Moiz​—En zonm ki ti annan lanmour

KI SAVEDIR LANMOUR? Lanmour i enplik annan en profon lafeksyon pour lezot. En dimoun ki annan lanmour i demontre par son parol ek aksyon lafason ki i santi anver sa bann ki i kontan, menm si sa i kout li bokou.

DAN KI FASON MOIZ TI DEMONTRE LANMOUR? Moiz ti demontre lanmour pour Bondye. Dan ki fason? Rapel sa ki ganny dir dan 1 Zan 5:3: “La lanmour Bondye: ki nou obei son konmannman.” Moiz ti viv son lavi dapre sa prensip. Parmi bann keksoz ki Bondye ti demann li pour fer ti enkli al devan Faraon, en zonm ki ti annan bokou pouvwar, e osi pour senpleman lev son baton lo Lanmer Rouz. Moiz ti obeir tou, “i ti fer egzakteman sanmenm,” ki swa i ti fasil oubyen i ti difisil.​—Egzod 40:16.

Moiz ti demontre lanmour pour son pep. Vi ki zot ti konnen ki Zeova ti pe servi Moiz pour gid zot, zot pa ti ezite pour al kot Moiz avek zot bann problenm. Labib i dir: “Lepep ti kontinyen vin kot Moiz depi bomaten ziska aswar.” (Egzod 18:13-16) Imazin lafatig ki Moiz ti’n bezwen santi apre en lazournen kot i ti’n ekout problenm bann Izraelit! Pourtan, i ti kontan pour ed sa bann dimoun ki i ti kontan.

Moiz pa ti zis ekout problenm bann Izraelit, me i ti osi priy pour zot. I ti menm priy pour bann ki ti fer li ditor! Par egzanp, kan Miryam ti konplent kont son frer Moiz, Zeova ti frap Miryam avek lalep. Dan plas kontan ki Miryam ti’n ganny pini, Moiz ti deswit priy pour li: “O Bondye, silvouple! Geri li, silvouple!” (Nonm 12:13) Si pa ti lanmour, kwa ki ti pous Moiz pour priy pour Miryam?

KI LESON NOU TIRE? Nou kapab imit Moiz par devlop en profon lanmour pour Bondye. Sa kalite lanmour i pous nou pour obeir son bann komannman ‘avek tou nou leker.’ (Romen 6:17) Kan nou obeir Zeova avek tou nou leker, nou fer son leker kontan. (Proverb 27:11) Nou osi benefisye kan nou obeir Zeova. Apretou, ler nou servi Bondye akoz nou kontan li, nou pa pou zis fer sa ki byen me nou pou servi li avek lazwa!​—Psonm 100:2.

En lot fason ki nou kapab imit legzanp Moiz, i kan nou devlop sa kalite lanmour ki met lentere lezot avan sa ki pour nou. Kan nou bann zanmi oubyen manm fanmir i apros nou avek zot problenm, lanmour i pous nou pour (1) donn zot tou nou latansyon, (2) senpatiz avek zot, e (3) fer zot santi ki nou enterese avek zot.

Parey Moiz, nou kapab priy pour bann ki nou kontan. Parler nou kapab santi ki nou pa kapab ed zot avek zot problenm. Petet nou menm dir, “Mon pa ni konnen ki mon kapab fer pour ou, mon pou mazin ou dan mon lapriyer.” Me mazinen: “Lapriyer senser en zonm zis i annan en gran pisans.” (Zak 5:16) Nou lapriyer i kapab pous Zeova pour fer en keksoz pour sa dimoun ki petet I pa ti pou’n fer. Ki pli bon keksoz nou kapab fer pour en dimoun ki nou vreman kontan ki priy pour li? *

Eski pa ou pou dakor ki nou kapab aprann bokou avek Moiz? Menm si i ti en dimoun ordiner, i’n kit en legzanp ekstraordiner lo lafwa, limilite, ek lanmour. Pli nou imit son legzanp, pli nou benefisye nou menm ek lezot.​—Romen 15:4.

[Not anba lo paz]

[Portre lo paz 6]