LAKLE POUR EN FANMIR ERE

Reisi dan en dezyenm maryaz

HERMAN: * “Mon premye madanm ti mor avek kanser apre ki nou ti’n marye pour 34 an. Ler mon ti remarye, mon madanm Linda ti santi ki mon ti pe toultan konpar li avek mon premye madanm. Pour fer sityasyon vin pli pir, mon bann zanmi ti souvan koz lo bann kalite ki mon madanm avan ti annan e sa ti fer Linda ankoler.”

LINDA: “Apre ki nou ti marye nou de Herman, mon ti santi konmsi mon ti pe viv dan lonbraz son premye madanm. Zot ti telman kontan li, i ti dous e byen poli. Parfwa mon demann mon lekor si en zour mon ti pou vin pros avek mon msye parey li.”

Herman ek Linda i kontan ki zot in zwenn kanmarad. Linda, ki ti’n divorse avek son premye msye, ti menm dir ki Herman i zantiy e brav akoz i’n sekour li dan bann sityasyon difisil. Me parey zot in admet, i annan en kantite defi ki pa ti zanmen egziste dan sa premye maryaz me ki kapab leve ler de dimoun i remarye. *

Si ou’n remarye, ki mannyer ou santi konsernan ou dezyenm maryaz? En madanm ki apel Tamara ki’n remarye trwa-z-an apre ki i ti’n divorse i dir: “Ler ou marye pour premye fwa, ou annan sa santiman spesyal ki ou maryaz pou dir pour touzour. Me ler ou marye en dezyenm fwa, ou kapab napa sa menm santiman akoz ou toultan konsyan ki ou premye maryaz ti kase.”

Par kont, en kantite koup in trouv lazwa dirab apre ki zot in remarye. Zot in fer zot maryaz en sikse, ou osi ou kapab. Ki mannyer? Annou  egzamin trwa defi e vwar ki mannyer prensip Labib i kapab ed ou fer fas avek zot. *

DEFI 1: OU FER ZEFOR POUR ANPES OU PREMYE MARYAZ AFEKTE OU MARYAZ AKTYEL.

Ellen ki reste Sidafrik i dir: “Mon pa kapab zis senpleman efas souvenir mon premye maryaz, sirtou ler nou pe al sa menm landrwa kot nou ti al vakans nou de mon premye msye. Par ler mon ariv ziska konpar mon msye aktyel avek mon msye avan.” De lot kote, si ou konzwen ti’n deza marye, ou kapab pa kontan ler i koz konsernan son premye maryaz.

SIZESYON: Aksepte larealite ki i pa posib ki ou oubyen ou konzwen pa mazin ditou konsernan zot premye maryaz, sirtou si i’n dir pour en bon pe lannen. Anfet, i annan serten dimoun ki admet ki par ler zot tronpe e apel zot konzwen non zot konzwen avan. Ki mannyer ou kapab fer fas avek sa sityasyon oubyen lezot sityasyon? Labib i donn sa konsey, “Esey konpran kanmarad.”​—1 Pyer 3:8, New Century Version.

Pa anpes ou konzwen koz lo son premye maryaz zis akoz zalouzi. Si ou konzwen i santi sa bezwen pour koz lo son premye konzwen, ekout li akoz sa pou montre ki ou konpran li e ki ou annan konpasyon. Osi, pa taye pour krwar ki i pe konpar ou. Ian ki ti’n remarye di-z-an pase i dir: “Mon madanm Kaitlyn pa’n zanmen dir ki nou pa devret koz lo mon madanm avan. O kontrer, i ti vwar sa konman en loportinite pour aprann ki mannyer mon’n vin sa kalite dimoun ki mon ete ozordi.” Petet ou kapab vwar ki sa kalite konversasyon pou ed ou batir en pli bon lanmitye avek ou nouvo konzwen.

Konsantre lo bann kalite inik e pozitif ki ou nouvo konzwen i annan. I vre, petet ou konzwen i mank serten kalite oubyen abilite ki ou konzwen avan ti annan. Me ou konzwen aktyel i kapab fer pli byen dan serten domenn. Alor, ranforsi ou maryaz, pa “bezwen konpar li avek” sa lot dimoun me reflesir e apresye sa ki ou kontan avek ou konzwen. (Galat 6:4) En zonm ki apel Edmond, ki’n marye de fwa, i dir, “Zis parey i napa de lanmitye ki parey, napa de maryaz ki parey.”

Ki mannyer ou kapab annan en pwennvi ekilibre lo bon souvenir ou premye maryaz ek ou lavi avek sa nouvo konzwen? Jared i dir: “En fwa mon ti eksplik mon madanm ki mon premye maryaz ti parey en zoli liv ki ti’n ganny ekri par mwan ek mon premye madanm. Tanzantan, mon kapab ouver e lir sa liv e mazin lo bann bon leksperyans ansanm. Me mon pa pe viv dapre sa liv. Plito, aprezan mwan ek mon nouvo madanm nou pe ekrir nou prop liv e se dapre sa liv ki mon pe viv en lavi ere.”

ESEY SA: Demann ou konzwen si ler ou koz lo ou premye maryaz sa i anbaras li. Idantifye bann moman kot i pa pou apropriye pour koz lo sa size.

DEFI 2: I DIFISIL POUR OU KOZ AVEK BANN ZANMI KI PA TRO KONN OU NOUVO KONZWEN.

Javier ki ti remarye si-z-an apre ki i ti’n divorse, i rakonte: “En pe letan apre ki mon ti’n marye, mon madanm ti santi ki serten mon bann zanmi ti pe esey rode ki kalite dimoun i ete par teste li.” En msye ki apel Leo ti fer fas avek en sityasyon diferan. I rakonte: “Serten dimoun ti dir avek mon madanm ki degre zot ti kontan e mank son premye msye dan mon figir.”

SIZESYON: Esey met ou dan soulye ou bann zanmi. Ian ki nou’n koz lo li pli boner, i dir: “Mon krwar ki bann zanmi ki ou konnen depi lontan i santi zot tris e vwar li difisil pour asosye avek zis enn dan sa koup ki zot ti’n abitye avek.” Alor, annan en latitid rezonnab e demontre ladouser anver tou dimoun. (Tit 3:2) Donn ou zanmi ek fanmir letan pour adapte avek sa nouvo sityasyon. Vi ki ou’n aprezan marye avek en lot dimoun, ou lanmitye avek ou bann zanmi pa pou parey. Javier ki nou ti mansyonnen pli boner i dir ki avek letan son madanm ek li ti amelyor zot  lanmitye avek zot zanmi. I ti azoute: “Nou ti esey fer nouvo zanmi e sa osi ti ed nou.”

Pran an konsiderasyon santiman ou konzwen ler ou pe pas letan avek bann zanmi ki ou ti annan avan. Par egzanp, si dan pe koze ou premye maryaz i vin dan konversasyon, servi bon zizman e pa oubliye pour enplik ou nouvo konzwen dan konversasyon. En proverb Labib i dir: “Si en dimoun i koz bann parol san reflesir, son bann parol i blese parey en lepe. Me en dimoun saz i fer atansyon avan i koze. Son parol i kapab geri sa bann blesir.”​—Proverb 12:18, Holy Bible​—Easy-to-Read Version.

ESEY SA: Mazin davans bann levennman ki kapab anbarasan pour ou oubyen ou konzwen. Diskit davans lo sa pli bon fason pour reponn kestyon oubyen komanter ou bann zanmi konsernan ou premye maryaz.

DEFI 3: I DIFISIL POUR OU ANNAN KONFYANS DAN OU NOUVO KONZWEN AKOZ OU PREMYE KONZWEN PA TI FIDEL.

Andrew, ki son premye madanm ti kit li, i dir: “Mon ti touzour per ki mon ti pou ganny trai ankor.” Apre ki i ti’n marye avek son dezyenm madanm ki apel Riley, sa lafreyer ti kontinyen. I dir: “Tanzantan mon ti demann mon lekor si mon ti pou kapab vin sitan bon parey premye msye Riley. Mon ti menm enkyet ki i ti pou deside kit mwan pour en lot si sa pa ti le ka.”

SIZESYON: Pa per pour eksprim ou santiman avek ou konzwen. Labib i dir: “Bann plan pa pou reisi kan napa konversasyon konfidansyel.” (Proverb 15:22) Konversasyon konfidansyel ti finalman ed Andrew ek Riley annan konfyans dan kanmarad. Andrew i dir: “Mon ti dir Riley ki mon pa pou zanmen servi divors konman en fason pour rezourd bann problenm e Riley ti dir mwan menm keksoz. Ptitapti mon ti kapab annan konfyans total dan li.”

Si ou nouvo konzwen in deza ganny trai, pran bann pa neseser pour ki i annan konfyans dan ou. Par egzanp, Michel ek Sabine ki zot premye maryaz ti fini par divors, ti tonm dakor pour fer konnen kanmarad si zot in ganny kontak avek zot premye konzwen. Sabine i dir: “Sa langazman ti fer nou santi sen e sof.”​—Efezyen 4:25.

ESEY SA: Met bann limit lo bann konversasyon ki ou annan avek bann dimoun lot sèks, swa an personn, lo telefonn, oubyen lo Internet.

Bokou dimoun in reisi dan zot dezyenm maryaz, ou osi ou kapab. Apre tou, ou aprezan konn ou lekor pli byen ki dan ou premye maryaz. Andrew ki nou’n koz lo li pli boner i dir: “Mon’n ganny bokou rekonfor atraver mon maryaz avek Riley. Apre 13 an maryaz, nou annan en relasyon tre pros, enn ki nou pa anvi perdi.”

[Not anba lo paz]

DEMANN OU LEKOR . . .

▪ Ki bann kalite inik ki mon konzwen i annan ki mon vreman apresye?

▪ Si topik konversasyon i lo mon premye maryaz, ki mannyer mon kapab reasir e respe dinyite mon konzwen aktyel?

[Portre lo paz 10]

[Portre lo paz 12]

Fer bann nouvo keksoz ki inifye zot konman en koup