LO KOUVERTIR: EN LEMONN SAN PREZIDIS​—KAN?

Prezidis​—En problenm global

JONATHAN, en Ameriken ki son paran i Koreen ti en viktim prezidis rasyal kan i ti en zanfan. Anmezir ki i ti pe grandi, i ti rod en landrwa kot personn pa ti pou ziz li dapre son laparans oubyen ras. I ti vin en dokter dan nor Alaska, Leta-z-ini, kot son laparans ti parey laplipar son pasyan. I ti pe swete ki laba dan sa pei fre pros avek Arctic Circle, i pa ti pou bezwen fer fas avek prezidis.

Me, i ti dezapwente kan i ti donn lasistans medikal en madanm ki ti annan 25 an. Kan sa pasyan ti sorti dan koma e vwar figir Jonathan, i ti zoure pour demontre son mekontantman pour bann Koreen. Pour Jonathan, sa lensidan ti en leksperyans terib ki ti fer li rapel ki malgre tou son zefor pour sanz landrwa e melanz avek lezot, sa pa ti ase pour li sap prezidis.

Leksperyans Jonathan i en laprev ki prezidis i egziste dan lemonn antye. I paret ki partou kot i annan dimoun, i annan prezidis.

Anfet, menm si prezidis i komen, bokou dimoun i dir zot pa kontan prezidis. Sa i vreman  en kontrovers. Ki mannyer en keksoz ki dimoun pa kontan i sitan komen dan lemonn? I evidan ki menm si bokou pa kontan prezidis, zot pa arive rekonnet ki i dan zot. Eski ou koumsa ou? Ki mannyer ou ti pou reponn sa kestyon?

EN SIZE PERSONNEL

Ki swa nou realize oubyen non, i difisil pour aksepte ki nou annan serten prezidis dan nou leker. Labib i eksplike akoz: “Leker i pli kapab anbete ki okenn lezot keksoz.” (Zeremi 17:9, Holman Christian Standard Bible) Alor, nou kapab ganny anbete pour krwar ki nou aksepte tou kalite dimoun. Oubyen, nou kapab mazinen ki nou annan bon rezon pour annan en move pwennvi lo en serten group dimoun.

Pour montre akoz i difisil pour aksepte ki nou annan prezidis dan nou, reflesir lo sa senaryo: Meton, ou pe marse aswar lo semen ou tousel. De zenn onm ki ou pa konnen i apros ou. Zot paret kosto e i paret ki enn ant zot i annan en keksoz dan son lanmen.

Eski ou ti pou tonm lo sa konklizyon ki zot en menas pour ou? I vre, i kapab ki sa ki ou’n deza pas ladan i tant pour fer ou mefye lezot, me eski sa i en rezon pour ou tonm lo sa konklizyon ki zot en danze pour ou? En kestyon pli enportan i: Ki ras oubyen group etnik sa de zonm? Ou larepons pour sa kestyon i kapab dir bokou lo ou. I kapab endike ki a en serten degre ou annan en serten kalite prezidis dan ou leker.

Si nou onnet avek nou lekor, nou pou bezwen admet ki dan en fason ou en lot, nou tou nou annan en serten kalite prezidis dan fon nou leker. Menm Labib i admet en form prezidis ki komen kan i dir: “Imen i ziz lezot par zot laparans.” (1 Samyel 16:7, Contemporary English Version) Vi ki nou tou nou annan sa tandans, menm si souvandfwa i anmenn move konsekans, eski nou kapab sirmont oubyen elimin prezidis dan nou lavi? Eski en zour prezidis pou ganny eliminen lo later?

[Bwat lo paz 3]

PREZIDIS I PARTOU KOTE

Kanada: “Malgre i annan diferan ras dan [sa pei] e i annan en kantite lalwa ek polisi legal pour protez drwa bann diferan kominote, prezidis rasyal i touzour en gro problenm.”​—En rapor Amnesty International lo Kanada, 2012.

Lerop: “[Karant wit] poursan bann Eropeen i krwar ki napa ase keksoz ki pe ganny fer pour elimin diskriminasyon dan zot pei.”​—Intolerance, Prejudice and Discrimination: A European Report, 2011.

Lafrik: “Dan bokou pei i annan vyolans ek diskriminasyon anver bann madanm.”​—Amnesty International Report 2012.

Nepal: “Dalits (“dernyen klas dimoun”) i soufer avek diskriminasyon ekonomik, sosyal e kiltirel.”​—Human Rights Watch World Report, 2012.

Les Lerop: “Ganny blanmen aletranze e viktimize dan zot pei, Roma dan les Lerop i en problenm ki bann politisyen pa anvi rezourd.”​—The Economist, 4 Septanm 2010.

[Bwat lo paz 4]

KI SI SA PREZIDIS?

Bann serser i ganny difikilte pour donn en definisyon pour sa mo prezidis. Serten i dir ki i “en latitid oubyen santiman negatif anver en dimoun akoz son group etnik.” Lezot i dir ki prezidis i ler nou “ziz lezot san annan ase lenformasyon” lo zot. Nou kapab annan prezidis anver ras, groser, langaz ouswa larelizyon en dimoun, si i en msye ouswa madanm, oubyen lezot ankor.

[Portre lo paz 3]

[Portre lo paz 4]

Ki mannyer ou ti pou reazir dan en tel sityasyon?