APROS AVEK BONDYE

Zeova “pa fer preferans”

Eski ou’n deza en viktim diskriminasyon? Eski in deza ariv ou ki ou ti ganny refize en servis, oubyen ou’n ganny meprize akoz ou kouler lapo, kiltir oubyen ran sosyal? Si wi, ou pa tousel. La en bon nouvel pour ou: Sa bann diskriminasyon ki souvan nou vwar isi lo later, pa egziste dan lesyel. Zapot Pyer ti dir avek konviksyon: “Bondye pa fer preferans.”​—Lir Akt 10:34, 35.

Ler Pyer ti dir sa parol i ti dan lakaz Korney, en zonm ki pa ti Zwif. Pyer ti en Zwif e i ti pe viv dan en letan kot bann Zwif ti konsider bann dimoun lezot nasyon konman bann enpir ki pa ti devret ganny frekante. Me, akoz Pyer ti dan lakaz Korney? Senpleman, se Zeova ki ti’n fer laranzman pour zot zwenn. Pyer ti’n ganny en vizyon kot i ti ganny dir: “Pa bezwen apel enpir, sa ki Bondye in deklare in pirifye.” San ki Pyer ti konnen, en zour avan sa, Korney osi ti’n ganny en vizyon, kot en lanz ti ordonn li pour al rod Pyer. (Akt 10:1-15) Kan Pyer ti realize ki Zeova ki ti par deryer tousala, i pa ti kapab reste labous fermen.

Pyer ti dir: “Aprezan, mon vreman konpran ki Bondye pa fer preferans pour personn.” (Akt 10:34) Sa mo Grek ki’n ganny tradwir “preferans,” i literalman vedir “get figir.” (The Kingdom Interlinear Translation of the Greek Scriptures) An rapor avek sa mo, en spesyalis Labib i eksplike: “I pe refer avek en ziz ki get figir en dimoun e ziz li dapre son prop santiman, andotmo, si i kontan sa dimoun oubyen non, me pa dapre levidans.” Bondye pa kontan en figir plis ki en lot akoz zot ras, nasyonalite, ran sosyal oubyen lezot fakter.

O kontrer, Zeova i vwar sa ki dan nou leker. (1 Samyel 16:7; Proverb 21:2) Apre Pyer ti dir: “Dan nenport ki nasyon tou dimoun ki annan respe pour li e ki fer sa ki byen Bondye i kontan li.” (Akt 10:35) Respe pour Bondye i enplik onor li, met konfyans dan li e evit okenn keksoz ki pou depler li. Pour fer sa ki byen i enplik volonterman fer sa ki fer plezir Bondye. Zeova i pran plezir dan sa zonm ki son leker i ranpli avek ladmirasyon ki pous li pour fer sa ki byen.​—Deterononm 10:12, 13.

Si ou’n deza eksperyans diskriminasyon oubyen prezidis, i annan bon rezon pour ou pran aker parol Pyer konsernan Bondye. Zeova pe atir dimoun sorti dan tou nasyon ver vre ladorasyon. (Zan 6:44; Akt 17:26, 27) I ekoute e reponn lapriyer son bann adorater menm si zot annan diferan ras, nasyonalite, oubyen ran sosyal. (1 Lerwa 8:41-43) Nou kapab annan konfyans ki kan Zeova i get lo later i vwar zis en sel ras e sa i ras imen. Eski sa i pous ou pour anvi aprann plis lo sa Bondye ki pa fer lapliferans?

Mon lektir Labib

Zan 17–Akt 10

[Ekstre lo paz 14]

Kan Zeova i get lo later i vwar zis en sel ras e sa i ras imen