot menm kapab ganny konsidere konman bann move dimoun. Zot parol, aksyon, resanz, e petet menm zot laparans i kapab diferan. Par kont, zot bon travay, setadir zot bon kondwit, i fer ki sa bann komanter negatif pa fer sans.
12 Pareyman, konversasyon ek divertisman bann vre Kretyen i diferan avek lezot dimoun. Zot resanz ek laparans i osi montre ki zot diferan avek laplipar dimoun dan zot kominote. Akoz sa, bann dimoun ki pa konn zot byen, i akiz zot konmkwa zot bann move dimoun. Me de lot kote, lezot dimoun i kapab felisit zot pour zot bon kondwit.
13, 14. Dan ki fason ‘lasazes i ganny rekonnet par son bann aksyon’? Donn legzanp.
13 En bon kondwit i kapab fer bann ki pe kritik nou vwar ki zot napa rezon pour fer sa. Menm Zezi, sa sel zonm ki ti konpletman fidel anver Bondye, ti ganny akize. Serten ti apel li “en gourman e en soular, . . . zanmi avek bann kolekter taks ek bann dimoun move repitasyon.” Me, son bon kondwit ti montre ki i ti annan lasazes, e sa ti demanti zot lakizasyon konmkwa i ti en move dimoun. Zezi ti dir: “lasazes Bondye i ganny rekonnet par son bann aksyon.” (Mat. 11:19) Sa i osi le ka ozordi. Par egzanp, serten dimoun ki reste pros avek Betel Selters Lalmanny i vwar lavi bann betelit drol. Par kont, mer sa lavil ti koz an byen lo zot, an dizan: “Bann Temwen ki servi laba i annan zot prop fason viv, me zot lavi pa deranz okenn dimoun dan kominote.”
14 Tou resaman, menm remark in ganny fer lo Temwen Zeova Mosko, Larisi. Zot ti ganny akize pour detrwa move kondwit tel ki zot kas bann fanmir, fer dimoun komet swisid, e fer zot refiz swen medikal. Me an Zen 2010, Lakour Drwa Imen Eropeen Strasbourg Lafrans ti dir ki Mosko ti mal fer pour anpes Temwen Zeova fer zot ladorasyon. Lakour Drwa Imen Eropeen ti dir ki bann lakour Larisi pa ti kapab prouve ki bann Temwen ti koupab e ki zot ti servi zot lalwa dan en fason tro strik avek Temwen Zeova.
SOUMISYON APROPRIYE
15. Ki prensip Labib bann vre Kretyen dan lemonn antye i swiv?
15 Pa zis Mosko, me Temwen Zeova dan lemonn antye pe akonpli en lot keksoz ki Pyer ti dir bann Kretyen i devret pe fer. I ti ekrir: “Akoz nou Senyer, soumet zot avek tou lotorite imen, avek lerwa ki annan lotorite siprenm [e] avek gouvernman.” (1 Pyer 2:13, 14) Menm si bann vre Kretyen pa form parti sa move lemonn, zot pare pour soumet avek bann lotorite osi lontan ki zot lalwa pa an konfli avek lalwa Bondye, parey Pol ti enstrir zot.—Lir Romen 13:1, 5-7.
16, 17. (a) Kwa ki montre ki nou pa kont gouvernman? (b) Ki serten zofisye gouvernman in dir konsernan Temwen Zeova?
16 Kan Temwen Zeova i konport zot konman “bann rezidan tanporer” dan sa lemonn, zot pa pe fer li dan zar konmsi zot pe proteste. Zot pa ni menm opoz ouswa enterfer avek lezot ki fer zot prop desizyon politik e sosyal. Kontrerman avek serten larelizyon, Temwen Zeova pa mel dan politik. Zot pa met okenn presyon lo bann dirizan pour fer zot sanz zot fason dirize. Zot definitivman napa sa dezir pour rebel kont gouvernman e ni menm ankouraz dimoun fer li.
17 Ler bann Kretyen i obeir bann zofisye gouvernman, zot pe montre respe ek loner ki sa bann dimoun i merite, e sa i annakor avek konsey Pyer pour “respe [bann] lerwa.” (1 Pyer 2:17) Parfwa, bann dimoun dan gouvernman pa vwar okenn rezon pour konsider Temwen Zeova konman en menas. Par egzanp Steffen Reiche, en politisyen Alman ki ti en manm gouvernman leta Brandenburg Lalmanny e plitar en manm parlman Lalmanny, ti dir ki Temwen Zeova ti montre bann bon kondwit ler zot ti pe ganny persekite par bann Nazi. I ti dir ki sa bann persekisyon pa ti sanz krwayans sa bann Temwen e ki zot ti tret lezot prizonnyen avek labonte. I ti azoute ki sa bann kalite i vreman enportan dan en pei parey Lalmanny sirtou la ki serten dimoun pe deplizanpli vin kriyel anver bann etranze oubyen bann ki annan diferan krwayans relizye e politik.
DEMONTRE LANMOUR
18. (a) Akoz i toutafe normal pour nou kontan nou bann fer ek ser? (b) Ki serten dimoun ki pa Temwen in remarke?
18 Zapot Pyer ti ekrir: “Kontan zot bann frer dan lafwa, annan reverans pour Bondye.” (1 Pyer 2:17) Temwen Zeova pa anvi depler Bondye e sa i motiv zot pour fer son lavolonte. Zot kontan ki zot form parti sa lasosyasyon frer ek ser dan lemonn antye ki annan sa menm dezir. Alor i toutafe normal pour zot “kontan zot bann frer dan lafwa.” Sa kalite lanmour pour kanmarad, ki telman rar dan sa lemonn egois, i etonn bann dimoun ki pa Temwen. Par egzanp, en gid ki ti pe travay avek en lazans vwayaz Ameriken ti etonnen pour vwar sa lanmour ki bann Temwen ti demontre ek led ki zot ti ofer bann delege sorti dan lezot pei kot en lasanble enternasyonal ki ti ganny fer Lalmanny 2009. I ti dir ki depi tou sa bann lannen ki i’n travay konman en gid, zanmen i’n deza vwar en tel keksoz. Plitar en Temwen ti fer sa remark: “Tou sa ki i ti dir lo nou ti ganny dir avek lantouzyasm e dan en fason ki demontre lapresyasyon.” Eski ou’n deza tann dimoun koz dan sa menm fason lo bann Temwen apre ki zot in obzerv nou pandan en lasanble distrik?
19. Ki nou devret determinen pour fer, e akoz?
19 Parey nou’n vwar dan sa lartik, Temwen Zeova i demontre dan plizyer fason ki zot vreman “bann rezidan tanporer” dan sa lemonn Satan. Zot kontan e determinen pour reste konman “bann rezidan tanporer.” Zot annan bon rezon pour annan lespwar solid ki tre byento zot pou vin rezidan permanan dan nouvo lemonn Bondye kot pou annan ladrwatir. Eski ou enpasyan pour vwar sa nouvo lemonn?
[Kestyon]
[Portre lo paz 23]
Nou refize siport lemonn Satan
[Portre lo paz 23]
Nou pe promot nouvo lemonn Bondye
[Portre lo paz 25]
Laverite dan Labib in ed sa fanmir Larisi pour ini ansanm
