IMIT ZOT LAFWA

I “ti mars avek sa vre Bondye”

NOE pe asize lo en madriye. I pe pran en pe letan pour repoze dan travay. I dres son leren e redi son bann misk ki byen fermal anmezir i pe get sa manman lars ki pe ganny konstri. Koltar so pe anvoy loder e nek ou tann tapaz marto ek lansar pe rezonnen. Kot i pe asize, Noe i vwar son bann garson pe travay dir pe aranz sa gro striktir dibwa. Son bann garson ek bel fiy ensi ki son madanm byenneme, zot tou zot in travay dir avek li lo sa proze pour plizyer dizenn lannen. Zot in fer en kantite travay, me i reste ankor en bon pe pour fer!

Bann dimoun dan sa landrwa i krwar Noe ek son fanmir i fou. Pli konstriksyon i avanse, pli dimoun i riye. Zot vwar li enposib pour krwar ki en deliz pou kapab kouver later antye. Pour zot, i vreman bet pour Noe kontinyelman anons sa deliz. Zot pa kapab krwar ki en zonm i kapab gaspiy son lavi ek lavi son fanmir dan en fason sitan bet. Pourtan, Bondye Noe, Zeova pa ti vwar Noe konman en bet.

Parol Bondye i dir: “Noe ti mars avek sa vre Bondye.” (Zenez 6:9) Ki sa i vedir? I pa vedir ki Bondye ti mars lo later avek Noe oubyen Noe ti mars avek Bondye dan lesyel. O kontrer, i vedir ki Noe ti sitan obeir son Bondye e kontan li, i ti konmsi i ti pe mars avek Bondye parey de zanmi. Plizyer milye lannen plitar, Labib i dir nou ki atraver son lafwa, “i ti kondann lemonn.” (Ebre 11:7) Ki mannyer sa ti posib? Ki nou kapab aprann ozordi atraver son lafwa?

EN ZONM SAN DEFO DAN EN MOVE LEMONN

Noe ti grandi dan en move lanvironnman ki ti pe kontinyelman vin pli move. Lemonn ti deza move depi lepok son granper Enok, en lot zonm drwat ki ti mars avek Bondye. Enok ti’n predir ki en zour, zizman ti pou vin lo bann move dimoun lo later. Me dan letan Noe, bann move dimoun ti’n vin pli pir ankor. Anfet, dapre pwennvi Zeova, later ti’n koronpi akoz i ti ranpli avek vyolans. (Zenez 5:22; 6:11; Zid 14, 15) Ki ti’n arive ki ti’n fer keksoz pli pir ankor?

En keksoz terib ti pe deroule parmi bann lanz dan lesyel. Enn parmi zot ti’n fini rebel kont Zeova e vin Satan oubyen Dyab akoz i ti koz manti lo Bondye e anbet Adan ek Ev pour fer pese. Pandan letan Noe, lezot lanz ti konmans revolte kont lotorite Zeova. Zot ti abandonn zot pozisyon dan lesyel e vin lo later, pran lekor imen e marye avek bann zoli madanm lo later. Sa bann lanz egois e orgeye ki ti’n rebele ti en move lenfliyans pour bann imen.​—Zenez 3:1-5; 6:1, 2; Zid 6, 7.

Deplis, sa bann lanz ki ti’n vin lo later ti annan bann relasyon abnormal avek bann madanm e zot ti ganny bann zanfan ki ti bann zean vreman for. Labib i apel zot bann Nefilim, ki literalman  vedir ‘bann ki fer lezot tonbe.’ Bann Nefilim ti brit e vyolan e kontan fer ditor lezot e sa ti fer kondisyon lo later vin pli pir. Bondye ti remark “sa kantite mesanste ki zonm ti pe fer lo later e tou sa ki i ti panse dan son leker ti toultan move.” Pour sa rezon, Zeova ti deside pour detri bann move dimoun dan 120-t-an.​—Zenez 6:3-5.

Fer konmsi ou ti pe esey elve ou zanfan dan en lemonn parey? Anfet, sanmenm sa ki Noe ti fer. I ti ganny en bon madanm. Apre ki Noe ti’n ganny 500-z-an, i ti ganny trwa zanfan Sem, Kam ek Zafet. * Noe ek son madanm ti bezwen protez zot bann garson kont sa bann move lenfliyans ki ti otour zot. Bann pti garson i kontan admir bann dimoun ki “for” e “popiler,” e se koumsa menm ki bann Nefilim ti ete. Kekfwa, i ti enposib pour Noe ek son madanm anpes zot zanfan antann bann nouvel konsernan bann keksoz ekstraordiner ki bann zean ti pe fer. Me sa ki zot ti kapab fer se ansenny zot zanfan laverite lo Zeova, sa enn ki ay tou move keksoz. Zot ti bezwen ed zot bann garson pour vwar ki Zeova pa kontan sa vyolans ek rebelyon ki ti pe arive.​—Zenez 6:6.

Bann paran ozordi i kapab byen konpran sityasyon Noe ek son madanm. Nou lemonn osi i ranpli avek vyolans ek rebelyon. Menm bann divertisman pour bann zanfan i ranpli avek vyolans. Bann paran ki saz i fer tou sa ki zot kapab pour protez zot zanfan kont sa bann move lenfliyans, par ansenny zot zanfan lo Zeova, sa Bondye lape ki en zour pou elimin vyolans. (Psonm 11:5; 37:10, 11) Paran, i posib pour reisi! Noe ek son madanm ti reisi fer sa. Zot bann garson ti grandi pour vin bann bon dimoun e zot ti marye avek bann madanm ki ti pare pour met Zeova premye dan zot lavi.

“FER EN LARS POUR OU”

En zour, lavi Noe ti sanz pour touzour. Zeova ti koz avek son serviter byenneme e i ti dir li Son plan pour anmenn sa lemonn ver son lafen. Bondye ti dir Noe: “Fer en lars pour ou avek dibwa.”​—Zenez 6:14.

Sa lars pa ti en bato parey serten i krwar. I ti napa ni gouvernay, ni lakiy, ni tyak oubyen okenn laform parey en bato, i ti senpleman en manman kof. Zeova ti donn Noe bann dimansyon presi sa lars, serten detay lo lafason ki i devret ganny fer e serten lenstriksyon pour met koltar anndan e an deor lars. I ti dir Noe: “La mon pe anmenn en deliz lo later . . . Tou sa ki lo later pou fini.” Par kont, Zeova ti donn Noe sa lord: “Ou, ou bann garson, ou madanm ek madanm ou bann garson i devret antre dan lars avek ou.” Noe ti osi bezwen met diferan kalite zannimo dan lars. Zis bann ki ti dan lars ki ti pou sirviv sa Deliz ki ti pe vini!​—Zenez 6:17-20.

Noe ti annan en gro latas devan li. Sa lars ti pou enorm, apepre 133 met longer, 22 met larzer e 13 met oter. I ti bokou pli gran ki okenn bato an  bwa ki’n deza egziste menm dan nou letan. Eski Noe ti refiz sa misyon, konplent akoz i ti difisil oubyen sanz bann pti detay pour fer li pli fasil pour li fer sa travay? Labib i dir: “Noe ti fer tou dapre sa ki Bondye ti’n donn li lord pour fer. I ti fer egzakteman sanmenm.”​—Zenez 6:22.

Sa travay ti pran plizyer dizenn lannen, petet 40 a 50 an. Zot ti bezwen koup e anmenn dibwa kot lars ti pe ganny konstri, sye e aziste sa bann dibwa. Sa lars ti pou annan de letaz apard ki son bout anba, diferan konpartiman ek en laport lo kote. Tre probab, i ti annan lafnet anler tou dilon sak kote sa lars e osi en twa avek en pti lapant pour delo koule.​—Zenez 6:14-16.

Anmezir ki lannen ti pase e ki lars ti konmans pran form, Noe ti’n bezwen byen kontan pour ganny sipor son fanmir! I ti annan en lot laspe dan sa travay ki Noe ti’n kapab vwar li pli difisil ki fer en lars. Labib i dir nou ki Noe ti “en predikater lazistis.” (2 Pyer 2:5) Savedir avek kouraz, i ti pare pour averti sa bann move dimoun ki ti napa respe pour Bondye ki en destriksyon ti pe vin lo zot. Ki ti zot reaksyon? Plitar, Zezi ki ti koz lo lepok Noe ti dir ki sa bann dimoun “pa ti pran kont nanryen.” I ti dir ki zot ti sitan okipe avek zot lavi normal parey manze, bwar e marye ki zot pa ti ni fatig zot avek Noe. (Matye 24:37-39) San dout, bokou ti sikann li ek son fanmir, petet menm serten ti menas e opoz li dan en fason vyolan.

Kantmenm sa, Noe ek son fanmir pa ti abandonnen. Menm si lemonn ti anvi fer zot krwar ki sa ki ti premye dan zot lavi, setadir konstri lars, pa ti fer sans e i pa ti enportan, toudmenm zot ti kontinyen fer li fidelman. Bann fanmir Kretyen ozordi i kapab aprann bokou atraver lafwa Noe ek son fanmir. Apre tou, nou pe viv dan sa letan ki Labib i apel “bann dernyen zour” sa move lemonn. (2 Timote 3:1) Zezi ti dir ki nou letan pou parey lepok ler Noe ti konstri lars. Si sa lemonn pa enterese avek sa bon nouvel oubyen menm persekit ouswa monk nou, i byen pour bann vre Kretyen mazin legzanp Noe, parski zot pa premye pour fer fas avek bann tel defi.

“ALE, . . .  ANTRE DAN LARS”

Plizyer dizenn lannen ti’n pase e Noe ek son fanmir ti pros pour fini lars. Kan Noe ti apepre 600-z-an, i ti perdi serten manm son fanmir. Son papa Lamek ti mor. * Senk an pli tar, papa Lamek, granpapa Noe, Metousela ti mor a laz 969 an. Li menm ki’n viv pli lontan dapre sa ki Labib in dir. (Zenez 5:27) Tou le de, Metousela ek Lamek ti vivan ler Adan sa premye zonm ti ankor vivan.

Dan sa menm lannen, Noe ti ganny en nouvo mesaz avek Zeova ki ti dir li: “Ale, ou avek ou fanmir, antre dan lars.” An menm tan, Bondye ti dir Noe met tou kalite zannimo dan lars, de zannimo dan sak me set zannimo pir parmi bann ki ti kapab ganny servi konman sakrifis.​—Zenez 7:1-3.

I ti’n bezwen inoubliyab pour Noe ek son fanmir. Zis mazinen kan zot ti vwar tou sa bann zannimo pe marse, taye, anvole, sot sote, trennen. I ti annan tou sort kalite grander, laform ek konportman. Pa mazin pov Noe pe esey bare, kriy oubyen menm fors sa bann zannimo sovaz pour antre dan lars. Sa resi i dir ki zot menm zot ti antre dan lars.​—Zenez 7:9.

Serten dimoun ki pa krwar sa ki ti arive dan letan Noe: ‘Ki mannyer en keksoz parey i kapab  arive? Ki mannyer tou sa zannimo ti kapab viv anpe dan lars? Eski i an deor pouvwar Kreater liniver pour kontrol tou bann zannimo ki i’n kree e menm fer zot obeir Noe? Mazinen ki Zeova i sa Bondye ki ti separ Lanmer Rouz an de e fer soley pa bouze. Pa i ti kapab fer tou sa ki i ganny dekrir dan listwar Noe? Byensir, i ti kapab e i ti fer!

Definitivman, Bondye ti pou kapab sov son bann zannimo dan en lot fason. Me avek lasazes, i ti swazir en fason ki montre ki i ti annan konfyans ki bann imen ti pou pran swen avek bann zannimo lo later. (Zenez 1:28) Bokou paran ozordi i servi legzanp Noe pour montre zot zanfan ki Zeova i kontan bann zannimo ek bann dimoun ki i’n kree.

Zeova ti dir Noe ki Deliz ti pou vin dan en semenn. I ti bezwen en moman entans pour fanmir Noe. Imazin sa travay pour met tou sa zannimo ek zot manze dan lars dan en fason byen organize ensi ki tou bann nesesite fanmir Noe. Madanm Noe ek madanm Sem, Kam ek Zafet ti bezwen byen okipe pour fer en landrwa ase konfortab pour zot dan lars.

Me ki lezot dimoun ti fer? Zot “pa ti pran kont nanryen” menm si zot ti vwar dan zot de lizye ki Bondye ti pe beni Noe ek son dir travay. Zot pa ti kapab pa vwar tou sa bann zannimo pe antre ansanm dan lars. Me nou pa devret soke ki sa bann dimoun pa ti oule ekoute. Ozordi, dimoun pa pran kont tou sa bann levidans ki montre ki nou pe viv dan bann dernyen zour sa move lemonn. Parey zapot Pyer ti predir, i ti pou annan bann moker ki ti pou vin sikann bann ki pran kont lavertisman Bondye. (2 Pyer 3:3-6) Pareyman, dimoun ti’n bezwen sikann Noe ek son fanmir.

Kan ki zot ti aret monk li? Sa resi i dir nou ki Noe ti anmenn son fanmir ek bann zannimo dan lars e “Zeova ti ferm laport par deryer li.” Si okenn moker ti’n vwar sa, san dout zot ti pou’n reste labous ouver. Si sa pa ti le ka, sirman kan lapli ti konmans tonbe zot ti’n bezwen reste trankil! Lapli ti konmans tonbe, tonbe, e kontinyelman tonbe e i ti kouver later antye parey Zeova ti’n dir.​—Zenez 7:16-21.

Eski Zeova ti pran plezir dan lanmor sa bann move dimoun? Non! (Ezekyel 33:11) O kontrer, i ti donn zot ase letan pour sanze e pour fer sa ki byen. Eski zot ti kapab sanze? Lavi antye Noe i reponn sa kestyon. Par mars avek Zeova, obeir Bondye dan tou keksoz, Noe ti montre ki zot ti kapab sov zot lavi si zot ti oule. Dan sa sans, son lafwa ti kondann lemonn dan son letan e Noe ti montre klerman par son lavi ki tou sa bann dimoun ti vreman move. Son lafwa ti gard li ek son fanmir sen e sof. Alor, si ou imit lafwa Noe, ou osi ou pou kapab fer en kantite dibyen ou lekor ek bann ki ekout ou. Parey Noe, ou kapab mars avek Bondye konman ou zanmi e sa lanmitye i kapab dire pour leternite!

[Not anba lo paz]

[Portre lo paz 10]

[Portre lo paz 11]

Noe ek son madanm ti bezwen protez zot zanfan kont bann move lenfliyans

[Portre lo paz 12, 13]

Menm si i ti annan levidans ki Bondye ti pe beni Noe, dimoun ti monk li e inyor son mesaz