LAKLE POUR EN FANMIR ERE

Konman pour tret bann ki pa dan ou fanmir

MARGARET, * EN BELMER LOSTRALI: “Sa madanm ki ti avek mon msye avan ti dir bann manrmay ki zot pa devret ekout nanryen sa ki mon dir, menm bann pti keksoz parey, ‘Pa bliye bros ou ledan.’” Margaret i santi ki son maryaz pe ganny afekte akoz sa taktik ki kre divizyon.

I vreman annan defi dan bann fanmir kot i annan boper ouswa belmer. * Laplipar boper ouswa belmer i bezwen koz avek manman ouswa papa sa zanfan, sirtou konsernan vizit, disiplin ek sipor finansyel. Zanmi ek fanmir pros osi i bezwen adapte avek bann nouvo manm fanmir. Annou vwar ki mannyer konsey Labib i kapab ed bann fanmir ki dan sa sityasyon.

RELASYON 1: LOT PARAN SA ZANFAN

En belmer Namibi ki apel Judith i dir: “En fwa, manman mon bann zanfan adoptif ti dir zot ki mwan mon zis en nouvo madanm pour zot papa e ki si nou annan zanfan ansanm, i pa pou zot frer ouswa ser. Son parol ti bles mwan en kantite akoz mon ti kontan sa bann zanfan konmsi zot ti pour mwan menm.”

Bann eksper i dakor ki relasyon avek lot paran en zanfan i kapab difisil, e i kapab diviz en  fanmir kot i annan boper ouswa belmer. Souvan, sa manman ek sa belmer ki vwar li pli difisil pour adapte. Kwa ki kapab ede?

En lakle pour reisi: Etablir bann limit rezonnab. Si ou esey evit net sa lot paran, sa zanfan i kapab soufer emosyonnelman. * Paran sa zanfan, setadir sa bann ‘ki’n fer li’ i annan en plas spesyal dan son lavi. (Proverb 23:22, 25) De lot kote, si ou les sa lot paran annan tro bokou kontrol kot ou lakour, ou pou fer ou nouvo konzwen fristre e menm ankoler. Fer zefor pour annan en bon lekilib, etablir bann limit rezonnab pour kapab protez ou maryaz e an menm tan fer zefor pour korpere avek sa lot paran.

SIZESYON POUR PARAN

▪ Kan ou koz avek ou msye ouswa madanm avan, konsantre lo byennet ou zanfan e pa tro koz lo lezot size. Par egzanp, avek bon zizman ou kapab demande si i posib pour progranm en letan spesifik pandan lazournen pour koz avek sa zanfan lo telefonn. Sa i souvan mars pli byen plito ki telefonn nenport ki ler ouswa tar aswar.

▪ Si zanfan pa pe reste avek ou, petet ou kapab telefonn zot, ekrir let, teks zot ouswa imel zot pour ki ou gard en bon kontak avek zot. (Deterononm 6:6, 7) Serten i menm koz avek zot atraver en sistenm video. Ou pou kapab pli byen konpran ou zanfan e annan en pli bon lenfliyans lo zot ki ou ti a krwar.

SIZESYON POUR BELMER

▪ Demontre lafeksyon anver manman sa zanfan par reasir li ki ou pa pe esey pran son plas. (1 Pyer 3:8) Tanzantan dir li ki mannyer sa zanfan i ete, koz plis lo sa ki pozitif. (Proverb 16:24) Demann li konsey e remersye li kan i fer sa.

▪ Pa tro demontre lafeksyon anver sa zanfan ler son manman i la. Beverly, en belmer Leta-z-ini i dir: “Bann pli pti zanfan ti anvi kriy mwan Manmi. Nou ti dakor ansanm ki zot kriy mwan koumsa kot lakour, me ler zot avek zot manman Jane ouswa son fanmir, pa servi sa mo. Depi sa, mwan ek Jane, nou’n annan en pli bon relasyon. Anfet, plitar nou ti travay ansanm pour ed zanfan pour zot pyes teat kot lekol e pour bann vizit ki zot al fer avek lekol.”

SIZESYON POUR PARAN EK BOPER OUSWA BELMER

▪ Pa zanmen koz an mal lo sa lot paran oubyen boper ouswa belmer devan zanfan. I fasil pour koz an mal lo li, me i kapab afekte sa zanfan. Ou pa zanmen konnen ki mannyer e kan ki ou parol i kapab ganny repete. (Eklezyast 10:20) Si en zanfan i dir ki son lot paran oubyen son belmer ouswa boper in koz an mal lo ou, konsantre lo santiman sa zanfan. Petet ou kapab dir li en keksoz parey: “Pov ou, i domaz ki ou’n tann sa. Ou  Manmi i ankoler avek mwan, e parfwa ler dimoun i ankoler, zot dir keksoz ki pa zantiy.”

▪ Eseye pour ki tou le de lakour i servi menm lareg ek disiplin. Si sa pa posib, eksplik sa zanfan ladiferans san kraz sa lot paran. Egzamin sa senaryo:

Belmer: Tim, met ou servyet mouye anpandan silvouple.

Tim: Kot Manmi nou kit ater, apre li ki met anpandan.

Belmer (ankoler): Be, li i pe fer ou vin pares.

Eski sa ti pou en pli bon larepons?

Belmer (zantiman): Anr, oke. Me isi, nou menm ki met anpandan.

▪ Evite progranm bann aktivite pour zanfan zour ki ou konnen zot sipoze pe al pas letan avek zot lot paran. (Matye 7:12) Si ou pa kapab fer sanzman pour sa aktivite, demann permisyon sa lot paran avan ki ou dir zanfan sa ki ou’n plàn.

ESEY SA: Swiv sa bann letap laprosenn fwa ki ou zwenn ansyen msye ouswa madanm ou konzwen:

1. Get li e fer en sourir. Evite pran bann gran respirasyon, fer tyouk ouswa devir ou lizye.

2. Kriy li par son non. Par egzanp dir, “Bonzour Jane.”

3. Si ou dan en group dimoun, enkli li dan konversasyon.

RELASYON 2: ZANFAN KI ADILT

Liv Step Wars i koz lo en madanm ki pe konplent konsernan lafason ki son msye i pran kote son bann gran zanfan e i pa oule rekonnet ki zot pa tret li byen. I dir, “Deswit mon pran lakoler.” Ki mannyer ou kapab evite ki ou relasyon avek bann pli gran zanfan pa afekte ou maryaz?

En lakle pour reisi: Demontre ki ou konpran zot. Labib i dir: “Personn pa devret rod son prop lentere, me lentere son prosen.” (1 Korentyen 10:24) Esey konpran santiman sa lot dimoun. Bann zanfan ki adilt i per pangar zot perdi lafeksyon zot paran. Ouswa zot santi ki si zot aksepte en boper ouswa belmer, zot pa pou fidel avek zot fanmir. De lot kote, paran i kapab santi ki si zot kritik zot zanfan, sa zanfan pou elwannyen avek zot.

Olye fors sa zanfan pour vin ou zanmi, les sa relasyon vin par li menm. An zeneral, i pa byen pour esey fors oubyen met presyon lo zot pour kontan ou. (Kantik Salomon 8:4) Alor, pa ekspekte tro bokou an rapor avek relasyon ki sa zanfan pou annan avek ou.

Pa bezwen dir tou sa ki ou santi ouswa mazinen, menm si ou pa ganny byen trete. (Proverb 29:11) Letan ou vwar li difisil pour kontrol sa ki ou dir, priye parey Lerwa David Izrael: “O Zeova, met en gardyen devan mon labous; fer vey laport mon labous.”​—Psonm 141:3.

Si ou deside viv dan lakaz kot zanfan in grandi, ou pou sirman vwar ki zot ankor atase avek sa landrwa. Pa tro fer bann gran sanzman, sirtou dan zot lasanm. Ou menm kapab deside pour sanz landrwa reste.

ESEY SA: Si sa bann gran zanfan i kontinyen mal azir ouswa pa respekte ou, eksprim ou santiman  avek ou konzwen e ekout byen son pwennvi. Pa bezwen met presyon lo li pour koriz son zanfan. Plito, zis esey konpran kanmarad. Enn fwa ki zot tonm “dakor avek kanmarad” konsernan en sityasyon, zot kapab travay ansanm pour amelyor sa sityasyon.​—2 Korentyen 13:11.

RELASYON 3: LEZOT FANMIR PROS EK ZANMI

Marion, en belmer Kanada i dir: “Mon paran i souvan donn kado zis mon pti garson, me pa zanfan mon msye. Parfwa nou ti aste kado pour zot nou menm, me parler nou ti napa ase larzan pour aste.”

En lakle pour reisi: Met ou nouvo fanmir premye. Dir ou fanmir pros ek zanmi konsernan ou langazman avek ou nouvo fanmir. (1 Timote 5:8) Menm si ou pa ekspekte ki tou ou fanmir pros ek zanmi i kontan ou nouvo fanmir, ou kapab demann zot pour zantiy e pa fer lapliferans. Eksplik zot ki lefe i pou annan lo bann zanfan si zot pa ganny latansyon ouswa lezot pa demontre labonte anver zot.

Fer zefor pour ki paran ou msye ouswa madanm avan i annan en plas dan lavi zot pti zanfan. En manman Langleter ki apel Susan i rakonte: “Dizwit mwan apre ki mon premye msye ti mor, mon ti remarye, me son paran ti vwar li difisil pour aksepte mon nouvo msye. Keksoz ti amelyore kan mon ti enplik zot plis dan lavi bann zanfan, mon ti fer bann zanfan telefonn zot e remersye zot pour zot sipor.”

ESEY SA: Gete avek lekel dan sa fanmir ouswa zanmi ki ou vwar pli difisil pour adapte avek e apre koz avek ou konzwen lo konman ou pou kapab amelyor sa relasyon.

Relasyon avek dimoun ki pa reste avek ou i kapab en defi pour bann fanmir kot i annan belmer ouswa boper. Me si ou aplik konsey Labib, ou pou vwar ki ou fanmir pou ganny bann benediksyon ki Labib i promet: “Par lasazes en fanmir i ganny batir e par disernman i pou ganny etablir solidman.”​—Proverb 24:3. ▪

[Not anba lo paz]

DEMANN OU LEKOR . . .

▪ Konman mon pou amelyor relasyon avek ansyen msye ouswa madanm mon konzwen?

▪ Konman pour anpes nou fanmir pros ek zanmi afekte nou nouvo fanmir?

[Portre lo paz 10]

[Portre lo paz 11]

Ou kapab annan plis lenfliyans lo ou zanfan ki ou ti a krwar

[Portre lo paz 12]

Lapolites ek respe i gard lape

[Portre lo paz 13]

Esey demontre lanmour anver tou zanfan dan fanmir